.jpg)
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ថ្លែងក្នុងសន្និសីទកាសែតនាពេលកន្លងមក។ ហ៊ាន រង្សី
ភ្នំពេញ៖ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលនៅថ្ងៃទី ១៦ ខែមេសានេះ បានចេញសារអំពាវនាវជាថ្មី ដល់ប្រជាពលរដ្ឋឲ្យរួមគ្នាប្រយុទ្ធនឹងសត្រូវអត់ស្រមោលកូវីដ ១៩ ដើម្បីចៀសផុតពីជ្រោះមរណៈ។
លោកស្រីថ្លែងថា បងប្អូនប្រជាពលរដ្ឋត្រូវធ្វើសកម្មភាពរួមគ្នា ដើម្បីប្រយុទ្ធនឹងវីរុសកូវីដ ១៩ សម្រាប់ការរស់នៅល្អប្រសើរនៅថ្ងៃស្អែក សម្រាប់ឆ្នាំល្អប្រសើរ និងសម្រាប់អនាគតល្អប្រសើរ។
លោកស្រី ឱ វណ្ណឌីន ថ្លែងថា៖ «សិទ្ធិរបស់អ្នក គឺជាសិទ្ធិរបស់ដែលត្រូវបានការពារពីការចម្លងវីរុសកូវីដ ១៩ ពីបុគ្គលម្នាក់ទៅបុគ្គលម្នាក់ទៀត។ ដូច្នេះ យើងទាំងអស់គ្នាត្រូវអនុវត្តសិទ្ធិរបស់យើងក្នុងការវាយបកធ្វើឱ្យវីរុសកូវីដ ១៩ ទទួលរងនូវការបរាជ័យ ដោយស្នាដៃពួកយើងទាំងអស់គ្នា។ សូមមានសុវត្ថិភាពល្អទាំងអស់គ្នា ដោយនៅផ្ទះ»។
កាលពីថ្ងៃទី ១៤ ខែមេសា លោកនាយករដ្ឋមន្រ្តី ហ៊ុន សែន បានអង្វរប្រជាពលរដ្ឋខ្មែរឱ្យរួមគ្នា ដើម្បីយកឈ្នះលើព្រឹត្តិការណ៍សហគមន៍ ២០ កុម្ភៈ ដែលកំពុងស្ថិតលើមាត់ជ្រោះនៃមរណៈ បើមិនរួមគ្នាជម្នះទេនោះ នឹងឈានទៅរកមរណៈមិនខាន។
លោកនាយករដ្ឋមន្រ្តីបានថ្លែងទទូចទៅកាន់ប្រជាពលរដ្ឋឱ្យរួមគ្នាបិទបញ្ចប់ព្រឹត្តិការណ៍មួយនេះយ៉ាងដូច្នេះ «សូមអង្វរករបងប្អូនប្រជាពលរដ្ឋរបស់យើងខិតខំឡើងរួមគ្នា ដើម្បីបញ្ចប់នូវព្រឹត្តិការណ៍ដ៏គ្រោះថ្នាក់។ យើងកំពុងស្ថិតនៅមាត់ជ្រោះនៃមរណៈហើយ ប្រសិនបើយើងមិនប្រឹងរួមគ្នា យើងនឹងឈានទៅរកមរណៈពិតប្រាកដ។ ដូច្នេះវិធីតែមួយគត់ គឺរួមដៃគ្នាទាំងរដ្ឋ និងប្រជាជន»៕
