ភ្នំពេញៈ លោក កើត រិទ្ធ រដ្ឋមន្ត្រីក្រសួងយុត្ដិធម៌នៅថ្ងៃចន្ទ ទី ១១ ខែឧសភា បានសម្រេចបង្កើតគណៈកម្មការអនុវត្តយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត (គ.យ.ក.ស) ដោយមានក្រុមការងារចំនួន ៤ ក្រុមដែលយុទ្ធនាការនេះនឹងឈានទៅដោះស្រាយភាពចង្អៀតណែននៅតាមពន្ធនាគារ។
គ.យ.ក.ស មានលោក កើត រិទ្ធ ជាប្រធានលោកស្រី ចាន់ សុទ្ធាវី និងលោក ព្រហ្ម សិទ្ធត្រា រដ្ឋលេខាធិការក្រសួងយុត្ដិធម៌ជាអនុប្រធានរួមនឹងសមាជិកចំនួន ៥ រូបទៀតដែលសុទ្ធតែរដ្ឋលេខាធិការក្រសួងយុត្ដិធម៌។
សេចក្ដីសម្រេចបានឲ្យដឹងថា៖ «គ.យ.ក.ស មានភារកិច្ចដឹកនាំ និងសម្របសម្រួលការងាររួមលើការអនុវត្តយុទ្ធនាការដោះស្រាយបញ្ហាកកស្ទះសំណុំរឿងនៅតាមសាលាដំបូង និងអយ្យការអមសាលាដំបូងរាជធានី-ខេត្ត។ ដាក់ចេញនូវគោលការណ៍ណែនាំ វិធាននានា និងផែនការសកម្មភាពចាំបាច់ ដើម្បីអនុវត្តយុទ្ធនាការឲ្យមានប្រសិទ្ធភាព»។
យុទ្ធនាការនេះសំដៅរួមចំណែក លើកកម្ពស់ សមត្ថភាព ស្ថាប័នក្នុងការបម្រើសេវាយុត្តិធម៌ឲ្យបានល្អប្រសើរ ក៏ដូចជារួមចំណែកកាត់បន្ថយភាពចង្អៀតណែននៅក្នុងពន្ធនាគារ។ គ.យ.ក.ស ក៏នឹងដាក់ចេញនូវដំណោះស្រាយបញ្ហាប្រឈមនានា ដែលកើតចេញពីការអនុវត្តយុទ្ធនាការ និងតាមដានត្រួតពិនិត្យ និងវាយតម្លៃ ការអនុវត្តយុទ្ធនាការនេះផងដែរ។
លោក ជិន ម៉ាលីន អ្នកនាំពាក្យក្រសួងយុត្ដិធម៌ និងជាសមាជិក គ.យ.ក.ស ថ្លែងពីថ្ងៃអង្គារថា ការបង្កើត គ.យ.ក.ស គឺដើម្បីដឹកនាំយុទ្ធនាការ ដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត និងភាពចង្អៀតណែននៅតាមពន្ធនាគារ។
លោកថ្លែងថា៖ «ផែនការលម្អិតនៃយុទ្ធនាការនេះនឹងប្រកាសនៅថ្ងៃចន្ទសប្ដាហ៍ក្រោយ ពេលនោះនឹងបង្ហាញនូវផែនការលម្អិតនៃយុទ្ធនាការពីវិធានការក៏ដូចជាកម្មវិធី យន្តការ តួអង្គអនុវត្ដលទ្ធផលរំពឹងទុក និងរយៈពេលនៃការអនុវត្ដ»។ លោកបន្តថា៖ «ដូច្នេះការបង្កើតគណៈកម្មការនេះ គឺដើម្បីដឹកនាំយុទ្ធនាការនេះហើយគោលដៅយុទ្ធនាការគឺដោះស្រាយសំណុំរឿងកកស្ទះនៅតាមតុលាការ និងភាពចង្អៀតណែនក្នុងពន្ធនាគារ»។
លោក កើត រិទ្ធ បានបញ្ជាក់តាមរយៈសេចក្ដីសម្រេចនេះថា គ.យ.ក.ស ត្រូវដំណើរការកិច្ចប្រជុំរបស់ខ្លួនតាមការអញ្ជើញ និងក្រោមការដឹកនាំរបស់ប្រធាន។ ប្រធាន គ.យ.ក.ស អាចប្រគល់សិទ្ធិជូនអនុប្រធានក្នុងការដឹកនាំកិច្ចប្រជុំក្នុងករណីចាំបាច់។
គ.យ.ក.ស. អាចប្រើប្រាស់ត្រា និងកញ្ចប់ថវិការបស់ក្រសួងយុត្ដិធម៌ក្នុងការបំពេញមុខងាររបស់ខ្លួន។ សេចក្ដីសម្រេចដដែលឲ្យដឹងថា គ.យ.ក.ស មានក្រុមការងារចំនួន ៤ ជាសេនាធិការដឹកនាំការអនុវត្ដយុទ្ធនាការនៅតាមសាលាដំបូង និងមានលេខាធិការដ្ឋានមួយជាសេនាធិការគាំទ្រផ្នែកបច្ចេកទេស រដ្ឋបាល និងហិរញ្ញវត្ថុ។
ក្រុមការងារទាំង ៤ ដែលជាសេនាធិការដឹកនាំអនុវត្ដយុទ្ធនាការរបស់ គ.យ.ក.ស មានការបែងចែកតំបន់ទទួលខុសត្រូវនៅតាមសាលាដំបូង ក្នុងនោះមានក្រុមទី ១ មានលោក គឹម សន្តិភាព រដ្ឋលេខាធិការក្រសួងយុត្តិធម៌ជាប្រធានរួមនឹងអនុប្រធាន និងសមាជិកចំនួន ២១ រូបទៀត ទទួលបន្ទុកការអនុវត្ដយុទ្ធនាការនៅសាលាដំបូងរាជធានីភ្នំពេញ ខេត្ដកណ្ដាល ព្រៃវែង និងខេត្ដស្វាយរៀង។ ក្រុមទី ២ មានលោក ឡុង ឆរិន្ទរដ្ឋលេខាធិការក្រសួងយុត្ដិធម៌ជាប្រធានរួមនឹងអនុប្រធាន និងសមាជិកចំនួន ១៤ រូបទៀត ទទួលបន្ទុកការអនុវត្ដយុទ្ធនាការនៅសាលាដំបូងខេត្តកំពង់ធំ កំពង់ចាម រតនគិរី មណ្ឌលគិរី ក្រចេះ ស្ទឹងត្រែង ត្បូងឃ្មុំ និងខេត្ដព្រះវិហារ។
ក្រុមទី ៣ មានលោក ជីវ សុងហាក់ រដ្ឋលេខាធិការក្រសួងយុត្ដិធម៌ជាប្រធានរួមនឹងអនុប្រធាន និងសមាជិកចំនួន ១២ រូបទៀតទទួលបន្ទុកការអនុវត្ដយុទ្ធនាការនៅសាលាដំបូងខេត្ដកំពង់ឆ្នាំង បន្ទាយមានជ័យ សៀមរាប ប៉ៃលិន បាត់ដំបង ឧត្ដរមានជ័យ និងខេត្ដពោធិ៍សាត់ និងក្រុមទី ៤ មានលោក ជិន ម៉ាលីន រដ្ឋលេខាធិការក្រសួងយុត្ដិធម៌ជាប្រធានរួមនឹងសមាជិកចំនួន ១១ រូបទៀតទទួលបន្ទុកការអនុវត្ដយុទ្ធនាការនៅសាលាដំបូងខេត្ដកំពង់ស្ពឺ តាកែវ ព្រះសីហនុ កំពត និងខេត្ដកោះកុង។
សេចក្ដីសម្រេចបានបញ្ជាក់ថា ក្រុមការងារទាំង ៤ មានតួនាទី និងភារកិច្ចអនុវត្ដគោលការណ៍ណែនាំផែនការសកម្មភាព និងសេចក្ដីសម្រេចនានាដែលបានដាក់ចេញដោយ គ.យ.ក.ស ។ សម្របសម្រួល និងចុះបំពេញការងារនៅតាមសាលាដំបូង និងអយ្យការអមសាលាដំបូងរាជធានី-ខេត្ដ ដើម្បីពិនិត្យ ប្រមូលទិន្នន័យ និងព័ត៌មានចាំបាច់នានាពាក់ព័ន្ធនឹងចំណាត់ការសំណុំរឿងរបស់សាលាដំបូងរាជធានី-ខេត្ដ។ កំណត់អាទិភាពនៃការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ដ។
តាមដានជំរុញ និងដោះស្រាយការកកស្ទះនូវបញ្ហាប្រឈមជាក់ស្ដែង ពាក់ព័ន្ធនឹងការអនុវត្ដយុទ្ធនាការនៅតាមសាលាដំបូង និងអយ្យការអមសាលាដំបូងរាជធានី-ខេត្ដ ដែលស្ថិតក្នុងតំបន់ទទួលខុសត្រូវរបស់ខ្លួន។ ជំរុញការអនុវត្ដយុទ្ធនាការឲ្យបានម៉ឺងម៉ាត់ និងឲ្យបានត្រឹមត្រូវតាមច្បាប់។ ចាត់វិធានការទប់ស្កាត់ភាពមិនប្រក្រតីនានាដែលអាចកើតមានក្នុងពេលយុទ្ធនាការព្រមទាំងកសាងសំណុំឯកសារនៃភាពមិនប្រក្រតីនានារាយការណ៍ជូន គ.យ.ក.ស និងអនុវត្ដភារកិច្ចផ្សេងទៀតតាមការប្រគល់ភារកិច្ចរបស់ប្រធាន គ.យ.ក.ស។
តាមសេចក្ដីសម្រេចដដែល គ.យ.ក.ស. និងក្រុមការងារទាំង ៤ ខាងលើមានលេខាធិការដ្ឋានមួយជាសេនាធិការលើការងារបច្ចេកទេស រដ្ឋបាល និងហិរញ្ញវត្ថុផងដែរក្នុងនោះមានលោក កេង សុម៉ារិទ្ធ រដ្ឋលេខាធិការក្រសួងយុត្ដិធម៌ជាប្រធានរួមនឹងអនុប្រធាន និងសមាជិកចំនួន ២៥ រូបទៀត។
លោក ស ខេង រដ្ឋមន្ដ្រីក្រសួងមហាផ្ទៃកាលពីថ្ងៃទី ៨ ខែឧសភា ក៏បានដឹកនាំកិច្ចប្រជុំជាមួយក្រសួងយុត្ដិធម៌ស្ដីពីការដោះស្រាយការកកស្ទះសំណុំរឿង និងភាពចង្អៀតណែនក្នុងពន្ធនាគារផងដែរ។ ចំណែកលោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃឲ្យដឹងថា បច្ចុប្បន្នទណ្ឌិតកំពុងជាប់ឃុំក្នុងពន្ធនាគារទូទាំងប្រទេសមានជិត ៤ ម៉ឺននាក់ក្នុងនោះទណ្ឌិតភាគច្រើនជាប់ឃុំក្នុងបទល្មើសគ្រឿងញៀន។
ដោយសារតែមានការចង្អៀតណែនក្នុងពន្ធនាគារ និងដើម្បីបញ្ចៀសការរីករាលដាលជំងឺកូវីដ១៩ កាលពីថ្ងៃទី ១១ ខែឧសភា ប្រធានពន្ធនាគារខេត្តព្រះសីហនុលោក ម៉ី ឌឿន បានឲ្យដឹងថា ពន្ធនាគារខេត្ដព្រះសីហនុបានសម្រេចផ្ទេរទណ្ឌិតមួយចំនួនទៅដាក់នៅពន្ធនាគារតាមបណ្ដាខេត្តផ្សេងទៀត ខណៈបច្ចុប្បន្នទណ្ឌិតកំពុងជាប់ឃុំក្នុងពន្ធនាគារខេត្ដនេះមានជាង ២ ពាន់នាក់ក្នុងនោះទណ្ឌិតជាង ៥០ ភាគរយជាប់ពាក់ព័ន្ធនឹងបទល្មើសគ្រឿងញៀន៕
វីដេអូ៖