.jpg)
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាននិងក្រុមការងារមើលសុខទុក្ខសិស្សមានពិការភាពក្នុងខេត្តកំពង់ចាម។ រូបថត ក្រសួងព័ត៌មាន
កំពង់ចាមៈ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានជំរុញនិងលើកទឹកចិត្ត ឲ្យសិស្សានុសិស្ស មានពិការភាព ត្រូវតស៊ូ និងមានឆន្ទះក្នុងការសិក្សា ដោយកុំយកបញ្ហាមានពិការភាព ជាឧបសគ្គក្នុងការការសិក្សានិងស្វែងរកការងារ ដោយហេតុគ្រប់ស្ថាប័នរដ្ឋ និងឯកជនបានទុកកន្លែងការងារ ២ ភាគរយ សម្រាប់ផ្ដល់ឱកាសដល់ជនមានពិការភាព។
ការថ្លែងរបស់ លោក ខៀវ កាញារីទ្ធ បានធ្វើក្នុងពេលចុះជួបសំណេះសំណាលសួរសុខទុក្ខជាមួយលោកគ្រូ អ្នកគ្រូ និងសិស្សានុសិស្ស ពិការភាព ដូចជា ពិការភ្នែក គ និងថ្លង់ នៅវិទ្យាល័យអប់រំពិសេសកំពង់ចាម ស្ថិតនៅសង្កាត់ វាលវង្ស ក្រុង កំពង់ចាម កាលពីថ្ងៃទី ៣ ខែវិច្ឆិកា ឆ្នាំនេះ។
លោករដ្ឋមន្ដ្រីថ្លែងថា៖ «សិស្សានុសិស្សដែលពិការភ្នែក គ ថ្លង់ មិនមែនជាឧបសគ្គក្នុងការរកការងារធ្វើនោះទេ គ្រប់ស្ថាប័នរដ្ឋនិងឯកជន បានទុកកន្លែងការងារ ២ ភាគរយ សម្រាប់ជនមានពិការភាព»។
លោករដ្ឋមន្រ្ដីបានបញ្ជាក់ថា ដោយសារតែបញ្ហាការីករាលដាលនៃជំងឺកូវីដ ១៩ ក្នុងឆ្នាំនេះ គឺមិនមានការប្រឡងរើសមន្ត្រីចូលក្នុងក្របខ័ណ្ឌរដ្ឋថ្មីបន្ថែមទេដើម្បីកាត់បន្ថយការចំណាយ។ ប៉ុន្ដែរាជរដ្ឋាភិបាលបានផ្តល់ថវិកាជួយដល់ប្រជាពលរដ្ឋក្រីក្រ ដែលរងផលប៉ះពាល់ដោយសារជំងឺកូវីដ ១៩ វិញ។
លោក ខៀវ កាញារីទ្ធ បានឲ្យដឹងថា រយៈពេល ១៧ ឆ្នាំកន្លងមកនេះ ក្រុមការងារបានចុះជួយដល់វិទ្យាល័យអប់រំពិសេសកំពង់ចាម។ ហើយរយៈពេល ៤ ឆ្នាំចុងក្រោយនេះក៏បានជួយបន្ថែម ដល់កុមារកំព្រា ដែលជួបការលំបាកផងដែរ។
លោករដ្ឋមន្រ្ដីថ្លែងថា៖ «យើងមានការសប្បាយរីករាយដោយបានឃើញសិស្សានុសិស្សមានពិការភាព ពិការភ្នែក គ ថ្លង់ បានសិក្សាដល់ថ្នាក់មហាវិទ្យាល័យ និងទទួលបានការងារល្អៗធ្វើ ហើយមានគ្រួសារប្រកបដោយសុខសុភមង្គលថែមទៀត»។ កាលពីថ្ងៃទី ៤ ខែវិច្ឆិកានេះ លោករដ្ឋមន្រ្ដីបានបង្ហាញ អំពីយុវជនម្នាក់ឈ្មោះ ស្រ៊ុន ដែលទទួលបានការងារធ្វើនៅមន្ទីរព័ត៌មានខេត្ដបាត់ដំបង។
លោករដ្ឋមន្រ្ដីបានអះអាងថា៖ «គេជាមនុស្ស autist តែមានឆន្ទៈយ៉ាងខ្ពស់ក្នុងជីវិត។ ពេលខ្ញុំយកមកឲ្យបម្រើការងារនៅមន្ទីរព័ត៌មានខេត្តបាត់ដំបង គេបានបំពេញការងារយ៉ាងល្អមិនចាញ់អ្នកឯទៀតឡើយ។ ជីវិតជាការតស៊ូ ហើយ អ្នកមានឆន្ទៈតស៊ូ ជាអ្នកមានជោគជ័យ»។
លោក កែវ ផល្លី នាយកវិទ្យាល័យអប់រំពិសេសកំពង់ចាម ថ្លែងប្រាប់ ភ្នំពេញ ប៉ុស្ដិ៍ នៅថ្ងៃទី ៥ ខែវិច្ឆិកា ថា សិស្សានុសិស្សមានពិការភាពនៅវិទ្យាល័យអប់រំពិសេសកំពង់ចាម សរុបមានចំនួន ១៧១ នាក់ ស្រីចំនួន ៧៣ នាក់ ក្នុងនោះសិស្សពិការភ្នែក មានចំនួន ៥៩ នាក់ សិស្ស គ ថ្លង់ ចំនួន ១១២ នាក់ ហើយបច្ចុប្បន្នសិស្សានុសិស្សមានពិការភាពនៅវិទ្យាល័យនេះ ចំនួន ២៩ នាក់ ក៏កំពុងបន្តការសិក្សាមហាវិទ្យាល័យនៅខេត្ដកំពង់ចាមនិងរាជធានីភ្នំពេញផងដែរ។
លោកថ្លែងថា៖ «ឯកឧត្ដមរដ្ឋមន្រ្ដីក្រសួងព័ត៌មានបានលើកទឹកចិត្ដដល់សិស្សានុសិស្សដែលមានពិការភាព មិនត្រូវបាក់ទឹកចិត្ដនោះទេ ត្រូវប្រឹងប្រែងសិក្សាឲ្យមានចំណេះដឹង និងជំនាញ នោះជីវិតនឹងទទួលបានជោគជ័យ ព្រោះឯកឧត្ដមរដ្ឋមន្រ្ដីបានលើកឡើងថា ពិការភាពមិនមែនជាឧបសគ្គចំពោះការស្វែងរកការងារធ្វើនោះទេ ប៉ុន្ដែអ្វីដែលសំខាន់នោះគឺចំណេះដឹង»។
លោក កែវ ផល្លី បានឲ្យដឹងថា សាលាអប់រំពិសេសបានបង្រៀនសិស្សមានពិការភាព ទៅតាមកម្មវិធីសិក្សារបស់ ក្រសួងអប់រំយុវជន និងកីឡា ប៉ុន្ដែមានបន្ថែមជំនាញពិការភាពមួយទៀត ដល់សិស្សផងដែរ។ ក្រៅពីនេះ សាលាមានបង្រៀន ភ្លេង សិល្បៈ និងបង្ហាត់ស្តាប់ និយាយសម្រាប់សិស្ស គថ្លង់ផងដែរ៕
