ភ្នំពេញ៖ លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ច សម្រាប់ការចាក់វ៉ាក់សាំងការពារកូវីដ១៩នៅទូទាំងប្រទេស (គ.វ.ក-១៩) បានណែនាំនិងបញ្ជាដាច់ខាត ទៅដល់ប្រធានអនុគណៈកម្មការចំពោះកិច្ចនៅតាមក្រសួងនីមួយៗ មិនត្រូវអនុញ្ញាតយកបុគ្គលិកផ្សេង ក្រៅពីមន្រ្តីរាជការស៊ីវិល ដែលស្ថិតក្នុងក្រសួងសាម៉ី មកចាក់វ៉ាក់សាំងឡើយ។
យោងតាមសារសំឡេង នៅរសៀលថ្ងៃទី០៤ ខែមេសា ឆ្នាំ២០២១នេះ លោកស្រីឱ វណ្ណឌីន បានបញ្ជាក់ថា ការមិនអនុញ្ញាតឱ្យយកអ្នកផ្សេងក្រៅពីមន្រ្តីរបស់ក្រសួង ដោយសារក្រសួងនីមួយៗ បានធ្វើបញ្ជីឈ្មោះបញ្ជូនមក គ.វ.ក-១៩ ដែលប្រធានស្ថាប័ន បានផ្ញើមកដើម្បីធ្វើការបែងចែកវ៉ាក់សាំង(Vaccine Allocation) ដែលវ៉ាក់សាំងសម្រាប់ក្រសួងស្ថាប័នមួយៗគឺត្រូវបានចែកជូនអស់ហើយ។
លោកស្រី ឱ វណ្ណឌីន មានប្រសាសន៍ថា ៖ «ដូចក្រសួងដែនដីនគរូបនីយកម្ម និងសំណង់បានចាក់លើសចំនួនដែលក្រសួងនេះបានស្នើសុំមក ដែលនេះជាបញ្ហាដែលយើងមិនមានវ៉ាក់សាំងសម្រាប់ផ្តល់ជូនអ្នកចាក់លើកទី២ ប្រសិនបើក្រសួងនីមួយៗ ចេះតែយកបុគ្គលផ្សេង ដែលមិនមែនជាបុគ្គលិករបស់ខ្លួន មកចាក់នោះ ធ្វើឱ្យចំនួនវ៉ាក់សាំង ដែលយើងគ្រោងផ្តល់ឱ្យមន្រ្តីរាជការនោះ មិនមានវ៉ាក់សាំងគ្រប់ចំនួនទេ»។
លោកស្រីបានបន្តថា វាជារឿងធំណាស់ ដែលប្រធានអនុគណៈកម្មការទាំងអស់ ត្រូវយកចិត្តទុកដាក់ និងមិនមែនស្រួលដូចការគិតនោះទេ ដោយសារវ៉ាក់សាំងមានតែ ១,៥លានដូស ដែលគោលដៅត្រូវចាក់គឺសម្រាប់តែ ៧៤៥ ០០០ នាក់ទេ ហើយ១០ម៉ឺននាក់ជាកម្មករ-និយោជិត។
លោកស្រីឱ វណ្ណឌីនថា ៖ «ខ្ញុំអនុវត្តន៍ទៅតាមចំនួនដែលទទួលបានពីសម្តេចតេជោ ដូចនេះសុំឯកឧត្តម លោកជំទាវ មិនត្រូវថែមបុគ្គលិកណាផ្សេងទេ ហើយចាប់ពីស្អែក(៥មេសា)ទៅសុំឱ្យក្រុមការងារចាក់វ៉ាក់សាំងចុះត្រួតពិនិត្យឱ្យបានហ្មត់ចត់បំផុត ហើយត្រូវផ្ទៀងផ្ទាត់តាមបញ្ជីដែលយើងមានស្រាប់ ប្រសិនបើអ្នកមកចាក់មិនស្ថិតក្នុងបញ្ជីគឺយើងមិនអនុញ្ញាតឱ្យចាក់ទេ»។
មួយវិញទៀត លោកស្រីឱ វណ្ណឌីន បានស្នើឱ្យប្រធានអនុគណៈកម្មការ ត្រូវធានាថា មន្រ្តីបុគ្គលិករបស់ខ្លួន គឺដល់វេនដែលត្រូវចាក់គឺអនុញ្ញាតឱ្យចាក់ដោយមិនត្រូវយកបុគ្គលផ្សេងមកចាក់នោះទេ។
លោកស្រីបញ្ជាក់ថា ៖ «ប្រសិនបើប្រធានស្ថាប័ន មិនអនុវត្តន៍ទៅតាមគោលដៅដែលបានដាក់ចេញ គឺសុំប្រធានអនុគណៈកម្មការនីមួយៗនេះ ត្រូវទទួលខុសត្រូវ ចំពោះមុខនាយករដ្ឋមន្រ្តី ព្រោះយើងមិនត្រូវចេះតែយកអ្នកនេះឬអ្នកនោះមកចាក់នោះទេ»៕