The Phnom Penh Post Search

Search form

Logo of Phnom Penh Post newspaper Phnom Penh Post - លោក កឹម សុខា នឹង​បន្ត​ចរចា​ឲ្យ​ដោះលែង​អ្នក​ជាប់​ឃុំ

លោក កឹម សុខា នឹង​បន្ត​ចរចា​ឲ្យ​ដោះលែង​អ្នក​ជាប់​ឃុំ

Content image - Phnom Penh Post
លោក មាជ សុវណ្ណារ៉ា (ជាប់​ខ្នោះ) ពេល​នាំ​មក​សាលា​ដំបូង​កន្លង​មក។ ហេង ជីវ័ន

លោក កឹម សុខា នឹង​បន្ត​ចរចា​ឲ្យ​ដោះលែង​អ្នក​ជាប់​ឃុំ

ភ្នំពេញៈ មេដឹកនាំ​គណបក្ស​សង្គ្រោះ​ជាតិ​លោក កឹម សុខា ដែល​ថ្លែង​ថា​ការ​លើក​លែង​ទោស​រូប​លោក​គឺ​​ត្រូវ​បាន​ធ្វើ​ឡើង​ក្នុង​ស្មារតី​នៃ​ការ​ផ្សះផ្សា​ជាតិ​រវាង​រូប​លោក និង​លោក​នាយក​រដ្ឋមន្ត្រី​ ហ៊ុន សែន ដោយ​គ្មាន​លក្ខខណ្ឌ​នោះ​បាន​បញ្ជាក់​ថា​លោក​នឹង​បន្ត​ធ្វើការ​ចរចា​ជាមួយ​លោក​នាយក​រដ្ឋមន្ត្រី​ឲ្យ​មាន​ការ​ដោះលែង​អ្នក​ទោស​នយោបាយ​ក្នុង​ពេល​ឆាប់ៗ។

លោក​ កឹម សុខា ត្រូវ​បាន​ព្រះមហាក្សត្រ​លើក​លែង​ទោស​កាលពី​ថ្ងៃ​សុក្រ​ដែល​ជាប់​ចោទ​ពី​បទ​បដិសេធ​មិន​ចូល​ខ្លួន​ទាក់ទង​ទៅ​នឹង​សំណុំ​រឿង​ស្នេហា​ជាមួយ​អ្នកនាង​ ខុម​ ចាន់តារាទី ហៅ​ ស្រីមុំ ដែល​មជ្ឈដ្ឋាន​ជាច្រើន​ចាត់​ទុក​ថា​គឺជា​រឿង​នយោបាយ​។

ព្រះរាជក្រឹត្យ​លើកលែង​ទោស​របស់​ព្រះមហាក្សត្រ​នេះ​បាន​បញ្ចប់​ការ​ឃុំ​ខ្លួនឯង​នៅ​មួយ​កន្លែង​​អស់​​រយៈពេល​ប្រាំ​មួយ​ខែ​របស់​លោក កឹម សុខា ហើយ​មួយ​ថ្ងៃ​ក្រោយ​មក​គឺ​នៅ​ថ្ងៃ​សៅរ៍​លោក​​បាន​វិល​ត្រឡប់​ទៅ​កាន់​លំនៅឋាន​របស់​លោក​នៅ​ក្នុង​ខណ្ឌ​ទួលគោក​​ដើម្បី​ជួបជុំ​គ្រួសារ​វិញ​។

ការ​លើក​លែង​ទោស​នេះ​ត្រូវ​បាន​ធ្វើ​ឡើង​ទៅ​តាម​សំណើ​របស់​​លោក​ ហ៊ុន សែន​ នឹង​ត្រូវ​បាន​ហៅ​ថា​ជា​ «ការ​សម្រប​សម្រួល» ​ដោយ​គណបក្ស​កាន់​អំណាច​ហើយ​ការ​លើកលែង​ទោស​នេះ​ផង​ដែរ​ក៏​ជា​ក្តីសង្ឃឹម​មួយ​សម្រាប់​អ្នក​ទោស​នយោបាយ​មួយ​ចំនួន​ដែល​កំពុង​ជាប់​ឃុំ​នៅ​ក្នុង​ពន្ធនាគារ​ព្រៃស​ដែល​ពួកគេ​អាច​នឹង​ត្រូវ​​ដោះលែង​នៅ​ក្រោម​កិច្ចព្រមព្រៀង​រវាង​ភាគី​ទាំង​ពីរ។

នៅ​ក្នុង​សុន្ទរកថា​​របស់​លោក​កាលពី​ម្សិលមិញ​លោក​ កឹម​ សុខា បាន​ថ្លែង​ប្រាប់​ទៅ​កាន់​អ្នក​គាំទ្រ​នៅ​ទីស្នាក់ការ​គណបក្ស​សង្គ្រោះ​ជាតិ​ថា​លោក​បាន​ពិភាក្សា​ជាមួយ​លោក ហ៊ុន សែន ដើម្បី​ជំរុញ​បញ្ហា​នេះ​ឲ្យ​បាន​ឆាប់​រហ័ស។

លោក​បញ្ជាក់​ថា​ដំណោះស្រាយ​នេះ​នឹង​មិន​បញ្ចប់​ជាមួយ​នឹង​ការ​ដោះលែង​ត្រឹម​តែ​រូប​លោក​តែ​ម្នាក់​នោះ​ទេ។​

លោក​ សុខា ​បាន​​រៀបរាប់​ពី​ការ​លើកលែង​ទោស​របស់​លោក​ថា​គ្រាន់តែ​ជា​ «ជំហាន​ដំបូង» ​ក្នុង​ការ​ដោះស្រាយ​បញ្ហា​នយោបាយ​ធំៗ​មួយ​ចំនួន​ទៀត​។ វា​នឹង​មាន​វិធានការ​ផ្សេង​ទៀត​ដើម្បី​ដោះស្រាយ​បញ្ហា​ដែល​នៅ​សេសសល់​ជាពិសេស​បង​ប្អូន​ប្រុស​ស្រី​របស់​យើង​ដែល​ស្ថិត​នៅ​ក្នុង​ពន្ធនាគារ​»។ លោក​ កឹម សុខា ​ក៏​បាន​ច្រាន​ចោល​ផង​ដែរ​ពី​ការ​លើក​ឡើង​ដែល​ថា​ការ​លើក​លែង​ទោស​រូប​លោក​អាច​មាន​ការ​ដោះដូរ​អ្វី​មួយ​ជាមួយ​គណបក្ស​ប្រជាជន​ដោយ​លោក​អះអាង​ថា​លោក​ និង​​លោក​នាយក​រដ្ឋមន្ត្រី​បាន​ឈាន​ដល់​កិច្ចព្រមព្រៀង​មួយ​ក្នុង​ស្មារតី​នៃ «ការ​​ផ្សះផ្សា​ជាតិ»។ លោក​បាន​ថ្លែង​ថា៖ «គ្មាន​លក្ខខណ្ឌ​អ្វី​ទាំងអស់»។

បើ​តាម​លោក សុខា លោក​មាន​គម្រោង​ទៅ​ជួប​អ្នក​ទោស​នយោបាយ​ដែល​កំពុង​ជាប់​ឃុំ​នៅ​ពន្ធនាគារ​ព្រៃស​ និង​គ្រោង​ចូល​គាល់​ព្រះមហាក្សត្រ​នរោត្តម សីហមុនី​ និង​ទៅ​ជួប​អ្នក​គាំទ្រ​នៅ​តាម​មូលដ្ឋាន។

ពាក់ព័ន្ធ​ទៅ​នឹង​ករណី​របស់​លោក កឹម សុខា ​នេះ​បុគ្គលិក​អង្គការ​សិទ្ធិ​មនុស្ស​អាដហុក​ចំនួន​ ៤ រូប​អគ្គលេខាធិការរង​គណៈកម្មាធិការ​ជាតិ​រៀបចំ​ការ​បោះឆ្នោត​លោក នី ចរិយា និង​មេឃុំ​គណបក្ស​ប្រឆាំង​លោក ស៊ាង ចែត​ ត្រូវ​បាន​ឃុំ​ខ្លួន​ចាប់​តាំងពី​ខែ​ឧសភា​មកពី​បទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ក្នុង​សំណុំ​រឿង​​អ្នកនាង​ ខុម ចាន់តារាទី​ ហៅ​ ស្រីមុំ​ ដែល​ត្រូវ​បាន​គេ​អះអាង​ថា​ជា​ស្រី​កំណាន់​របស់​លោក សុខា​។

ទន្ទឹម​នឹង​នេះ​ដែរ​សកម្មជន​ជាច្រើន​រូប​ទៀត​របស់​គណបក្ស​សង្គ្រោះ​ជាតិ​រួម​ទាំង​តំណាងរាស្រ្ត​ចំនួន​ពីរ​រូប​ក៏​កំពុង​ជាប់​ពន្ធនាគារ​ដែរ​ដោយ​ជាប់​ចោទ​ពី​ករណី​មួយ​ចំនួន​ដែល​គេ​ចាត់ទុក​ថា​ជា​រឿង​នយោបាយ​។

លោក​ សុខ ឥសាន អ្នក​នាំ​ពាក្ស​គណបក្ស​ប្រជាជន​កាលពី​ថ្ងៃ​ម្សិលមិញ​បាន​ថ្លែង​ថា​ទោះបី​ជា​ការ​លើក​លែង​ទោស​​លោក កឹម សុខា ត្រូវ​បាន​ភ្ជាប់​​ជាមួយ​អ្នក​ទោស​ផ្សេង​ទៀត​ដែល​ទាក់ទង​នឹង​ករណី​នេះ​ដែរ​​ក៏​ដោយ​ប៉ុន្តែ​គេ​ត្រូវ​រង់ចាំ​រហូត​ដល់​មាន​ការ​ស៊ើបសួរ​សិន​ដោយ​លោក​បាន​កត់សម្គាល់​ថា​មាន​តែ​អ្នក​ដែល​ត្រូវ​​បាន​តុលាការ​ផន្ទាទោស​រួចរាល់​ហើយ​ប៉ុណ្ណោះ​ទើប​អាច​ត្រូវ​​លើក​លែង​ទោស។

លោក​បាន​ថ្លែង​ថា៖ «នៅ​ពេល​ដែល​សាលក្រម​ចូល​ជា​ធរមាន​យើង​នឹង​គិត​ពី​ការ​លើកលែង​ទោស»។

ទាក់ទង​កាលពី​ម្សិលមិញ​មេធាវី​ការពារ​ក្តី​​សកម្មជន​ដែល​ជាប់​ឃុំ​លោក​ សំ សុគង់ នឹង​លោក​ ជូង ជូងី ​បាន​ថ្លែង​ថា​ពួក​​លោក​មិន​ទាន់​ទទួល​បាន​ពេលវេលា​លម្អិត​សម្រាប់​សវនាការ​នា​ពេល​ខាង​មុខ​នៅ​ឡើយ​ទេ​ទោះបី​ជា​អ្នក​ទាំង​ពីរ​បាន​និយាយ​ថា​ពួកគាត់​មាន​ឆន្ទៈ​ក្នុង​ការ​ទម្លាក់​បណ្តឹង​ឧទ្ធរណ៍​ចោល​ដើម្បី​ត្រួសត្រាយ​ផ្លូវ​ធ្វើ​ឱ្យ​មាន​ដំណោះស្រាយ​នយោបាយ​មួយ​ក៏ដោយ​។

ប្រភព​មួយ​ដែល​បាន​មកពី​គណបក្ស​សង្គ្រោះជាតិ​ដែល​ស្នើ​សុំ​មិន​បញ្ចេញ​ឈ្មោះ​បាន​អះអាង​ថា​លោក​យល់​ថា​ថ្ងៃ​ទី​ ៧ ខែ​មករា​អាច​ជា​ថ្ងៃ​ដែល​ត្រូវ​ដោះលែង​អ្នក​ទោស​នយោបាយ​ទាំងអស់​ពី​ពន្ធនាគារ​។

សមាជិក​គ្រួសារ​របស់​អ្នក​ជាប់​ឃុំ​ដែល​ជា​មន្ត្រី​អាដហុក​កាលពី​ថ្ងៃ​ម្សិលមិញ​បាន​សម្តែង​​នូវ​ក្តីសង្ឃឹម​ថា​មនុស្ស​ជា​ទីស្រឡាញ់​​របស់​ពួកគាត់​នឹង​ត្រូវ​​ដោះ​លែង​ក្នុង​ពេល​ឆាប់ៗ​។​

កូនស្រី​លោកស្រី​ លឹម មុន្នី ឈ្មោះ​ អ៊ុន ប៊ុណ្ណារី ថ្លែង​ថា​៖ «នេះ​គឺជា​សញ្ញា​ល្អ​សម្រាប់​ការិយាល័យ​សិទ្ធិ​មនុស្ស​ដែល​អ្នកស្រី​បាន​ជំរុញ​ឱ្យ​តុលាការ​ពន្លឿន​ដំណើរការ​នេះ»។

អ្នកស្រី យ៉ែម ចន្ថា ភរិយា​​លោក​ នី​ ចរិយា ​ថ្លែង​​ថា​៖ «ខ្ញុំ​សូម​បួងសួង​ឲ្យ​អ្នក​នយោបាយ​ត្រូវ​គ្នា។ ប្រសិន​បើ​ពួកគាត់​​ត្រូវ​គ្នា​ស្ថានភាព​របស់​យើង​គឺ​ល្អ​ប៉ុន្តែ​នៅ​ពេល​ដែល​ពួកគាត់​មិន​ត្រូវ​គ្នា​វា​នឹង​ក្លាយ​ជា​រឿង​អាក្រក់​សម្រាប់​ប្តី​របស់​ខ្ញុំ​»៕ NS

អត្ថបទគួរចាប់អារម្មណ៍