.jpg)
ក្រុមមេធាវីលោក កឹម សុខា ផ្តល់បទសម្ភាសទៅអ្នកកាសែតនៅមុខសាលាឧទ្ធរណ៍ពីឆ្នាំមុន។ ហ៊ាន រង្សី
ភ្នំពេញៈ សហមេធាវីការពារសិទ្ធិលោក កឹម សុខា បានចេញសេចក្ដីថ្លែងការណ៍ជាសាធារណៈ ហាមដល់អ្នកនយោបាយដែលមានបំណងបង្កើត គណបក្ស ឬចលនានយោបាយណាមួយសម្រាប់ចូលរួមការបោះឆ្នោតនាពេលខាងមុខ មិនអនុញ្ញាតឱ្យយកឈ្មោះលោក កឹម សុខា ដែលជាប្រធាននៃអតីតគណបក្សសង្គ្រោះជាតិទៅភ្ជាប់ ពាក់ព័ន្ធនឹងបក្សនយោបាយនោះទេ។
យោងតាមសេចក្ដីថ្លែងការណ៍របស់សហមេធាវីការពារសិទ្ធិលោក កឹម សុខា កាលពីថ្ងៃទី ៧ ខែកុម្ភៈ បានឱ្យដឹងថា៖ «ក្នុងនាមលោក កឹម សុខា យើងខ្ញុំជាសហមេធាវី សូមបញ្ជាក់ជាថ្មីម្តងទៀតថា បុគ្គល ឬក្រុមណាដែលមានបំណងបង្កើត ឬបានកំពុងបង្កើត ឬបានបង្កើតគណបក្សនយោបាយ ឬចលនានយោបាយណាមួយ សូមកុំយកករណី ឬឈ្មោះរបស់លោក កឹម សុខា ទៅភ្ជាប់ពាក់ព័ន្ធជាមួយ។ បុគ្គល ឬក្រុមណាដែលធ្វើកិច្ចការ (នេះ) សូមមានសេចក្តីក្លាហាន ទទួលខុសត្រូវដោយខ្លួនឯង»។
លោកស្រី ម៉េង សុភារី មេធាវីការពារក្តីរបស់លោក កឹម សុខា បានប្រាប់ភ្នំពេញ-ប៉ុស្តិ៍បន្ថែមកាលពីថ្ងៃ ៨ កុម្ភៈថា សេចក្តីថ្លែងការណ៍របស់សហមេធាវី គឺជាជំហររបស់លោក កឹម សុខា ចង់បញ្ជាក់ទៅបុគ្គល ឬក្រុមមួយចំនួនដែលធ្លាប់បានយកឈ្មោះលោកទៅប្រើ ឬកំពុងបន្តប្រើប្រាស់ឈ្មោះរបស់លោក។
លោកស្រីបញ្ជាក់ថា៖ «លោក កឹម សុខា ក៏ចង់ឱ្យអ្នកនយោបាយទាំងនោះបន្តធ្វើនយោបាយប្រកបដោយគុណធម៌ និងជឿជាក់លើសមត្ថភាពរបស់ខ្លួនដើម្បីធ្វើនយោបាយ កុំឱ្យទាញផលប្រយោជន៍ពីលោកដើម្បីតែបម្រើផលប្រយោជន៍ខ្លួន»។
លោកស្រី មេធាវី បានបញ្ជាក់ផងដែរថា លោក កឹម សុខា មិនបានជាប់ពាក់ព័ន្ធនឹងករណីដែលលោក អ៊ូ ច័ន្ទរ័ត្ន អតីតសមាជិកសភានៃអតីតគណបក្សសង្គ្រោះជាតិដែលថ្មីៗនេះបានបង្កើតគណបក្សថ្មីមួយ ដោយរង់ចាំលោក កឹម សុខា មកកាន់តំណែងជាប្រធានគណបក្ស ឬក្នុងចលនា ២ ធ្នូ ដែលលោក សម រង្ស៊ី បានប្រើប្រាស់ឈ្មោះលោក កឹម សុខា ធ្វើការភ្នាល់គ្នានោះទេ។
លោកស្រីថ្លែងថា៖ «បុគ្គលនីមួយៗមានសិទ្ធិធ្វើនយោបាយរៀងៗខ្លួន ដូច្នេះហើយមិនចង់ឱ្យពាក់ព័ន្ធទេ។ សម្រាប់លោក កឹម សុខា ខ្លួនឯងផ្ទាល់ លោកក៏ចង់មានឱកាសមានសេរីភាពទៅធ្វើនយោបាយវិញដែរ ព្រោះតែគាត់គឺជាអ្នកនយោបាយ ហើយពេលនេះ គាត់នៅតែផ្ទះ»។
អតីតគណបក្សសង្គ្រោះជាតិជាគណបក្សប្រឆាំងធំមួយនៅកម្ពុជា ដឹកនាំដោយលោក កឹម សុខា មុនពេលដែលតុលាការកំពូលរំលាយគណបក្សនេះចោលកាលពីថ្ងៃទី ១៦ ខែវិច្ឆិកា ឆ្នាំ ២០១៧ ដោយសារមេដឹកនាំបក្សនេះត្រូវបានចោទពីបទក្បត់ជាតិ ឬឃុបឃិតជាមួយបរទេស។
លោក កឹម សុខា ត្រូវបានតុលាការកំពូលដកហូតសិទ្ធិធ្វើនយោបាយជាង ៣ ឆ្នាំដោយគិតចាប់ពីថ្ងៃដែលសមត្ថកិច្ចចាប់ខ្លួនលោកនៅក្នុងផ្ទះក្នុងរាជធានីភ្នំពេញកាលពីខែកញ្ញា ឆ្នាំ ២០១៧ ហើយត្រូវបានចោទប្រកាន់ពីបទ៖ «ឃុបឃិតជាមួយរដ្ឋបរទេស»។ សំណុំរឿងនេះត្រូវបានតុលាការលើកមកជំនុំជម្រះនៅសាលាដំបូងរាជធានីភ្នំពេញនៅដើមខែមករា។
ប៉ុន្តែការផ្ទុះឡើងនៃវីរុសកូរ៉ូណាបណ្តាលឱ្យសំណុំរឿងត្រូវបានផ្អាក។ លោក កឹម សុខា ត្រូវបានដោះលែងឱ្យនៅក្រៅឃុំជាបណ្តោះអាសន្នក្នុងខែវិច្ឆិកាឆ្នាំ ២០១៨ គឺរយៈពេល ១ ឆ្នាំ បន្ទាប់ពីរូបលោកត្រូវបានចាប់ខ្លួន។
បើទោះបីជាមានការដោះលែងរូបលោកឱ្យនៅក្រៅឃុំក៏ដោយ តុលាការបានធ្វើការរឹតត្បិតការធ្វើដំណើររបស់លោកដោយអនុញ្ញាតឱ្យលោកនៅក្នុងផ្ទះ ហាមលោកជួបជាមួយអតីតមន្ត្រី ឬបុគ្គលនៃអតីតគណបក្សសង្គ្រោះជាតិដែលត្រូវបានរំលាយដោយតុលាការ។ កាលពីខែវិច្ឆិកាឆ្នាំមុន តុលាការក៏បានសម្រេចបន្ធូរបន្ថយការរឹតបន្តឹងលើការនៅក្រៅឃុំដោយអនុញ្ញាតឱ្យរូបលោកអាចធ្វើដំណើរបាននៅក្នុងប្រទេស។
ទោះយ៉ាងណាក៏ដោយ តុលាការបានដាក់បម្រាមមិនឱ្យរូបលោកចាកចេញពីប្រទេស មិនឱ្យធ្វើសកម្មភាពនយោបាយ ហើយតម្រូវឱ្យលោកបង្ហាញខ្លួនប្រសិនបើមានការកោះហៅដោយអាជ្ញាធរ។
លោក អ៊ូ ច័ន្ទរ័ត្ន អតីតតំណាងរាស្ត្រនៃអតីតគណបក្សសង្គ្រោះជាតិដែលបានប្រកាសពីបំណងក្នុងការបង្កើតគណបក្សថ្មីដែលមានឈ្មោះថា «គណបក្សកែទម្រង់កម្ពុជា» ប្រាប់ភ្នំពេញប៉ុស្តិ៍កាលពីថ្ងៃទី ៨ ខែកុម្ភៈ ថា ការប្រកាសរបស់លោក កឹម សុខា គឺជារឿងត្រឹមត្រូវ ព្រោះលោក កឹម សុខា កំពុងជាប់ក្នុងបម្រាមរបស់តុលាការ ហើយលោកក៏មិនបានជាប់ពាក់ព័ន្ធនឹងការបង្កើតគណបក្សថ្មីនេះដែរ។
លោកបញ្ជាក់ថា៖ «ខ្ញុំមិនបានប្រកាសថា ទុកតំណែងប្រធានហ្នឹង ជូនឯកឧត្តម កឹម សុខា ទេ។ ខ្ញុំបានបញ្ជាក់ជូនតាមព័ត៌មាន និងសាធារណជនច្បាស់លាស់ហើយថា ការពាក់ព័ន្ធជាមួយឯកឧត្តមប្រធាន កឹម សុខា គឺអត់មានទេក្នុងការបង្កើតគណបក្សថ្មីនេះ ដោយសារតែលោកមិនបានជជែកអ្វីជាមួយខ្ញុំក្នុងការបង្កើតនេះទេ»។
ប៉ុន្តែអ្វីដែលខ្ញុំបានលើកឡើងជាក់ស្តែងថា ក្នុងករណីមិនមែនតែលោកប្រធាន កឹម សុខា ទេ ភាគីណាក៏ដោយក្នុងអតីតគណបក្សសង្គ្រោះជាតិឱ្យតែមានថ្នាក់ដឹកនាំណាមួយ ទាំងលោកជំទាវ មូរ សុខហួរ ក៏ដោយ ប្រសិនមានឱកាសចេញមកដឹកនាំវិញ នោះពួកយើងមិនធ្វើទេគណបក្សនយោបាយនេះ។ យើងនឹងបិទគណបក្សនេះហើយនឹងអាចចូលរួមគាំទ្រពួកគាត់វិញ» នេះជាការអះអាងរបស់លោក អ៊ូ ច័ន្ទរ័ត្ន។
បើតាមអតីតតំណាងរាស្ត្ររូបនេះគោលបំណងរបស់លោកក្នុងការបង្កើតបក្សថ្មីនេះ គឺដោយសារតែលោកចង់បង្រួបបង្រួមឱ្យមានតែគណបក្សនយោបាយរួមមួយដែលធ្វើការប្រកួតប្រជែងជាមួយគណបក្សកាន់អំណាច ដើម្បីបម្រើផលប្រយោជន៍សង្គមជាតិទាំងមូល។
អ្នកវិភាគនយោបាយលោក គិន ភា ជាប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា លើកឡើងថា ការប្រកាសរបស់លោក កឹម សុខា ក្នុងពេលនេះគឺមានសេណារីយោ ២។
លោកថា ទី១ ព្រោះតែលោក កឹម សុខា កំពុងជាប់បម្រាមហាមធ្វើនយោបាយ ដូច្នេះការដែលភ្ជាប់លោកទៅនឹងគណបក្សនយោបាយណាមួយនឹងធ្វើឱ្យគាត់ជាប់ប្រឡាក់ និងខុសទៅនឹងបម្រាមរបស់តុលាការ ដែលធ្វើឱ្យលោកត្រូវតែលាងខ្លួនឱ្យស្អាតខ្លួនឯងពីបញ្ហានយោបាយ។
លោក គិន ភា បានបន្តថា៖ «ទិដ្ឋភាពទី២ ប្រហែលជាកុំឱ្យមានអ្នកនយោបាយបានឱកាសនិយមណាមួយ ប្រើប្រាស់កេងចំណេញពីឥទ្ធិពលពីកេរ្តិ៍ឈ្មោះ ឬក៏ពីប្រជាប្រិយភាពរបស់គាត់ នៅក្នុងស្រទាប់មហាជន។ គាត់ប្រហែលជាចៀសវាងនូវចំណុច ២ នេះ»។
លោក គិន ភា បានអះអាងថា ក្នុងពេលបច្ចុប្បន្ន គេនៅមិនទាន់មានការសិក្សាណាមួយឱ្យបានច្បាស់លាស់ថា លោក កឹម សុខា នៅមានប្រជាប្រិយភាព ក្នុងស្រទាប់មហាជននោះទេ។ ប៉ុន្តែតាមការសង្កេតលោក កឹម សុខា ហាក់មានប្រជាប្រិយភាពខ្លាំងក្នុងអំឡុងពេលដែលលោកត្រូវបានចាប់ខ្លួន និងឃុំខ្លួន ព្រោះចរន្តនៃការគាំទ្រ និងតាមដានរបស់ប្រជាពលរដ្ឋមានលក្ខណៈគគ្រឹកគគ្រេងខ្លាំងណាស់៕
វីដេអូ៖
