តាកែវៈ លោក អ៊ូច ភា អភិបាលខេត្ដតាកែវបានថ្លែងនៅក្នុងសន្និសីទសារព័ត៌មាននៅទីស្ដីការគណៈរដ្ឋមន្ត្រីកាលពីម្សិលមិញថា សមត្ថកិច្ចបានបង្ក្រាបករណីបទល្មើសគ្រឿងញៀនបានចំនួន ៥៩ ករណី និងឃាត់ខ្លួនមនុស្សចំនួន ១២៥ នាក់ក្នុងរយៈពេល ៦ ខែ នាឆ្នាំ ២០២០។ ករណីនេះបើធៀបនឹងឆ្នាំ ២០១៩ ក្នុងរយៈពេលដូចគ្នាបង្ក្រាបបាន ៣៦ ករណី និងឃាត់ខ្លួនមនុស្ស ៧២ នាក់។
លោកអភិបាលខេត្ដបានឲ្យដឹងទៀតថា ការបង្ការ និងបង្ក្រាបបទល្មើសគ្រប់ប្រភេទបានទទួលលទ្ធផលជោគជ័យដោយមានយន្តការគណៈបញ្ជាការឯកភាពរួមទាំងការយកចិត្តទុក្ខដាក់ពង្រឹងការអនុវត្តគោលនយោបាយ ភូមិ-ឃុំមានសុវត្ថិភាព ការធ្វើវេទិកាសាធារណៈ ដោយមានការចូលរួមយ៉ាងសកម្មពីសំណាក់ប្រជាពលរដ្ឋ។
លោកអភិបាលខេត្ដថ្លែងថា រដ្ឋបាលខេត្ដបានដាក់ចេញនូវបទបញ្ជាស្តីពីការលុបបំបាត់ល្បែងស៊ីសង ការជួញដូរ ចែកចាយ និងការប្រើប្រាស់គ្រឿងញៀនគ្រប់ប្រភេទរបស់គណៈបញ្ជាការឯកភាពរដ្ឋបាលខេត្ត គួបផ្សំនឹងការប្រើបាស់វិធានការណ៍សរុប មធ្យោបាយសរុប និងកម្លាំងសរុបបានធ្វើឲ្យសន្តិសុខសណ្តាប់ធ្នាប់សាធារណៈនៅទូទាំងខេត្តកាន់តែប្រសើរឡើងជាលំដាប់។
ជាក់ស្តែងការងារថែរក្សាសន្តិសុខសណ្តាប់ធ្នាប់ បង្ក្រាបបានបទល្មើសព្រហ្មទណ្ឌចំនួន ១៦៣ ករណី ក្នុងឆ្នាំ ២០១៩ ប្រៀបធៀបនឹងឆ្នាំ ២០១៨ បង្ក្រាបបាន ១៥១ ករណី។
លោក សុខ សំណាង ស្នងការនៃស្នងការដ្ឋាននគរបាលខេត្ដតាកែវថ្លែងក្នុងសន្និសីទនេះដែរថា បញ្ហាគ្រឿងញៀនគឺជាបញ្ហាសកល ហើយប្រទេសកម្ពុជាជាប្រទេសរងគ្រោះពីបញ្ហាគ្រឿងញៀន។ ប្រទេសកម្ពុជាពិតជាមានអ្នកប្រើប្រាស់គ្រឿងញៀនមែន ប៉ុន្ដែមិនមែនជាអ្នកផលិតគ្រឿងញៀនទេ៕