The Phnom Penh Post Search

Search form




Logo of Phnom Penh Post newspaper Phnom Penh Post - លោក​នាយក​រដ្ឋ​មន្ត្រី​អំពាវនាវ​ឲ្យ​មាន​ការ​ប្រុង​ប្រយ័ត្ន​ពី​ការ​បរិភោគ​ចំណី​អាហារ

លោក​នាយក​រដ្ឋ​មន្ត្រី​អំពាវនាវ​ឲ្យ​មាន​ការ​ប្រុង​ប្រយ័ត្ន​ពី​ការ​បរិភោគ​ចំណី​អាហារ

លោក​នាយក​រដ្ឋ​មន្ត្រី​អំពាវនាវ​ឲ្យ​មាន​ការ​ប្រុង​ប្រយ័ត្ន​ពី​ការ​បរិភោគ​ចំណី​អាហារ

ភ្នំពេញៈ លោក​នាយក​រដ្ឋ​មន្ត្រី​ហ៊ុន សែន បាន​អំពាវ​នាវ​ឱ្យ​មាន​ការ​ប្រុង​ប្រយ័ត្ន​ចំពោះ​ការ​បរិភោគ​ចំណី​អាហារ​និង​ជំរុញ​ឲ្យ​មាន​ការ​ស្រាវ​ជ្រាវ អំពី​ករណី​ពុល​អាហារ បន្ទាប់​ពី​បាន​កើត​ឡើង​ជា​បន្ត​បន្ទាប់​នា​ពេល​ថ្មីៗ​នេះ។

ថ្លែង ក្នុង​ពិធី​ចែក​សញ្ញាបត្រ​ដល់​និស្សិត​សាកល​វិទ្យាល័យ​កម្ពុជា​នា​ព្រឹក ​ថ្ងៃ​ម្សិលមិញ នៅ​រាជ​ធានី​ភ្នំពេញ លោក​នាយក​រដ្ឋ​មន្ត្រី ហ៊ុន សែន បាន​អំពាវនាវ​ដល់​ប្រជា​ពលរដ្ឋ​ឲ្យ​មាន​ការ​យក​ចិត្ត ទុក​ដាក់ និង​ប្រុងប្រយ័ត្ន​ខ្ពស់​អំពី​បញ្ហា​សុវត្ថិភាព​និង​គុណភាព​ចំណី​អាហារ។ លោក​នាយក​រដ្ឋ​មន្ត្រី​ក៏​បាន​ជំរុញ​ឲ្យ​មន្ត្រី​ជំនាញ​ផ្នែក​សុវត្ថិភាព ចំណី​អាហារ សហការ​ជាមួយ​មន្ត្រី​ពាក់ព័ន្ធ​ធ្វើ​ការ​ ចុះ​ស៊ើប​អង្កេត​អំពី​ករណី​ទាំង​នេះ។លោក​បាន​ថ្លែង​ថា ៖«ពាក់​ព័ន្ធ​ នឹង​សុវត្ថិភាព​ចំណី​អាហារ​នេះ ទាមទារ​ឲ្យ​មាន​ការ​ប្រុងប្រយ័ត្ន។ ពីមុន​ងាប់​នឹង​អត់​ស៊ី តែ​ឥឡូវ​នេះ​ងាប់​នឹង​ស៊ី​ច្រើន​ពេក»។

លោក​នាយក រដ្ឋ​មន្ត្រី​ក៏​បាន​លើក​យក​រឿង​កំប្លែង​មួយ​មក​និយាយ ដើម្បី​ជា​ការ​ដាស់​តឿន​ឲ្យ​មាន​ការ​ប្រុងប្រយ័ត្ន​លើ​សុវត្ថិភាព​ចំណី អាហារ​នេះ​ថា ដើម​ឡើយ​មាន​កូន​សិស្ស​ម្នាក់​សួរ​ទៅ​អ្នក​គ្រូ​របស់​គាត់​ថា​ តើ​ផ្សិត​ទាំង​អស់​គេ​ហូប​បាន​ប៉ុន្មាន​ដង? អ្នក​គ្រូ​ឆ្លើយ​ថា ផ្សិត​ទាំង​​អស់​គេ​ហូប​បាន​តែ​ម្ដង។​ កូន​សិស្ស​នោះ​ឆ្ងល់​ណាស់​ហើយ​សួរ​ទៀត​ថា​ហេតុ​អី​បាន​ជា​គេ​ហូប​បាន​តែ​ម្ដង? អ្នក​គ្រូ​ឆ្លើយ​ថា៖«អើ​បើ​ពុល​ងាប់​ហើយ​បាន​ស៊ី​អី​ទៀត»​។ លោក​បាន​បញ្ជាក់​ថា​៖«​ផ្សិត​មិន​មែន​ស៊ី​បាន​គ្រប់​តែ​ផ្សិត​នោះ​ទេ ​[មាន​ផ្សិត​ខ្លះ​វា​ពុល​]»។

កាល​ពី​ម្សិលម៉្ងៃ កុមារា កុមារី​ក្រោម​អាយុ​១៥​ឆ្នាំ ចំនួន​១៧​នាក់​ នៅ​សាលា​បឋម​សិក្សា​កៀន​ម៉ា ឃុំ​កំពង់​អុស ស្រុក​ជលគិរី ខេត្ត​កំពង់​ឆ្នាំង បាន​ពុល​ដំឡូង​ឆឹង ប៉ុន្តែ​ត្រូវ​បាន​ដឹក​ទៅ​សង្គ្រោះ​នៅ​មន្ទីរ​ពេទ្យ​ខេត្ត​ទាន់​ពេល​វេលា។ ករណី​នេះ​ដែរ កាល​ពី​ព្រឹក​ថ្ងៃ​អង្គារ ក្រុម​យុវជន​ស្ម័គ្រចិត្ដ របស់​លោក​នាយក​រដ្ឋ​មន្ត្រី​ហ៊ុន សែន និង​ក្រុម​មន្ដ្រី​ជំនាញ​ ចំនួន​១៥​នាក់ នៅ​ក្នុង​ក្រុម​ទី៥៥ ដែល​កំពុង ចុះ​វាស់​វែង​ដី​ធ្លី នៅ​ចំណុច​ឃុំ​បឹងប្រាំ ស្រុក បវេល ខេត្ដ​បាត់ដំបង បាន​ពុល​ចង្រិត​លីង​បណ្តាល​ឲ្យ​ចុក​ពោះ និង​ក្អួត​ចង្អោរ ក្រោយ​ពី​ពួក​គេ​បាន​ហូប​វា​មុន​ពេល​ចេញ​ទៅ​បំពេញ​ការងារ។ កាលពី​ដើម​ខែ​ធ្នូ ក្រុម​មន្ដ្រី​យោធា​សឹក​រង​ស្រុក​ត្រពាំង​ប្រាសាទ​ ខេត្ដ​ឧត្ដរមានជ័យ ៣​នាក់ បាន​ស្លាប់​និង​២០​នាក់​ពុល បន្ទាប់​ពី​ពួក​គេ​បាន​ហូប​ស្រា ដែល​ផ្សំ​អំពី​ទឹក​លាយ​សារ​ធាតុ​មេតាណុល។ ​ករណី​ស្រដៀង​គ្នា​នេះ​ដែរ នៅ​ក្នុង​ខេត្ត​កំពង់ចាម​កាល​ពី​ចុង​ខែ​វិច្ឆិកា​កន្លង​មក​នេះ ​មាន​ប្រជា​ពលរដ្ឋ​ចំនួន​ពីរ​នាក់​បានស្លាប់ និង​ម្នាក់​ទៀត​ត្រូវ​បាន​នាំ​យក​ទៅ​សម្រាក​ព្យាបាល​នៅ​ប្រទេស​វៀតណាម ដោយ​សារ​តែ​អ្នក​រងគ្រោះ​ទាំង​នោះ​បាន​ផឹក​ស្រា​ថ្នាំ​ដែល​គេ​បាន​ត្រាំ ជាមួយ​សត្វ​តុកកែ និង​សត្វ​អាពីង៕

អត្ថបទគួរចាប់អារម្មណ៍