ភ្នំពេញៈ នាយឧត្តមសេនីយ៍ផ្កាយ ៤ លោក ធឹម សុផា អគ្គនាយកនៃអគ្គនាយកដ្ឋានសវនកម្មផ្ទៃក្នុងនៃក្រសួងមហាផ្ទៃបានបដិសេធចំពោះការចោទប្រកាន់ និងរិះគន់ របស់ប្រធានគណបក្សខ្មែរក្រោកដែលថា លោកបានកេណ្ឌសែស្រឡាយបក្ខពួកគ្រួសារនិយម រហូតដល់ជាង ២០ នាក់ឲ្យមកកាន់តួនាទីនៅក្នុងអគ្គនាយកដ្ឋានសវនកម្ម ដោយលោកចាត់ទុកថា ជាការមួលបង្កាច់ និងជាការបំពុលសង្គម។
ការបដិសេធរបស់លោក ធឹម សុផា បានធ្វើឡើងខណៈដែលនាយកដ្ឋានបុគ្គលិកនៃក្រសួងមហាផ្ទៃបាននិងកំពុងស៊ើបអង្កេត ទៅលើនាយនគរបាលជាន់ខ្ពស់រូបនេះ ដោយសារតែលោកត្រូវបានលោកវឌ្ឍនាសារពង្ស ប្រធានគណបក្សខ្មែរក្រោក ចោទប្រកាន់លោកផ្កាយ ៤ ធឹម សុផា បានកេណ្ឌសែស្រឡាយបក្ខពួកគ្រួសារនិយម រហូតដល់ ២២ នាក់ ឲ្យមកកាន់ការងារ តួនាទីនៅក្នុងអគ្គនាយកដ្ឋានសវនកម្មផ្ទៃក្នុងនៃក្រសួងមហាផ្ទៃ ក្រោមការដឹកនាំរបស់លោក។
លោក ធឹម សុផា បានប្រាប់ភ្នំពេញប៉ុស្តិ៍ ពីម្សិលមិញថា ការរិះគន់ដោយគ្មានមូលដ្ឋានច្បាស់លាស់ និងមិនត្រឹមត្រូវដោយសារតែមានមន្ត្រីរបស់លោកដែលមិនសប្បាយចិត្ត ជាមួយនឹងលោកដែលបានព្យាយាមមួលបង្កាច់។
លោកបញ្ជាក់ថា៖ «វាមិនមានច្បាប់ណាដែលចែងថា មិនឲ្យយកសែលោហិតចូលធ្វើការទេ។ វាជាការមួលបង្កាច់។ ព័ត៌មានយ៉ាងដូច្នេះយូរទៅវានឹងសាបដោយសារតែពាក្យវាមិនពិតហើយមិនគួរប្រើបំពុលសង្គមដូច្នេះទេ»។
លោកបញ្ជាក់ថា លោកមានកូន ៣ នាក់ដែលក្នុងនោះមានកូនប្រសារម្នាក់ ហើយមានប្អូនជីដូនមួយ ៣ នាក់ និងដន្លងមួយផងដែរ បាននិងកំពុងបម្រើការងារនៅ អគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ ដែលលោកថា អ្នកទាំងអស់នោះសុទ្ធតែត្រូវបានជ្រើសរើសតាមលក្ខន្តិកៈ និងគោលការណ៍ក្រសួងមហាផ្ទៃ។
លោក សក់ សេដ្ឋា រដ្ឋលេខាធិការក្រសួងមហាផ្ទៃ ប្រាប់ភ្នំពេញប៉ុស្តិ៍ កាលពីថ្ងៃទី ៣ ខែកុម្ភៈ ថា រដ្ឋមន្ត្រីក្រសួងមហាផ្ទៃលោក ស ខេង បានប្រាប់ឲ្យនាយកដ្ឋានបុគ្គលិកនៃក្រសួងមហាផ្ទៃធ្វើការស៊ើបអង្កេត ទៅលើករណីដែលបានចុះផ្សាយ ដោយបានចោទទៅលើលោក ធឹម សុផា នោះ។
លោកបញ្ជាក់ថា៖ «នៅពេលស្រាវជ្រាវហើយ យើងនឹងធ្វើការផ្ទៀងផ្ទាត់មើលថាតើវាមានបញ្ហាមិនប្រក្រតីកន្លែងណាខ្លះពីអ្វីដែលចុះផ្សាយនាពេលកន្លងមកវាជាព័ត៌មាន។ ការស្រាវជ្រាវនេះមិនមែនធ្វើឡើងតាមសំណើអីទេតែដោយសារតែមានការលេចឮព័ត៌មាន»។
លោកថា៖ «យើងស្រាវជ្រាវថាតើការតែងតាំង និងការទទួលបានតួនាទីរបស់គាត់ហ្នឹងធ្វើតាមលក្ខន្តិកៈ និងគោលការណ៍ (ក្រសួងមហាផ្ទៃ)ដែរ ឬអត់។ ប្រសិនបើការតែងតាំងឬការទទួលតំណែងនោះធ្វើតាមលក្ខន្តិកៈ និងគោលការណ៍ វាជារឿងធម្មតាទេ ដោយសារគ្មានច្បាប់ណាថាមិនឲ្យឪពុកនិងកូន (ធ្វើការជាមួយគ្នា) »។
កាលពីថ្ងៃទី ៣១ ខែមករា លោក វឌ្ឍនា សារពង្ស ប្រធានគណបក្សខ្មែរក្រោក និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ បានបង្ហោះនៅលើហ្វេសប៊ុកផ្លូវការរបស់លោកថា ករណីរបស់នាយឧត្តមសេនីយ៍ផ្កាយ ៤ ធឹម សុផា ក្រសួងមហាផ្ទៃ ត្រូវទប់ស្កាត់ និងត្រូវធ្វើការលុបបំបាត់វប្បធម៌សែស្រឡាយនិងគ្រួសារនិយមដើម្បី ផ្ដល់ឱកាសដល់ពលរដ្ឋទូទៅ។
លោកក៏បានបង្ហោះរិះគន់កាលពីថ្ងៃទី ១ ខែកុម្ភៈ ថា ទោះបីជា កូនអ្នកក្រខិតខំប្រឡងជាប់ក៏ធ្លាក់ដែរដោយសារតែខ្លួនគ្មានសែស្រឡាយ ធ្លាក់ខណៈពេលដែលកូនអ្នកមាន ទោះបីប្រឡងធ្លាក់ក៏ជាប់ដែរ ដោយសារតែខ្លួនមានសែស្រឡាយ។
លោកបញ្ជាក់ថា៖ «កូនអ្នកមានខ្សែប្រឡងធ្លាក់ក៏ជាប់ កូនអ្នកក្រប្រឡងចង់ងាប់ទោះត្រូវជាប់ក៏ធ្លាក់។ ការបង្កើត ពូជនិយមក្នុងជួរមន្ត្រីរាជការជាការបិទឱកាសយុវជនដែលមានបំណងចូលរួមបម្រើជាតិ»៕