ភ្នំពេញៈ លោកស្រី អ៊ុងសាន ស៊ូជី (Aung San Suu Kyi) ទីប្រឹក្សារដ្ឋ និងជារដ្ឋមន្ត្រីការបរទេសនៃសាធារណរដ្ឋសហភាពមីយ៉ាន់ម៉ា បានមកដល់ប្រទេសកម្ពុជាហើយ កាលពីវេលាម៉ោង ៤ រសៀលថ្ងៃម្សិលមិញដែលដំណើរទស្សនកិច្ចនេះ ធ្វើឡើងតបតាមការអញ្ជើញរបស់លោកនាយករដ្ឋមន្ត្រី ហ៊ុន សែន។
បើយោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ កាលពីថ្ងៃទី ២៦ ខែ មេសា ក្នុងដំណើរទស្សនកិច្ចរយៈពេល ៣ ថ្ងៃនេះ លោកស្រី អ៊ុងសាន ស៊ូជី នឹងចូលក្រាបបង្គំគាល់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី និងសម្តេច ព្រះមហាក្សត្រី នរោត្តម មុនីនាថ សីហនុ នៅព្រះបរមរាជរាំង។ លោកស្រីក៏នឹងជួបលោក សាយ ឈុំ ប្រធានព្រឹទ្ធសភា លោក ហេង សំរិន ប្រធានរដ្ឋសភា និងជួបទ្វេភាគីជាមួយលោកនាយករដ្ឋមន្ត្រី ហ៊ុន សែន។
យោងតាមសេចក្តីប្រកាសព័ត៌មានដដែលនេះ លោកស្រី អ៊ុងសាន ស៊ូជី នឹងដាក់កម្រងផ្កាគោរពវិញ្ញាណក្ខន្ធនៅស្តូបវិមានឯករាជ្យ និងព្រះមណ្ឌល ព្រះបរមរតនកោដ្ឋ អតីតព្រះមហាក្សត្រកម្ពុជា។ នៅចុងបញ្ចប់នៃការបំពេញទស្សនកិច្ចនេះ លោកស្រីនឹងធ្វើដំណើរទៅកាន់ខេត្តសៀមរាប ដើម្បីទស្សនាប្រាសាទបុរាណខ្មែរ។
សេចក្តីប្រកាសព័ត៌មានបានបញ្ជាក់ថា៖ «ដំណើរទស្សនកិច្ចផ្លូវការរបស់លោកជំទាវ អ៊ុងសាន ស៊ូជី នៅព្រះរាជាណាចក្រកម្ពុជានឹងពង្រឹង និងពង្រីកថែមទៀតនូវចំណងមិត្តភាព និងកិច្ចសហប្រតិបត្តិការទ្វេភាគី លើគ្រប់វិស័យ ព្រមទាំងក្នុងក្របខ័ណ្ឌអាស៊ាន និងពហុភាគី»។
លោក កេត សោផាន់ អ្នកនាំពាក្យក្រសួងការបរទេស មិនអាចទាក់ទងដើម្បីសុំការបញ្ជាក់បន្ថែមបានទេកាលពីម្សិលមិញ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា និងជាអ្នកវិភាគបញ្ហានយោបាយ បានថ្លែងកាលពីសប្តាហ៍មុនថា កម្ពុជា និងភូមាតែងតែជួយគ្នា និងគាំទ្រគ្នាទៅវិញទៅមកក្នុងក្របខ័ណ្ឌវេទិកាអន្តរជាតិ និងបញ្ហានានានៅក្នុងក្របខ័ណ្ឌអាស៊ាន។
លោក គិន ភា បញ្ជាក់ថា៖ «បើយើងនិយាយក្នុងក្របខ័ណ្ឌអាស៊ាន យើងជាសមាជិកអាស៊ានថ្មី ដែលមានកម្រិតនៃការអភិវឌ្ឍសេដ្ឋកិច្ចប្រហាក់ប្រហែលគ្នា។ អ៊ីចឹងទេការពង្រឹងការរឹតចំណងទំនាក់ទំនងទ្វេភាគី រវាងប្រទេសទាំង ២ ហ្នឹង គឺមានសារៈសំខាន់ណាស់ ដើម្បីឱ្យទៅជាកម្លាំងចលករសំខាន់មួយក្នុងក្របខ័ណ្ឌអាស៊ាន ក៏ដូចជានៅក្នុងក្របខ័ណ្ឌកិច្ចការតំបន់»។
ចំណែកលោក មាស នី អ្នកវិភាគនយោបាយ ក៏បានថ្លែងកាលពីម្សិលមិញដែរថា កាលពីមុន លោកស្រី អ៊ុងសាន ស៊ូជី ត្រូវបានគេទទួលស្គាល់ថា ជាអ្នកទទួលបានរង្វាន់ណូបែលទាក់ទងនឹងការតស៊ូដើម្បីលទ្ធិប្រជាធិបតេយ្យ ប៉ុន្តែនៅពេលនេះ លោកស្រី អ៊ុងសាន ស៊ូជី ហាក់ដូចជាទទួលរងនូវសម្ពាធជាច្រើននៅក្នុងប្រទេសរបស់គាត់ ហើយនិងកំពុងទទួលរងនូវការរិះគន់ធ្ងន់ៗ ពីអន្តរជាតិផងដែរ ទៅលើការធ្វើទុក្ខបុកម្នេញទៅដល់ជនជាតិរ៉ូហ៊ីងយ៉ា។
លោក មាស នី បានបញ្ជាក់ថា៖ «អ៊ីចឹង ខ្ញុំមិនរំពឹងថា នឹងមានការលើកយករឿងលទ្ធិប្រជាធិបតេយ្យមកជជែកទេរវាងមេដឹកនាំទាំង ២ ព្រោះយើងដឹងថា មេដឹកនាំទាំង ២ ប្រហែលជានឹងមើលឃើញលទ្ធិប្រជាធិបតេយ្យតាមបែបមួយផ្សេងដែលខុសពីលទ្ធិប្រជាធិបតេយ្យដែលបស្ចិមប្រទេសបាន និងកំពុងសម្លឹងមើល»៕