.jpg)
លោក គឹម រស្មី ឧត្តមសេនីយ៍ត្រីនៃកងយោធពលខេមរភូមិន្ទមុនលុបចេញពីក្របខ័ណ្ឌ។ ហ្វេសប៊ុក
ភ្នំពេញៈ ព្រះករុណាព្រះបាទសម្ដេចព្រះបរមនាថ នរោត្តម សីហមុនី បានចេញព្រះរាជក្រឹត្យត្រាស់បង្គាប់លុបឈ្មោះឧត្តមសេនីយ៍ត្រី គឹម រស្មី អត្តលេខ ០១៧៨៩៣ នាយទាហាន ថ្នាក់ឧត្តមសេនីយ៍នៃកងយោធពលខេមរភូមិន្ទ ចេញពីក្របខ័ណ្ឌនៃកងយោធពលខេមរភូមិន្ទ កាលពីចុងសប្ដាហ៍កន្លងមកនេះ។
ក្នុងព្រះរាជក្រឹត្យឡាយព្រះហស្តលេខានៅថ្ងៃទី ៩ ខែកុម្ភៈត្រាស់បង្គាប់ថា៖ «សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាត្រូវទទួលបន្ទុកអនុវត្តព្រះរាជក្រឹត្យនេះចាប់ពីថ្ងៃឡាយព្រះហស្តលេខាតទៅ»។
ទោះជាយ៉ាងណាក៏ដោយការលុបឈ្មោះលោក គឹម រស្មី ចេញពីក្របខ័ណ្ឌនៃកងយោធពលខេមរភូមិន្ទ មិនត្រូវបានមន្ត្រីនៃរាជរដ្ឋាភិបាលអះអាងពីមូលហេតុច្បាស់លាស់នោះទេ ប៉ុន្តែករណីបែបនេះបានកើតឡើងមិនយូរប៉ុន្មានក្រោយពីមានការផ្សព្វផ្សាយតាមបណ្ដាញសង្គមហ្វេសប៊ុក ជាវីដេអូឃ្លីបក្នុងការរៀបចំខួបកំណើត ដោយលោក រស្មី បានចែកលុយឱ្យកូនៗចំនួន ៥ នាក់ដោយក្នុងម្នាក់ទទួលបាន ១០ ម៉ឺនដុល្លារសហរដ្ឋអាមេរិក។
លើសពីនេះលោក រស្មី ថែមទាំងលើកឡើងអំពីទ្រព្យសម្បត្តិដ៏ច្រើនរបស់លោកនៅមុខចំណោមអ្នកចូលរួម។ ក្រោយមកទៀតលោក រស្មី ក៏បានបង្ហាញរូបភាពផ្ទះដ៏ស្កឹមស្កៃសាងសង់ពីឈើប្រណីត ហើយដែលធ្វើឱ្យមហាជនចោទជាសំណួរនៅក្នុងហ្វេសប៊ុកដែលបានចែកចាយជាសាធារណៈ អំពីប្រភពទ្រព្យសម្បត្តិរបស់លោក គឹម រស្មី អាចកេងប្រវ័ញ្ចពីបទល្មើសព្រៃឈើដែលបន្តកើតមានយ៉ាងរ៉ាំរ៉ៃនៅក្នុងខេត្តរតនគិរី។
មិនយូរប៉ុន្មាននៅថ្ងៃដែលព្រះរាជក្រឹត្យត្រាស់បង្គាប់លុបឈ្មោះលោក រស្មី ចេញពីក្របខ័ណ្ឌនៃកងយោធពលខេមរភូមិន្ទ លោកនាយករដ្ឋមន្ត្រី ហ៊ុន សែន បានសរសេរយ៉ាងខ្លីតាមទំព័រហ្វេសប៊ុកថា៖ «នេះជាការវះកាត់ប្រកបដោយការឈឺចាប់។ នេះជាអភិក្រមទី ៥ គឺការវះកាត់»។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងកាលពីម្សិលមិញថា អភិក្រមទី៥ ប្រើសម្រាប់វះកាត់នៅពេលនេះ គឺជាការអនុវត្តឡើងសម្រាប់មន្រ្តីអសកម្ម ឬពុករលួយ ដោយមិនអាចរង់ចាំឱ្យពួកគេស្ម័គ្រចិត្តកែប្រែខ្លួនទៀតឡើយ។
លោក ស៊ីផាន ថ្លែងថា៖ «ពាក់កណ្ដាលអាណត្តិហ្នឹងគឺជាខ្សែបន្ទាត់ក្រហមមួយចំពោះការវិនិច្ឆ័យរបស់នាយករដ្ឋមន្ត្រីឬអង្គភាពដទៃទៀត ស្ដីអំពីភាពស្ពឹកស្រពន់ ឬភាពមិនប្រក្រតីរបស់មន្ត្រីទាំងអស់ហ្នឹង ដែលសម្អាតចេញពីរដ្ឋបាលរបស់លោក នេះជាការលើកឡើងរបស់នាយករដ្ឋមន្ត្រី»។
លោក អេង ហ៊ី មន្ត្រីនាំពាក្យកងរាជអាវុធហត្ថលើផ្ទៃប្រទេសបានថ្លែងកាលពីម្សិលមិញដែរថា ការបញ្ចប់តួនាទីជាមេបញ្ជាការកងរាជអាវុធហត្ថនៅខេត្តរតនគិរី គឺជាសិទ្ធិរបស់រាជរដ្ឋាភិបាលដែលអាចដាក់ឬដកតំណែង ហើយមិនមានការស៊ើបអង្កេតឬណែនាំអ្វីជាមុននោះឡើយ។
លោក ហ៊ី ថ្លែងថា៖ «ព្រោះការដាក់ហើយ នឹងការដកជារឿងធម្មតាតើ រដ្ឋាភិបាលមានសិទ្ធិតើ។ អត់មានត្រូវរកមូលហេតុអីផង ព្រោះរដ្ឋាភិបាលគាត់មានសិទ្ធិអំណាចក្នុងការតែងតាំងឬដកហូតមុខតំណែង»។
ភ្នំពេញប៉ុស្តិ៍មិនអាចទាក់ទង លោក គឹម រស្មី បានទេកាលពីម្សិលមិញ ប៉ុន្តែស្រ្តីដែលលើកទូរស័ព្ទបានអះអាងថា ជាភរិយារបស់លោកបដិសេធធ្វើអត្ថាធិប្បាយ។
ទោះយ៉ាងណាក៏ដោយ មាន អង្គការក្រៅរដ្ឋាភិបាលចំនួន ២ បានចេញមុខអះអាងដោយព្រមាននឹងដាក់ពាក្យបណ្ដឹងរៀងៗខ្លួនឲ្យមានការស៊ើបអង្កេតទ្រព្យសម្បត្តិរបស់អតីតមេបញ្ជាការកងរាជអាវុធហត្ថខេត្តរតនគិរី ក្រោយព្រះមហាក្សត្រត្រាស់បង្គាប់លុបឈ្មោះចេញពីក្របខ័ណ្ឌនៃកងយោធពលខេមរភូមិន្ទ។
លោក ប៉ែន ប៊ុណ្ណារ៍ មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃអង្គការអាដហុក និងលោក រស់ សារ៉ុម ប្រធានសមាគមជយលាភីបញ្ញាជនកម្ពុជា បានអះអាងកាលពីម្សិលមិញថា គ្រោងនឹងដាក់ពាក្យបណ្ដឹងប្រឆាំងលោក គឹម រស្មី អតីតមេបញ្ជាការកងរាជអាវុធហត្ថខេត្តរតនគិរី ដោយដាក់បន្ទុកសង្ស័យពីទ្រព្យសម្បត្តិដែលបានសម្ញែងជាសាធារណៈនោះ អាចបានមកពីការរត់ពន្ធឈើប្រណីតចេញទៅប្រទេស វៀតណាម។
លោក ប៉ែន ប៊ុណ្ណារ៍ បានអះអាងថា ការដកឬដាក់មន្ត្រីណាមួយគឺជាសិទ្ធិរបស់រដ្ឋាភិបាលនិងមិនមែនជាការផ្ដន្ទាទោសឡើយ ហើយបើរដ្ឋាភិបាលមិនបានចាត់វិធានការស៊ើបអង្កេតទេ មន្ត្រីអង្គការសង្គមស៊ីវិល និងពលរដ្ឋគ្រប់រូបមានសិទ្ធិដាក់ពាក្យប្ដឹងបរិហារផ្លូវការទៅតុលាការចំពោះលោក គឹម រស្មី ពីបទសង្ស័យធ្វើឱ្យបាត់បង់ធនធានធម្មជាតិ។
លោក ប៊ុណ្ណារ៍ អះអាងថាកាលពីអំឡុងឆ្នាំ ២០១០ មានមន្ត្រីជាន់ខ្ពស់របស់រដ្ឋាភិបាលម្នាក់ដែលស្រឡាញ់ធនធានធម្មជាតិ បានចុះទៅស៊ើបអង្កេតផ្ទាល់អំពីបទល្មើសព្រៃឈើក្នុងខេត្តរតនគិរី ហើយក្រោយមកបានខលទូរស័ព្ទមកប្រាប់លោកថា គ្រាន់តែរយៈពេល ១ ខែ គឺសង្កេតឃើញរថយន្តយីឌុបដឹកឈើចេញទៅប្រទេសវៀតណាមប្រហែល ៥០០ ឡាន និងក្នុងមួយរថយន្តអាចផ្ទុកឈើបានចំនួន ១០០ តោន។ លោក ប៊ុណ្ណារ៍ បន្ថែមថា លើសពីនេះ លោក គឹម រស្មី ក៏ត្រូវបានរកឃើញពីការកាប់បំផ្លាញដីព្រៃជាង ១ ពាន់ហិកតាទៀត ស្ថិតនៅក្នុងស្រុកកូនមុំដើម្បីធ្វើជាកម្មសិទ្ធិផ្ទាល់ខ្លួនកាលពីអំឡុងឆ្នាំ ២០១៧។
លោក ប៊ុណ្ណារ៍ ថ្លែងថា៖ «បើយើងដាក់បណ្ដឹងបរិហារផ្លូវការ យើងនឹងមានមេធាវី ហើយយើងអាចឆែកសំណុំរឿងគាត់ (គឹម រស្មី) គាត់នឹងឆ្លើយដោះបន្ទុកយ៉ាងមេច តើគាត់ពាក់ព័ន្ធហ្នឹងមានអ្នកផ្សេងទៀតពាក់ព័ន្ធអត់?។ បណ្ដឹងបរិហារផ្លូវការចំពោះលោក គឹម រស្មី នឹងដាក់ទៅតុលាការខេត្តរតនគិរីមុនថ្ងៃទី ២៥ ខែកុម្ភៈ នេះ ហើយក្នុងនោះគឺមានទាំងភ័ស្ដុតាងជាឯកសារនិងរូបភាពដែលបង្ហាញអំពីគំនរឈើដូចភ្នំដែលគេដឹកពីរតនគិរីយកទៅទុកក្នុងទឹកដីវៀតណាមក្បែរព្រំដែន»។
ខណៈលោក រស់ សារ៉ុម អះអាងថា ការដកតំណែងនេះជាប់ពាក់ព័ន្ធនឹងការកេងប្រវ័ញ្ចទ្រព្យសម្បត្តិជាតិ ជាពិសេសនៅពីក្រោយនៃការកាប់បំផ្លាញព្រៃឈើក្នុងខេត្តរតនគិរីនាំចេញទៅវៀតណាម។
លោក សារ៉ុម បញ្ជាក់ថា៖ «ការសង្ស័យទាំងនេះគឺបានដាក់បញ្ចូលរួចហើយទៅក្នុងពាក្យបណ្ដឹង ដែលត្រៀមយកដាក់ទៅខាងអង្គភាពប្រឆាំងអំពើពុករលួយក្នុងរយៈពេលប៉ុន្មានថ្ងៃទៀតនេះ ដើម្បីស៊ើបអង្កេតស្វែងរកការពិតជូនប្រជាពលរដ្ឋ»។
លោក ថ្លែងបន្តថា៖ «យើងធ្លាប់មានឯកសារពាក់ព័ន្ធជាមួយគាត់នៅពីក្រោយខ្នងនៃការនាំឈើពីរតនគិរីចេញទៅវៀតណាម ដែលមានមេការម្នាក់ឈ្មោះថាលោក វ៉ៃ អ៊ីចឹងយើងអត់ដឹងថា តើគាត់ពាក់ព័ន្ធនឹងរឿងឋ (ដឹកឈើចេញទៅវៀតណាម) ហ្នឹងឬអត់ទេ។ អ៊ីចឹងយើងចង់ឱ្យគាត់បំភ្លឺអំពីភាពស្អាតស្អំរបស់គាត់ កុំឱ្យប៉ះពាល់ដល់អ្នកផ្សេងទៀត ហើយបើគាត់ស្អាតស្អំមែនអាហ្នឹងគាត់ជាវីរបុរសហើយ»។
ភ្នំពេញប៉ុស្ដិ៍មិនអាចទាក់ទងលោក ឱម យុិនទៀង ប្រធានអង្គភាពប្រឆាំងអំពើពុករលួយបានទេ៕
