ភ្នំពេញ៖ លោកនាយករដ្ឋមន្រ្តី ហ៊ុន សែន បានលើកជាសំណួរទាក់ទងនឹងកីឡាករបាល់ទាត់ដ៏ល្បីលំដាប់ពិភពលោកចំនួន ២ រូប ដែលនឹងត្រូវចាក់វ៉ាក់សាំងការពារវីរុសកូវីដ ១៩ របស់ប្រទេសចិន នៅប៉ុន្មានថ្ងៃខាងមុខនេះថា តើពួកគាត់អាចនឹងស្លាប់ទេ ក្រោយចាក់វ៉ាក់សាំងនេះ។
ការចោទសួរដូចនេះ ពីលោក ហ៊ុន សែន ដោយសារកន្លងមកមានក្រុមមនុស្សមួយចំនួនបានធ្វើការរិះគន់ និងនិយាយថា លោកយកវ៉ាក់សាំងចិនមកចាក់ឱ្យប្រជាពលរដ្ឋ ដើម្បីសម្លាប់មនុស្ស។
លោកនាយករដ្ឋមន្រ្តី ហ៊ុន សែន បានសរសេរលើបណ្តាញហ្វេសប៊ុករបស់លោកនៅយប់ថ្ងៃអាទិត្យ ទី ០២ ខែឧសភានេះថា តើបងប្អូន ជាពិសេសយុវជនកម្ពុជាយល់យ៉ាងណាដែរ នៅពេលកីឡាករលំដាប់ពិភពលោក Messi និង Neymar ចាក់វ៉ាក់សាំងកូវីដ ១៩ ស៊ីណូវ៉ាក់ (Sinovac) របស់ចិន? និងតើហេតុអ្វីកីឡាករទាំងពីររូបជ្រើសរើសយកវ៉ាក់សាំងចិនជំនួសឱ្យការចាក់វ៉ាក់សាំងពីប្រទេសផ្សេងទៀត?
លោក ហ៊ុន សែន បានសរសេរថា៖ «កាលពីមុនពួកបំផ្លាញជាតិមួយចំនួនបាននិយាយថា វ៉ាក់សាំងរបស់ចិន «ចាក់សម្លាប់មនុស្ស» នៅពេលដែលខ្លួនខ្ញុំផ្ទាល់ បានសម្រេចជ្រើសរើសយកវ៉ាក់សាំងរបស់ចិនស៊ីណូហ្វាម (Sinopharm) និង ស៊ីណូវ៉ាក់ (Sinovac) មកចាក់ជូនបងប្អូនប្រជាពលរដ្ឋកម្ពុជា ដើម្បីការពារអាយុជីវិតពីជំងឺដ៏កាចសាហាវកូវីដ ១៩»។
លោកនាយករដ្ឋមន្រ្តី ហ៊ុន សែន បានបន្តថា មកដល់ពេលនេះ ប្រសិនលោកមិនរឹងក្បាលស្វែងរកវ៉ាក់សាំងពីចិនដែលជាមិត្តដែកថែបរបស់កម្ពុជា និងប្រសិនគ្មានការជួយឧបត្ថម្ភពីមិត្តចិនលើការផ្គត់ផ្គង់វ៉ាក់សាំង តើកម្ពុជាមានវ៉ាក់សាំងមកពីណាចាក់ជូនប្រជាជន។
លោកបានឱ្យដឹងថា៖ «ខ្ញុំបាននិយាយមិនតិចជាង ៣ ដងថា សូមកុំបារម្ភថា វ៉ាក់សាំងមកពីប្រទេសណា តែត្រូវបារម្ភពីការអត់វ៉ាក់សាំងចាក់។ ពាក្យនេះត្រឹមត្រូវណាស់សម្រាប់ប្រទេសជាច្រើននៅលើពិភពលោក»។
លោកនាយករដ្ឋមន្រ្តីបានបញ្ជាក់ថា ករណី Messi និង Neymar ខុសពីប្រទេសនានាត្រង់ថា ពួកគាត់មានជម្រើសច្រើនគាត់ចាក់វ៉ាក់សាំងពីប្រទេសណាក៏បាន ហេតុអ្វីគាត់ជ្រើសយកវ៉ាក់សាំងរបស់ចិនសម្រាប់ចាក់ទៅវិញ?
លោក ហ៊ុន សែន សង្កត់ធ្ងន់ថា៖ «ម្នាលអ្នកនយោបាយប្រឆាំងស្ទើរភ្លើងទាំងឡាយ គួរខិតខំរៀនសូត្រឱ្យបានប្រសើរជាងនេះ»៕