មណ្ឌលគិរី៖ អាជ្ញាធរខេត្តមណ្ឌលគិរីពន្លឿនការស្ថាបនាស្ពាន និងផ្លូវឆ្ពោះទៅកាន់ច្រកទ្វារព្រំដែនទ្វេភាគីណាមលៀរ ក្នុងស្រុកពេជ្រាដា ជាប់ព្រំដែនវៀតណាម ដើម្បីងាយស្រួលដល់ប្រជាពលរដ្ឋធ្វើចរាចរណ៍ ក៏ដូចជាការផ្លាស់ប្តូរកសិផលនានាឲ្យកាន់តែមានលក្ខណៈល្អប្រសើរ ខណៈគម្រោងនេះ សម្រេចបានជាង ៥០ ភាគរយ។
ក្នុងឱកាសចុះពិនិត្យមើលការស្ថាបនាស្ពាន និងផ្លូវ ឆ្ពោះទៅច្រកទ្វារព្រំដែនទ្វេភាគីណាមលៀរ ក្នុងស្រុកពេជ្រាដា លោក ស្វាយ សំអ៊ាង អភិបាលខេត្តមណ្ឌលគិរី បានជំរុញឲ្យមន្ត្រីជំនាញយកចិត្តទុកដាក់ និងពន្លឿនការសាងសង់ស្ពាន និងផ្លូវមួយខ្សែនេះ ឲ្យបានទាន់ពេលវេលា ដើម្បីជួយសម្រួលដល់ការធ្វើដំណើរ ក៏ដូចជាការដឹកកសិផលនានារបស់ប្រជាពលរដ្ឋ ឲ្យកាន់តែមានលក្ខណៈល្អប្រសើរ។
លោកបានបញ្ជាក់ថា៖ «ការស្ថាបនាស្ពានអូរផ្លាយ ១ កន្លែង និងផ្លូវ ១ ខ្សែ ឆ្ពោះទៅច្រកទ្វារព្រំដែន ក្នុងស្រុកពេជ្រាដា ជាគម្រោងរបស់មន្ទីរសាធារណការ និងដឹកជញ្ចូនខេត្ត ដែលប្រើប្រាស់ថវិកាជាតិ។ មន្ទីរជំនាញ ត្រូវយកចិត្តទុកដាក់ស្ថាបនាស្ពាន និងផ្លូវនេះ ឲ្យសមស្របតាមស្តង់ដា និងលក្ខណៈបច្ចេកទេស ដើម្បីធ្វើយ៉ាងណាឲ្យមានគុណភាព ក្នុងការប្រើប្រាស់ឲ្យបានយូរអង្វែង»។
ក្រៅពីជំរុញមន្ត្រីជំនាញ លោក ស្វាយ សំអ៊ាង ក៏ស្នើឲ្យប្រជាពលរដ្ឋទាំងអស់ ត្រូវចូលរួមសហការជាមួយមន្ទីរជំនាញ និងអាជ្ញាធរមូលដ្ឋាន ដើម្បីធ្វើយ៉ាងណាឲ្យដំណើរការសាងសង់ស្ពាន និងផ្លូវនេះ ឲ្យទទួលបានជោគជ័យ ខណៈលោកចាត់ទុកសមិទ្ធផលទាំងនេះ គឺជាសរសៃឈាមរបស់ប្រជាពលរដ្ឋនៅក្នុងខេត្ត ក៏ដូចជាភ្ញៀវទេសចរដែលមកទស្សនាកម្សាន្តនៅតាមរមណីយដ្ឋាន និងខ្សែក្រវាត់ព្រំដែនផងដែរ។
ការស្ថាបនាស្ពានបេតុងអូរផ្លាយដែល មានប្រវែង ៤៥ ម៉ែត្រ ទទឹង ១០ ម៉ែត្រ ត្រូវបានចាប់ផ្តើមអនុវត្តតាំងពីថ្ងៃទី ៣០ ខែ វិច្ឆិកា ឆ្នាំ ២០២០ ខណៈតាមគម្រោងស្ពាននេះ ត្រូវសាងសង់រួចរាល់នៅចុងឆ្នាំ ២០២១ នេះ។ នេះបើតាមលោក រស់ គីមធន ប្រធានមន្ទីរសាធារណការ និងដឹកជញ្ចូនខេត្តមណ្ឌលគិរី បានប្រាប់ ភ្នំពេញ ប៉ុស្តិ៍ នៅថ្ងៃព្រហស្បតិ៍។
លោក រស់ គីមធន បានឲ្យដឹងទៀតថា ក្រៅពីស្ពាន គឺមានផ្លូវចាក់កៅស៊ូ ១ ខ្សែ ដែលតភ្ជាប់ពីផ្លូវជាតិលេខ ៧៦ ត្រង់ចំណុច គ.ម ១៣៥+១០០ ផ្លូវខេត្តលេខ ៣៧៦៤ មានប្រវែងសរុប ៥១ គីឡូម៉ែត្រ រហូតដល់ច្រកទ្វារព្រំដែនទ្វេភាគីណាមលៀរ ក្នុងស្រុកពេជ្រាដា។
លោកបញ្ជាក់ថា៖ «ផ្លូវនេះ ស្ថាបនារួចរាល់បានប្រវែងជាង ៣៣ គីឡូម៉ែត្រហើយ ក្នុងឆ្នាំ ២០២០ បើគិតទៅរួចរាល់ជាង ៥០ ភាគរយហើយ។ ដោយយើងកំពុងបន្តចាក់ផ្លូវកៅស៊ូបន្ថែមប្រវែង ៧០០ ម៉ែត្រទៀត ចំណែកផ្លូវនៅសល់ ១៥ គីឡូម៉ែត្រ គឺមិនទាន់ស្ថាបនាទេ ព្រោះដោយសារតែមានជំងឺរាតត្បាត ធ្វើឲ្យការសាងសង់មានបញ្ហាខ្លះៗ»។
យ៉ាងណាចំពោះផ្លូវដែលនៅសេសសល់នេះ លោកបានអះអាងថា មន្ទីរនឹងខិតខំលើកគម្រោងផែនការនៅឆ្នាំបន្តបន្ទាប់ទៀត ដើម្បីធ្វើយ៉ាងណា ឲ្យការដំណើរការស្ថាបនាផ្លូវ ១ ខ្សែនេះ ឲ្យបានរួចរាល់នាពេលខាងមុន រហូតដល់ព្រំដែន ដើម្បីងាយស្រួលដល់ប្រជាពលរដ្ឋធ្វើចរាចរណ៍ ក៏ដូចជា ការផ្លាស់ប្តូរកសិផលនានា រវាងប្រទេសជិតខាង ឲ្យកាន់តែមានលក្ខណៈល្អប្រសើរ។
លោកបញ្ជាក់ថា៖ «ផ្លូវនេះ គឺជាផ្លូវតែមួយទៅច្រកព្រំដែនណាមលៀរ ហើយបើយើងបានតភ្ជាប់កំណាត់ផ្លូវមួយខ្សែទៀត បានដល់ព្រំដែននេះ យើងនឹងមានផលល្អ សម្រាប់ប្រជាពលរដ្ឋធ្វើដំណើរដឹកកសិផល ចេញចូលទំនាក់ទំនងទៅប្រទេសជិតខាង និងទៅតំបន់ទេសចរណ៍នានា»៕