.jpg)
លោកគង់ គាំ កាលទៅធ្វើជាសាក្សីក្នុងករណីលោកកឹម សុខា នៅសាលាដំបូងរាជធានីភ្នំពេញ ថ្ងៃទី ២៣ មករា។ ផា លីណា
ភ្នំពេញៈ អ្នកនយោបាយចាស់វស្សា លោក គង់ គាំ ដែលជាអតីតប្រធានគណបក្ស សម រង្ស៊ី និងជាទីប្រឹក្សាជាន់ខ្ពស់ នៃអតីតគណបក្សសង្គ្រោះជាតិ ត្រូវបានគណបក្សឆន្ទៈខ្មែរ ផ្តល់តួនាទីជូនលោកជាប្រធានកិត្តិយសនៃបក្សថ្មីនេះ ក្រោយពី លោកទទួលបានសិទ្ធិធ្វើនយោបាយឡើងវិញ ដែលគណបក្សរំពឹងថា លោកអាចជួយស្រូបបាននូវសំឡេងគាំទ្របន្ថែមពី អតីតសមាជិកមូលដ្ឋាននៃអតីតបក្សប្រឆាំង។
សេចក្តីថ្លែងការណ៍កាលពីថ្ងៃទី ២៧ មករា របស់គណបក្សឆន្ទៈខ្មែរ ដឹកនាំដោយលោកគង់ មុនីកា កូនប្រុសរបស់លោក គង់ គាំ ដែលគណបក្សនេះបានបង្កើតឡើងមុនការបោះឆ្នោត កាលពីថ្ងៃទី ២៩ កក្កដា ២០១៨ ដើម្បីចូលរួមប្រកួតប្រជែងដែរនោះ គណៈកម្មាធិការនៃគណបក្សនេះ បានជួបប្រជុំពិភាក្សាលើបញ្ហាមួយចំនួន រួមមាន ទី១ ធ្វើបច្ចុប្បន្នភាពនិងកែសម្រួលក្បាលម៉ាស៊ីនថ្នាក់ដឹកនាំថ្នាក់ជាតិរបស់គណបក្ស ទី២ ត្រួតពិនិត្យនិងកែសម្រួលរចនាសម្ព័ន្ធក្រុមប្រឹក្សារាជធានី ខេត្ត ក្រុង ស្រុក ខណ្ឌ របស់គណបក្ស និងជាពិសេសមួយទៀត អង្គប្រជុំគណៈកម្មធិការនាយក នៃគណបក្សឆន្ទៈខ្មែរ បានសម្រេចផ្តល់តួនាទីផ្លូវការជាប្រធានកិត្តិយសគណបក្សឆន្ទៈខ្មែរ ជូនលោក គង់ គាំ ដោយមតិជាឯកច្ឆន្ទ។
លោក គង់ មុនីកា ប្រធានគណបក្សឆន្ទៈខ្មែរ ប្រាប់ភ្នំពេញប៉ុស្តិ៍ ពីម្សិលមិញថា លោក គង់ គាំ ដែលជាអតីតប្រធានគណបក្ស សម រង្ស៊ី ត្រូវបាន គណៈកម្មាធិការនាយកគណបក្សឆន្ទៈខ្មែរ បោះឆ្នោតផ្តល់សេចក្តីទុកចិត្ត ឱ្យធ្វើជាប្រធានកិត្តិយសគណបក្សឆន្ទៈខ្មែរ ហើយរំពឹងថា វត្តមានរបស់លោកគង់ គាំ អាចនឹងជួយឲ្យគណបក្សរបស់លោកទទួលបានការគាំទ្រពីអតីតសមាជិកក្រុមប្រឹក្សារបស់គណបក្សសង្គ្រោះជាតិ ដែលបានចូលទៅបម្រើជាមួយគណបក្សប្រជាជនកម្ពុជា និងក៏មានការគាំទ្រពីសមាជិកគណបក្សប្រជាជនកម្ពុជាផងដែរ។
លោក គង់ មុនីកា ថ្លែងថា៖ «យើងយល់ថា គាត់ជាអ្នកនយោបាយជើងចាស់ ដែលបានឆ្លងកាត់នយោបាយច្រើន និងកន្លងមកគាត់ធ្លាប់ជាឧត្តមទីប្រឹក្សា របស់អតីតគណបក្សសង្គ្រោះជាតិ ដែលជាគណបក្សប្រឆាំងមួយដ៏ធំ។ នេះគ្រាន់តែជាការជូននូវ មុខងារខ្ពង់ខ្ពស់មួយ ក្នុងគណបក្សរបស់យើងគឺដើម្បីជូនទៅគាត់ជាប្រធានកិត្តិយសរបស់គណបក្សឆន្ទៈខ្មែរ»។
លោកបានបន្ថែមថា លោក គង់ គាំ ក្នុងនាមជាប្រធានកិត្តិយសរបស់គណបក្សឆន្ទៈខ្មែរ គឺគ្រាន់តែមានតួនាទីផ្តល់ជាអនុសាសន៍ មតិយោបល់ ប្រឹក្សា ឬក៏ចុះទៅជួបជាមួយសកម្មជន និងអ្នកគាំទ្រ។ លោកមិនមានតួនាទីចាត់ចែង គណបក្សនោះទេ ហើយលោក គង់ មុនីកា មានសុទិដិ្ឋនិយមថាវត្តមានរបស់ឪពុកលោក នឹងជួយជំរុញ សកម្មជនឆន្ទៈខ្មែរកាន់តែមានជំនឿចិត្តក្នុងការបំពេញការងាររបស់ខ្លួន ឲ្យមានប្រសិទ្ធភាពថែមទៀត។
ដោយបង្ហាញនូវក្តីសង្ឃឹមទៅលើការគាំទ្រច្រើនថែមទៀត តាមរយៈលោក គង់ គាំ គឺលោក គង់ មុនីកា មានជំនឿថា អតីតសកម្មជនសង្គ្រោះជាតិ ដែលកំពុងរស់នៅក្នុងការគាបសង្កត់ពីអាជ្ញាធរ ដោយសារពួកគេប្រឈមនឹងការចោទប្រកាន់ពីអាជ្ញាធរថាជាផ្នែកមួយនៃបដិវត្តន៍ពណ៌ និងចលនាសង្គ្រោះជាតិនោះ គឺពួកគេ អាចនឹងងាកមកគាំទ្រគណបក្សឆន្ទៈខ្មែរ។
លោកបញ្ជាក់ថា៖ «ពួកគាត់អាចសម្លឹងមកគណបក្សឆន្ទៈខ្មែរ ដើម្បីជាជម្រកថ្មី និងជាឱកាសថ្មីដើម្បីឈានទៅរកការផ្លាស់ប្តូរថ្មីជាវិជ្ជមាន»។
បើទោះបីជាគណបក្សរបស់លោកមិនមានអង្គបោះឆ្នោតសម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ដែលនឹងប្រព្រឹត្តទៅនាថ្ងៃទី ២៦ ខែឧសភា ឆ្នាំ ២០១៩ ក៏ពិតមែន ប៉ុន្តែលោក គង់ មុនីកា បញ្ជាក់ថា គណបក្សលោកបាននិងកំពុងរៀបចំយុទ្ធសាស្រ្ត និងត្រៀមចូលរួមការបោះឆ្នោតនេះផងដែរ ដោយលោករំពឹងថា គណបក្សឆន្ទៈខ្មែរ នឹងទទួលបានការគាំទ្រច្រើន ជាពិសេសអតីតសមាជិកក្រុមប្រឹក្សានៃអតីតគណបក្សសង្គ្រោះជាតិ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា លើកឡើងថា គណបក្សឆន្ទៈខ្មែររបស់លោក គង់ មុនីកា នឹងមិនអាចទទួលបានសំឡេងគំាទ្រពីអតីតសមាជិកក្រុមប្រឹក្សារបស់បក្សសង្គ្រោះជាតិ ដែលបានចូលទៅបម្រើជាមួយគណបក្សប្រជាជន ពីការបោះឆ្នោតជ្រើសរើសសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ ខាងមុខនោះទេ ដោយសារតែអង្គបោះឆ្នោតទាំងអស់សុទ្ធតែជាមន្ត្រីរបស់គណបក្សប្រជាជន។ ចំណែកអ្នកដែលបានចូលរួមជីវិតនយោបាយជាមួយគណបក្សប្រជាជនទាំងនោះបានទទួលនូវអនាគតដ៏ល្អរួចទៅហើយ។
លោកបញ្ជាក់ថា៖ «សម្រាប់ខ្ញុំគាត់នឹងមិនទទួលបានអាសនៈណាមួយ និងមិនទទួលបានសន្លឹកឆ្នោតផងដែរ ដោយសារតែ យើងត្រូវដឹងថា សមាជិកក្រុមប្រឹក្សាទំាងអស់សុទ្ធតែជារបស់គណបក្សប្រជាជនកម្ពុជា ថ្វីបើមួយចំនួនមកពីអតីតគណបក្សសង្គ្រោះជាតិ ក៏មិនប្រាកដថា ពួកគេទៅបោះឲ្យគណបក្សឆន្ទៈខ្មែរដែរ តែការចូលរួមរបស់គាត់ឲ្យប្រជាពលរដ្ឋស្គាល់បណ្តើរៗ។ ចំពោះលទ្ធផលស្ទើរតែមិនបានមួយសន្លឹកឆ្នោតណាមួយផងដោយសារការបោះឆ្នោតនេះ អសកល»។
លោកថា វត្តមានរបស់លោក គង់ គាំ មិនមានសក្តានុពលទាក់ទាញអតីតសមាជិកក្រុមប្រឹក្សារបស់បក្សប្រឆាំងបានទេ ហើយមិនមានប្រជាប្រិយភាព ដូចថ្នាក់ដឹកនាំបក្សប្រជាជននោះដែរ។
លោក ឯម សុវណ្ណារ៉ា អ្នកវិភាគនយោបាយ និងជាសាស្ត្រាចារ្យវិទ្យាសាស្ត្រនយោបាយបានថ្លែងថា ការរំពឹងទុករបស់មេដឹកនាំគណបក្សឆន្ទៈខ្មែរ នឹងមិនសុក្រឹតទេ ដោយសារលោក គង់ គាំ ចូលមកបម្រើគណបក្សកូនរបស់គាត់លោក គង់ មុនីកា នោះ មិនបានទទួលការគាំទ្រពីសកម្មជន នៃអតីតគណបក្សសង្គ្រោះជាតិនោះទេដោយសារតែពលរដ្ឋខ្មែរមិនទាន់ឲ្យតម្លៃអ្នកដែលចុះចូលនោះទេ។
លោកបញ្ជាក់ថា៖ «បើយើងមើលលទ្ធផលបោះឆ្នោតជាក់ស្តែង កាលពីកន្លងទៅ គណបក្សឆន្ទៈខ្មែរមិនបានទទួលមួយសំឡេងនៅក្នុងសភាទេ។ អាសនៈ (ក្រុមប្រឹក្សាឃុំ) ទាំងអស់នោះជារបស់គណបក្សប្រជាជន និងពួកគេលែងនៅជាមួយគណបក្សសង្គ្រោះជាតិទៀតហើយ និង [អាសនៈ] មួយផ្នែកទៀតត្រូវបានយកដោយគណបក្សហ៊្វុនស៊ិនប៉ិច ដូច្នេះគណបក្សឆន្ទៈខ្មែរពុំអាចទទួលបានការគាំទ្រទេ»៕
