.jpg)
ជំនួបរវាងអាជ្ញាធរជាតិប្រយុទ្ធប្រឆាំងគ្រឿងញៀន និងឯកអគ្គរដ្ឋទូតអាមេរិក។ រូបថត សហការី
ភ្នំពេញៈ លោក កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានស្នើឱ្យសហរដ្ឋអាមេរិកបន្តគាំទ្រដល់កម្មវិធីព្យាបាល និងស្តារនីតិសម្បទាអ្នកញៀនគ្រឿងញៀន និងគាំទ្រលើគោលនយោបាយប្រយុទ្ធប្រឆាំងគ្រឿងញៀនរបស់កម្ពុជា ខណៈដែលបញ្ហាគ្រឿងញៀនកំពុងតែបន្តកើនឡើង។ នេះបើតាមលោកឧត្តមសេនីយ៍ទោ សួន ឃឿន អនុប្រធាននាយកដ្ឋានរដ្ឋបាល និងហិរញ្ញវត្ថុនៃអគ្គនាយកដ្ឋានអាជ្ញាធរជាតិប្រយុទ្ធប្រឆាំង គ្រឿងញៀន។
ការស្នើសុំរបស់លោកឧបនាយករដ្ឋមន្ត្រី កែ គឹមយ៉ាន បានធ្វើឡើងនៅព្រឹកថ្ងៃទី ១០ ខែកុម្ភៈ ឆ្នាំ ២០២០ នៅក្នុងឱកាសជំនួបពិភាក្សាការងារជាមួយលោក Patrick Murphy ឯកអគ្គរដ្ឋទូត សហរដ្ឋអាមេរិក ប្រចាំកម្ពុជានៅវិមានមិត្តភាព កម្ពុជា-ចិន។
លោកឧត្តមសេនីយ៍ទោ សួន ឃឿន បានថ្លែងប្រាប់អ្នកសារព័ត៌មានបន្ទាប់ពីជំនួបពិភាក្សានោះថា លោក កែ គឹមយ៉ាន បានស្នើសហរដ្ឋអាមេរិកបន្តពង្រឹងកិច្ចសហប្រតិបត្តិការ និងគាំទ្រដល់កម្ពុជាលើគោលនយោបាយប្រយុទ្ធប្រឆាំងគ្រឿងញៀន និងយន្តការត្រួតពិនិត្យគ្រឿងញៀនរបស់កម្ពុជាទាំងក្នុងក្របខ័ណ្ឌអន្តរជាតិ តំបន់អនុតំបន់ជាមួយប្រទេសជិតខាង។
លោកបញ្ជាក់ថា៖ «ឯកឧត្តមឧបនាយករដ្ឋមន្ត្រីក៏បានស្នើសហរដ្ឋអាមេរិក ត្រួតពិនិត្យឡើងវិញក្នុងការគាំទ្រលើការផ្តល់ផ្នែកសម្ភារសម្រាប់មន្ទីរពិសោធន៍ គ្រឿងញៀន និងស្នើឲ្យបន្តគាំទ្រដល់ដំណើរការកម្មវិធីព្យាបាល និងស្តារនីតិសម្បទាអ្នកញៀនគ្រឿងញៀននៅកម្ពុជា»។ ក្រៅពីនេះ លោកឧបនាយករដ្ឋមន្ត្រីក៏បានបង្ហាញជូនឯកអគ្គរដ្ឋទូតសហរដ្ឋអាមេរិកពីសភាពការណ៍គ្រឿងញៀនទាំងនៅក្នុងក្របខ័ណ្ឌអន្តរជាតិ តំបន់ អនុតំបន់ គឺមិនមានការថយចុះនោះទេ ជាពិសេសសកម្មភាពជួញដូរ និងចរាចរណ៍គ្រឿងញៀននៅតាមផ្លូវគោក ផ្លូវទឹក ផ្លូវអាកាស ព្រមទាំងបញ្ញើប្រៃសណីយ៍ ដោយសមត្ថកិច្ចកម្ពុជាបានស្រាវជ្រាវរកឃើញមានបទល្មើសធំៗជាបន្តបន្ទាប់។
នៅក្នុងឱកាសនោះដែរ ប្រធានអាជ្ញាធរជាតិប្រយុទ្ធប្រឆាំងគ្រឿងញៀនបានថ្លែងអបអរអំពីសមិទ្ធផលនៃកិច្ចសហប្រតិបតិ្តការរវាងសហរដ្ឋអាមេរិក និងកម្ពុជាពិសេសគឺវិស័យប្រយុទ្ធប្រឆាំងគ្រឿងញៀនតាមរយៈគម្រោងជំនួយមួយចំនួនទាំងការគាំទ្រលើផ្នែកបច្ចេកទេស និងការបណ្តុះបណ្តាលលើវិស័យត្រួតពិនិត្យគ្រឿងញៀននៅកម្ពុជា។
លោកស្រី Emily Zeeberg អ្នកនាំពាក្យស្ថានទូតសហរដ្ឋអាមេរិកប្រចាំនៅកម្ពុជាបានបដិសេធធ្វើអត្ថាធិប្បាយពាក់ព័ន្ធនឹងជំនួបខាងលើ។ ប៉ុន្តែបើយោងតាមធ្វីធើរបស់លោក Patrick Murphy ដែលបានចុះផ្សាយកាលពីថ្ងៃចន្ទបានសរសេរថា៖ «អង្គប្រជុំព្រឹកនេះ (ថ្ងៃចន្ទ) ជាមួយឧបនាយករដ្ឋមន្ត្រីប្រកបដោយផលផ្លែផ្កា។ យើងបានពិភាក្សាកិច្ចសហប្រតិបត្តិការរវាងសហរដ្ឋអាមេរិក និងកម្ពុជាស្តីពីបញ្ហាអនុវត្តច្បាប់រួមមានការគាំទ្រកុមារ និងប្រឆាំងការជួញដូរគ្រឿងញៀន»។
លោកនាយឧត្តមសេនីយ៍ មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានថ្លែងថា នៅក្នុងជំនួបនោះលោក កែ គឹមយ៉ាន និងលោក Patrick Murphy បានចែករំលែក និងផ្លាស់ប្តូរព័ត៌មានគ្នាពាក់ព័ន្ធនឹងសភាពការគ្រឿងញៀន និងរៀបចំឲ្យមានយន្តការពង្រឹងប្រសិទ្ធភាពការងារពាក់ព័ន្ធរវាងប្រទេសទាំង ២។
លោកបញ្ជាក់ថា៖ «ពាក់ព័ន្ធនឹងសភាពការណ៍គ្រឿងញៀន (អាមេរិក និងកម្ពុជា) នឹងរួមគ្នាដើម្បីបំផ្លាញក្រុមឧក្រិដ្ឋជនដែលមានអង្គការចាត់តាំង»។
លោក សួន ឃឿន ក៏បានឲ្យដឹងដែរថា លោក កែ គឹមយ៉ាន ក៏បានប្រាប់ទៅឯកអគ្គរដ្ឋទូតអាមេរិកថា តាមរយៈការយកចិត្តទុកដាក់របស់រាជរដ្ឋាភិបាលកម្ពុជា និងអាជ្ញាធរជាតិប្រយុទ្ធប្រឆាំងគ្រឿងញៀនបានដាក់ចេញនូវយុទ្ធនាការប្រយុទ្ធប្រឆាំងគ្រឿងញៀនខុសច្បាប់ហើយកម្ពុជាទទួលលទ្ធផលផ្លែផ្កាជាទីពេញចិត្ត។ លោកលើកឡើងទៀតថា ការបង្ក្រាបបទល្មើសគ្រឿងញៀនមានការកើនឡើងជារៀងរាល់ឆ្នាំហើយបច្ចុប្បន្ន អាជ្ញាធរបានគ្រប់គ្រងអ្នកញៀនគ្រឿងញៀនជាង ២ ម៉ឺននាក់៕
