ភ្នំពេញៈ លោក គង់ គាំ អតីតប្រធានគណបក្ស សម រង្ស៊ី បានសម្តែងការភ្ញាក់ផ្អើលនៅចំពោះមុខចៅក្រមស៊ើបសួរសាលាដំបូងរាជធានីភ្នំពេញ ចំពោះអ្វីដែលជាឃ្លីបវីដេអូរបស់លោក កឹម សុខា បាននិយាយនៅក្នុងវេទិកាមួយ នៅប្រទេសអូស្ត្រាលីកាលពីឆ្នាំ ២០១៣ ដែលលោក សុខា ថា លោកបានចូលធ្វើនយោបាយវិញគឺដោយសារតែមានការជួយផ្តល់ជាមតិយោបល់ពីមន្ត្រីមួយចំនួន របស់សហរដ្ឋអាមេរិក។
លោក គង់ គាំ បានប្រាប់ក្រុមអ្នកសារព័ត៌មាន នៅពេលចេញពីសាលាដំបូងរាជធានី បន្ទាប់ពីត្រូវបានចៅក្រមស៊ើបសួរលោក គី ឫទ្ធី បានសាកសួរលោកចំនួន ៣ ម៉ោងកាលពីព្រឹកម្សិលមិញថា ចៅក្រមបានសាកសួរលោកទាក់ទងនឹងទំនាក់ទំនង និងសកម្មភាពរបស់លោក កឹម សុខា ជាមួយលោក សម រង្ស៊ី ដែលពាក់ព័ន្ធនឹងសំណុំរឿង សន្ទិដ្ឋិភាព (ក្បត់ជាតិ) ឃុបឃិតជាមួយបរទេសប៉ុនប៉ងផ្តួលរំលំរដ្ឋាភិបាលរបស់លោក កឹម សុខា។
ការសាកសួរលោក គង់ គាំ គឺធ្វើឡើង បន្ទាប់ពីចៅក្រមស៊ើបសួរ សាលាដំបូងរាជធានីភ្នំពេញ បានសាកសួរទៅលើសាក្សីចំនួន ៩ នាក់ពាក់ព័ន្ធសំណុំរឿង «ក្បត់ជាតិ» របស់លោក កឹម សុខា និងក្រោយពីចៅក្រមស៊ើបសួរ បានបដិសេធពាក្យស្នើសុំរបស់ក្រុមមេធាវីការពារសិទ្ធិលោក កឹម សុខា ជាលើកទី ៣ ដែលស្នើសុំឲ្យទម្លាក់បទចោទប្រកាន់លើលោក សុខា។
លោក គង់ គាំ ដែលក៏ជាអតីតទីប្រឹក្សាជាន់ខ្ពស់អតីតគណបក្សសង្គ្រោះជាតិ ហើយដែលទើបតែត្រូវទទួលបានសិទ្ធិធ្វើនយោបាយឡើងវិញកាលពីពេលថ្មីៗនេះ បានថ្លែងថា លោក គី ឫទ្ធី បានសាកសួរលោក អស់រយៈពេលប្រមាណជិត ៣ ម៉ោង ពាក់ព័ន្ធទៅនឹងសកម្មភាពគណបក្សសិទ្ធិមនុស្ស ការចូលរួមគ្នារវាងគណបក្សសិទ្ធិមនុស្ស និងគណបក្សសម រង្ស៊ី ទៅជាគណបក្សសង្គ្រោះជាតិ និងសកម្មភាពរបស់លោក សម រង្ស៊ី និងលោក កឹម សុខា។
លោកបញ្ជាក់ថា៖ «ខ្ញុំស្បថថា បានដឹងអីជម្រាបហ្នឹង មិនបានបំភ្លៃ បំផ្លើស ឬមួលបង្កាច់អ្វីទេ ហើយខ្ញុំគិតថា មេធាវី ដើមចោទ គេជាអ្នកដាក់បន្ទុក ឯមេធាវីចុងចោទគឺជាអ្នកដោះបន្ទុក ខ្ញុំជាសាក្សី មិនបានដាក់បន្ទុកទេ មិនបានដោះបន្ទុកទេ គ្រាន់តែបំភ្លឺ ដើម្បីឱ្យតុលាការ មានព័ត៌មានគ្រប់គ្រាន់ ផ្តល់យុត្តិធម៌ដល់អ្នកដែលត្រូវចោទតែប៉ុណ្ណឹងទេបាទ»។
លោកបន្ថែមថា៖ «ការពិតខ្ញុំជាទីប្រឹក្សា ហើយដូចដែលលោក សម រង្ស៊ី ពេលថ្មីៗចុងក្រោយថា ខ្ញុំចូលមកបំភ្លឺនេះ មិនសូវដឹងរឿងអីច្រើនទេ តែមានតែ សម រង្ស៊ី ទេ ដែលដឹងរឿងគ្រប់យ៉ាង។ ជាការត្រឹមត្រូវ ដែលលោក សម រង្ស៊ី ដឹងរឿងគ្រប់យ៉ាង ប៉ុន្តែអ្នកដែលដឹងតិច ក៏ត្រូវតែមានព័ត៌មានជូនចៅក្រម ហើយអ្នកដឹងច្រើន ក៏មានព័ត៌មានជូនចៅក្រម ដែលមានគោលដៅតែមួយគត់ គឺរកយុត្តិធម៌ឲ្យអ្នកដែលត្រូវចោទ»។
ទោះជាយ៉ាងណា លោកថា លោកមិនបានដឹងថា លោក កឹម សុខា មានទំនាក់ទំនងជាមួយបរទេសនោះទេ ហើយលោកអះអាងថា ការចូលរួមគ្នា រវាងគណបក្សសិទ្ធិមនុស្សនិងគណបក្ស សម រង្ស៊ី ទៅជាគណបក្សសង្គ្រោះជាតិគឺដើម្បីបង្រួបបង្រួមគ្នា ជាកម្លាំង ដើម្បីចូលរួមប្រកួតប្រជែង ការបោះឆ្នោតឆ្នាំ ២០១៣ ដោយតម្លាភាព និងយុត្តិធម៌ និងនាំមកនូវភាពវិជ្ជមាន ចំពោះប្រទេស កម្ពុជា។
បើតាមលោក គង់ គាំ នៅមុនពេលសាកសួរ ចៅក្រមបានរៀបចំចាក់ឃ្លីបវីដេអូរបស់លោក កឹម សុខា ដែលនិយាយនៅប្រទេសអូស្ត្រាលីឲ្យលោកមើល ប៉ុន្តែលោកបានប្រាប់ចៅក្រមថា លោកបានមើលវីដេអូដែល លោក សុខា បាននិយាយអំពីការជួយពីមន្ត្រីអាមេរិក ដែលធ្វើឲ្យលោកមានការភ្ញាក់ផ្អើលចំពោះវីដេអូនេះរួចហើយ។
លោកបញ្ជាក់ថា៖ «ដូច្នេះខ្ញុំគិតថា អ្វីៗអាស្រ័យលើ លោក កឹម សុខា ខ្លួនឯង។ ខ្ញុំគ្រាន់តែភ្ញាក់ផ្អើល ដែលមានវីដេអូ សំឡេង គាត់ (កឹម សុខា) ថា គាត់បានធ្វើការជាមួយបរទេស ដើម្បីនឹងធ្វើឲ្យមានការផ្លាស់ប្តូរនៅកម្ពុជា។ ខ្ញុំគ្រាន់តែដឹងថា ទាំង ២ នាក់ គណបក្សសិទ្ធិមនុស្ស និងគណបក្ស សម រង្ស៊ី បង្កើតគណបក្សសង្គ្រោះជាតិ ដើម្បីមានថាមពល ប្រជែងជាមួយគណបក្ស គ្រប់គ្រងអំណាច»។
លោកចៅក្រម គី ឫទ្ធី និងលោក សួស វិទ្យារ៉ាន់ឌី អ្នកនាំពាក្យសាលាដំបូងរាជធានី មិនអាចទាក់ទងសុំអធិប្បាយបានទេ កាលពីម្សិលមិញ។
លោក ចាន់ ចេន មេធាវីមួយរូបក្នុងចំណោមមេធាវីការពារក្តី ៤ រូបរបស់លោក សុខា បានថ្លែងថា៖ «រហូតមកដល់ពេលនេះ ខ្ញុំមិនទាន់ឃើញសំណុំរឿងរបស់គាត់ (កឹម សុខា) មានអីប្លែកឬយ៉ាងណាទេ ពីព្រោះចៅក្រមស៊ើបសួរកំពុងបន្តនីតិវិធីរបស់គាត់»។
សាក្សី ដែលត្រូវបានសាលាដំបូងរាជធានីភ្នំពេញ ចេញដីកាកោះហៅឲ្យចូលឆ្លើយបំភ្លឺ លើសំណុំរឿងលោក កឹម សុខា ពីបទសន្ទិដ្ឋិភាពជាមួយបរទេសនេះ រួមមាន លោក សៀ ភារម្យ អតីតប្រធានអង្គការក្រុមការងារពិសេសសិទ្ធិលំនៅឋាន លោក មាស គឹមសេង អតីតមន្ត្រីសមាគមធាងត្នោត លោ-ស្រី ចក់ សុភាព ប្រធានមជ្ឈមណ្ឌលសិទ្ធិមនុស្សកម្ពុជា លោក ប៉ា ងួនទៀង ប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) លោក កែវ រតនា អតីតមន្ត្រីអតីតគណបក្សសង្គ្រោះជាតិ លោក ខឿន វីរ៉ាត់ មន្ត្រីអតីតគណបក្សសង្គ្រោះជាតិ លោក ហេង ពិសិដ្ឋ អតីតយុវជនអតីតគណបក្សសង្គ្រោះជាតិ លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) និងអ្នកស្រី ស ស៊ន សកម្មជនដីធ្លីសហគមន៍បុរីកីឡា។
លោក កឹម សុខា ត្រូវបានសមត្ថកិច្ចចាប់ខ្លួននៅពាក់កណ្តាលអាធ្រាត្រ ឈានចូលថ្ងៃទី ៣ ខែកញ្ញា ឆ្នាំ ២០១៧ ហើយត្រូវបានបញ្ជូនទៅឃុំខ្លួន បណ្តោះអាសន្ននៅពន្ធនាគារត្រពាំងផ្លុង ក្នុងខេត្តត្បូងឃ្មុំ។
លោកត្រូវបានតុលាការចោទប្រកាន់ពីបទសន្ទិដ្ឋិភាពជាមួយបរទេស តាមមាត្រា ៤៤៣ នៃក្រមព្រហ្មទណ្ឌ ដែលអាចប្រឈមមុខនឹងការជាប់ពន្ធនាគារពី ១៥ ឆ្នាំដល់ ៣០ ឆ្នាំប្រសិនបើតុលាការរកឃើញថាមានទោស។ បច្ចុប្បន្នលោកសុខា ត្រូវបានឲ្យស្នាក់នៅក្នុងផ្ទះ ក្រោមការត្រួតពិនិត្យរបស់តុលាការ៕