ភ្នំពេញៈ លោកនាយករដ្ឋមន្ត្រីហ៊ុន សែន ជំរុញលើកទឹកចិត្តដល់ប្រជាកសិករបន្តការដាំដុះដោយប្រើប្រាស់ជី ធម្មជាតិដើម្បីឆ្លើយតបទៅនឹងតម្រូវការរបស់អ្នកបរិភោគ។
ថ្លែង ពីខេត្តកណ្តាល ក្នុងពិធីសម្ពោធរោងចក្រផលិតជីកសិកម្មរបស់ក្រុមហ៊ុនសម្ព័ន្ធ អន្តរជាតិផ្កាយប្រាំកម្ពុជាដែលមានទីតាំងស្ថិតនៅក្នុងឃុំ សំរោងធំ ស្រុកកៀនស្វាយ ខេត្តកណ្ដាល កាលពីម្សិលមិញ លោកនាយករដ្ឋមន្ត្រីហ៊ុន សែនបានជំរុញលើកទឹកចិត្តដល់ប្រជាកសិករឲ្យបន្តការប្រើប្រាស់ជី ធម្មជាតិឲ្យបានច្រើនក្នុងការដាំដុះផលដំណាំរបស់ពួកគេ។ លោកបានថ្លែងថា៖ «ថ្វីបើយើងត្រូវការជី[គីមីកសិកម្ម]ជាច្រើនដើម្បីបង្កើនផលិតផលកសិកម្មរបស់យើង តែទន្ទឹមជាមួយគ្នានេះ យើងត្រូវជំរុញដល់កសិករឲ្យប្រើប្រាស់ជីធម្មជាតិជាបន្តទៀតព្រោះអ្នក បរិភោគភាគច្រើននាពេលបច្ចុប្បន្នមានការយល់ដឹងពីសុវត្ថិភាព ចំណីអាហារ ហើយពួកគេចៀសវាងទិញនូវបន្លែផ្លែឈើណាដែលប្រើជីគីមី»។
លោកបានបន្ថែមថា ប្រទេសកម្ពុជានៅមានលទ្ធភាពប្រើជីលាមកសត្វ និងជីដែលផ្សំឡើងពីរុក្ខជាតិពណ៌បៃតង ដូចជាទន្ទ្រានខេត្ត សណ្ដែកខ្មោច កំប្លោក ចកជា ដើម។ រួមទាំងកាកសំណល់ផ្ទះបាយ ដែលសុទ្ធតែជាជីធម្មជាតិដ៏មានគុណភាពអាចជួយឲ្យដីមានជីវជាតិ និងជួយឲ្យដំណាំមានគុណភាពល្អ និងបរិមាណផលច្រើន។
យោង តាមរបាយការណ៍របស់ក្រសួងកសិកម្មដែលត្រូវបានថ្លែងឲ្យដឹងជា សាធារណៈដោយលោកនាយករដ្ឋមន្ត្រី កាលពីម្សិលមិញបានបញ្ជាក់ថា កាលពីឆ្នាំ២០១១ កម្ពុជាបាននាំចូលជីគីមីកសិកម្មចំនួនជាង៥១ម៉ឺនតោន និងនៅឆ្នាំ២០១២ បាននាំចូលជីជាង៥៥,៦ម៉ឺនតោន។ នៅឆ្នាំ២០១៣ខាងមុខនេះ កម្ពុជាត្រូវការនាំចូលជីពីក្រៅប្រទេសប្រមាណជាង៦១,៧ម៉ឺនតោន សម្រាប់ប្រើប្រាស់លើផ្ទៃដីដាំដុះសរុបប្រមាណ៤,១លានហិកតា។
លោកបានបន្តទៀតថា នៅពេលនេះគេរំពឹងថា រោងចក្រផលិតជីកសិកម្មផ្កាយប្រាំកម្ពុជា នឹងជួយកាត់បន្ថយនូវលំហូរសាច់ប្រាក់ពីកម្ពុជាទៅក្រៅប្រទេសដោយ រោងចក្រនេះមានសមត្ថភាពផលិតជីនៅក្នុងដំណាក់កាលទី១របស់ ខ្លួនបានចំនួន៣៥ម៉ឺនតោនក្នុងមួយឆ្នាំ ហើយក្នុងដំណាក់កាលទី២ អាចឈានដល់កន្លះលានតោនក្នុងមួយឆ្នាំ។
ទោះជាបែបណាលោកនាយក រដ្ឋមន្ត្រីបានអំពាវនាវដល់ម្ចាស់ក្រុមហ៊ុន រោងចក្រផលិតជីមួយនេះឲ្យគិតគូអំពីគុណភាពផលិតផលជីនិងតម្លៃ របស់វា ដែលនេះជាបញ្ហាចម្បងក្នុងការទប់ស្កាត់ការនាំចូលជីពី ក្រៅប្រទេស។ លោកបានថ្លែងថា៖«បើសិនចង់បានលក់ផលិតផលដាច់ ហើយកុំឲ្យមានការនាំចូលជីពីក្រៅប្រទេស ជម្រើសដែលល្អត្រូវមានគុណភាពឲ្យវាប្រាកដប្រជានិងតម្លៃឲ្យវា ថោក បើមិនដូច្នោះទេសូមកុំមកពឹងពាក់រដ្ឋាភិបាលថាសូមជួយទប់ស្កាត់ កុំឲ្យមានការនាំចូលជីពីបរទេស រដ្ឋាភិបាលមិនមាននយោបាយបែបនេះទេ»។
លោកយ៉ង សាំងកុមារ ប្រធានមជ្ឈមណ្ឌលស្រាវជ្រាវ និងអភិវឌ្ឍន៍កសិកម្មកម្ពុជាបានថ្លែងថា ការជំរុញលើកទឹកចិត្តជាការប្រសើរយ៉ាងហោចណាស់ធ្វើឲ្យប្រជាកសិករដែលខិតខំព្យាយាមប្រើប្រាស់ជីធម្មជាតិដើម្បីការពារនៅ បរិស្ថាន និងសុវត្ថិភាពដល់អ្នកបរិភោគ។ លោកបានថ្លែងថា៖«ជាមួយគ្នានេះត្រូវជំរុញដល់ស្ថាប័នពាក់ព័ន្ធចុះធ្វើការផ្សព្វផ្សាយនិងបង្រៀនបច្ចេកទេសក្នុងការធ្វើជីធម្មជាតិបន្ថែមទៀតនិង ស្វែងរកទីផ្សារផលិតផលសម្រាប់ប្រជាកសិករ ជាពិសេសត្រូវបង្កើតកម្មវិធីឡជីវឧស្ម័ននៅ តាមបណ្តាខេត្តក្រុងឲ្យបានកាន់តែច្រើន»៕
