ភ្នំពេញៈ លោក ស ខេង រដ្ឋមន្ដ្រីក្រសួងមហាផ្ទៃ បានបញ្ជាឲ្យស្ថាប័ននិងអង្គភាពនីមួយៗ លុបបំបាត់ការបញ្ជូនមន្ត្រីដែលមិនគោរពវិន័យឬមន្ត្រីអសកម្ម ឲ្យទៅចូលរៀន នៅបណ្ឌិតសភានគរបាលជាតិ ដែលបានបង្កឲ្យមានការលំបាកដល់សាលា និងបានធ្វើឲ្យរាជរដ្ឋាភិបាលខាតបង់ថវិកា និងពេលវេលាឥតប្រយោជន៍ ដោយលោកជំរុញឲ្យបញ្ជូនមន្ត្រីវ័យក្មេង ដែលមានសមត្ថភាពបំពេញការងារឲ្យទៅចូលរៀនវិញ។
លោក ស ខេង បានថ្លែងនៅចំពោះមុខមន្ដ្រីនគរបាលរាប់រយនាក់ក្នុងពិធីសម្ពោធឲ្យប្រើប្រាស់អគារស្នាក់នៅកម្ពស់ ៥ ជាន់និងសមិទ្ធផលនានា នៅបណ្ឌិត្យសភានគរបាលជាតិកម្ពុជាកាលពីព្រឹកម្សិលមិញថា រាជរដ្ឋាភិបាល បានចំណាយថវិកាយ៉ាងច្រើន ដើម្បីធ្វើការបណ្តុះបណ្តាល មន្ដ្រីនគរបាល ប៉ុន្តែផ្ទុយទៅវិញ ធនធានមនុស្សដែលបានបណ្ដុះបណ្ដាលរួច បែរជាមានអង្គភាពខ្លះ មិនប្រើនិងមិនឲ្យតម្លៃ ដែលប្រការនេះបានធ្វើឲ្យរាជរដ្ឋាភិបាលចំណាយថវិកា និងពេលវេលាឥតប្រយោជន៍។
លោកបញ្ជាក់ថា៖ «ទាក់ទងនឹងបញ្ហានេះខ្ញុំធ្លាប់លើករួចហើយ មើលតែការអនុវត្តជាក់ស្តែង នៅមានភាពចន្លោះប្រហោង នៅក្នុងអង្គភាពមួយចំនួនតូច ដែលនៅតែប្រកាន់គំនិតអភិរក្សនិយម មិនព្រមផ្លាស់ប្តូរ ផ្នត់គំនិតរបស់ខ្លួន ឲ្យស្របទៅនឹង ការរីកចម្រើន របស់សង្គមជាតិ និងអន្តរជាតិ»។
ទោះយ៉ាងណាលោកថា រហូតមកដល់ពេលនេះ បើធ្វើការប្រៀបធៀបកាលពីពេលមុន មន្ដ្រីនគរបាលកម្ពុជា មានការវិវត្ត រីកចម្រើន នឹងយល់ដឹងច្រើន ចំពោះការបញ្ជូនមន្ដ្រីមកសិក្សារៀនសូត្រតែក៏នៅមានអង្គភាពមួយចំនួន ដែលនៅតែមិនទាន់យល់។
លោកបានអំពាវនាវដល់មន្ត្រីដែលជាអ្នកទទួលខុសត្រូវនៅក្នុងអង្គភាពនីមួយៗ ត្រូវជ្រើសរើសមន្ត្រី ដែលមានភាពមោះមុត និងឧស្សាហ៍ព្យាយាម ក្នុងការបំពេញការងារ និងការសិក្សារៀនសូត្រ ឲ្យមកចូលរៀននៅបណ្ឌិត្យសភានគរបាលជាតិ។
លោកថា៖ «អង្គភាពសាមីមួយចំនួននៅតែគិតថា ការចាត់មន្ដ្រីទៅបណ្ដុះបណ្ដាល គឺជារូបភាពនៃការដាក់ទណ្ឌកម្មគឺមិនមែនមកទទួលយកចំណេះដឹង និងជំនាញថ្មីៗពីសាលា ដើម្បីលើកកម្ពស់សមត្ថភាព ប្រសិទ្ធភាពការងារ និងអភិវឌ្ឍ អង្គភាពនោះទេដូច្នេះហើយទើបប្រធានអង្គភាពសាមីមួយចំនួននៅតែបញ្ជូនមន្ដ្រីដែលមិនគោរពវិន័យ ឬមន្ដ្រីអសកម្ម ឲ្យទៅសិក្សាដែលជាហេតុធ្វើឲ្យខុសនឹងលក្ខខណ្ឌកំណត់របស់សាលា និងបង្កការលំបាកដល់សាលា»។
ទោះយ៉ាងណា លោក ស ខេង ក៏បានអំពាវនាវដល់មន្ត្រីនគរបាលគ្រប់អង្គភាពមិនត្រូវបោះបង់មន្ដ្រីដែលមិនគោរពវិន័យ ឬអសកម្មនោះទេ។ «យើងខិតខំអប់រំដុសខាត់ ដើម្បីឲ្យគេក្លាយជាមន្ដ្រីដែលសកម្ម មន្ដ្រីដែលមានគុណសម្បត្តិគ្រប់គ្រាន់ហើយនឹងមានឱកាស ដើម្បីនឹងចាត់បញ្ជូន ឲ្យមកសិក្សារៀនសូត្រ ដូចមន្ដ្រីដទៃទៀត។ អង្គភាពមួយចំនួនបានបញ្ជូនមន្ត្រី ទៅសិក្សា ឈ្មោះ ដដែលៗ បានន័យថា មនុស្សដដែលៗ ហើយចំពោះអ្នកមិនមានឈ្មោះទៅសិក្សា នៅតែមិនមានឈ្មោះទៅសិក្សា រហូត។ សូមយកចិត្តទុកដាក់លុបបំបាត់នូវកង្វះខាតនេះ»។
លោក ស ខេង ក៏បានណែនាំប្រធានអង្គភាពទាំងអស់ត្រូវចេះឲ្យតម្លៃនិងផ្តល់តួនាទីដល់មន្ត្រីវ័យក្មេងដែលមានសមត្ថភាពនិងសក្តានុពលក្នុងការបំពេញភារកិច្ច ក្រោយពីពួកគេបានបញ្ចប់ការសិក្សាត្រឹមត្រូវ ជាជាងផ្តល់តួនាទីដល់មន្ដ្រីនគរបាលដែលរត់ការមិនបានរៀនសូត្រ ឡើងកាន់តំណែង ព្រោះមន្ដ្រីទាំងនោះមិនបានឆ្លងកាត់ វគ្គបណ្ដុះបណ្ដាលឡើយ ដូច្នេះការងារក៏មិនរីកចម្រើនដូចគ្នាដែរ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា អះអាងថា ការកើតមានបាតុភាពបញ្ជូនមន្ត្រីដែលមិនយកចិត្តទុកដាក់រៀនសូត្រ ឲ្យទៅរៀនសូត្រគឺអាចមកពីមានការនិយមសាច់ញាតិនិងបក្ខពួកនៅក្នុងអង្គភាពនិងស្ថាប័នផ្សេងៗមួយចំនួន។ «តិចឬច្រើន វាកើតមានក្នុងសង្គមយើង ហើយយើងឃើញមានបាតុភាពច្រើនដូចជាយើងបានឃើញនៅក្នុងបណ្តាញសង្គមក្តី។ ការលើកឡើងរបស់សម្តេចស ខេងពិតជាត្រឹមត្រូវ។ យើងអង្កេតឃើញថា របៀបនៃការចាត់តាំង បញ្ជូនមន្ត្រី ទៅរៀនសូត្រ វាក៏លេចឡើង នូវបាតុភាពមិនប្រក្រតីដែរ ដូចជានៅមានការប្រើប្រាស់សាច់ញាតិនិយម បងប្អូនឬបក្ខពួកវាតែងតែកើតមានឡើងនៅស្ថាប័នរដ្ឋរបស់យើង មិនត្រឹមតែស្ថាប័ននគរបាលទេ ហើយក្រសួងខ្លះ គេចាត់ទុកជាក្រសួងគ្រួសារក៏មានដែរ ដែលឪ រដ្ឋមន្ត្រី កូនរដ្ឋលេខាធិការ ក្មួយប្រធានខុទ្ទកាល័យ ហើយកូនស្រីហិរញ្ញវត្ថុ»។
បើតាមលោក ភា រដ្ឋាភិបាល មិនអនុញ្ញាតឲ្យមានបក្ខពួកនិយមបែបនេះទៀតទេដោយសារតែវាអាចធ្វើឲ្យបាត់បង់ជំនឿពីពលរដ្ឋម្ចាស់ឆ្នោតហើយក៏អាចបង្កបញ្ហាធំ ក្នុងប្រព័ន្ធរដ្ឋបាលរបស់ជាតិដែរ ហេតុដូច្នេះហើយរដ្ឋាភិបាលបានធ្វើកំណែទម្រង់ស៊ីជម្រៅ នឹងជួយកាត់បន្ថយបាតុភាពបែបនេះ។
អ្នកវិភាគនយោបាយលោក មាស នី និងលោក ឱក សេរីសោភក្តិ៍ មិនអាចទាក់ទងសុំអធិប្បាយបានទេ៕