ភ្នំពេញៈ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យ ត្រាស់បង្គាប់តែងតាំងលោកស្រី ឈឹម ពៅសុកាន់ឌី ជាអគ្គនាយិកា នៃអគ្គនាយកដ្ឋានវិទ្យុជាតិកម្ពុជា នៃក្រសួងព័ត៌មាន បន្ទាប់ពីលោក ទន់ សារ៉ាត អគ្គនាយកចាស់បានចូលនិវត្ដន៍។
លោក អ៊ុក គឹមសេង អ្នកនាំពាក្យក្រសួងព័ត៌មាន បានប្រាប់ភ្នំពេញប៉ុស្ដិ៍នៅថ្ងៃទី ៤ ខែកញ្ញាថា ក្រសួងព័ត៌មានបានទទួលព្រះរាជក្រឹត្យចុះថ្ងៃទី ២៤ ខែសីហាឆ្នាំ ២០១៨នេះហើយ ដោយតែងតាំងលោកស្រី ឈឹម ពៅសុកាន់ឌី ជាអគ្គនាយិកា នៃអគ្គនាយកដ្ឋានវិទ្យុជាតិកម្ពុជា ប៉ុន្ដែលោកមិនទាន់ដឹងថា ក្រសួងនឹងរៀបចំកម្មវិធីតែងតាំងជាផ្លូវការនៅថ្ងៃណានោះទេ។
លោកថ្លែងថា៖«យើងមានព្រះរាជក្រឹត្យនេះហើយ គ្រាន់តែមិនទាន់ធ្វើពិធីចូលកាន់តំណែង ព្រោះការចូលកាន់តំណែងនេះ យើងមានប្រគល់ត្រាអី។ អ៊ីចឹងយើងអត់ទាន់ដឹងថា ឯកឧត្ដមរដ្ឋមន្ដ្រី គាត់កំណត់នៅពេលណាទេ»។
លោក គឹមសេង បន្ថែមថា ការតែងតាំងអគ្គនាយិកាវិទ្យុជាតិកម្ពុជា ថ្មីនេះ ព្រោះអគ្គនាយកចាស់គាត់ត្រូវចូលនិវត្ដន៍។ លោក ទន់ សារ៉ាត ជាអគ្គនាយកចាស់ បានចូលកាន់តំណែងកាលពី ថ្ងៃទី ២៩ ខែឧសភា ឆ្នាំ២០១៥ បន្តពីលោកតន់ យ៉ាន ដែលក៏បានចូលនិវត្តន៍ដូចគ្នាផងដែរ។
លោកឲ្យដឹងថា៖«លោកអគ្គនាយកចាស់ គាត់ធ្វើការងារនៅវិទ្យុជាតិតាំងពីឆ្នាំ ១៩៧៩ មក ហើយពេលនេះ គាត់មានអាយុ ៦០ ឆ្នាំ ទៅហើយ។ អ៊ីចឹងគាត់ក៏ចូលនិវន្ដន៍តែម្ដង»៕