.jpg)
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន។ ហេង ជីវ័ន
ភ្នំពេញៈ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានអះអាងថា វិទ្យុសំឡេងសហរដ្ឋអាមេរិក (VOA) និងវិទ្យុអាស៊ីសេរី (RFA) អាចនឹងបើកការិយាល័យរបស់ខ្លួនឡើងវិញបាន ប៉ុន្តែត្រូវគោរពកាតព្វកិច្ចសារពើពន្ធជាមុនសិន។
លោក កាញារីទ្ធ កាលពីថ្ងៃទី ២៥ ខែមករា ឆ្នាំ ២០១៩ បានធ្វើលិខិតមួយឆ្លើយតបទៅនឹងសេចក្ដីថ្លែងការណ៍របស់ក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា បានឲ្យដឹងថា៖ «ចំពោះករណីស្នើសុំបើកការិយាល័យតំណាងវិទ្យុសំឡេងសហរដ្ឋអាមេរិក (VOA) និងវិទ្យុអាស៊ីសេរី (RFA) អគ្គនាយកដ្ឋានពន្ធដារបានស្នើមកក្រសួងព័ត៌មាន មុនផ្តល់អាជ្ញាប័ណ្ណ ឬផ្តល់ការអនុ-ញ្ញាតឲ្យចុះបញ្ជីស្របច្បាប់ដល់ការិយាល័យវិទ្យុសំឡេងសហរដ្ឋអាមេរិក (VOA) និងវិទ្យុអាស៊ីសេរី (RFA) នេះគួរភ្ជាប់នូវលក្ខខណ្ឌនៃការគោរពកាតព្វកិច្ចសារពើពន្ធជាមុន»។
លិខិតដដែលនេះបានឲ្យដឹងថា វិទ្យុសំឡេងសហរដ្ឋអាមេរិក (VOA) និងវិទ្យុអាស៊ីសេរី (RFA) បានធ្វើសកម្មភាពផ្សព្វផ្សាយព័ត៌មាន និងបើក ការិយាល័យរបស់ខ្លួននៅកម្ពុជាជាយូរឆ្នាំមកហើយ ដោយពុំបានចុះបញ្ជីនៅក្រសួងព័ត៌មាននិងពុំបានអនុវត្តកាតព្វកិច្ចចុះបញ្ជីពន្ធដារស្របច្បាប់ និងបទប្បញ្ញត្តិស្តីពីពន្ធដារនោះទេ។
យោងតាមសេចក្ដីថ្លែងការណ៍របស់រាជរដ្ឋាភិបាលនៃព្រះរាជាណាចក្រកម្ពុជាកាលពី ថ្ងៃទី ៣ ខែធ្នូ ឆ្នាំ ២០១៨ បានបង្ហាញនូវការប្តេជ្ញាចិត្តយ៉ាងមោះមុត ក្នុងការលើកតម្កើងនូវសិទ្ធិសេរីភាពសារព័ត៌មាន សេរីភាពនៃការបញ្ចេញមតិស្របតាមរដ្ឋធម្មនុញ្ញ និងច្បាប់ដែលមានជាធរមាន ហើយបានបញ្ជាក់យ៉ាងច្បាស់ថា វិទ្យុអាស៊ីសេរី និងវិទ្យុសំឡេងសហរដ្ឋអាមេរិក បានផ្តួចផ្តើមគំនិតបិទការិយាល័យតំណាង របស់ខ្លួនដោយខ្លួនឯង។ ដូច្នេះវិទ្យុទាំង ២ នេះ ក៏មានសេរីភាពបើកការិយាល័យតំណាងរបស់ខ្លួននៅកម្ពុជាឡើងវិញបានដែរ។
លោក ផុស សុវណ្ណ អ្នកនាំពាក្យក្រសួងព័ត៌មានបានថ្លែងពីម្សិលមិញថា ក្រសួងព័ត៌មាននៅតែស្វាគមន៍ និងអនុញ្ញាតឲ្យបើកការិយាល័យរបស់ VOA និង RFA តែពួកគាត់ត្រូវបំពេញកាតព្វកិច្ចសារពើពន្ធជាមុនសិន។
លោក ថ្លែងថា៖ «ដោយសារពួកគាត់មានកាតព្វកិច្ចត្រូវបំពេញលើសារពើពន្ធដូច្នេះយើងឲ្យគាត់ដោះស្រាយបញ្ហាឲ្យរួចរាល់ពីខាងពន្ធដារ ហើយយើងនឹងអនុញ្ញាតជូនគាត់វិញហើយ»។
ទោះយ៉ាងណាក៏ដោយលោកសុវណ្ណ បានច្រានចោលការចោទប្រកាន់ពីប្រភពនានា មកលើរាជរដ្ឋាភិបាលកម្ពុជាថាបានរឹតត្បិតសិទ្ធិសេរីភាពសារព័ត៌មាន សេរីភាពនៃការបញ្ចេញមតិ និងអះអាងថា ទោះបីជាវិទ្យុទាំង២នេះមិនមានការិយាល័យនៅប្រទេសកម្ពុជាតែពួកគេបានបន្តផ្សព្វផ្សាយព័ត៌មានរបស់ពួកគេតាមបណ្តាញផ្សេងៗដូចជាតាមប្រព័ន្ធអុីនធឺណិត។
លោក សុវណ្ណ ថ្លែងថា៖ «អត់សេរីភាពឯណាកាលពីជំនួបជាមួយនាយករដ្ឋមន្ត្រីលើកទី ៣ មានអ្នកសារព័ត៌មានបានចូលរួមយ៉ាងចង្អៀតណែន ហើយសារព័ត៌មាន online ក៏កំពុងកើនឡើងយ៉ាងច្រើន»។
លោក ប៉ែន បូណា ប្រធានក្លិបអ្នកកាសែតកម្ពុជាបានអះអាងថា រដ្ឋាភិបាលកម្ពុជាមិនបាន រឹតត្បិតសិទ្ធិសេរីភាពណាមួយទៅលើវិទ្យុទាំង២នោះទេ តែដោយសារតែវិទ្យុទាំង ២ នោះ មានការប្រឈមមុខជាមួយច្បាប់ និងបញ្ហាផ្នែកបច្ចេកទេសទាក់ទងរឿងបង់ពន្ធ ហើយនៅប្រទេសកម្ពុជាសារព័ត៌មានទាំងអស់ទាំងទូរទស្សន៍ និងវិទ្យុ និងស្ថាប័នព័ត៌មានផ្សេងទៀតសុទ្ធតែបង់ពន្ធ។
លោកបញ្ជាក់ថា៖ «យើងគ្រាន់តែយល់ថា នៅប្រទេសយើងនេះសារព័ត៌មានទាំងអស់រាប់ទាំងវិទ្យុ និងទូរទស្សន៍សុទ្ធតែបង់ពន្ធដូចគ្នា ដូច្នេះហេតុអីបានជាវិទ្យុបរទេសមួយចំនួនមកធ្វើការនៅស្រុកខ្មែរយើងហ្នឹងគាត់មិនបង់ពន្ធហើយគាត់គេចពន្ធ ហើយបានបិទការិយាល័យដោយខ្លួនឯងហើយចោទថាមានការបិទសេរីភាព»។
លោក ប៉ែន បូណា បានថ្លែងថា៖ «ពួកគេគួរតែធ្វើការបង់ពន្ធត្រឹមត្រូវតាមច្បាប់ជាមុនសិនមុនពេលដែលធ្វើការចោទប្រកាន់រាជរដ្ឋាភិបាលកម្ពុជាថាបាន រឹតត្បិតសិទ្ធិសេរីភាពរបស់សា្ថប័នខ្លួន ហើយពួកគេគួរតែបញ្ឈប់ការចោទប្រកាន់ទាំងនេះចំពោះរាជរដ្ឋាភិបាលថាបានធ្វើទុក្ខបុកម្នេញចំពោះពួកគេ ហើយបន្ថែមថាវាមានលំបាកក្នុងការស្វែងយល់អំពីមូលហេតុដែលនៅពីក្រោយការស្ទាក់ស្ទើរក្នុងការបើកការិយាល័យរបស់ខ្លួននៅប្រទេសកម្ពុជា»៕
