.jpg)
លោក នេត សាវឿន អគ្គស្នងការនគរបាលជាតិក្នុងកិច្ចប្រជុំកាលពីម្សិលមិញ។ រូបថត នគរបាលជាតិ
ភ្នំពេញៈ លោក ខៀវ សុភ័គ អ្នកនាំពាក្យក្រសួងមហាផ្ទៃបានព្រមានថា សមត្ថកិច្ចនឹងចាត់វិធានការចំពោះបុគ្គលដែលបង្ហោះសារ «ញុះញង់» គាំទ្រការប្រកាសវិលត្រឡប់មកវិញរបស់លោក សម រង្ស៊ី ខណៈដែលលោក នេត សាវឿន អគ្គស្នងការនគរបាលជាតិបានកោះប្រជុំមន្ត្រីសមត្ថកិច្ចពាក់ព័ន្ធ ដោយដាក់ចេញនូវទិសដៅការងារមួយចំនួនក្នុងការទប់ស្កាត់ «ចលនាឧទ្ទាម» ដែលមានចេតនាប៉ុនប៉ងបង្កអសន្តិសុខដើម្បីផ្តួលរំលំរដ្ឋាភិបាលស្របច្បាប់ ដែលកើតចេញពីការបោះឆ្នោត។
លោក ខៀវ សុភ័គ បានថ្លែងប្រាប់ភ្នំពេញ ប៉ុស្តិ៍ កាលពីថ្ងៃចន្ទថា សមត្ថកិច្ចមិនត្រឹមតែស្វែងរកចាប់ខ្លួនអ្នកដែលបានទទួលផែនការពីលោក សម រង្ស៊ី ប៉ុណ្ណោះទេ តែសមត្ថកិច្ចថែមទាំងនឹងចាត់វិធានការបុគ្គលដែលសរសេរសារបង្ហោះគាំទ្រការប្រកាសវិលត្រឡប់របស់លោក សម រង្ស៊ី ផងដែរ។
លោកបញ្ជាក់ថា៖ «អ្នកឯងទៅគាំទ្រអ្នកដែលផ្តួលរំលំរាជរដ្ឋាភិបាល យើងចាត់ទុកជាអ្នកដែលប្រឆាំងសុខសន្តិភាពរបស់ប្រទេសជាតិ ហើយអ្នកចង់អុកឡុកមិនឲ្យប្រទេសជាតិមានសុខសន្តិភាពហើយវិធានការយើងចាប់ខ្លួនអ្នកហ្នឹង»។
លោក សុភ័គ ថ្លែងថា៖ «យើងក៏នឹងចាត់វិធានការអ្នកដែលសរសេរសារដែរ បើអ្នកសរសេរនៅ (ក្នុងប្រទេស)។ យើងចង់រកមុខអ្នកដែលសរសេរបែបហ្នឹង បើវានៅក្នុងប្រទេស យើងនឹងចាប់វាផងដែរ។ ប្រទេសគេកំពុងតែមានសុខសន្តិភាព ហើយហេតុអីបានជាអ្នកឯងចង់ផ្តួលរំលំរដ្ឋាភិបាល។ ពេលដែលមក យើងនឹងចាប់ទាំង (សម) រង្ស៊ី និងទាំងអស់ដោយសារតែខុសច្បាប់»។
លោកបន្តថាទោះក្នុងតម្លៃណាក៏ដោយ សមត្ថកិច្ចនឹងធ្វើការចាប់មេខ្លោង ឬក្រុមណាដែលមានបំណងបំផ្លាញសុខសន្តិភាព និងការអភិវឌ្ឍដែលប្រទេសកម្ពុជា កំពុងតែមាននាពេលបច្ចុប្បន្ននេះ។ លោកបន្ថែមថាការចាប់ខ្លួនមេខ្លោងមួយចំនួនរបស់អតីតគណបក្សប្រឆាំង វានឹងមិនធ្វើឲ្យប្រទេសមានចលាចលនោះទេ។
លោក ខៀវ សុភ័គ បញ្ជាក់ថា៖ «វានឹងមិនបង្កចលាចលនោះទេ ដោយសារតែវាមានតែមេប៉ុណ្ណោះហើយពេលដែលយើងចាប់តែមេអស់។ យើងឃើញពេល កឹម សុខា ជាប់គុក សម រង្ស៊ី មានធ្វើអីណា។ យើងចាប់តែមេៗដែលបំផុសបំផុលវាមិនមានច្រើនរហូតដល់រាប់លាននាក់នោះទេ។ យើងរកតែមេខ្លោង»។
ជាមួយគ្នានេះកាលពីថ្ងៃអង្គារម្សិលមិញក្នុងកិច្ចប្រជុំផ្សព្វផ្សាយសភាពការណ៍សន្តិសុខ និងសណ្តាប់ធ្នាប់សាធារណៈអគ្គស្នងការនគរបាលជាតិបានដាក់ចេញនូវផែនការមួយចំនួនដើម្បីទប់ស្កាត់ចលនា «ឧទ្ទាម» ដែលមានចេតនា ប៉ុនប៉ងបង្កភាពអសន្តិសុខ ដើម្បីផ្តួលរំលំរដ្ឋាភិបាលស្របច្បាប់។ កិច្ចប្រជុំមានការចូលរួមពីគ្រប់នាយកដ្ឋានចំណុះក្រោមអគ្គស្នងការដ្ឋាននគរបាលជាតិ។
លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិបានថ្លែងទៅកាន់មន្ត្រីដែលបានចូលរួមប្រមាណ ១០០០ នាក់ថា៖ «យើងប្តេជ្ញាទាំងអស់គ្នា ការពាររាជរដ្ឋាភិបាលមិនឲ្យក្រុមណា ពួកក្បត់ជាតិណា មកបំផ្លាញសេចក្តីសុខ និងសន្តិភាពនៅកម្ពុជាបានឡើយ»។
លោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការនគរបាលជាតិបានថ្លែងឲ្យដឹងបន្ទាប់ពីចប់កិច្ចប្រជុំថា កិច្ចប្រជុំនេះមានគោលបំណងសំខាន់គឺការផ្សព្វផ្សាយនូវសភាពការណ៍ថ្មីៗពាក់ព័ន្ធដល់ស្ថានភាពសន្តិសុខ សណ្ដាប់ធ្នាប់សង្គមដែលក្នុងនោះក៏ពាក់ព័ន្ធទៅនឹងការបង្ក្រាបចលនាឧទ្ទាមដែលមានចេតនា ប៉ុនប៉ងធ្វើផែនការបង្កអសន្តិសុខ ផ្តួលរំលំរដ្ឋាភិបាលស្របច្បាប់ដែលកើតចេញពីការបោះឆ្នោតផងដែរ។
លោក គឹមខឿន បញ្ជាក់ថា៖ «ជាទិសដៅ អគ្គស្នងការនគរបាលជាតិបានសង្កត់ធ្ងន់ទៅលើការងារ ២ គឺទី ១ ពង្រឹងសមត្ថភាពនៅក្នុងការការពារសុវត្ថិភាពក្នុងពិធីភ្ជុំបិណ្ឌ និងទី ២ គឺយើងពង្រឹងសន្តិសុខរួមមិនអនុញ្ញាតឲ្យកម្លាំងអមិត្តណា ឬពួកឧទ្ទាមណាមកបំផ្លិចបំផ្លាញសុវត្ថិភាព សន្តិសុខ សន្តិភាព និងប្រយោជន៍របស់ជាតិដែលយើងកំពុងតែមានសព្វថ្ងៃនេះ»។
លោកបន្ថែមថាអគ្គស្នងការនគរបាលជាតិ ខិតខំពង្រឹងគ្រប់ជំនាញទាំងអស់ ដើម្បីការពារសុវត្ថិភាព និងសន្តិសុខជូនប្រជាពលរដ្ឋហើយថា មន្ត្រីស្នងការដ្ឋាននគរបាលរាជធានី ខេត្តក៏នឹងខិតខំធ្វើការផ្សព្វផ្សាយដល់មន្ត្រីនគរបាលមូលដ្ឋាន និងប្រជាពលរដ្ឋឲ្យយល់ដឹងពីឧបាយកលនឹងសកម្មភាពរបស់ពួកអតីតបក្សប្រឆាំងដើម្បីកុំឲ្យចាញ់ឧបាយកលរបស់ពួកគេ។
មន្ត្រីនគរបាលជាន់ខ្ពស់ម្នាក់ដែលបានចូលរួមក្នុងកិច្ចប្រជុំនេះ ហើយស្នើសុំមិនសុំបញ្ចេញឈ្មោះបានប្រាប់ភ្នំពេញប៉ុស្តិ៍ថា៖ «អគ្គស្នងការនគរបាលជាតិ បានដាក់បទបញ្ជាថា ធ្វើយ៉ាងណាត្រូវចាប់ខ្លួនមេពួកឧទ្ទាមឲ្យបានបើទោះបីជាមានការចូលរួមគាំទ្រច្រើនយ៉ាងណាក៏ដោយ។ កម្លាំងនគរបាលទាំងអស់ ត្រូវតែធ្វើតាមបញ្ជារបស់ថ្នាក់លើ ហើយដាច់ខាតត្រូវទប់ស្កាត់កុំឲ្យក្រុមឧទ្ទាមបំផ្លាញសុខសន្តិភាព»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក បានថ្លែងថា វិធានការរបស់សមត្ថកិច្ចចំពោះបុគ្គលដែលបង្ហោះសារគាំទ្រការវិលត្រឡប់របស់លោក សម រង្ស៊ីគឺជាការរំលោភសិទ្ធិសេរីភាពនៃការបញ្ចេញមតិដែលមានចែងក្នុងរដ្ឋធម្មនុញ្ញដែលនេះធ្វើឲ្យលោកកាន់តែព្រួយបារម្ភ។
លោកបញ្ជាក់ថា៖ «យើងឃើញថា បញ្ហានេះកាន់តែធ្ងន់ធ្ងរទៅៗហើយវាប៉ះពាល់ដល់សិទ្ធិសេរីភាពនៃការបញ្ចេញមតិ និងសិទ្ធិក្នុងការធ្វើសកម្មភាពនយោបាយដោយសារតែពួកគេ គ្រាន់តែបញ្ចេញសារ ឬក៏ទស្សនរបស់ខ្លួនដែលមានចែងក្នុងច្បាប់»។
លោកបានបន្ថែមថាផែនការរបស់សមត្ថកិច្ចក្នុងការចាប់ខ្លួនលោក សម រង្ស៊ី និងមន្ត្រីជាន់ខ្ពស់របស់អតីតគណបក្សសង្គ្រោះជាតិអាចនឹងបង្កធ្វើឲ្យមានភាពចលាចលនៅក្នុងប្រទេសកម្ពុជា ដោយសារតែវាអាចនឹងកើតមាននូវការប្រឈមមុខដាក់គ្នារវាងកម្លាំងអ្នកដែលគាំទ្រលោក សម រង្ស៊ី និងកម្លាំងសមត្ថកិច្ច។
ប៉ុន្តែលោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានគាំទ្រនូវវិធានការរបស់សមត្ថកិច្ចក្នុងការចាប់ខ្លួនបុគ្គលដែលបង្ហោះសារញុះញង់ពាក់ព័ន្ធនឹងការប្រកាសវិលត្រឡប់របស់លោក សម រង្ស៊ី ខណៈដែលលោកថា ទង្វើ និងសាររបស់លោក សម រង្ស៊ី មានចេតនាបង្កអសន្តិសុខ ផ្តួលរំលំរដ្ឋាភិបាលស្របច្បាប់។
លោកបញ្ជាក់ថា៖ «អ្នកទាំងឡាយណាដែលធ្វើសកម្មភាពដោយការបង្ហោះសារ ឬសកម្មភាពបង្ហោះសំឡេង ឬសកម្មភាពអ្វីផ្សេងទៀតពួកគេគឺឃុបឃិត និងរួមគំនិតនៅក្នុងឧបាយកលក្បត់ផ្តួលរំលំរដ្ឋាភិបាលស្របច្បាប់ដែលកើតចេញពីឆន្ទៈរបស់ប្រជាពលរដ្ឋ ហើយសមត្ថកិច្ចមានកាតព្វកិច្ចត្រូវបង្ការ និងទប់ស្កាត់កុំឲ្យកើតទៅជាបញ្ហាធំ ដែលគ្រប់គ្រងលែងបាន»។
លោកបន្ថែមថា នគរបាលជាតិមានសមត្ថភាពគ្រប់គ្រាន់ ដើម្បីធ្វើការចាប់ខ្លួនលោក សម រង្ស៊ី នៅពេលលោក សម រង្ស៊ី វិលត្រឡប់មកដល់កម្ពុជាវិញ។
ការបើកកិច្ចប្រជុំរបស់អគ្គស្នងការនគរបាលជាតិកាលពីម្សិលមិញនេះ ធ្វើឡើងបន្ទាប់ពីសកម្មជនអតីតគណបក្សសង្គ្រោះជាតិចំនួន ៦ នាក់បន្ថែមទៀត ត្រូវបានសាលាដំបូងរាជធានីភ្នំពេញចោទប្រកាន់ និងបញ្ជូនទៅឃុំខ្លួនបណ្តោះអាសន្ននៅពន្ធនាគារក្រោមការចោទប្រកាន់ពីបទ «រួមគំនិតក្បត់ និងញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គមជាតិ»៕
វីដេអូ៖
