.jpg)
ទិដ្ឋភាពនៃដំណើរការនាំកុមារទៅព្យាបាលនៅមន្ទីរពេទ្យគន្ធបុប្ផាកន្លងមក។ ភ្នំពេញ ប៉ុសិ៍្ត
ភ្នំពេញៈ ក្រោយពេលជួលក្នុងតម្លៃទាបរយៈពេល ១៨ ឆ្នាំ ឧកញ៉ា គិត ម៉េង បានសម្រេចប្រគល់ដីដែលមានតម្លៃ ៨ លានដុល្លារទៅមូលនិធិគន្ធបុប្ផា របស់លោកនាយករដ្ឋមន្ត្រី ហ៊ុន សែន។ នេះបើតាមការបញ្ជាក់របស់លោកនាយករដ្ឋមន្ត្រី កាលពីព្រឹកមិញនេះ។
ក្នុងពិធីប្រកាសជាផ្លូវការនូវ មូលនិធិគន្ធបុប្ផា ដែលលោកជាស្ថាបនិក និង ជាប្រធានកិត្តិយស លោកនាយករដ្ឋមន្ត្រី ហ៊ុន សែន បានថ្លែងថា ឧកញ៉ា គិត ម៉េង បានសរសេរសំបុត្រប្រគល់ដីមន្ទីរពេទ្យគន្ធបុប្ផានៅភ្នំពេញ ទៅមូលនិធិ គន្ធបុប្ផា ក្រោយពេលមន្ទីរពេទ្យកុមារនេះបានជួលរយៈពេល ១៨ ឆ្នាំ។
លោកបានថ្លែងថា៖ «អ៊ីចឹង ដីនេះឡើងតាមតម្លៃទីផ្សារដល់ ៨ លានដុល្លារទៅហើយ។ ម្សិលមិញនេះ លោកឧកញ៉ា គិត ម៉េង បានសរសេរសំបុត្រមកខ្ញុំបានប្រគល់ដីនេះមកកាន់មូលនិធី។ អ៊ីចឹងតម្លៃដីនេះស្មើ ៨ លាន យើងទទួលយកនូវដីនេះ ដែលមានតម្លៃ ៨ លានដាក់ក្នុងមូលនិធិ ហើយមូលនិធិនឹងផ្ទេរដីនេះ ទៅឲ្យមន្ទីរពេទ្យគន្ធបុប្ផាតាមរយៈប័ណ្ណកម្មសិទ្ធិតែម្តង»។
លោកថា លោកនឹងបន្តគាំទ្រមូលនិធិនេះ បើលោកនៅជានាយករដ្ឋមន្ត្រីនៅអាណត្តិក្រោយ «សម្រាប់អាណត្តិបន្តទៅមុខ បើខ្ញុំនៅតែបន្តកាន់តំណែងជានាយករដ្ឋមន្ត្រី នៃរាជរដ្ឋាភិបាលដែលខ្ញុំនឹងបន្តដឹកនាំផ្តល់ការគាំទ្រជាប់មិនដាច់ដល់មន្ទីរពេទ្យគន្ធបុប្ផា សំដៅធានាឲ្យខាងតែបាននូវចីរភាពនៃកិច្ចដំណើរការរបស់មន្ទីរពេទ្យនេះ ក្នុងការផ្តល់សេវាព្យាបាលនិងថែទាំសុខភាពតាមរយៈការបន្តផ្តល់ថវិកា យ៉ាងតិច ១០ លានដុល្លារក្នុងមួយឆ្នាំសម្រាប់ប្រតិបត្តិការរបស់មន្ទីរពេទ្យ និងយ៉ាងតិច ៥ លានដុល្លារក្នុង ១ ឆ្នាំសម្រាប់មូលនិធិគន្ធបុប្ផា ក៏ដូចជា ការបន្តវិភាជន៍ប្រាក់ចំណូលលក់សំបុត្រចូលទស្សនាប្រាសាទអង្គរ ជូនដល់មន្ទីរពេទ្យគន្ធបុប្ផាជាប្រចាំផងដែរ»៕
