ភ្នំពេញៈ លោកស្រី ឱ វណ្ណឌីន មន្ត្រីនាំពាក្យក្រសួងសុខាភិបាលបានលើកឡើងនៅថ្ងៃម្សិលមិញថា កម្ពុជានៅមិនទទួលបានការបញ្ជាក់ផ្លូវការណាមួយពីប្រទេសវៀតណាម ជុំវិញបុរសជនជាតិវៀតណាមម្នាក់ត្រូវបានអះអាងថា ឆ្លងជំងឺកូវីដ ១៩ ពីប្រទេសកម្ពុជា នៅឡើយទេ។ ប៉ុន្តែលោកស្រីថា បុរសវៀតណាមនេះមិនអាចឆ្លងជំងឺកូវីដ ១៩ ពីកម្ពុជាឡើយ។
លោកស្រី ឱ វណ្ណឌីន បានបញ្ជាក់តាមប្រព័ន្ធតេឡេក្រាមថា ក្រុមការងាររបស់ក្រសួងសុខាភិបាលបានស្រាវជ្រាវដោយយកចិត្តទុកដាក់បំផុត បន្ទាប់ពីមានសារព័ត៌មានវៀតណាមបានចុះផ្សាយថា មានពលរដ្ឋវៀតណាមម្នាក់បានឆ្លងជំងឺកូវីដ ១៩ បន្ទាប់ពីធ្វើដំណើរចេញពីខេត្តសៀមរាបត្រឡប់ទៅដល់ប្រទេសវៀតណាម វិញ ប៉ុន្តែការស្រាវជ្រាវនោះមិនបានរកឃើញអ្នកឆ្លងថ្មីនោះទេ ក្រៅតែអ្នកឆ្លងចំនួន ១២២ នាក់ ដែលបានជាសះស្បើយទាំងអស់។
លោកស្រីថ្លែងថា៖ «នៅតែគ្មានព័ត៌មានផ្លូវការពីវៀតណាម។ មកទល់ពេលនេះមិនទាន់មានរកឃើញអ្នកមានវីរុសកូវីដ១៩ ថ្មីនោះទេ ហើយប្រសិនបើមានក្រសួងនឹងជម្រាបជូនហើយ»។ កាលពីថ្ងៃសៅរ៍ទី ១៦ ឧសភា សារព័ត៌មានវៀតណាម VNexpress បានចុះផ្សាយថា ពលរដ្ឋវៀតណាមចំនួន ៤ នាក់ដែលធ្វើដំណើរត្រឡប់ពីបរទេសវិញ ត្រូវបានធ្វើតេស្ដវិជ្ជមានជាមួយជំងឺកូវីដ ១៩ ដែលបានធ្វើឱ្យប្រទេសនេះមានអ្នកឆ្លងសរុបកើនដល់ ៣១៨ នាក់។
សារព័ត៌មាននេះបន្តថា ក្នុងចំណោមអ្នកជំងឺថ្មីទាំង ៤ នាក់នោះ គឺមានម្នាក់ជាបុរសអាយុ ៣៩ ឆ្នាំ ដែលរស់នៅក្នុងសង្កាត់តាន់កូវ (Tan Chau) ក្នុងខេត្តតាយនីញ (Tay Ninh) ជាប់ព្រំដែនជាមួយប្រទេសកម្ពុជាគឺបានធ្វើដំណើរតាមរថយន្តក្រុងពីខេត្តតាយនីញមកកាន់ខេត្តសៀមរាបកាលពីថ្ងៃ ១០ ខែមករា ហើយបន្ទាប់មកបានវិលត្រឡប់ទៅប្រទេសវៀតណាមដោយខុសច្បាប់វិញនៅថ្ងៃទី ២ ខែឧសភា ក្នុងអំឡុងពេលកម្ពុជា-វៀតណាម បានបិទព្រំដែនតាំងពីខែមេសា។
ប្រភពដដែលបញ្ជាក់ថា បុរសនេះបានជិះម៉ូតូឌុបរបស់ជនជាតិខ្មែរម្នាក់ចេញពីព្រំដែនចូលទៅលេងផ្ទះម្ដាយនៅសង្កាត់តាន់កូវ ហើយបន្ទាប់មកបានរាយការណ៍ទៅកាន់ប៉ុស្ដិ៍ប៉ូលិសដែលនៅជិតនោះ អំពីការធ្វើដំណើរត្រឡប់ពីកម្ពុជាវិញ និងត្រូវបានដាក់ឱ្យនៅដាច់ដោយឡែកកាលពីថ្ងៃទី ៣ ឧសភា។
រហូតដល់ថ្ងៃទី ៥ ឧសភា បុរសនេះត្រូវបុគ្គលិកពេទ្យយកសំណាកទៅធ្វើតេស្ដតែទទួលបានលទ្ធផលអវិជ្ជមានជាមួយកូវីដ ១៩ ប៉ុន្តែការធ្វើតេស្ដសំណាកលើកទី ២ នៅថ្ងៃសុក្រសប្ដាហ៍មុននេះគឺបង្ហាញពីផលវិជ្ជមានជាមួយជំងឺនេះ។ ការចេញផ្សាយរបស់សារព័ត៌មានវៀតណាមនេះ គឺចំថ្ងៃដែលក្រសួងសុខាភិបាលកម្ពុជាបានប្រកាសថា អ្នកជំងឺកូវីដ ១៩ ចុងក្រោយគេបង្អស់គឺត្រូវបានព្យាបាលជា ១០០%។
កាលពីដើមខែមេសាលោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាធ្លាប់បានប្រតិកម្មជាមួយសារព័ត៌មានវៀតណាម VNA ដោយលោកអះអាងថា សារព័ត៌មាននេះបានចុះផ្សាយអាក្រក់អំពីប្រទេសកម្ពុជា ដោយបានចាត់កម្ពុជាចូលនៅក្នុងចំណោមប្រទេសនៅអឺរ៉ុបផ្សេងទៀតថាជាក្រុមប្រទេសអាចធ្វើឱ្យមានហានិភ័យអំពីជំងឺកូវីដ ១៩ សម្រាប់ប្រទេសវៀតណាម។
ប៉ុន្តែយ៉ាងណាក្ដីលោកស្រី ឱ វណ្ណឌីន បានលើកឡើងទៀតថា បុរសជនជាតិវៀតណាមនោះគឺមិនទាន់ដឹងអំពីទីកន្លែងដែលបានឆ្លងជំងឺកូវីដ១៩នោះទេ ដោយសារមេរោគនេះអាចកើតមានឡើងគ្រប់ទីកន្លែងគ្រប់កាលៈទេសៈ និងគ្រប់ពេលវេលាទាំងអស់ ជាពិសេសគឺនៅពេលដែលបុគ្គលធ្វើដំណើរចល័តតែម្តង។
លោកស្រីថា៖ «ខ្ញុំគ្រាន់តែសូមជម្រាបជូនថា ករណីនេះមិនមានភាពជាក់លាក់ ហើយក៏មិនអាចនឹងវាយតម្លៃថា ការចម្លងនេះគឺកើតចេញពីព្រះរាជាណាចក្រកម្ពុជាយើងដែរ ដោយសារបុគ្គលនោះបានទៅដល់ប្រទេសវៀតណាម បើគិតទៅហួសពី ១៤ ថ្ងៃទៅហើយមកទល់ពេលដែលចុះផ្សាយថារកឃើញវិជ្ជមាននោះ»។
លោក ផៃ ស៊ីផាន អ្នកនាំពាក្យរដ្ឋាភិបាលបានលើកឡើងថា ការចុះផ្សាយរបស់សារព័ត៌មានគឺគ្រាន់តែជាតម្រុយមួយប៉ុណ្ណោះ។
លោកថា៖ «រវាងប្រជាជាតិទៅប្រជាជាតិ ហើយអ្វីដែលយើងទទួលព័ត៌មានគឺតាមរយៈកិច្ចសហការរវាងក្រសួងសុខាភិបាលកម្ពុជា និងក្រសួងសុខាភិបាលរបស់ប្រទេសវៀតណាម។ យើងទទួលបានព័ត៌មានផ្លូវការតែពីរដ្ឋាភិបាល និងរដ្ឋាភិបាលទេ រីឯអ្នកសារព័ត៌មានគឺគ្រាន់តែឱ្យតម្រុយតែប៉ុណ្ណឹង»។
លោក នួន ពុទ្ធារ៉ា អភិបាលក្រុងសៀមរាបបានលើកឡើងថា លោកមិនបានដឹងច្បាស់អំពីមូលហេតុដែលបុរសជនជាតិវៀតណាមចូលមកកាន់ខេត្តសៀមរាបនោះទេ ដោយលោកឱ្យទៅសួរខាងប្រធានមន្ទីរសុខាភិបាលខេត្តវិញ។
ប៉ុន្តែលោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាបបានបញ្ជាក់ថា មានតែមន្ត្រីនាំពាក្យក្រសួងសុខាភិបាលប៉ុណ្ណោះដែលមានសិទ្ធិផ្ដល់ព័ត៌មានផ្លូវការនេះបាន ប៉ុន្តែលោកលើកឡើងថា បុរសវៀតណាមនោះគឺភាគច្រើនអាចឆ្លងជំងឺកូវីដ ១៩ នៅក្នុងប្រទេសវៀតណាម។ លោកថា៖ «ព្រោះតាំងពីថ្ងៃ ២ ថ្ងៃ ៣ នោះមកហើយធ្វើតេស្ដនៅថ្ងៃ ៤ នៅនោះ (វៀតណាម) មានឃើញឯណា ដល់ថ្ងៃ ១៥ ទើបបានគេឃើញ ហើយយើងដាក់ការសង្ស័យថា គាត់ឆ្លងនៅវៀតណាមខ្លួនឯង»៕