លោកនាយករដ្ឋមន្រ្តី ហ៊ុន សែន នៅរសៀលថ្ងៃទី២ ខែធ្នូ បានចុះហត្ថលេខាលើលិខិតថ្លែងអំណរគុណមួយទៀត ជូនចំពោះក្រុមហ៊ុនអាកាសចរណ៍ ខេមបូឌា អ៊ែរវ៉េ ដែលបានផ្តល់យន្តហោះដឹកម៉ាស់ និងសម្ភារវេជ្ជសាស្ត្រទៅកាន់ប្រទេសទីម័រខាងកើត ដោយជោគជ័យ បន្ទាប់ពីក្រុមហ៊ុនមួយនេះបានផ្តល់យន្តហោះដឹកសម្ភារស្រដៀងគ្នានេះទៅកាន់ប្រទេស មីយ៉ាន់ម៉ា កាលពីសប្តាហ៍មុន។
នៅក្នុងលិខិតថ្លែងអំណរគុណផ្ញើទៅក្រុមហ៊ុនអាកាសចរណ៍ ខេមបូឌា អ៊ែរវ៉ែ នោះ លោកនាយករដ្ឋមន្ត្រី ហ៊ុន សែន បានមានប្រសាសន៍ថា៖ «រាជរដ្ឋាភិបាលកម្ពុជា សូមថ្លែងអំណរគុណ និងកោតសរសើរដោយស្មោះចំពោះក្រុមហ៊ុនអាកាសចរណ៍ ខេមបូឌា អ៊ែរវ៉េ ដែលបានជួយឧបត្ថម្ភការហោះហើរជាមនុស្សធម៌ជាលើកទី២ ដឹកជញ្ជូនម៉ាសចំនួន ១លាន៥ម៉ឺន និងបរិក្ខារពេទ្យសរុបចំនួន ១២មុខ សម្រាប់ប្រយុទ្ធប្រឆាំងនឹងជំងឺកូវីដ១៩ ដែលជាអំណោយរបស់រាជរដ្ឋាភិបាលកម្ពុជា យកទៅជូនរដ្ឋាភិបាលនៃសាធារណរដ្ឋប្រជាធិបតេយ្យទីម័រឡេស្ត នៅថ្ងៃទី០២ ខែធ្នូ ឆ្នាំ ២០២០ នេះ»។
លោកនាយករដ្ឋមន្ត្រីក៏បានជូនពរ ថ្នាក់ដឹកនាំក្រុមហ៊ុន និងសហការីទាំងអស់នៃក្រុមហ៊ុនអាកាសចរណ៍ ខេមបូឌា អ៊ែរវ៉េ ផងដែរ។
ក្រុមហ៊ុនអាកាសចរណ៍ ខេមបូឌា អ៊ែរវ៉េ បាននិយាយថា ខ្លួនពិតជាមានកិត្តិយសណាស់ដែលបានបំពេញភារកិច្ចដ៏សំខាន់បែបនេះ បន្ទាប់ពីខ្លួនបានដឹកជញ្ជូនម៉ាស់និងសម្ភារវេជ្ជសាស្ត្រដែលជាជំនួយរបស់រដ្ឋាភិបាលកម្ពុជា ទៅកាន់ប្រទេស មីយ៉ាន់ម៉ា កាលពីសប្តាហ៍មុន ដោយជោគជ័យ។
ចាប់តាំងពីបើកជើងហោះហើរដំបូង ក្រុមហ៊ុនអាកាសចរណ៍ ខេមបូឌា អ៊ែរវ៉េ តែងតែប្រកាន់ខ្ជាប់នូវស្តង់ដារខ្ពស់បំផុត ដោយផ្តល់សេវាកម្មដឹកអ្នកដំណើរប្រកបដោយសុវត្ថិភាព ប្រសិទ្ធភាព និងផាសុកភាព ហើយយន្តហោះដឹកទំនិញរបស់ខ្លួនក៏មានកម្រិតស្តង់ដារល្អប្រសើរដូចគ្នាដែរ។
ក្រុមហ៊ុនអាកាសចរណ៍មួយនេះ កំពុងបង្កើនការបណ្តុះបណ្តាលបុគ្គលិកប្រកបដោយជំនាញវិជ្ជាជីវៈនិងមានមនសិការខ្ពស់ ប្រកបដោយជំនាញវិជ្ជាជីវៈ មានស្តង់ដារខ្ពស់បំផុត និងមានគ្រឹះដ៏រឹងមាំសម្រាប់ការផ្តល់សេវាកម្មដឹកជញ្ជូនរបស់ខ្លួនប្រកបដោយជោគជ័យ។
ដោយបានបំពេញបេសកកម្មដឹកសម្ភារវេជ្ជសាស្រ្តកាលពីពេលថ្មីៗនេះ ក្រុមហ៊ុនអាកាសចរណ៍ ខេមបូឌា អ៊ែរវ៉េ ទទួលបានបទពិសោធន៍ដ៏មានតម្លៃក្នុងការប្រើប្រាស់យន្តហោះរបស់ខ្លួនឲ្យកាន់តែមានប្រសិទ្ធភាពក្នុងការដឹកជញ្ជូនទំនិញ និងអ្នកដំណើរយ៉ាងមានសុវត្ថិភាព ក្នុងការសម្រេចបាននូវប្រតិបត្តិការដ៏សំខាន់នេះ។
ខណៈពេលដែលទទួលបានការកោតសរសើរពីរាជរដ្ឋាភិបាល ចំពោះការបំពេញការងារប្រកបដោយជោគជ័យនេះ ក្រុមហ៊ុនក៏ទទួលបានការទទួលស្គាល់យ៉ាងកក់ក្តៅពីសាធារណៈជនទូទៅផងដែរ។
ក្រុមហ៊ុនអាកាសចរណ៍ ខេមបូឌា អ៊ែរវ៉េ ជាក្រុមហ៊ុនអាកាសចរណ៍ ដែលមានសមត្ថភាពខ្ពស់ កាន់តែមានទំនុកចិត្តក្នុងការបំពេញនូវតម្រូវការផ្សេងៗ ដើម្បីផ្តល់ជូនសេវាកម្មដឹកជញ្ជូនតាមតម្រូវការ និងមានលក្ខណៈចម្រុះដើម្បីបំពេញតាមតម្រូវការទីផ្សារ។
ក្រុមហ៊ុនអាកាសចរណ៍ ខេមបូឌា អ៊ែរវ៉េ បានខិតខំប្រឹងប្រែងធ្វើឱ្យកាន់តែប្រសើរឡើងនូវសេវាកម្មរបស់ខ្លួនជាបន្តបន្ទាប់ ខណៈដែលការកសាងបណ្តាញផ្លូវហោះហើរ កាន់តែមានភាពទូលំទូលាយ ជាមួយនឹងការប្តេជ្ញាចិត្តខ្ពស់ចំពោះទំនួលខុសត្រូវសង្គម។
ក្រុមហ៊ុនអាកាសចរណ៍ ខេបូឌា អ៊ែរវ៉េ នឹងបន្តផ្តល់សេវាកម្ម ដូចជាការដឹកជញ្ជូនអ្នកដំណើរ ការដឹកជញ្ជូនទំនិញ និងការផ្ទេរទំនិញតាមរយៈព្រលានយន្តហោះតភ្ជាប់ ឬដៃគូសហប្រតិបត្តិការ ក៏ដូចជាសេវាកម្មដែលពាក់ព័ន្ធដទៃទៀត ទៅដល់គោលដៅនានានៅទូទាំងពិភពលោក៕