ភ្នំពេញៈ ប្រធានកិត្តិយសគណបក្សឆន្ទៈខ្មែរ លោក គង់ គាំ ដែលជាអតីតប្រធានគណបក្ស សម រង្ស៊ី ថ្មីៗនេះ បានហៅលោក សម រង្ស៊ី ប្រធានស្តីទី នៃអតីតគណបក្សសង្គ្រោះជាតិ ថាជាមេដឹកនាំជ្រុលនិយម ហួសហេតុនិយម ដោយលោកថា បើជឿមេដឹកនាំរូបនេះ អំពីអ្វី ដែលមិនអាចកើតឡើងបាន គឺជាភាពលេលាបំផុត។ នេះបើតាមការលើកឡើងរបស់លោក តាមរយៈហ្វេសប៊ុកផ្ទាល់ខ្លួន ដែលបានផ្សព្វផ្សាយកាលពីថ្ងៃទី ៦ កុម្ភៈ។
ការលើកឡើងរបស់លោក គង់ គាំ បែបនេះហាក់ដូចជាការឆ្លើយតបទៅលោក សម រង្ស៊ី ដែលប៉ុន្មានថ្ងៃនេះបានប្រកាសវិលចូលកម្ពុជាវិញក្នុងឆ្នាំ ២០១៩ ជាមួយនឹងការប្រកាសថា លោកវិលចូលមកប្រទេសវិញ គឺមិនមែនចូលមកឲ្យលោកនាយករដ្ឋមន្ត្រី ហ៊ុន សែន ដែលជាគូប្រជែងនយោបាយចាប់ខ្លួនលោកនោះទេ ប៉ុន្តែការវិលត្រឡប់ចូលស្រុករបស់លោក ដែលលោកអះអាងថា មានការអមដំណើរដោយកម្មករ និងប្រជាពលរដ្ឋរាប់ម៉ឺននាក់នោះ គឺដើម្បីងើបឡើងចាប់លោក ហ៊ុន សែន ទៅវិញទេ។
លោក គង់ គាំ បានសរសេរតាមបែបឌឺដងទៅលោក សម រង្ស៊ី ថា៖ «មិនឲ្យ ហ៊ុន សែន ចាប់ សម រង្ស៊ី ទេ គឺងើបឡើងជាមួយ សម រង្ស៊ី ទៅចាប់ ហ៊ុន សែន វិញទាំងអស់គ្នា។ ឆាចោលអំណាច ហ៊ុន សែន ខ្មែរបាត់បង់ដីធ្លី បានដីធ្លីមកវិញ ខ្មែរជំពាក់គេ លែងជំពាក់គេ។ កសិផលបានថ្លៃខ្ពស់ ប្រាក់ខែមន្ត្រីរាជការ ប្រាក់ឈ្នួលកម្មករខ្ពស់»។
ជាមួយនឹងការឌឺដងស៊កសៀតនេះ លោក គង់ គាំ ចាត់ទុកសកម្មភាព ឬការលើកឡើងរបស់លោក សម រង្ស៊ី នាពេលកន្លងមកថា ជានយោបាយឆុងៗរបស់លោក សម រង្ស៊ី ដែលលទ្ធផល គឺកំពប់អស់ ច្របូកច្របល់អស់ រលំរលាយអស់ ទើបវាពិតប្រាកដ។
លោកបញ្ជាក់ថា៖ «ភាសា និងអំពើត្រៀមធ្វើរបស់ សម រង្ស៊ី អំពីការងើបឡើងផ្តួលរំលំអំណាច ដែលកំពុងគ្រប់គ្រងប្រទេស ដើម្បីភាពស្រមើស្រមៃទាំងឡាយ គឺអំពើប្រទូស្តរាយ ភាពអន្តរាយតាំងពីដើមទីរហូតទីបញ្ចប់»។
ជាងនេះទៀត លោកបានលើកអំពីគណបក្សឆន្ទៈខ្មែរ ដឹកនាំដោយកូនប្រុសរបស់លោក គឺលោក គង់ មុនីកា ដែលលោកថា ជាគណបក្សស្របច្បាប់ ស្ថិតក្នុងបញ្ជីស្រាប់ ជាគណបក្សប្រឆាំងថ្មី មានរូបសញ្ញាព្រះអាទិត្យ ជាជម្រើសថ្មី ដើម្បីការផ្លាស់ប្តូរថ្មី ដែលចូលរួមទាំងការការពារ ការកសាង ទាំងការប្រកួតប្រជែងឲ្យមានការផ្លាស់ប្តូរតាមក្រឹត្យក្រមគតិច្បាប់ដោយសន្តិវិធី។
ជុំវិញការប្រកាសវិលចូលស្រុករបស់លោក សម រង្ស៊ី នោះ អគ្គនាយកដ្ឋានអន្តោប្រវេសន៍ បានបញ្ជាឲ្យគោលដៅច្រកទ្វារអាកាសយានដ្ឋានអន្តរជាតិ និងច្រកទ្វារព្រំដែនអន្តរជាតិ ត្រូវចាត់វិធានការអនុវត្ត និងសហការអនុវត្ត ជាមួយសមត្ថកិច្ចពាក់ព័ន្ធក្នុងការអនុវត្តដីកាបង្គាប់ឲ្យចាប់ខ្លួនលោក សម រង្ស៊ី បន្ទាប់ពីលោកបានប្រកាសជាញឹកញាប់ថានឹងត្រឡប់ចូលស្រុកខ្មែរវិញនៅឆ្នាំ ២០១៩ នេះ។
យោងតាមសេចក្តីណែនាំ ដែលចុះហត្ថលេខាដោយអគ្គនាយកនៃអគ្គនាយកដ្ឋានអន្តោប្រវេសន៍ លោក គៀត ច័ន្ទថារិទ្ធ កាលពីថ្ងៃទី ១ កុម្ភៈ បានណែនាំដល់អគ្គនាយករងនៃអគ្គនាយកដ្ឋានអន្តោប្រវេសន៍និងប្រធាននាយកដ្ឋានក្រោមឱវាទទាំងអស់ត្រូវចាត់វិធានការអនុវត្ត និងសហការអនុវត្ត ជាមួយសមត្ថកិច្ចពាក់ព័ន្ធ ក្នុងការអនុវត្តដីកាចាប់ខ្លួនលោក សម រង្ស៊ី។
សេចក្តីណែនាំនោះបញ្ជាក់ថា៖ «មានព័ត៌មានថាទណ្ឌិតឈ្មោះ សម រង្ស៊ី នឹងធ្វើដំណើរចូលមកព្រះរាជាណាចក្រកម្ពុជា នាពេលខាងមុខ។ ក្នុងន័យនេះអគ្គនាយក នៃអគ្គនាយកដ្ឋានអន្តោប្រវេសន៍ សូមក្រើនរំឭកជាថ្មីដល់ ឯកឧត្តម លោកជំទាវ អគ្គនាយករង និងលោកប្រធាននាយកដ្ឋានពាក់ព័ន្ធ ពិសេស នៅតាមគោលដៅច្រកទ្វារអាកាសយានដ្ឋានអន្តរជាតិ និងច្រកទ្វារព្រំដែនអន្តរជាតិត្រូវចាត់វិធានការអនុវត្ត និងសហការអនុវត្តជាមួយសមត្ថកិច្ចពាក់ព័ន្ធឲ្យមានប្រសិទ្ធភាពខ្ពស់»។
យោងតាមសេចក្តីថ្លែងការណ៍របស់អតីតគណបក្សសង្គ្រោះជាតិចុះថ្ងៃទី ៦ កុម្ភៈ ឆ្នាំ ២០១៩ ដែលបានបង្ហោះនៅលើហ្វេសប៊ុកផេក ឈ្មោះ កឹម មនោវិទ្យា កូនស្រីរបស់លោក កឹម សុខា ប្រធានអតីតគណបក្សសង្គ្រោះជាតិ ដែលកំពុងដាក់ឲ្យនៅក្នុងផ្ទះស្ថិតក្រោមការត្រួតពិនិត្យរបស់តុលាការ ហើយដែលត្រូវបានកញ្ញា កឹម មនោវិទ្យា បដិសេធថាមិនមែនជាហ្វេសប៊ុកផេករបស់កញ្ញានោះ បានបញ្ជាក់ថា គណបក្ស ពិតជាមានការសោកស្តាយជាទីបំផុត ដែលក្រុមជនធ្វើបក្សប្រហារដឹកនាំ ដោយបុគ្គល សម រង្ស៊ី ព្យាយាមបំផ្លាញនូវក្តីសង្ឃឹម របស់គណបក្ស តាមរយៈការបន្តភូតកុហកម្តងហើយម្តងទៀត ចំពោះអ្នកគាំទ្រ ដែលថា នឹងវិលត្រឡប់មកកាន់ប្រទេស កម្ពុជា វិញនៅឆ្នាំ ២០១៩។
សេចក្តីថ្លែងការណ៍បញ្ជាក់ថា៖ «នេះគឺជាការបោកប្រាស់ ខាងផ្នែកស្មារតី សតិអារម្មណ៍និងជាការផ្តល់ក្តីសង្ឃឹមក្លែងក្លាយ ដែលមិនមែនជាការពិត។ នេះគ្រាន់តែជាយុទ្ធសាស្ត្ររបស់ក្រុមបក្សប្រហារ ដែលធ្វើឡើងដើម្បីបំពងសំឡេងគ្រប់កាលៈទេសៈក្នុងគោលបំណងកុំឲ្យមនុស្សម្នាភ្លេចឈ្មោះ និងមុខខ្លួនតែប៉ុណ្ណោះ»។
សេចក្តីថ្លែងការណ៍បន្ថែមថា៖ «សូមអំពាវនាវដល់បងប្អូន សកម្មជន និងប្រជាពលរដ្ឋឈប់ចំណាយពេលឥតប្រយោជន៍ ជាមួយការសន្យាដែលគ្មានការពិតដែលធ្វើឲ្យបងប្អូនកាន់តែប្រឈមមុខកាន់តែខ្លាំង និងខាតបង់ពេលវេលា និងថវិកាឥតប្រយោជន៍»។
ទោះជាយ៉ាងណា កញ្ញា កឹម មនោវិទ្យា បានបដិសេធថា គណនីហ្វេសប៊ុក ដែលបានបង្ហោះសេចក្តីថ្លែងការណ៍របស់គណបក្សសង្គ្រោះជាតិ ដែលបានសម្តែងការសោកស្តាយ និងរិះគន់ចំពោះលោក សម រង្ស៊ី ប្រធានស្ដីទីគណបក្សសង្គ្រោះជាតិនោះមិនមែនជារបស់កញ្ញានោះទេ។ កញ្ញាបញ្ជាក់ថា៖ «វាក្លែងក្លាយទេ។ មិនមែនជាគណនីរបស់ខ្ញុំទេ»។
លោក អ៊ូ ច័ន្ទរ័ត្ន អតីតតំណាងរាស្ត្រ នៃអតីតគណបក្សសង្គ្រោះជាតិ ហាក់មិនមានជំនឿទៅលើការប្រកាសវិលចូលស្រុករបស់លោក សម រង្ស៊ី ទាំងស្រុងនោះទេ ដោយសារលោករង្ស៊ី បានប្រកាសវិលត្រឡប់មកប្រទេស កម្ពុជា វិញជាច្រើនលើកមកហើយ តែលោកមិនត្រឡប់ចូលប្រទេសតាមការសន្យានោះទេ បើគ្មានដំណោះស្រាយ ហើយលោកតែងតែលើកយកហេតុផលផ្សេងៗ។
លោកបញ្ជាក់ថា៖ «យើងធ្លាប់ឃើញគាត់ធ្លាប់មានប្រសាសន៍ជ្រុលមួយចំនួន ដូចជាថ្មីៗនេះលោកប្រកាសថាលោកនឹងចូលទៅចាប់លោកនាយករដ្ឋមន្ត្រី ហ៊ុន សែន ក្តី។ នេះគឺជាពាក្យពេចន៍មួយ ដែលជាការបំផ្លើសហួសហេតុពេក»។
ចំណែកលោក សុខ ឥសាន អ្នកនាំពាក្យគណបក្សប្រជាជនកម្ពុជាបានថ្លែងតាមសារតេឡេក្រាមថា៖ «លទ្ធភាពដែលទណ្ឌិតថាមកចាប់សម្តេចតេជោ ហ៊ុន សែន នោះគឺអត់មានទេ។ ពីព្រោះ គ្រាន់តែមកដល់ព្រលានយន្តហោះភ្លាម ទណ្ឌិតរូបនេះ ត្រូវចាប់ខ្លួនភ្លែត ដោយអ្នកមកគាំទ្រមួយចំនួនតូចនោះមិនទំាងបានឃើញបានដឹងផងទេ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា គាំទ្រការរិះគន់របស់លោក គង់ គាំ ដោយសារតែលោក រង្ស៊ី តែងតែប្រើយុទ្ធសាស្ត្រនយោបាយញុះញង់ឲ្យមានការរើសអើងជាតិសាសន៍បង្កចលាចលក្នុងសង្គម។
លោកថា៖ «នេះគឺជាការត្រឹមត្រូវ ដែលលោក គង់ គាំ ហៅលោក សម រង្ស៊ី ថា ជាមេដឹកនាំជ្រុលនិយម ហួសហេតុនិយម ដោយសារតែរបៀបដែលគាត់ធ្វើនយោបាយ ជាពិសេសវោហារស័ព្ទ របស់លោក សម រង្ស៊ី ហួសហេតុពីស្តង់ដានយោបាយធម្មតា និងជ្រុលនិយម មានទាំងការរើសអើងជាតិសាសន៍ ភាសាទម្លាក់ឬដាក់កំហុសឬក៏ការរុញច្រានឲ្យមានចលនាបដិវត្តន៍»។
លោកបន្ថែមថា៖ «នេះជាវោហារស័ព្ទនយោបាយដែលលោក សម រង្ស៊ី ធ្វើឡើងដើម្បីលើកទឹកចិត្តខ្លួនឯងនិងអ្នកគាំទ្រផង ក៏ប៉ុន្តែការពិតនៅពេលគាត់ចូលទឹកដីកម្ពុជាម៉ោងណា គាត់នឹងត្រូវបានចាប់ពេលនោះ»។
អ្នកវិភាគនយោបាយ លោក មាស នី មិនអាចទាក់ទងសុំអត្ថាធិប្បាយបានទេម្សិលមិញ ឯអ្នកវិភាគលោក អ៊ូ វីរៈ បដិសេធធ្វើអត្ថាធិប្បាយ៕