The Phnom Penh Post Search

Search form




Logo of Phnom Penh Post newspaper Phnom Penh Post - លោក កឹម សុខា ចង់​ឲ្យ​ទម្លាក់​បទចោទ​លើ​រូប​លោក បន្ទាប់​ពី​ទទួល​បាន​​ការ​បន្ថូរ​បន្ថយ​លក្ខខណ្ឌ​នៅ​ក្រៅ​ឃុំ

លោក កឹម សុខា ចង់​ឲ្យ​ទម្លាក់​បទចោទ​លើ​រូប​លោក បន្ទាប់​ពី​ទទួល​បាន​​ការ​បន្ថូរ​បន្ថយ​លក្ខខណ្ឌ​នៅ​ក្រៅ​ឃុំ

Content image - Phnom Penh Post
លោក កឹម សុខា​ ​នា​ពេល​ក​ន្លង​មក។ ហុង មិនា

លោក កឹម សុខា ចង់​ឲ្យ​ទម្លាក់​បទចោទ​លើ​រូប​លោក បន្ទាប់​ពី​ទទួល​បាន​​ការ​បន្ថូរ​បន្ថយ​លក្ខខណ្ឌ​នៅ​ក្រៅ​ឃុំ

បន្ទាប់​ពី​ត្រូវ​បាន​ចៅក្រម​ស៊ើប​សួរ​បន្ធូរបន្ថយ​លក្ខខណ្ឌ​នៃ​ការ​នៅ​ក្រៅ​ឃុំ នៅ​ថ្ងៃ​អាទិត្យ​នេះ​ លោក កឹម សុខា បាន​សរសេរ​នៅ​លើ​ទំព័រ​ហ្វេសប៊ុក​របស់​លោក ដោយ​ចង់​ឲ្យ​មាន​ការ​ទម្លាក់​ចោល​បទ​ចោទ ​«ក្បត់ជាតិ» ពី​រូប​លោក។

លោក​បាន​សរសេរ​ថា៖ «ក្នុង​នាម​ជា​បុគ្គល​ស្អាត​ស្អំ​ម្នាក់​ដែល​ត្រូវ​បាន​រង​ការ​ឃុំ​ខ្លួន​ទាំង​គ្មាន​កំហុស​២​ឆ្នាំ​មក​ហើយ​ ខ្ញុំ​នៅ​តែ​បន្ត​ទាម​ទារ​ឲ្យ​ទម្លាក់​ចោល​បទ​ចោទ​ប្រកាន់​មក​លើ​រូប​ខ្ញុំ។ ខ្ញុំ​រំពឹង​ថា​សេចក្តី​សម្រេច​ក្នុង​ថ្ងៃ​នេះ​គឺ​ជា​ជំហ៊ាន​ទី​១​ ប៉ុន្តែ​រូប​ខ្ញុំ​ក៏​ដូច​ជា​ពលរដ្ឋ​ខ្មែរ​ដទៃ​ទៀត​ដែល​បាន​បាត់​បង់​សិទ្ធិ​សេរី​ភាព​នយោបាយ​នៅ​តែ​ត្រូវការ​ដំណោះ​ស្រាយ​និង​យុត្តិ​ធម៌​ពិត​ប្រាកដ»។

លោក​ថ្លែង​ថា លោក​នឹង​ជួប​ជាមួយ​ប្រជា​ពលរដ្ឋ​នា​ពេល​ខ្លី​ខាង​មុខ​នេះ​ ប៉ុន្តែ​លោក​មិន​ទាន់​អាច​ប្រាប់​ដំណឹង​លម្អិត​នៅ​ឡើយ​ទេ។​

កាល​ពី​ព្រឹក​ថ្ងៃ​អាទិត្យ ​​ទី​១០ វិច្ឆិកា​ សាលា​ដំបូង​រាជ​ធានី​ភ្នំ​ពេញ​បាន​ចេញ​សេចក្តី​ប្រកាស​ព័ត៌មាន​​ដោយ​សម្រេច​​បន្ធូរ​បន្ថយ​លក្ខខណ្ឌ​​នៅ​ក្រៅ​ឃុំ​របស់​លោក កឹម សុខា គឹ​អនុញ្ញាត​ឲ្យ​លោក​ធ្វើ​ដំណើរ​បានទូលំ​ទូលាយ ប៉ុន្តែ​ត្រូវ​ស្ថិត​នៅ​ក្នុង​ព្រះ​រាជាណាចក្រ​កម្ពុជា។

សេចក្តីប្រកាសព័ត៌មាន​បញ្ជាក់​ថា​ ជន​ត្រូវ​ចោទ​ កឹម សុខា ត្រូវ​បាន​ចៅ​ក្រម​ស៊ើប​សួរ​សម្រេច​បន្ត​ដាក់​ឲ្យ​ស្ថិត ក្រោម​ការ​ត្រួត​ពិនិត្យ​តាម​ផ្លូវ​តុលា​ការ​ ដោយ​ត្រូវ​ជាប់​កាតព្វកិច្ច​ដូច​ជា​មិន​ត្រូវ​ចេញ​ក្រៅ​ព្រំ​ប្រទល់​ដែន​ដី​នៃ​ព្រះ​រាជាណាចក្រ​កម្ពុជា មិន​ត្រូវ​ធ្វើ​សកម្ម​ភាព​នយោបាយ ​ហើយ​ត្រូវ​ឆ្លើយ​តប​នឹង​ការ​កោះ​ហៅ​ពី​គ្រប់​សមត្ថ​កិច្ច។

លោក អ៊ី រិន្ទ អ្នក​នាំ​ពាក្យ​សាលា​ដំបូង​រាជធានី​ភ្នំពេញ បាន​ប្រាប់​ភ្នំពេញ​ប៉ុស្តិ៍​ថា៖ «បើ​តាម​ខ្លឹម​សារ​(សេចក្តី​សម្រេច​ចុង​ក្រោយ​របស់​តុលាការ) ហ្នឹងទៅ ​គាត់​ត្រូវ​តែ​គោរព​តាម​លក្ខខណ្ឌ ៣ ចំណុច​នេះ។ យើង​អាច​ពិនិត្យ​មើល​ថា កាល​ពីមុន​គាត់​អាច​ដើរ​នៅ​ក្នុង​តំបន់​មួយ តែ​ឥឡូវ​គាត់​អាច​ដើរ​ទូលំ​ទូលាយ​ជាង​មុន»។

សូម​បញ្ជាក់​ថា លោក កឹម សុខា ត្រូវ​បាន​ចាប់​ខ្លួន​កាល​ពី​ថ្ងៃ​ទី ថ្ងៃទី៣ ខែកញ្ញា ឆ្នាំ២០១៧ ​ចោទ​ប្រកាន់​ពី​បទ​ក្បត់​ជាតិ ឬ​បទ​«សន្ទិដ្ឋិភាព​ជាមួយ​បរទេស» ដែល​ប្រឈម​មុខ​ជាប់​ពន្ធនាគារ​​រហូត​ដល់​៣០​ឆ្នាំ។ ចៅក្រម​ស៊ើប​សួរ​លោក គី ឫទ្ធី បាន​សម្រេច​ឲ្យ​លោក​នៅ​ក្រៅ​ឃុំ​បណ្ដោះ​អាសន្ន​​ ក្រោម​ការ​ត្រួត​ពិនិត្យ​របស់​តុលាការ កាល​ពី​ថ្ងៃ​ទី​ ០៩ ខែកញ្ញា ឆ្នាំ២០១៨ ប៉ុន្តែ​បាន​ដាក់​លក្ខខណ្ឌ​​មិន​អនុញ្ញាត​ឱ្យ​ចេញ​ក្រៅ​ពី​ព្រំប្រទល់​នៃ​ដែន​ដី​ដែល​ខណ្ឌ​ដោយ​ផ្លូវ​លេខ​៣១៣ ផ្លូវ​លេខ​៣១១ និង​ផ្លូវ​លេខ៦០៨ ដែល​ជា​ទីតាំង​នៅ​ប្លុក​គេហដ្ឋាន​របស់​លោក។

អ្នក​ស្រី ម៉េង សុភារី មេធាវី​មួយ​រូប​ក្នុង​ចំណោម ៤ រូប​របស់​លោក កឹម សុខា បាន​ថ្លែង​ថា លោក កឹម សុខា មិន​ទាន់​ចេញ​ក្រៅគេហដ្ឋាន​របស់​លោក​ទេ ដោយ​ត្រូវ​ស្វែង​យល់ពី​លក្ខខណ្ឌ​ថ្មី​សិន រួម​មាន​ការ​ហាម​មិន​ឲ្យ​ធ្វើ​សកម្មភាព​នយោបាយ។ អ្នក​ស្រី​ថា ក្រុម​មេធាវី​នឹង​ស្វែង​រក​ការ​បក​ស្រាយ​ដើម្បី​កុំ​ឲ្យ​សកម្មភាព​របស់​លោក​ កឹម សុខា ប៉ះ​ពាល់​ដល់​ម្រាម​របស់​ចៅក្រម​ស៊ើប។

ចំពោះ​ការ​ដាក់​ពាក្យ​ស្នើ​សុំ​ថ្មីៗ​នេះ អ្នក​ស្រីបញ្ជាក់​ថា «យើង​ខ្ញុំ​ជា​សហ​មេធាវី មិន​​បាន​​ដាក់​​ពាក្យ​ស្នើ​ឲ្យ​សុំ​ឲ្យ​កែ​ប្រែ​កាតព្វ​កិច្ច​នៃ​ការ​ត្រួត​ពិនិត្យ​តាម​ផ្លូវ​តុលាការ​ទេ។ យើង​ខ្ញុំ​គឺ​បាន​ស្នើ​សុំ​ឲ្យ​មាន​ការ​លើក​លែង​បទ​ចោទ​ ដល់​កូន​ក្តី​យើង​ខ្ញុំ។ ប៉ុន្តែ​បាន​ត្រឹម​ត្រូវ​តែ​ការ​កែ​​ប្រែ​កាត​ព្វកិច្ច​ត្រួត​ពិនិត្យ​តាម​ផ្លូវ​តុលាការ ដូច្នេះ​ហើយ យើង​នឹង​នៅ​តែ​បន្ត​ទាមទារ​ឲ្យ​មាន​ការ​ទម្លាក់​បទ​ចោទ​នេះ​នេះ»។

ការ​បន្ធូរ​បន្ថយ​លក្ខខណ្ឌ​នេះ ត្រូវ​បាន​ស្វាគមន៍​ដោយ​អង្គការ​ធ្វើ​ការ​ផ្នែក​សិទ្ធិ​មនុស្ស​ជា​ច្រើន ប៉ុន្តេ​ពួក​គេ​នៅ​តែ​ទាមទារ​ឲ្យ​មាន​ការ​ទម្លាក់​បទ​ចោទ​ពី​លោក​ កឹម សុខា។ ស្ថានទូត​អាមេរិក​ក៏​បាន​ស្វាគមន៍​ការ​វិវត្ត​ចុង​ក្រោយ​នេះ​ដែរ។

ឯក​អគ្គរដ្ឋ​ទូត​អាមេរិក លោក Patrick Murphy បាន​សរសេរ​នៅ​លើ​ទំពរ​ទ្វីទ័រ របស់​លោក​ថា៖ «យើង​កត់​សម្គាល់​ឃើញ​ការ​ដក​ការ​រឹត​ត្បិត​ពី​អតីត​អនុប្រធានរដ្ឋ​សភា​ កឹម សុខា។ នេះ​ជា​ជំហាន​នៅ​លើ​ទិស​ដៅ​ត្រឹម​ត្រូវ ប៉ុន្តែ​ការ​វិវត្ត​ដ៏​ត្រឹម​ត្រូវ​នោះ​គឺ​សិទ្ធិ​ពេញ​លេញ ហើយ​សេរីភាព​របស់​លោក​ត្រូវ​តែ​ស្ដារ​ឡើង​វិញ»។

លោក​ក៏បាន​សរសេរ​ថា លោក​សង្ឃឹមថា លោក កឹម សុខា នឹង​អាច​ប្រឡូក​ក្នុង​នយោបាយ​ពេញលេញ​ឆាប់ៗ​នេះ៕

អត្ថបទគួរចាប់អារម្មណ៍

  • ជនជាតិ​ភាគតិច និង​សង្គម​ស៊ីវិល​ប្ដឹង​ជំទប់​ឃុំ និង​អភិបាលរង​ខេត្ត ​រឿង​ចេញ​បណ្ណ​សម្គាល់​ដី​ជាន់​លើ​ដី​ព្រៃ

    មណ្ឌលគិរី: ពលរដ្ឋ​សហគមន៍​ជនជាតិ​ដើម​ភាគតិច និង​សង្គម​ស៊ីវិល​ចំនួន ៦ ​នាក់​ បាន​ដាក់​ពាក្យបណ្ដឹង​ចំនួន ២ ​ដាច់​ ដោយឡែក​ពី​គ្នា​ប្ដឹង​មនុស្ស ៤ ​នាក់ ​ទៅ​តុលាការខេត្ត​ក្នុង​នោះ​មាន​ជំទប់​ទី​ ១ ​ឃុំ​ប៊ូស្រា​ម្នាក់ និង​អភិបាលរង​ខេត្តមណ្ឌលគិរី​ម្នាក់​ដោយ​ចោទ​ពាក់ព័ន្ធ​ការចេញ​បណ្ណ​សម្គាល់​ម្ចាស់​ដីធ្លី​ជាន់​លើដី​គម្រប​ព្រៃឈើ និង​បទ​ចោទ​ពាក់ព័ន្ធ​លួច​គាស់​យក​ថ្ម​ធម្មជាតិ​

  • កាណាដា​ពិន័យ VW ១៥០ ​លាន​ដុល្លារ

    ក្រុងតូរ៉ុនតូៈ តុលាការ​ក្នុង​ទីក្រុង​តូរ៉ុនតូ​កាលពី​ថ្ងៃ​ពុធ​បាន​បញ្ជា​ឲ្យ​ក្រុមហ៊ុន Volkswagen (VW) បង់ប្រាក់​ពិន័យ ១៩៦,៥ លាន​ដុល្លារ​កាណាដា (១៥០ ​លាន​ដុល្លារ​អាមេរិក​) បន្ទាប់ពី​ក្រុមហ៊ុន​ផលិត​រថយន្ត​មួយ​នេះ​បាន​សារភាព​កំហុស​ចំពោះ​ការរំលោភច្បាប់​បរិស្ថាន​ក្នុង​រឿងអាស្រូវ​បោក​បន្លំ​ការបញ្ចេញ​កាបូន​។

  • សហជីព​បារាំង​​ព្យាយាម​បន្ត​ការ​តវ៉ា​ប្រឆាំង​ការ​កែ​ទម្រង់​ប្រាក់​សោធននិវត្តន៍​​ ដើម្បី​ដាក់​សម្ពាធ​លើ​រដ្ឋាភិបាល​​

    ក្រុង​ប៉ារីស៖ ក្រុម​សហជីព​បារាំង​កាល​ពី​ថ្ងៃ​ពុធ​ បាន​បន្ត​ធ្វើ​​កូដកម្ម​ជា​ច្រើន​ ដោយ​​មាន​​បំណង​បង្កើន​សម្ពាធ​​​​ទៅ​លើ​រដ្ឋាភិបាល​មុន​នឹង​រដ្ឋាភិបាល​នេះ​ ធ្វើ​ការ​បង្ហាញ​ការ​កែ​ទម្រង់​ប្រាក់​សោធននិវត្តន៍​ចុង​ក្រោយ ​ដែល​បាន​​​ជំរុញ​ឲ្យ​មាន​ការ​តវ៉ា​ពី​បញ្ហា​ការងារ​ធំ​បំផុត​នៅ​បារាំង​ជា​ច្រើន​ទសវត្សរ៍​នោះ​​។ ​

  • លាភ ​រដ្ឋា ​និង ​ផាន់ ​គ្រាន់ ​ប៉ះ​ថៃ​ចំណូល​ថ្មី​

    ភ្នំពេញ៖ ​អ្នក​លេង​កណ្តាប់​ដៃ​របស់​កម្ពុជា​ចំនួន ​២ ​នាក់ គឺ ​លាភ ​រដ្ឋា និង​ ផាន់ ​គ្រាន់​ ​នឹង​​ត្រូវ​បង្ហាញ​ខ្លួន​រួមគ្នា នៅ​​លើ​សង្វៀន​ SEATV នា​រសៀល​ថ្ងៃ​សៅរ៍​ស្អែក​នេះ ​ដោយ​ពួក​គេ​ត្រូវ​ជួប​ជាមួយ​​កីឡាករ​ថៃ​​ចំណូល​ថ្មី​ មិន​ធ្លាប់​មក​ប្រកួត​ក្នុង​សង្វៀន​នៅ​​ប្រទេស ​កម្ពុជា ​នោះ​ទេ​​។