ភ្នំពេញៈ លោក រៀល ខេមរិន្ទ្រ តំណាងរាស្ត្រគណបក្សសង្គ្រោះជាតិបានច្រានចោលការចោទប្រកាន់ដែលថាលោកបានកេងប្រវ័ញ្ចប្រាក់ជាច្រើនម៉ឺនដុល្លារពីការរៀបចំដំណើរទៅមើលបង្គោលព្រំដែនកម្ពុជា-វៀតណាមខេត្តស្វាយរៀង និងស្នើឲ្យអង្គភាពប្រឆាំងអំពើពុករលួយចាត់វិធានការស្វែងរកជនខិលខូចដែលបានបង្ខូចកិត្តិយសរបស់លោក។
ការលើកឡើងនេះឆ្លើយតបទៅនឹងដីកាកោះរបស់ប្រធានអង្គភាពប្រឆាំងអំពើពុករលួយលោក ឱម យ៉ិនទៀង ដែលបានប្រាប់ឲ្យលោក ខេមរិន្ទ្របច្ចុប្បន្នកំពុងទៅបំពេញទស្សនកិច្ចនៅសហរដ្ឋអាមេរិកឲ្យចូលបំភ្លឺលើករណីបណ្តឹងចំនួនបីដែលចោទថាលោកបានកេងប្រវ័ញ្ចប្រាក់រហូតដល់ ៥៥០០០ ដុល្លារ ពីការរៃអង្គាសថវិកាសម្រាប់ធ្វើដំណើរទៅព្រំដែននៅខេត្តស្វាយរៀងកាលពីខែកក្កដា។
តាមរយៈលិខិតចុះថ្ងៃទី ១៣ ខែសីហា លោក រៀល ខេមរិន្ទ្រ បានរៀបរាប់ថាថវិកាដែលលោកបានទទួលពីសប្បុរសជនទាំងក្នុង និងក្រៅប្រទេសសរុបមានតែ ២០៧៥០ ដុល្លារសម្រាប់ការរៀបចំដំណើរទៅមើលបង្គោលព្រំដែនកម្ពុជា-វៀតណាមកាលពីថ្ងៃទី ១៩ ខែកក្កដា ឆ្នាំ ២០១៥ ហើយថវិកាទាំងនោះត្រូវបានចំណាយទៅលើការជួលរថយន្ត ការទិញទង់ជាតិទង់សាសនា និងសម្ភារផ្សេងៗព្រមទាំងម្ហូបអាហារ និងទឹកសុទ្ធជាដើម។
លោកបានបញ្ជាក់ថា រាល់ការទទួលការគ្រប់គ្រង និងការចាត់ចែងថវិកាទាំងអស់គឺមានក្រុមការងារតាមផែននីមួយៗជាអ្នកទទួលបន្ទុក និងទទួលខុសត្រូវប្រកបដោយតម្លាភាព។
លោកបញ្ជាក់ថា៖ «ពាក្យបណ្តឹងនេះគឺជាការប្រឌិតក្នុងចេតនា ទុច្ចរិតមួលបង្កាត់បង្ខូចកេរ្តិ៍ឈ្មោះ និងកិត្តិយសរបស់ខ្ញុំទាំងស្រុង... ខ្ញុំសូមឲ្យអង្គភាពប្រឆាំងអំពើពុករលួយមេត្តាចាត់វិធានការស្វែងរកជនខិលខូចដែលមានចេតនាមួលបង្កាច់បង្ខូចកិត្តិយសខ្ញុំ និងចាត់វិធានការតាមនីតិវិធីដើម្បីផ្តន្ទាទោសជនទាំងនេះតាមច្បាប់ជាធរមាន»។
អ្នកនាំពាក្យស្តីទីគណបក្សសង្គ្រោះជាតិ លោក អ៊ូ ច័ន្ទឫទ្ធិ បានឲ្យដឹងថាគណបក្សនេះគាំទ្រឲ្យលោក រៀល ខេមរិន្ទ្រ ធ្វើរបាយការណ៍ពីការចំណាយនៃថវិកាទាំងនោះទៅកាន់អង្គភាពប្រឆាំងអំពើពុករលួយ ACU និងម្ចាស់ជំនួយប៉ុន្តែលោកគិតថា៖ «រឿងនេះ ACU មិនគួរចេញដីកាកោះតាមរយៈបណ្តឹងអនាមិកនោះទេព្រោះខ្ញុំគិតថាបើម្ចាស់ជំនួយចង់ដឹងពីចំណាយមែននោះពួកគេគួរតែសួរនាំ ឬចោទសួរលោក រៀល ខេមរិន្ទ្រដោយផ្ទាល់»។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានបដិសេធផ្តល់អធិប្បាយកាលពីថ្ងៃម្សិលមិញដោយថាលោកមិនទាន់បានឃើញលិខិតតបនោះនៅឡើយទេប៉ុន្តែលោកធ្លាប់បានឲ្យដឹងថាបើសិនជាការបំភ្លឺរបស់លោក រៀល ខេមរិន្ទ្រ មានហេតុផលត្រឹមត្រូវលោកនឹងជូនដំណឹងទៅកាន់អ្នកប្តឹងវិញថាករណីនេះមិនដូចការចោទប្រកាន់នោះទេ។
គួររំឭកថាលោក រៀល ខេមរិន្ទ្រ ធ្លាប់បានដឹកនាំសកម្មជនបក្ស និងប្រជាពលរដ្ឋចុះទៅពិនិត្យមើលបង្គោលព្រំដែន កម្ពុជា-វៀតណាម លេខ ២០២ និង ២០៣ ក្នុងខេត្តស្វាយរៀងចំនួនពីរលើកមកហើយ ហើយកាលពីថ្ងៃទី ២៨ ខែមិថុនា មានការប៉ះទង្គិចគ្នាមួយបានកើតឡើងធ្វើឲ្យពលរដ្ឋកម្ពុជា និងវៀតណាមរងរបួសទាំងសងខាងហើយក្នុងនោះរូបលោកក៏រងរបួសផងដែរ៕
