ភ្នំពេញៈ លោក កឹម សុខា អនុប្រធានគណបក្សប្រឆាំង ដែលត្រូវបានគេលាបពណ៌ជាយូរមកហើយថា ជាអ្នកក្បាលរឹងក្នុងការបង្រួបបង្រួមនយោបាយ ដែលបានបង្កើតគណបក្សសង្គ្រោះជាតិនោះ បានថ្លែងជាសាធារណៈអំពីការមិនឯកភាពផ្ទាល់ខ្លួនចំពោះកិច្ចព្រមព្រៀងនយោបាយ ដែលគណបក្សរបស់លោកបានចុះកាលពី ខែកក្កដា ឆ្នាំមុន ជាមួយនឹងគណបក្សប្រជាជនរបស់លោកនាយករដ្ឋមន្ត្រី ហ៊ុន សែន។
អ្នកវិភាគបានសង្ស័យជាយូរមកហើយថា លោក កឹម សុខា មិនសប្បាយចិត្តនឹងកិច្ចព្រមព្រៀងដែលធ្វើឲ្យគណបក្សសង្គ្រោះជាតិយល់ព្រមចូលប្រជុំក្នុងរដ្ឋសភា ដើម្បីធ្វើកំណែទម្រង់ប្រព័ន្ធនយោបាយនោះ ប៉ុន្តែ លោកទប់ចិត្តមិនថ្លែងអំពីការបែកបាក់ផ្ទៃក្នុងទាក់ទងនឹងសេចក្តីសម្រេចនេះទេ ទើបតែពេលនេះ។
ទីបំផុត លោកបានថ្លែងទៅកាន់អ្នកគាំទ្រក្នុងទីក្រុងឡុងប៊ិច រដ្ឋកាលីហ្វ័រនីញ៉ា កាលពីថ្ងៃចុងសប្តាហ៍ ដោយប្រាប់ពួកគេថា លោកមិនសប្បាយចិត្តនឹងកិច្ចព្រមព្រៀង ថ្ងៃទី២២ ខែកក្កដា ទេ ដែលបានត្រួសត្រាយផ្លូវឲ្យកែប្រែច្បាប់ពីរដែលទាក់ទងនឹងការបោះឆ្នោត ដែលនឹងត្រូវអនុម័តក្នុងពេលឆាប់ៗនេះ។
លោក សុខា បានបញ្ជាក់ថា៖ «និយាយឲ្យពិតទៅ ខ្ញុំមិនសប្បាយចិត្តនឹងលទ្ធផលនៃកិច្ចចរចាទេ ប៉ុន្តែ ខ្ញុំបានគោរពនូវគោលការណ៍របស់គណបក្សសង្គ្រោះជាតិ និងជំហររបស់គណបក្សសង្គ្រោះជាតិ ដែលត្រូវទទួលយកកិច្ចព្រមព្រៀងដើម្បីឈានទៅដោះស្រាយបញ្ហា»។
«ដូច្នេះ យើងបានទទួលយកនូវកិច្ចព្រមព្រៀងដ៏ខ្លីដែលមិនច្បាស់លាស់ និងមិនលម្អិត [មានន័យថា] កិច្ចព្រមព្រៀងនេះអាចបកស្រាយតាមរបៀបច្រើនយ៉ាង»។
លោកបានពន្យល់ថា កិច្ចពិភាក្សាផ្ទៃក្នុងរបស់គណបក្សនៅពេលនោះថា តើគណបក្សសង្គ្រោះជាតិគួរបញ្ចប់ការធ្វើពហិការរយៈពេល ១ឆ្នាំ របស់ខ្លួនឬយ៉ាងណាគឺជាកិច្ចពិភាក្សាមានភាពតានតឹងខ្លាំង។
ប៉ុន្តែលោក សុខា បានបន្ថែមថា ខណៈដែលលោកដឹងថា គណបក្សប្រជាជននឹងមានសំឡេងច្រើនជាងគណបក្សសង្គ្រោះជាតិក្នុងរដ្ឋសភាក៏ដោយ ប៉ុន្តែ លោកទទួលស្គាល់ថា វាជាការសំខាន់ ដែលថ្នាក់ដឹកនាំគណបក្សសង្គ្រោះជាតិនៅបង្រួបបង្រួម រហូតដល់ការបោះឆ្នោត ឆ្នាំ២០១៨។
លោកបានបន្ថែមថា៖ «គណបក្សកាន់អំណាចខ្លាចការបង្រួបបង្រួមរបស់យើង ហើយប្រសិនបើយើងមានគំនិតខុសគ្នា និងបែកបាក់ ដោយសារតែបញ្ហាទាំងនេះ យើងនឹងចាញ់មុនពេលប្រយុទ្ធ។ ខ្ញុំយល់ព្រមអត់ធ្មត់ដើម្បីបន្តការបង្រួបបង្រួមនេះ ហើយមិនត្រូវចាញ់ល្បិចរបស់អ្នកផ្តាច់ការទេ»។
គណបក្សសង្គ្រោះជាតិបានបង្កើតឡើងក្នុង ឆ្នាំ២០១២ បន្ទាប់ពីការបង្រួបបង្រួមរវាងគណបក្សសិទ្ធិមនុស្សរបស់លោក កឹម សុខា និងគណបក្ស សម រង្ស៊ី។
កាលពីម្សិលមិញ លោក សម រង្ស៊ី ប្រធានគណបក្សសង្គ្រោះជាតិ បានថ្លែងការ ការខ្វែងគំនិតគ្នាក្នុងគណបក្ស គឺជាវប្បធម៌ប្រជាធិបតេយ្យវិជ្ជមាន ហើយថា លោកគ្មានបញ្ហានឹងលោក កឹម សុខា ក្នុងការសម្តែងនូវអ្វីដែលជាប្រវតិ្តសាស្ត្រទេ នៅពេលនេះ។
«ប៉ុន្តែអ្វីដែលសំខាន់គឺថា នៅទីបំផុត យើងបានមកដល់ការសន្និដ្ឋានដូចគ្នា ហើយយើងបានធ្វើសេចក្តីសម្រេចតំណាងឲ្យគណបក្ស»។
លោក សម រង្ស៊ី បានទទួលស្គាល់ថា សាររបស់លោក សុខា ដែលបានថ្លែងទៅកាន់អ្នកគាំទ្រនៅសហរដ្ឋអាមេរិក គឺផ្សេងពីអ្វីដែលលោកបាននិយាយក្នុងប្រទេសកម្ពុជា ប៉ុន្តែបានថ្លែងថា វាមិនជាប់ទាក់ទងទៅនឹងការពិតដែលការចរចាកំណែទម្រង់ការបោះឆ្នោតជាមួយគណបក្សប្រជាជនកម្ពុជាត្រូវបានបញ្ចប់នាពេលថ្មីៗនេះទេ។
លោក រង្ស៊ី បានថ្លែងថា៖ «នៅសហរដ្ឋអាមេរិក ប្រជាពលរដ្ឋនិយាយបើកចំហ ពួកគេមិនមានអារម្មណ៍នៃការដាក់កំហិតដូចនៅក្នុងប្រទេសកម្ពុជាទេ ដូច្នេះ ខ្ញុំយល់ថា លោក កឹម សុខា ត្រូវតែឆ្លើយតបទៅពួកគេក្នុងលក្ខណៈត្រង់»។
«ដូច្នេះសម្រាប់យើងដែលជាថ្នាក់ដឹកនាំគណបក្ស យើងនៅតែស្ថិតក្នុងអារម្មណ៍ធម្មតា»។
លោក រង្ស៊ី បានថ្លែងបន្តថា លោកយល់អំពីបំណងរបស់លោក សុខា ដែលនិយាយ ប៉ុន្តែវា «លឿនបន្តិចចំពោះគាត់ដែលធ្វើការវិនិច្ឆ័យកិច្ចព្រមព្រៀង ខែកក្កដា ថា មិនច្បាស់លាស់»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានចម្អកចំពោះការឆ្លើយតបរបស់លោក កឹម សុខា ទៅនឹងកិច្ចព្រមព្រៀងដែលបានចុះហត្ថលេខាកាល ៨ខែ កន្លងទៅ ដោយថ្លែងថា៖ «ថាតើគាត់សប្បាយចិត្តឬមិនសប្បាយចិត្តគឺជារឿងរបស់គាត់ពីព្រោះប្រធានគណបក្សបានចុះហត្ថលេខារួចហើយ។ ប្រសិនបើគាត់មិនសប្បាយចិត្តឥឡូវនេះ វាមានន័យថា គាត់ចុះហត្ថលេខាស្ទើរស្ទាក់»។
លោក ឥសាន ក៏បានព្យាករណ៍ផងដែរថា ការបែកបាក់រវាងក្រុមលោក សម រង្ស៊ី និងលោក កឹម សុខា នៅក្នុងគណបក្សអាចនឹងផ្ទុះឡើងលក្ខណៈផ្ទៃក្នុងនាពេលខាងមុខ។
ប៉ុន្តែលោក អ៊ុក សេរីសុភ័ក្ត្រ អ្នកវិភាគនយោបាយឯករាជ្យ បានថ្លែងថា ផ្ទុយទៅវិញ គណបក្សប្រឆាំងទំនងជាបានឈានទៅដល់ «កម្រិតនៃភាពចាស់ទុំនយោបាយ» ដូចបានឃើញហើយតាមរយៈលោក កឹម សុខា អាចបិទមាត់មិននិយាយរហូតដល់ការជជែកអំពីកំណែទម្រង់ការបោះឆ្នោតត្រូវបានបញ្ចប់។
លោកបន្តថា ទោះយ៉ាងណាក្តី ឥឡូវនេះ គណបក្សទទួលស្គាល់ថា ខ្លួនត្រូវតែការពារខ្លួនឯងប្រឆាំងនឹងអ្នកគាំទ្រដែលចោទប្រកាន់ខ្លួនថា បានបន្ទន់ទៅតាមគណបក្សប្រជាជនកម្ពុជា។
អ៊ុក សេរីសុភ័ក្ត្រ បានថ្លែងបន្តថា នេះគឺជាសារៈសំខាន់មួយពីលោក សុខា ដែលថា៖ «យើងមានភាពលំបាកជាច្រើនក្នុងការដោះស្រាយជាមួយគណបក្សប្រជាជនកម្ពុជា ប៉ុន្តែយើងនឹងរក្សាការបង្រួបបង្រួមគណបក្សនេះមិនឲ្យបែកបាក់។ លោក សម រង្ស៊ី និងខ្ញុំនឹងអត់ធ្មត់ហើយប្រកាន់ខ្ជាប់ជាមួយគ្នារហូតដល់ការបោះឆ្នោត»។
លោកបន្ថែមថា ទោះយ៉ាងណាក្តី ការសម្រេចចិត្តរបស់លោក សុខា បំបែកភាពមិននិយាយស្តីរបស់ខ្លួននៅក្រៅប្រទេសកម្ពុជា គឺជាការឆ្លាតវៃ។ លោកថ្លែងឲ្យដឹងបន្តទៀតថា៖ «ប្រសិនបើគាត់និយាយនៅក្នុងប្រទេសកម្ពុជា វាគឺដូចថា គាត់កំពុងនិយាយនៅក្នុងផ្ទះរបស់គណបក្សប្រជាជនកម្ពុជាថា គាត់មិនឯកភាពជាមួយពួកគេអំពីការចរចាអ្វីក៏ដោយដែលបានធ្វើកន្លងមក»។
លោកបានគូសបញ្ជាក់ឲ្យដឹងបន្តថា៖ «ខ្ញុំគិតថា ថ្នាក់ដឹកនាំគណបក្សប្រជាជនកម្ពុជានឹងពិចារណា... អ្នកនិយាយអំពីរឿងពិត ប៉ុន្តែអ្នកចេះគិតគ្រប់គ្រាន់មិននិយាយវាចេញមកខ្លាំងៗក្នុងប្រទេសកម្ពុជា»។
