ភ្នំពេញៈ អ្នករាយការណ៍ពិសេសរបស់អង្គការសហប្រជាជាតិ (UN) ទទួលបន្ទុកសិទ្ធិមនុស្សនៅកម្ពុជាលោកស្រី រ៉ូណា ស្ម៊ីត បានវាយតម្លៃខ្ពស់ជាវិជ្ជមានមកលើរាជរដ្ឋាភិបាលកម្ពុជាក្នុងការខិតខំប្រឹងប្រែងដោះស្រាយបញ្ហាសិទ្ធិមនុស្ស សេរីភាពនៃការបញ្ចេញមតិវិធានការទប់ស្កាត់ការរីករាលដាលជំងឺកូវីដ ១៩ និងការកែទម្រង់ប្រព័ន្ធយុត្តិធម៌នៅប្រទេសកម្ពុជា។
ការលើកឡើងរបស់លោកស្រី រ៉ូណា ស្ម៊ីត បានធ្វើឡើងក្នុងជំនួបជាមួយលោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា (គ.ស.ម.ក.) កាលពីថ្ងៃទី ២៥ សីហា ដោយមានការចូលរួមពីតំណាងក្រសួងមហាផ្ទៃ ក្រសួងការបរទេស និងសហប្រតិបត្តិការអន្តរជាតិក្រសួងយុត្តិធម៌ ក្រសួងព័ត៌មាន និងក្រសួងសុខាភិបាល។
នៅក្នុងសេចក្តីប្រកាសពីលទ្ធផលនៃជំនួបរបស់ គ.ស.ម.ក. កាលពីថ្ងៃទី ២៥ ខែសីហា តាមរយៈប្រព័ន្ធវីដេអូលោកស្រី រ៉ូណា ស្ម៊ីត បានលើកឡើងដោយបានកោតសរសើរ និងវាយតម្លៃខ្ពស់ជាវិជ្ជមានអំពីកិច្ចខិតខំប្រឹងប្រែងរបស់រាជរដ្ឋាភិបាល។ លោកស្រីក៏បានលើកទឹកចិត្តឱ្យបន្តកិច្ចខិតខំប្រឹងប្រែងជាមួយនឹងលទ្ធផលជាវិជ្ជមាននេះបន្តទៀតដែរ។
ជាមួយគ្នានេះលោកស្រីក៏បានបង្ហាញពីក្តីកង្វល់ និងផ្តល់ជាអនុសាសន៍មួយចំនួនផងដែរទៅដល់រាជរដ្ឋាភិបាលដូចជាការទប់ស្កាត់នូវការផ្សព្វផ្សាយព័ត៌មានមិនពិត និងព័ត៌មានក្លែងក្លាយពាក់ព័ន្ធនឹងជំងឺកូវីដ១៩។ ការរៀបចំ និងការធ្វើវិសោធនកម្មច្បាប់មួយចំនួនដោយមានការចូលរួមពីភាគីពាក់ព័ន្ធ និងស្របតាមគោលការណ៍សិទ្ធិមនុស្សអន្តរជាតិច្បាប់ស្តីពីសមាគម និងអង្គការមិនមែនរដ្ឋាភិបាល។ សេចក្តីព្រាងច្បាប់ស្តីពីសណ្តាប់ធ្នាប់សាធារណៈ និងសេចក្តីព្រាងច្បាប់ស្តីពីការបង្កើតស្ថាប័នសិទ្ធិមនុស្សជាតិជាដើម។
លោកស្រី រ៉ូណា ស្ម៊ីត ក៏មានការបារម្ភពីការរឹតត្បិតសិទ្ធិសេរីភាពបញ្ចេញមតិ និងការជួបជុំតវ៉ា ប៉ុន្តែលោកស្រីមិនគាំទ្រនូវការជួបជុំបញ្ចេញមតិដែលបំពានច្បាប់ បំពានសិទ្ធិសេរីភាពអ្នកដទៃ បង្កឱ្យមានការរើសអើងពូជសាសន៍ អំពើហិង្សា និងភាពចលាចលប៉ះពាល់ដល់សណ្តាប់ធ្នាប់សាធារណៈ និងសន្តិសុខសង្គម។
លោក ជិន ម៉ាលីន អនុប្រធានគណៈកម្មាធិការសិទ្ធិមនុស្សកម្ពុជាបានប្រាប់ភ្នំពេញប៉ុស្តិ៍ពីម្សិលមិញថា ជំនួបពិភាក្សានេះទទួលបានលទ្ធផលមានលក្ខណៈជាវិជ្ជមាន និងការយោគយល់គ្នាច្រើន។
លោកមានប្រសាសន៍ថា៖ «អ្វីដែលយើងអាចវាយតម្លៃបាននោះ គឺលោកស្រី រ៉ូណា ស្ម៊ីត ហាក់មានការយល់ច្រើនពីស្ថានភាព និងតថភាពពិតប្រាកដជាក់ស្តែងដែលកើតមាននៅកម្ពុជា ហើយជាពិសេសគឺមូលដ្ឋានច្បាប់ និងវិធានការច្បាប់របស់សមត្ថកិច្ចដែលបានដាក់ចេញនាពេលកន្លងមកនេះ»។
លោក ជិន ម៉ាលីន បន្ថែមថា ការជួបនេះគឺជាឱកាសល្អសម្រាប់កម្ពុជាធ្វើការពន្យល់បកស្រាយលម្អិត ច្បាស់លាស់ផ្អែកលើមូលដ្ឋានច្បាប់ពាក់ព័ន្ធទៅនឹងស្ថានភាពព្រឹត្តិការណ៍មួយចំនួនដែលមានការចោទប្រកាន់ ដោយអគតិថា មានការរំលោភបំពានសិទ្ធិ។
លោកស្រី រ៉ូណា ស្ម៊ីត បានយល់ និងបានស្តាប់យ៉ាងយកចិត្តទុកដាក់នូវការពន្យល់បកស្រាយរបស់កម្ពុជា ហើយគាត់វាយតម្លៃខ្ពស់ពីការរីកចម្រើននៃការវិវត្តជាវិជ្ជមាននៃស្ថានភាពសិទ្ធិមនុស្ស។ ប៉ុន្តែគាត់នៅមានក្តីកង្វល់មួយចំនួនដូចមានចែងក្នុងសេចក្តីប្រកាសនេះ ប៉ុន្តែក្តីកង្វល់ទាំងនេះគឺកម្ពុជាកំពុងមើលឃើញដូចគ្នាហើយកំពុងតែអនុវត្ត និងធ្វើការដោះស្រាយជាបន្តបន្ទាប់។
គ.ស.ម.ក. និងអន្តរក្រសួងនឹងធ្វើការពិចារណាលើកង្វល់ និងអនុសាសន៍របស់លោកស្រី រ៉ូណា ស្ម៊ីត ហើយនឹងបន្តកិច្ចសហប្រតិបត្តិការជាមួយគ្នាទៀត ដើម្បីធ្វើឱ្យស្ថានភាពសិទ្ធិមនុស្សនៅកម្ពុជាកាន់តែមានភាពល្អប្រសើរឡើង។
វីដេអូ៖
លោក ជិន ម៉ាលីន បញ្ជាក់ថា៖ «យើងទទួលយកនូវអនុសាសន៍ និងក្តីកង្វល់របស់គាត់ ហើយយើងបន្តធ្វើការសហការគ្នាធ្វើការជាមួយគ្នាបន្តទៀតដើម្បីឱ្យស្ថានភាពសិទ្ធិមនុស្សនៅកម្ពុជាកាន់តែល្អប្រសើរឡើងថែមទៀត»។
ប្រធានវិទ្យាស្ថានប្រជាធិបតេយ្យកម្ពុជាលោក ប៉ា ច័ន្ទរឿន យល់ឃើញថា ការវាយតម្លៃជាវិជ្ជមានរបស់លោកស្រី រ៉ូណា ស្ម៊ីត គ្រាន់តែជាការទទួលស្គាល់នូវការខិតខំប្រឹងប្រែងរបស់រាជរដ្ឋាភិបាលក្នុងការទប់ស្កាត់ និងដោះស្រាយបញ្ហាកូវីដ១៩។ ជាចំណុចមួយដែលប្រជាពលរដ្ឋទទួលស្គាល់ពីការខិតខំប្រឹងប្រែងរបស់រាជរដ្ឋាភិបាលក្នុងការទប់ស្កាត់ការរីករាលដាលនៃជំងឺនេះដែលមិនអាចប្រកែកបាន។ ប៉ុន្តែបញ្ហាការរំលោភសិទ្ធិមនុស្សនៅកម្ពុជានៅមិនទាន់មានភាពប្រសើរនៅឡើយទេ។
លោកថ្លែងថា៖ «ចំពោះស្ថានភាពសិទ្ធិមនុស្ស និងការធ្លាក់ចុះនៃដំណើរការប្រជាធិបតេយ្យនៅកម្ពុជានេះគឺជារឿងពិតដែលមិនអាចប្រកែកបានដូចដែលសហភាពអឺរ៉ុបក៏បានសម្រេចដក EBA ចំនួន ២០ ភាគរយពីកម្ពុជាយើងដែរ ដោយសារតែមានការរំលោភសិទ្ធិមនុស្សនៅមានលក្ខណៈធ្ងន់ធ្ងរ និងជាប្រព័ន្ធ»។
លោកថា លោកមិនទាន់រំពឹងរដ្ឋាភិបាលកម្ពុជានឹងអនុវត្តតាមអនុសាសន៍របស់លោកស្រី រ៉ូណា ស្ម៊ីត នោះឡើយ លុះត្រាតែលោកឃើញជាក់ស្តែងសិនទើបជឿជាក់។ លោកថា មានតែពលរដ្ឋ អង្គការសង្គមស៊ីវិលក៏ដូចជាភ្នាក់ងារអង្គការសហប្រជាជាតិផ្នែកសិទ្ធិមនុស្សបន្តតាមដាន និងទាមទារឱ្យអាជ្ញាធរ ពាក់ព័ន្ធរួមទាំងមន្ត្រីសិទ្ធិមនុស្សបំពេញតាមការសន្យារបស់ខ្លួនក្នុងការលើកកម្ពស់ការគោរពសិទ្ធិមនុស្ស និងដំណើរការ ប្រជាធិបតេយ្យនៅប្រទេសកម្ពុជា៕