ភ្នំពេញៈ លោកនាយករដ្ឋមន្ត្រី ហ៊ុន សែន បានដាក់បញ្ជាឲ្យស្ថាប័នមានសមត្ថកិច្ចថ្នាក់ជាតិ និងថ្នាក់ក្រោមជាតិ ចាត់វិធានការផ្លូវច្បាប់ភ្លាមៗ ចំពោះក្រុម ឬបុគ្គលណាមួយដែលនិយាយបំភ្លៃថា រាជរដ្ឋាភិបាល បានកំពុងប្រើប្រាស់ផែនទីក្លែងក្លាយ ក្នុងការងារបោះបង្គោលព្រំដែន កម្ពុជា-វៀតណាម។
ការដាក់បញ្ជានេះ ធ្វើឡើងតាមលទ្ធផលនៃសេចក្តីប្រកាសព័ត៌មាន នៃសម័យប្រជុំពេញអង្គគណៈរដ្ឋមន្ត្រី ចុះថ្ងៃទី២១ ខែសីហា ឆ្នាំ២០១៥ និងបន្ទាប់ពីរាជរដ្ឋាភិបាលកម្ពុជា បានទទួលផែនទីពីអង្គការសហប្រជាជាតិចំនួន ១៨ផ្ទាំង កាលពីថ្ងៃព្រហស្បតិ៍ និងបានផ្ទៀងផ្ទាត់រួចរាល់ ព្រមទាំងប្រកាសទទួលស្គាល់ដោយលោក វ៉ា គឹមហុង ប្រធានគណៈកម្មាធិការទទួលបន្ទុកកិច្ចការព្រំដែនថា ដូចគ្នាទៅនឹងផែនទីរបស់រដ្ឋាភិបាលខ្នាត ១/១០០.០០០ ដែលប្រើសម្រាប់បោះបង្គោលព្រំដែនបច្ចុប្បន្ន។
អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន បានបញ្ជាក់ថា រដ្ឋាភិបាលចង់បញ្ឈប់នូវសកម្មភាពវាយប្រហារ ដែលមានលក្ខខណ្ឌជាបទល្មើស ចោទប្រកាន់ចំពោះផែនទី ដែលត្រូវបានទទួលស្គាល់ដោយអតីតព្រះមហាក្សត្រ និងព្រះមហាក្សត្របច្ចុប្បន្ន រួមទាំងសភាផងនោះ។
លោកថា៖ «ការចោទបំភ្លឺ នោះគឺជាសកម្មភាពប្រឆាំងនឹងផលប្រយោជន៍ជាតិ ហើយប៉ះពាល់ដល់សន្តិសុខជាតិ ដែលអ្នកទាំងនោះ ត្រូវទទួលខុសត្រូវចំពោះមុខច្បាប់»។
ស្របគ្នានឹងការលើកឡើងនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន្ត បានឲ្យដឹងដែរថា នៅព្រឹកថ្ងៃសុក្រដដែលនោះ លោកនាយករដ្ឋមន្ត្រី ហ៊ុន សែន ក៏បានផ្ញើសារពីលទ្ធផលនៃការផ្ទៀងផ្ទាត់ផែនទី ដែលផ្តល់ដោយអង្គការសហប្រជាជាតិ ទៅប្រធានគណបក្សសង្គ្រោះជាតិ លោក សម រង្ស៊ី និងស្នើបញ្ឈប់ការប្រើប្រាស់បញ្ហាព្រំដែនជាល្បែងនយោបាយបន្តទៀត។
សារនោះមានខ្លឹមសារថា៖ «…សុំ ឯ.ឧ កុំបន្ទោសខ្ញុំថា ប្រើល្បិចយកសត្វមានពឹសចេញពីរូង ព្រោះផែនទីត្រឹមត្រូវរបស់ ឯ.ឧ សាហាវជាងសត្វអសិរពឹសទៅទៀត ព្រោះផែនទីនេះ មិនត្រឹមតែបោកប្រាស់ប្រជាជនប៉ុណ្ណោះទេ តែផែនទីនេះ បានធ្វើឲ្យសហការី ឯ.ឧ ខ្លះ ជាប់គុក និងខ្លះទៀតកំពុងរត់គេចខ្លួន។ ខ្ញុំសង្ឃឹមថា ចាប់ពីពេលនេះតទៅ បញ្ហាព្រំដែនពិសេសព្រំដែនកម្ពុជា-វៀតណាម លែងក្លាយទៅជាល្បែងនយោបាយ បោកប្រាស់ប្រជាពលរដ្ឋពីសំណាក់ ឯ.ឧ ផ្ទាល់ និងមនុស្សក្នុងគណបក្ស ឯ.ឧ តទៅទៀត»។
តបនឹងរឿងនេះ លោក សម រង្ស៊ី ដែលកំពុងស្ថិតនៅប្រទេសអូស្ត្រាលី បានឲ្យដឹងតាមអ៊ីម៉ែលថា រាល់ព្រឹត្តិការណ៍ដែលបានកើតឡើងថ្មីនេះ គឺសរបញ្ជាក់ឲ្យឃើញថា បញ្ហាព្រំដែនកម្ពុជា-វៀតណាម គឺជាចំណុចរសើបបំផុតសម្រាប់គណបក្សកាន់អំណាច។
លោកបន្តថា បញ្ហាជាច្រើនទៀត ដែលកម្ពុជា កំពុងជួបប្រទះ និងត្រូវដោះស្រាយមានដូចជា ភាពក្រីក្រ អយុត្តិធម៌សង្គម ការរំលោភសិទ្ធិមនុស្ស អំពើពុករលួយ ការបណ្តេញចេញ ការបំផ្លាញបរិស្ថាន ភាពរអាក់រអួលនៃដំណើរការប្រព័ន្ធអប់រំ សុខភាព រួមនឹងបញ្ហាពលករចំណាកស្រុកផងដែរ។
លោក សម រង្ស៊ី បានថ្លែងថា៖ «ព្រោះយើងចង់ឃើញដំណើរការបោះឆ្នោត នៅឆ្នាំ ២០១៧-២០១៨ រលូត ហើយខ្ញុំក៏ចង់ឲ្យសមាជិក សមាជិកាគណបក្សសង្គ្រោះជាតិទាំងអស់ ផ្តោតការរិះគន់ទៅលើបញ្ហាទាំងនេះវិញ ដើម្បីស្វែងរកដំណោះស្រាយជួយដល់ប្រជាពលរដ្ឋកម្ពុជា។ ការរិះគន់ក្នុងន័យស្ថាបនានេះ គឺជាស្មារតីនៃវប្បធម៌សន្ទនា ដែលនឹងបញ្ជាក់ពីតម្លៃនៃសន្តិភាពលទ្ធិប្រជាធិបតេយ្យ»។
គួរបញ្ជាក់ថា សមាជិកព្រឹទ្ធសភាមកពីគណបក្ស សម រង្ស៊ី លោក ហុង សុខហួរ ត្រូវបានតុលាការសម្រេចឃុំខ្លួន ដោយចោទ ៣ បទល្មើស គឺការក្លែងឯកសារសាធារណៈ ការប្រើប្រាស់ឯកសារក្លែងក្លាយ និងញុះញង់ឲ្យមានអសន្តិសុខ ពាក់ព័ន្ធនឹងសន្ធិសញ្ញាកម្ពុជា និងវៀតណាម នៅឆ្នាំ១៩៧។
លោក ហុង សុខហួរ ត្រូវបានសមត្ថកិច្ច ចាប់ខ្លួនពីរថ្ងៃ បន្ទាប់ពីលោកនាយករដ្ឋមន្ត្រី ហ៊ុន សែន បានចេញបញ្ជាឲ្យចាប់ខ្លួន ដោយចោទថា ក្លែងឯការសន្ធិសញ្ញាកម្ពុជា និងវៀតណាម ឆ្នាំ១៩៧៕
