ភ្នំពេញៈ ព្រះមហាក្សត្រខ្មែរ ត្រាស់បង្គាប់តែងតាំង លោក កែវ ពុទ្ធរស្មី ជាសមាជិកក្រុមប្រឹក្សាធម្មនុញ្ញក្នុងអាណត្តិថ្មី ជំនួសព្រះអង្គម្ចាស់ នរោត្តម សិរីវុឌ្ឍ ដែលបានផុតអាណត្តិ ស្របពេលអាណត្តិថ្មីនៃស្ថាប័នជាតិកំពូលមួយនេះ នឹងត្រូវផ្លាស់ប្តូរសមាជិកចំនួន ៣ រូប ហើយសមាជិកថ្មីដែលមានរូបលោកដែរនោះ គ្រោងនឹងចូលកាន់តំណែងនៅពាក់ណ្តាលខែក្រោយ។
ព្រះរាជក្រឹត្យ ឡាយព្រះហស្តលេខា ដោយព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ចុះថ្ងៃទី ៩ ឧសភា ដែលទើបផ្សព្វផ្សាយកាលពីម្សិលមិញ បានបញ្ជាក់ថា «ត្រាស់បង្គាប់ តែងតាំង ឯកឧត្តម កែវ ពុទ្ធរស្មី ជាសមាជិកក្រុមប្រឹក្សាធម្មនុញ្ញក្នុងអាណត្តិថ្មី»។
លោក កែវ ពុទ្ធរស្មី ដែលត្រៀមនឹងចូលកាន់តំណែងក្នុងចំណោមសមាជិក ២ រូបទៀត នាពាក់កណ្តាលខែក្រោយ ជាអតីតឧបនាយរដ្ឋមន្ដ្រី និងជាឧត្ដមប្រឹក្សាផ្ទាល់របស់ព្រះករុណា ព្រះបាទសម្តេច ព្រះបរមនាថ នរោត្តម សីហមុនី។ លោកក៏ទើបតែទទួលគ្រឿងឥស្សរិយយស សម្រាប់និទាឃរដូវឆ្នាំ ២០១៨ «The Order of the Rising Sun, Gold and Silver Star» ពីរដ្ឋាភិបាលជប៉ុនផងដែរ បន្ទាប់ពីរូបលោកបានរួមចំណែកធ្វើឲ្យប្រសើរឡើងនូវទំនាក់ទំនងរវាងកម្ពុជា-ជប៉ុន។
បើតាមលោក មឹន ស៊ាន សមាជិក និងជាអ្នកនាំពាក្យក្រុមប្រឹក្សាធម្មនុញ្ញ បានប្រាប់ភ្នំពេញប៉ុស្តិ៍ពីម្សិលមិញថា ក្នុងអាណត្តិថ្មីនេះ នឹងមានសមាជិកចំនួន ៣ រូប ត្រូវបានផុតអាណត្តិ បន្ទាប់ពីកាន់តំណែងក្នុងរយៈពេល ៩ ឆ្នាំ។ ជាមួយនឹងការផ្លាស់ប្តូរនេះ លោក មឹន ស៊ាន ក៏បានប្រាប់ដែរថា ពិធីចូលកាន់តំណែង អាចនឹងប្រព្រឹត្តឡើងនៅពាក់កណ្តាលខែ មិថុនា ខាងមុខ ដោយស្របជាមួយនឹងការបូកសរុបលទ្ធផលការងាររបស់ក្រុមប្រឹក្សាធម្មនុញ្ញ ក្នុងរយៈពេល ៣ ឆ្នាំ កន្លងមកនេះ។
លោកបញ្ជាក់ថា៖ «ក្រៅពីលោក កែវ ពុទ្ធរស្មី ទទួលតំណែង ក្នុងនោះក៏មាន លោកស្រី លី វួចឡេង មកពីខាងតុលាការ ហើយ ១ រូបទៀត ខ្ញុំមិនទាន់ច្បាស់ទេ ព្រោះអត់ទាន់ឃើញចេញជាផ្លូវការ។ ចេញ ៣ នាក់ ចូលវិញ ៣ នាក់ ហើយអ្នកដែលចប់ ៩ ឆ្នាំ គឺមានខ្ញុំម្នាក់ដែរ និងព្រះអង្គម្ចាស់ សិរីវុឌ្ឍ ចំណែកឯកឧត្តម ហ៊ី សោភា ដែលគាត់ត្រូវចេញហ្នឹង ខ្ញុំមិនទាន់ដឹងច្បាស់ដែរថា គាត់ត្រូវបន្តឬអត់?»។
លោក ឡៅ ម៉ុងហៃ អ្នកវិភាគនយោបាយថ្លែងថា សមាជិកភាពក្រុមប្រឹក្សា ជាមុខតំណែងខ្ពស់ ថ្លៃថ្នូរ និងផ្ដល់កិត្តិយសខ្ពង់ខ្ពស់ដល់សមាជិក។ លោកបានថ្លែងបន្តថា មុខតំណែងជាសមាជិក ជារង្វាន់ធំណាស់ដល់អ្នកណាដែលត្រូវបានតែងតាំងជាសមាជិក។
ក្រុមប្រឹក្សាធម្មនុញ្ញ គឺជាស្ថាប័នកំពូលមួយ ដែលមានចែងក្នុងរដ្ឋធម្មនុញ្ញ ឆ្នាំ ១៩៩៣ សម្រាប់ការពារការគោរពរដ្ឋធម្មនុញ្ញ បកស្រាយរដ្ឋធម្មនុញ្ញ និងច្បាប់ ដែលរដ្ឋសភាបានអនុម័ត និងព្រឹទ្ធសភាបានពិនិត្យចប់សព្វគ្រប់ហើយ។ ស្ថាប័នជាតិកំពូលមួយនេះ ក៏មានតួនាទី សម្រេចអំពីករណីវិវាទកម្មទាក់ទងនឹងការបោះឆ្នាតជ្រើសតាំងតំណាងរាស្ដ្រ និងការបោះឆ្នោតជ្រើសតាំងសមាជិកព្រឹទ្ធសភាផងដែរ។
សមាជិកនៃក្រុមប្រឹក្សាធម្មនុញ្ញ គឺមាន ៩ រូប ដែល ៣ រូប តែងតាំងដោយព្រះមហាក្សត្រផ្ទាល់ ៣ រូប ជ្រើសតាំងដោយរដ្ឋសភា និង ៣ រូបទៀត ជ្រើសតាំងដោយឧត្ដមក្រុមប្រឹក្សានៃអង្គចៅក្រម។
ប្រធាន ត្រូវបានជ្រើសតាំងតាមការបោះឆ្នោត ដោយសមាជិកក្រុមប្រឹក្សាធម្មនុញ្ញ តាមមតិភាគច្រើនដាច់ខាត រៀងរាល់ ៣ ឆ្នាំម្តង ក្រោយពីសមាជិកថ្មី ៣ រូប ចូលកាន់តំណែង។ សមាជិកទាំងអស់នៃក្រុមប្រឹក្សាធម្មនុញ្ញ ត្រូវបានតែងតាំង ឬជ្រើសតាំងពីចំណោមឥស្សរជន ដែលមានសញ្ជាតិខ្មែរពីកំណើត មានអាយុយ៉ាងតិច ៤៥ ឆ្នាំ មានបទពិសោធការងារយ៉ាងតិច ១៥ ឆ្នាំ និងមានសញ្ញាបត្រឧត្ដមសិក្សាឡើងទៅ ក្នុងវិស័យច្បាប់ រដ្ឋបាល ការទូត និងសេដ្ឋកិច្ច៕