.jpg)
លោក កឹម សុខា ពេលទៅសាលាដំបូងរាជធានីកាលពីខែមករា។ ហេង ជីវ័ន
ភ្នំពេញៈ មេដឹកនាំអតីតគណបក្សប្រឆាំងលោក កឹម សុខា កាលពីថ្ងៃពុធម្សិលមិញបានអំពាវនាវសាជាថ្មីសូមឲ្យតុលាការទម្លាក់ចោលបទចោទលើរូបលោកនៅថ្ងៃខួប ៣ ឆ្នាំនៃការចាប់ខ្លួន។ ប៉ុន្តែមន្ត្រីក្រសួងយុត្តិធម៌ថ្លែងថា មានតែតុលាការទេ ដែលជាអ្នកសម្រេចដោយផ្អែកលើអង្គហេតុ អង្គច្បាប់ សាក្សី និងភ័ស្តុតាង។
លោក កឹម សុខា បានសរសេរសារនៅលើទំព័រហ្វេសប៊ុករបស់លោកថា គិតត្រឹមថ្ងៃទី ២ ខែកញ្ញា ២០២០ វាមានរយៈពេល ៣ ឆ្នាំហើយ ដែលលោកបានបាត់បង់សេរីភាព និងសិទ្ធិក្នុងការធ្វើនយោបាយដើម្បីបម្រើប្រទេសជាតិ និងប្រជាពលរដ្ឋខ្មែរ។
លោកថា ប្រទេសជាតិត្រូវការបោះជំហានវិជ្ជមានជាជាងការជាប់មន្ទិលសង្ស័យនៃភាពអវិជ្ជមានណាមួយនៅក្នុងស្ថានភាពដែលពិភពលោកកំពុងតែជួបប្រទះការរីករាលដាលជំងឺកូវីដ ១៩ និងវិបត្តិសេដ្ឋកិច្ចដ៏ធ្ងន់ធ្ងរ។
លោកសរសេរថា៖ «កាលៈទេសៈនេះ ខ្មែរគួរតែមានការផ្សះផ្សាជាតិ ឯកភាពជាតិហើយខ្ញុំគួរតែមានសិទ្ធិសេរីភាពពេញលេញ ដើម្បីអាចចូលរួមបម្រើជាតិមាតុភូមិ និងប្រជាពលរដ្ឋខ្មែរយើង ជាពិសេសចូលរួមរកដំណោះស្រាយទៅលើបញ្ហាប្រឈមដ៏សំខាន់បំផុតគឺ «ជីវភាពប្រជាពលរដ្ឋខ្មែរ» ដែលនឹងត្រូវរងផលប៉ះពាល់ដោយសារបញ្ហាសេដ្ឋកិច្ចកម្ពុជាផ្ទាល់ និងឥទ្ធិពលវិបត្តិសេដ្ឋកិច្ចពិភពលោក»។
លោកបន្តថា៖ «ឆ្លងតាមសវនាការនៅតុលាការកន្លងមក ខ្ញុំមើលឃើញថា មិនមានភ័ស្តុតាងដាក់បន្ទុកជាក់លាក់ និងគ្រប់គ្រាន់ ដែលអាចចោទខ្ញុំថាបានប្រព្រឹត្តបទល្មើសដូចការចោទប្រកាន់នោះទេ ហើយក្នុងនោះខ្ញុំក៏បានបញ្ជាក់យ៉ាងច្បាស់លាស់ និងបង្ហាញសព្វគ្រប់ហើយថា ទាំងកន្លងមក បច្ចុប្បន្ន និងទៅអនាគត ខ្ញុំមិនមានចេតនា មិនបានប្រព្រឹត្ត និងមិនគាំទ្រនូវអំពើទាំងឡាយណាដែលនាំឲ្យប៉ះពាល់ដល់ផលប្រយោជន៍របស់ប្រទេសកម្ពុជា និងប្រជាពលរដ្ឋខ្មែរជាដាច់ខាត»។
លោកជឿជាក់ថា មានមតិជាតិ មតិអន្តរជាតិ ជាពិសេសសមត្ថកិច្ចថ្នាក់ដឹកនាំ ក៏ដូចជាចៅក្រមផងដែរ បានយល់ និងទទួលស្គាល់ថា លោកមិនមានចេតនា មិនបានប្រព្រឹត្ត និងមិនគាំទ្រនូវអំពើហិង្សាឡើយ។
លោកបញ្ជាក់ថា៖ «ដូច្នេះឈរលើស្មារតីខាងលើនេះរួមទាំងស្មារតីផ្សះផ្សាជាតិ បង្រួបបង្រួមជាតិ ខ្ញុំសូមឲ្យតុលាការពិចារណាទម្លាក់ចោលបទចោទប្រកាន់មកលើរូបខ្ញុំ និងផ្តល់សិទ្ធិសេរីភាពពេញលេញ ដើម្បីឲ្យខ្ញុំអាចបន្តចូលរួមបម្រើជាតិ និងប្រជាពលរដ្ឋខ្មែរ ក្រោមដំបូលរដ្ឋធម្មនុញ្ញនៃព្រះរាជាណាចក្រកម្ពុជាក្នុងកាលៈទេសៈនៃស្ថានភាពបច្ចុប្បន្ននេះ និងទៅអនាគត»។
ទោះយ៉ាងណាអ្នកនាំពាក្យក្រសួងយុត្តិធម៌លោក ជិន ម៉ាលីន ថ្លែងថាលោក កឹម សុខា មានសិទ្ធិស្នើសុំឲ្យតុលាការទម្លាក់បទចោទ ប៉ុន្តែការសម្រេចយ៉ាងណានោះ គឺអាស្រ័យនៅលើតុលាការដែលនឹងសម្រេចក្ដីដោយផ្អែកលើអង្គហេតុ និងអង្គច្បាប់ភ័ស្តុតាងសាក្សី និងសក្ខីកម្មដែលមានជាធរមាន។ លោកថ្លែងថា៖ «ការស្នើសុំនេះជាសិទ្ធិរបស់គាត់ ប៉ុន្តែគាត់ត្រូវចូលរួមក្នុងនីតិវិធីបន្តទៀត ហើយបង្ហាញមូលដ្ឋានរឹងមាំដើម្បីធ្វើការដោះបន្ទុក។ នេះជាបែបបទជានីតិវិធីច្បាប់»។
សវនាការលោក កឹម សុខា លើបទ «សន្ទិដ្ឋភាពជាមួយបរទេស» ត្រូវបានសាលាដំបូងរាជធានីភ្នំពេញផ្អាកជាបណ្ដោះអាសន្នតាំងពីខែមីនា ដោយសារការរាតត្បាតសកលនៃជំងឺកូវីដ ១៩។ មេធាវី ១ រូបរបស់លោក កឹម សុខា គឺលោក ចាន់ ចេន ថ្លែងពីម្សិលមិញថា រហូតមកទល់ពេលនេះ មិនមានអ្វីវិវត្តថ្មីទេ គឺតុលាការបន្តផ្អាកសវនាការដដែល។
លោក គុជ គឹមឡុង អ្នកនាំពាក្យសាលាដំបូងរាជធានីភ្នំពេញមិនអាចទាក់ទងសុំការបកស្រាយទៅលើការលើកឡើងរបស់លោក កឹម សុខា បានទេកាលពីម្សិលមិញ។
លោក ឯម សុវណ្ណារ៉ា អ្នកវិភាគនយោបាយយល់ឃើញថា លោក កឹម សុខា ចង់រំឭកពីការចាប់ខ្លួនលោក។ កាលពីពេលថ្មីៗនេះលោក សុខា បានចុះទៅតាមខេត្ត ដើម្បីស្ទាបស្ទង់មើលថា តើការហាមប្រាមលោកមិនឲ្យធ្វើនយោបាយនោះហាមក្នុងកម្រិតណា។
លោកថ្លែងថា៖ «ការប្រកាសរបស់គាត់តាមហ្វេសប៊ុក វាមិនជំរុញឲ្យតុលាការទម្លាក់បទចោទលើរូបលោកទេ ព្រោះអត់មានឥទ្ធិពលអីទៅលើតុលាការ ឬក៏គណបក្សកាន់អំណាចទេ។ គណបក្សកាន់អំណាចគេចង់ឲ្យតែគូបដិបក្ខទន់ខ្សោយទេ»៕
