.jpg)
ប្រជាពលរដ្ឋនាំគ្នាទៅទទួលការចាក់វ៉ាក់សាំង នៅអនុវិទ្យាល័យតាំងក្រសាំង ស្ថិតក្នុងសង្កាត់កាកាប ខណ្ឌពោធិ៍សែនជ័យ។ ហេង ជីវ័ន
ភ្នំពេញ៖ ទោះបីជារាជរដ្ឋាភិបាលបានសម្រេចបន្តនូវការបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅ នៃខេត្តកណ្តាលចំនួន ៧ ថ្ងៃទៀតបន្ថែមក៏ដោយ ក៏លោកនាយករដ្ឋមន្រ្តី ហ៊ុន សែន នៅតែបន្តឱ្យមានការចាក់វ៉ាក់សាំងដល់ប្រជាពលរដ្ឋឱ្យបានលឿន និងឆាប់រហ័សក្នុងរយៈពេលដ៏ខ្លី។
ក្នុងសេចក្តីសម្រេចស្តីពីការបន្តការបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅ នៃខេត្តកណ្តាល ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ កាលពីថ្ងៃទី ២៦ ខែមេសា លោក ហ៊ុន សែន បានស្នើឱ្យគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស ត្រូវរៀបចំកែសម្រួលវិធីសាស្ត្រ និងផែនការចាក់វ៉ាក់សាំងការពារជំងឺកូវីដ ១៩ ឱ្យក្លាយទៅជា «យុទ្ធនាការជាតិចាក់វ៉ាក់សាំង»។
លោក ហ៊ុន សែន បានបញ្ជាក់ក្នុងសេចក្តីសម្រេចថា៖ «ត្រូវប្រើប្រាស់កម្លាំងសរុប និងមធ្យោបាយសរុបរបស់ជាតិ ដើម្បីជំរុញការចាក់វ៉ាក់សាំងនេះឱ្យបានលឿន និងឆាប់រហ័សក្នុងរយៈពេលដ៏ខ្លី សម្រាប់ប្រជាពលរដ្ឋដែលមានអាយុចាប់ពី ១៨ ឆ្នាំឡើងទៅឱ្យបានគ្រប់រូបនៅក្នុងភូមិសាស្ត្ររាជធានីភ្នំពេញ និងទីប្រជុំជនធំៗនៃខេត្តកណ្តាល ដែលមានមនុស្សច្រើនកុះករធ្វើការ និងរស់នៅ»។
លោកថា យុទ្ធនាការជាតិចាក់វ៉ាក់សាំងនេះ ដើម្បីបង្កើតឱ្យមានភាពស៊ាំសហគមន៍ (Herd Immunity) ក្នុងការធានាប្រសិទ្ធភាពក្នុងការគ្រប់គ្រងការឆ្លងរាលដាលនៃជំងឺកូវីដ ១៩ និងជាពិសេស ការបញ្ចៀសឱ្យបាននូវការបិទខ្ទប់ជាថ្មីសម្រាប់ភូមិសាស្ត្រនេះ។
ការអនុវត្តនូវយុទ្ធនាការជាតិចាក់វ៉ាក់សាំងនេះ ត្រូវធានាឱ្យបាននូវរបៀបរៀបរយ និងសណ្តាប់ធ្នាប់ ដើម្បីបង្ការការឆ្លងរាលដាលនៃជំងឺកូវីដ ១៩ ក្នុងអំឡុងពេលនៃកិច្ចដំណើរការនេះ ពិសេសតាមរយៈគោលការណ៍នាំយកសេវាទៅកៀកបំផុតជូនប្រជាពលរដ្ឋ។
ជាមួយគ្នានេះដែរ វ៉ាក់សាំងស៊ីណូហ្វាមចំនួន ៤០ ម៉ឺនដូស ដែលជាជំនួយរបស់សាធារណរដ្ឋប្រជាមានិតចិនមកដល់រាជរដ្ឋាភិបាលកម្ពុជានឹងដឹកមកដល់នៅថ្ងៃទី ២៨ ខែ មេសា ឆ្នាំ ២០២១ នេះ។ នេះបើតាមការឱ្យដឹងពីលោកស្រី យក់ សម្បត្តិ រដ្ឋលេខាធិការក្រសួងសុខាភិបាល។
លោកស្រី យក់ សម្បត្តិ បានលើកឡើងដូចនេះតាមរយៈសារព័ត៌មានហ្វ្រេសញូវថា សាធារណរដ្ឋប្រជាមានិតចិនបានផ្តល់នូវជំនួយជាវ៉ាក់សាំងការពារវីរុសកូវីដ ១៩ ស៊ីណូហ្វាមនេះចំនួន ៣ លើកហើយ បើគិតរួមនឹងវ៉ាក់សាំងដែលនឹងមកដល់នៅថ្ងៃស្អែកនេះ។
លោកស្រី យក់ សម្បត្តិ ថា៖ «ការផ្តល់នេះ គឺដើម្បីចូលរួមប្រយុទ្ធប្រឆាំងជំងឺកូវីដ ១៩ និងធានាការពារសុខុមាលភាពប្រជាពលរដ្ឋកម្ពុជាពីការរាតត្បាតជំងឺកូវីដ ១៩»។
គួរបញ្ជាក់ផងដែរថា សាធារណរដ្ឋប្រជាមានិតចិន បានផ្តល់ជំនួយនូវវ៉ាក់សាំងការពារវីរុសកូវីដ ១៩ ស៊ីណូហ្វាមនេះ ចំនួន ២ លើករួចមកហើយ ដោយលើកទី១ នៅថ្ងៃទី ០៧ ខែកុម្ភៈ ចំនួន ៦០ ម៉ឺនដូស និងលើកទី២ នៅថ្ងៃទី ៣១ ខែមីនា ដែលមានចំនួន ៧០ ម៉ឺនដូស។
គិតមកដល់ពេលនេះ កម្ពុជាទទួលបានវ៉ាក់សាំងជាង ៣ លានដូសរួចមកហើយ រួមមានវ៉ាក់សាំងស៊ីណូហ្វាមជាជំនួយរបស់រដ្ឋាភិបាលចិន ១ លាន ៣ សែនដូស, វ៉ាក់សាំងស៊ីណូវ៉ាក់ដែលបានទិញពីរដ្ឋាភិបាលចិនចំនួន ២ លានដូស និងវ៉ាក់សាំងរបស់ក្រុមហ៊ុនអាស្ត្រាហ្សេនីកា (Astra Zeneca) ចំនួន ៣២៤ ០០០ ដូស ជាជំនួយរបស់មជ្ឈមណ្ឌលខូវ៉ាក់ (Covax Facility) តាមរយៈអង្គការសុខភាពពិភពលោក។
គិតត្រឹមថ្ងៃទី ២៦ ខែមេសា មនុស្សចំនួន ១ ២៩៥ ៩៧៣ នាក់ ត្រូវបានទទួលការចាក់វ៉ាក់សាំងការពារវីរុសកូវីដ ១៩ នៅទូទាំងប្រទេស ក្នុងនោះតាមរយៈក្រសួងសុខាភិបាលមានចំនួន ១ ០០១ ៤៣០ នាក់ និងក្រសួងការពារជាតិ បានចំនួន ២៩៤ ៥៤៣ នាក់៕
