.jpg)
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន។ ហ៊ាន រង្សី
ភ្នំពេញៈ ថ្លែងលើបណ្តាញសង្គមហ្វេសប៊ុកកាលពីថ្ងៃចន្ទ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានឲ្យដឹងថា មានជនទុច្ចរិតមួយចំនួនជ្រកក្រោមស្លាកសារព័ត៌មាន ទៅធ្វើការងារប្រាសចាកវិជ្ជាជីវៈ ដែលការធ្វើបែបនោះ គឺនាំឲ្យប៉ះពាល់ដល់កិត្តិយស សេចក្តីថ្លៃថ្នូរ របស់អ្នកសារព័ត៌មានអាជីពដែលមានវិជ្ជាជីវៈត្រឹមត្រូវ។
លោក ខៀវ កាញារីទ្ធ បានឲ្យដឹងដោយយោងតាមការត្អូញត្អែរបស់ម្ចាស់សហគ្រាសធុនតូច និងមធ្យម ចំពោះសកម្មភាពគ្មានវិជ្ជាជីវៈមួយចំនួនរបស់អ្នកព័ត៌មាន ដែលតែងតែចុះសុំលុយ និងផ្សព្វផ្សាយនាំ ឱ្យប៉ះពាល់ដល់មុខរបររបស់សហគ្រាសធុនតូច និងធម្យម។
លោក ខៀវ កាញារីទ្ធ បានសរសេរថា៖ «សកម្មភាពរញីរញ៉ៃរបស់អ្នកកាសែតគ្មានវិជ្ជាជីវៈ សំដៅដល់អ្នកកាសែត ដែលគ្មានមានកាសែតចេញផ្សាយ អ្នកកាសែតមានតែកូនកាមេរ៉ាតូចមួយ ឬ ទូរស័ព្ទដៃមួយគ្រឿង ផ្សាយតាមហ្វេសប៊ុក ដោយគ្មានរបៀបវារៈទៀងទាត់ តែទៀងទាត់ក្នុងការចុះសុំលុយ»។
លោកបានឲ្យដឹងថា ម្ចាស់សហគ្រាសបានរាយការណ៍ថា ការផ្សាយរបស់អ្នកអ្នកសារព័ត៌មានគ្មានវិជ្ជាជីវៈទាំងនោះ គឺមិនបានយល់ច្បាប់ពាណិជ្ជកម្ម និងលិខិតបទដ្ឋាន ឬបច្ចេកទេសអ្វីទាំងអស់ ដែលប៉ះពាល់យ៉ាងខ្លាំងដល់មុខរបររបស់សហគ្រាសធុនតូច និងមធ្យម។
លោក កាញារីទ្ធ ថ្លែងថា៖ «ខ្ញុំសង្ឃឹមថាអ្នកកាសែតទាំងអស់នឹងខិតខំចៀសវាងពីការប្រព្រឹត្តខុសវិជ្ជាជីវៈ ហើយរួមគ្នាកម្ចាត់អោយបានពួកទុច្ចរិតជ្រកក្រោមស្លាកសារព័ត៌មាន ដើម្បីសេចក្តីថ្លៃថ្នូរនៃអ្នកសារព័ត៌មានវិជ្ជាជីវៈទាំងអស់ក្នុងប្រទេសកម្ពុជា យើង»។
លោក ឆាយា នាថ និពន្ធនាយកសារព័ត៌មាន CPC NEWS បានថ្លែងថា តាមការសង្កេតជាក់ស្តែង និងតាមរបាយការណ៍ពីប្រជាពលរដ្ឋជាសំអាង ពិតជាមានបាតុភាពមិនល្អ ដែលបាននិងកំពុងប៉ះពាល់ដល់វិជ្ជាជីវៈសារព័ត៌មានពិតប្រាកដ។
លោក នាថ ថ្លែងថា៖ «សម្រាប់ខ្ញុំ ពេលដែលប្រជាពលរដ្ឋ ឬអ្នករកស៊ី មន្ត្រីរាជការ នាំគ្នានិយាយថា អ្នកកាសែត ឥឡូវ ក្លាយជាអ្នកជំរិតទារប្រាក់នោះ គឺពិតជាមិនអាចទទួលយកបានឡើយ។ បញ្ហានេះសង្ឃឹមថា លោករដ្ឋមន្ត្រីក្រសួងព័ត៌មាន នឹងមានវិធានការចំពោះក្រុមអ្នកកាសែតគ្មានវិជ្ជាជីវៈ គ្មានក្រមសីលធម៌ទាំងនេះផង ដើម្បីលើកតម្លៃនៃវិជ្ជាជីវៈសារព័ត៌មាន របស់យើងទាំងអស់គ្នាឡើងវិញ»។
លោក ប៉ែន បូណា ប្រធានក្លិបអ្នកកាសែតកម្ពុជា បានប្រាប់ ភ្នំពេញ ប៉ុស្តិ៍ កាលពីម្សិលមិញថា បច្ចុប្បន្ននេះមានបុគ្គលច្រើនណាស់ពាក់ស្លាកសារព័ត៌មាន ដើម្បីទៅប្រព្រឹត្តរឿងផ្តេសផ្តាស ដែលធ្វើឲ្យខូចគេឈ្មោះ កិត្តិយស ប៉ះពាល់ដល់អ្នកសារព័ត៌មានអាជីពជាច្រើន។
លោក បូណា ថ្លែងថា៖ «បុគ្គលបែបហ្នឹង មានច្រើនមែនទែន អ្នកខ្លះជាអ្នកលេងហ្វេសប៊ុក តាំងខ្លួនជាអ្នកសារព័ត៌មាន អ្នកខ្លះទៀតរួមគ្នាបង្កើតជាក្រុមនីមួយៗ ដើម្បីទៅកន្លែងណាមួយក្នុងបំណងរកលុយ ដោយធ្វើសកម្មភាពផ្សេងៗ ដោយសំអាងថា ខ្លួនគាត់ជាអ្នកសារព័ត៌មាន ប៉ុន្តែអ្វីដែលគាត់ធ្វើហ្នឹងមិនមែនក្នុងន័យជាអ្នកសារព័ត៌មានវិជ្ជាជីវៈ ត្រឹមត្រូវទេ គឺដើម្បីតែផលប្រយោជន៍ប៉ុណ្នោះ»។
លោក បូណា អះអាងថា សកម្មភាពបែបនោះ ធ្វើឲ្យមហាជនមានការយល់ច្រឡំចំពោះអ្នកសារព័ត៌មានដែលមានវិជ្ជាជីវៈត្រឹមត្រូវ ហេតុនេះក្រសួងព័ត៌មានគួរតែមានវិធានការណាមួយ ឬធ្វើយ៉ាងណាបែងចែកឲ្យច្បាស់រវាងអ្នកសារព័ត៌មានអាជីព និងអ្នកសារព័ត៌មានដែលគ្រាន់តែតាំងខ្លួនជាអ្នកសារព័ត៌មានតែមិនមែនអាជីព ខណៈ អ្នកមួយចំនួនផ្សេងទៀតមានអាជ្ញាប័ណ្ណ ប៉ុន្តែមិនបានប្រព្រឹត្តតាមវិជ្ជាជីវៈ។
លោក ផុស សុវណ្ណ ជាអគ្គនាយកនៃអគ្គនាយកដ្ឋានព័ត៌មាន និងសោតទស្សន៍ និងជាអ្នកនាំពាក្យក្រសួងព័ត៌មាន បានប្រាប់ ភ្នំពេញ ប៉ុស្តិ៍ កាលពីម្សិលមិញថា ពាក់ព័ន្ធក្នុងរឿងនេះ ក្រសួងព័ត៌មានមិននៅស្ងៀមទេ គឺបានត្រៀម ដាក់ចេញនូវវិធានការមួយចំនួន ដើម្បីពង្រឹងការអនុវត្តច្បាប់លើអ្នកសារព័ត៌មាន ដែលផ្សព្វផ្សាយគ្មានវិជ្ជាជីវៈត្រឹមត្រូវ ផ្សាយព័ត៌មានមិនពិត និងអុជអាលដែលធ្វើឲ្យប៉ះពាល់ដល់ប្រយោជន៍ និងកិត្យានុភាពសហគ្រាសធនតូច និងមធ្យម។
លោក សុវណ្ណ ថ្លែងថា៖ «ក្នុងកិច្ចកការងារនេះ យើងបានត្រៀមដាក់ចេញនូវវិធានការសំខាន់ៗចំនួន ២ គឺ ទី១ បង្កើតបទដ្ឋានគតិយុត្ត ដើម្បីទប់ស្កាត់ និងលុបបំបាត់ព័ត៌មានមិនពិត និងព័ត៌មានក្លែងក្លាយ ចំណែកទី២ គឺបង្កើតយន្តការអប់រំ និងការពង្រឹងការអនុវត្តច្បាប់លើអ្នកសារព័ត៌មាន»។
លោក សុវណ្ណ ថា ក្រសួងព័ត៌មានបានសហការជាមួយក្រសួង ស្ថាប័នពាក់ព័ន្ធ ដើម្បីពង្រឹងការអនុវត្តច្បាប់លើអ្នកសារព័ត៌មានក្នុងស្រុកដែលផ្សាយព័ត៌មានមិនពិត ព័ត៌មានអុជអាលបណ្តាលឲ្យកើតអំពើហិង្សា ចលាចលនៅក្នុងសង្គម និងធ្វើឲ្យប៉ះពាល់ដល់សន្តិសុខជាតិ សេដ្ឋកិច្ចជាតិ។ លើកលែងតែ គេហទំព័រព័ត៌មួយចំនួនដែលមិនបានចុះបញ្ជីនៅក្រសួងព័ត៌មាន និងសារព័ត៌មានបរទេស ដែលមានមូលដ្ឋាននៅក្រៅប្រទេសមួយចំនួនតូច ក្រសួងព័ត៌មាន នឹងសហការជាមួយក្រសួងពាក់ព័ន្ធបន្តពង្រឹកការអនុវត្តច្បាប់៕
វីដេអូ៖
