The Phnom Penh Post Search

Search form




Logo of Phnom Penh Post newspaper Phnom Penh Post - លោក​ គង់ គាំ ​អាច​ជា​អនុប្រធាន​តែ​ម្នាក់​គត់​របស់​ CNRP




លោក​ គង់ គាំ ​អាច​ជា​អនុប្រធាន​តែ​ម្នាក់​គត់​របស់​ CNRP

Content image - Phnom Penh Post
លោក គង់ គាំ អតីត​ប្រធាន​គណបក្ស សម​ រង្ស៊ី ដែល​អាច​នឹង​​ត្រូវ​ជ្រើសរើស​សម្រាប់​តំណែង​អនុប្រធាន​គណបក្ស​សង្គ្រោះជាតិ​។ រូបថត ហ្វេសប៊ុក

លោក​ គង់ គាំ ​អាច​ជា​អនុប្រធាន​តែ​ម្នាក់​គត់​របស់​ CNRP

ភ្នំពេញៈ អតីត​ប្រធាន​គណបក្ស សម រង្ស៊ី ​លោក គង់ គាំ អាច​នឹង​​​​ជា​បេក្ខជន​តែ​ម្នាក់​គត់​ដែល​នឹង​ត្រូវ​សមាជ​គណបក្ស​ប្រឆាំង​​ដែល​ប្រារព្ធ​ធ្វើ​ឡើង​នៅ​ក្នុង​សប្តាហ៍​នេះ​បោះឆ្នោត​ឲ្យ​ធ្វើ​ជា​អនុប្រធាន​គណបក្ស ខណៈ​ដែល​លោក កឹម សុខា នឹង​ត្រូវ​ជ្រើសរើស​ឲ្យ​​ធ្វើ​ជា​ប្រធាន​គណបក្ស​ជំនួស​លោក​ សម រង្ស៊ី ដែល​បាន​លាលែង។

ព័ត៌មាន​នេះ​បាន​លេចឮ​ឡើង​បន្ទាប់ពី​មាន​ព័ត៌មាន​ថា​គណបក្ស​ប្រឆាំង​នឹង​ជ្រើសរើស​អនុប្រធាន​ ៣ រូប គឺ​លោកស្រី ជូឡុង សូមូរ៉ា ភរិយា​លោក សម រង្ស៊ី លោក យឹម សុវណ្ណ អ្នក​នាំពាក្យ​គណបក្ស និង​លោក ប៉ុល ហំម អ្នក​តំណាងរាស្ត្រ​។

បើ​យោង​តាម​​សំឡេង​​​ដែល​​ត្រូវ​បាន​គេ​បង្ហោះ​​​​នៅ​លើ​ហ្វេសប៊ុក​ឈ្មោះ​ សីហា កាលពី​ថ្ងៃ​សៅរ៍​​បាន​បង្ហាញ​​ថា​តំណាងរាស្រ្ត​គណបក្ស​សង្គ្រោះ​ជាតិ លោក លឹម គីមយ៉ា បាន​ទៅ​ជួប​ជាមួយ​លោក គង់ គាំ កាលពី​ចុង​សប្តាហ៍​មុន​នៅ​ផ្ទះ​របស់​លោក​​​​ដោយ​សុំ​ឲ្យ​លោក គង់ គាំ ធ្វើ​ជា​អនុប្រធាន​គណបក្ស​សង្គ្រោះ​ជាតិ​ខណៈ​លោក យឹម សុវណ្ណ ដែល​ជា​​តំណាងរាស្រ្ត​​គណបក្ស​សង្គ្រោះ​ជាតិ​​ និង​ជា​អ្នក​​នាំ​ពាក្យ​ក៏​ត្រូវ​បាន​គេ​​ព្រលយ​ថា​ក៏​នឹង​​​​ត្រូវ​​​តែងតាំង​ជា​អនុប្រធាន​គណបក្ស​សង្គ្រោះ​ជាតិ​​ដែល​នឹង​ត្រូវ​ជ្រើសរើស​នៅ​​ក្នុង​សមាជ​​របស់​គណបក្ស​ថ្ងៃ​ទី​ ២ មីនា​ក្នុង​សប្តាហ៍​នេះ​ផង​ដែរ​។

នៅ​ក្នុង​សំឡេង​ដែល​បង្ហោះ​ដោយ​សីហា​លោក លឹម គីមយ៉ា បាន​ថ្លែង​ថា​លោក គង់ គាំ ស័ក្តិសម​ធ្វើ​ជា​​អនុប្រធាន​​គណបក្ស​សង្គ្រោះ​ជាតិ​​ដោយសារ​លោក​​ពោរពេញ​ទៅ​ដោយ​បទពិសោធ​​​នយោបាយ​ និង​​​ថា​​លោក គង់ គាំ អាច​ទប់ទល់​នឹង​លោក កឹម សុខា បាន​ហើយ​លោក​ថា លោក សុវណ្ណ មិន​ស័ក្តិសម​ជា​អនុប្រធាន​​គណបក្ស​សង្គ្រោះ​ជាតិ​ទេ។

លោក លឹម គីមយ៉ា បាន​ថ្លែង​ថា​៖ «​​ខាង សម រង្ស៊ី ​ខ្ញុំ​មិន​ដឹង​​ថា​​គាត់​ចង់​ដាក់​នរណា​ទេ។ ការ​ដាក់​លោកយឹម សុវណ្ណ គឺ​ពិបាក​បន្តិច​។ ​ប្រសិន​បើ​ដាក់​លោក​ យឹម សុវណ្ណ ​មិន​មាន​ឥទ្ធិពល​ [ទៅ​លើ​លោក កឹម សុខា​] ទេ។ ​បើ​ដាក់​​លោក គង់ គាំ ​មាន​ [លទ្ធភាព​] ​ទប់ទល់​។ ​ដូច្នេះ​ខ្ញុំ​ស្នើ​សុំ​លោក​​ឲ្យ​ទទួល​យក​តំណែង​​អនុប្រធាន​នោះ​។ ​នេះ​គឺ​ស័ក្តិសម​ជាង​»។

ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​លោក លឹម គីមយ៉ា បាន​បញ្ជាក់​ថា​លោក​ពិតជា​បាន​ជួប​ជាមួយ​លោក គង់ គាំ ​កាល​ពី​ថ្ងៃ​សុក្រ​មែន​ដោយ​​ជជែក​អំពី​បេក្ខភាព​អនុប្រធាន​​គណបក្ស​ហើយ​ថា​លោក គាំ ​យល់ព្រម​ទទួល​យក​​តំណែង​​នេះ​ប្រសិន​បើ​បេក្ខភាព​​របស់​លោក​ត្រូវ​បាន​ស្នើ​ឲ្យ​ធ្វើ​ជា​អនុប្រធាន​បក្ស។ ​

លោកលឹម គីមយ៉ា ​បាន​​​ថ្លែង​ថា​៖ «​​លោក [គង់ គាំ] ​បាន​ថ្លែង​ថា​លោក​តែងតែ​រង់ចាំ​នៅ​ពេល​គណបក្ស​ត្រូវ​ការ​។ ​ខ្ញុំ​បាន​សួរ​ថា​ប្រសិន​បើ​គណបក្ស​ត្រូវការ​​លោក​ធ្វើ​ជា​អនុប្រធាន ​តើ​លោក​ចូលរួម​ឬ​អត់? ​លោក​បាន​ថ្លែង​ថា​លោក​រីករាយ​នឹង​ទទួល​យក​ហើយ​ខ្ញុំ​បាន​និយាយ​ថា​ខ្ញុំ​នឹង​​ទៅ​ស្នើ​​លោក​អនុប្រធាន​​ [ប្រធាន​ស្តីទី​លោក កឹម សុខា​]»។ «​​ខ្ញុំ​យល់​ថា​លោក គង់ គាំ មាន​បទពិសោធ​ច្រើន​។ គេ​ [​ប្រជាពលរដ្ឋ​​] ​ស្គាល់​លោក​ច្រើន​​។ ​គេ​គោរព​លោក​ច្រើន​ហើយ​លោក​​ឆ្លាត​ក្នុង​ការ​ដោះស្រាយ​​បញ្ហា​នយោបាយ​។​ [លោក យឹម សុវណ្ណ​] ​ជា​អ្នក​នយោបាយ​ធម្មតា​»។

ទោះ​យ៉ាង​ណា​ក្តី លោក លឹម គីមយ៉ា ​បាន​ថ្លែង​ថា​លោក​មិន​ប្រាកដ​​ថា ​តើ​មន្រ្តី​ជាន់ខ្ពស់​​ប៉ុន្មាន​នាក់​នឹង​ត្រូវ​បាន​ជ្រើសរើស​​ជា​អនុប្រធាន​​គណបក្ស​​ទេ ​ប៉ុន្តែ​លោក​ថា​តាម​លោក​ដឹង​សមាជិក​គណបក្ស​សង្គ្រោះ​ជាតិ​ភាគច្រើន​បំផុត​​ចង់​​ឲ្យ​លោក គង់ គាំ ធ្វើ​ជា​អនុប្រធាន​គណបក្ស​​សង្គ្រោះ​ជាតិ​។

ឆ្លើយតប​នឹង​​សំឡេង​របស់​លោក​ដែល​ត្រូវ​បាន​ថត​​ និង​បង្ហោះ​​ដោយ​​ហ្វេសប៊ុក​​របស់​ សីហា លោក លឹម គីមយ៉ា បាន​​ថ្លែង​ថា​លោក​មិន​ខ្វល់​អំពី​​សំឡេង​​ដែល​ត្រូវ​បាន​ថត​ដោយ​ខុស​ច្បាប់​នោះ​ទេ​​ហើយ​បាន​ចាត់​ទុក​​ការ​ថត​​សំឡេង​របស់​លោក​ថា​ជា​សកម្មភាព​​មួយ​របស់​ប្រទេស​មួយ​ដែល​ជា​ប្រទេស​ «​ព្រៃ​» ​ហើយ​ថា​រដ្ឋាភិបាល​បច្ចុប្បន្ន​​មិន​ស័ក្តិសម​ដឹកនាំ​ប្រទេស​នេះ​​ទៀត​ទេ​។

លោក លឹម គីមយ៉ា ថ្លែង​បន្ត​ថា​៖ «​​នេះ​មិន​ហៅ​ថា​ជា​ប្រទេស​​ដែល​មាន​​នីតិរដ្ឋ​ទេ​ ​មិនមែន​ជា​ប្រទេស​ប្រជាធិបតេយ្យ​ទេ​។ នេះ​ជា​ប្រទេស​ព្រៃ​»។ «​​ដូច្នេះ​ខ្ញុំ​បារម្ភ​សម្រាប់​ប្រជាពលរដ្ឋ​សម្រាប់​ខ្ញុំ​គ្មាន​បញ្ហា​ទេ​»។

នៅពេល​ទាក់ទង​កាលពី​ម្សិលមិញ​លោក គង់ គាំ ​បាន​ទទួល​ស្គាល់​ថា​ឈ្មោះ​របស់​លោក​ពិតជា​​​ត្រូវ​បាន​​​ពិនិត្យ​មើល​ពិចារណា​​ឲ្យ​ធ្វើ​ជា​អនុប្រធាន​គណបក្ស​សង្គ្រោះ​ជាតិ​មែន​ហើយ​ថា​លោក​នឹង​ទទួល​យក​តំណែង​ជា​អនុប្រធាន​​គណបក្ស​ប្រសិន​​គណបក្ស​សង្គ្រោះ​ជាតិ​ត្រូវ​ការ​លោក។​

លោក គង់ គាំ ​បាន​ថ្លែង​បន្ត​ថា​៖«​​ប្រសិន​បើ​​ប្រធាន​ស្តីទី​លោក កឹម សុខា ​ដែល​នឹង​ក្លាយ​ជា​​ប្រធាន​​នៅ​ក្នុង​សមាជ​ខាង​មុខ​ហើយ​ភាគច្រើន​បំផុត​នៃ​គណៈកម្មាធិការ​នាយក [ស្នើ​] ​ត្រឹមត្រូវ​ទៅ​តាម​លក្ខន្តិកៈ​ខ្ញុំ​នឹង​​មិន​បដិសេធ ​​អំពី​ការ​ចែក​រំលែក​ឲ្យ​ធ្វើ​របៀប​ដែល​ [គណបក្ស​សង្គ្រោះ​ជាតិ​]​ នៅ​តែ​ជា​​អ្នក​តំណាង​ឆន្ទៈ​របស់​ពលរដ្ឋ​ខ្មែរ​»​។

ទន្ទឹម​នេះ​មន្រ្តី​គណបក្ស​​​សង្គ្រោះ​ជាតិ​​ក៏​បាន​ថ្លែង​ផង​ដែរ​​​ថា​សមាជ​ថ្ងៃ​ទី​ ២ ខែ​មីនា​ដែល​នឹង​ប្រារព្ធ​ធ្វើ​​ឡើង​ដើម្បី​​ជ្រើសរើស​អនុប្រធាន​ផ្អែក​ទៅ​តាម​ស្មារតី​ទីក្រុង​​ម៉ានីល​ដែល​បាន​ព្រមព្រៀង​គ្នា​ដោយ​ថ្នាក់​ដឹកនាំ​កំពូល​របស់​បក្ស​ហើយ​បាន​បដិសេធ​​ការ​ចោទប្រកាន់​ដែល​ថា​គណបក្ស​នឹង​តែងតាំង​អនុប្រធាន​បី​រូប​។

មន្រ្តី​ជាន់​ខ្ពស់​​គណបក្ស​សង្គ្រោះជាតិ​​ដែល​បាន​បដិសេធ​បង្ហាញ​ឈ្មោះ​បាន​ប្រាប់​ភ្នំពេញ​ប៉ុស្តិ៍​​ថា​ស្មារតី​​នៅ​ទីក្រុង​ម៉ានីល​​ដែល​សម្រេច​ដោយ​​​អតីត​ប្រធាន​គណបក្ស​សង្គ្រោះជាតិ​លោក សម រង្ស៊ី ​និង​អនុប្រធាន លោក កឹម សុខា គឺ​ថា​គណបក្ស​ត្រូវ​ការ​អនុប្រធាន​បក្ស​តែ​ម្នាក់​ដូច្នេះ​​សមាជ​​ថ្ងៃ​ទី ២ មីនា គឺ​នឹង​ត្រូវ​ជ្រើសរើស​​អនុប្រធាន​​គណបក្ស​សង្គ្រោះ​ជាតិ​តែ​​ម្នាក់​មិនមែន​បី​នាក់​ដូច​ការ​ចោទ​ប្រកាន់​ទេ​។

ទោះ​យ៉ាង​ណា​ក្តី​​មន្រ្តី​ជាន់ខ្ពស់​​មិន​បាន​​ផ្តល់​ឈ្មោះ​​ជាក់លាក់​​ អំពី​បេក្ខភាព​​​អនុប្រធាន​គណបក្ស​សង្គ្រោះជាតិ​ទេ​ ប៉ុន្តែ​គ្រាន់តែ​ព្រលយ​ថា​តំណាងរាស្រ្ត​​ និង​ជា​អ្នក​នាំពាក្យ​របស់​គណបក្ស​លោក យឹម សុវណ្ណ ត្រូវ​បាន​​តែងតាំង​ខណៈ​អនុប្រធាន​​គណបក្ស លោក កឹម សុខា នឹង​ត្រូវ​ជ្រើសរើស​​ជា​ប្រធាន​គណបក្ស​នៅ​​ក្នុង​សប្តាហ៍​នេះ​​។ ​

លោក​បាន​ថ្លែង​ថា​៖ «​​​តាម​ស្មារតី​ទីក្រុង​ម៉ានីល​បាន​ចែង​ថា​មាន​​​ប្រធាន​តែ​ម្នាក់ ​និង​អនុប្រធាន​តែ​ម្នាក់​។ ដូច្នេះ​មិន​មាន​​អនុប្រធាន​បី​នាក់​ទេ​»។

លោក យឹម សុវណ្ណ មិន​អាច​ទាក់ទង​សុំ​អត្ថាធិប្បាយ​បាន​ទេ​កាលពី​ម្សិលមិញ។

លោក សំ គន្ធាមី នាយក​ប្រតិបត្តិ​នៃ​អង្គការ​ឃ្លាំ​មើល​ការ​បោះឆ្នោត​ NICFEC បាន​ថ្លែង​ថា​គណបក្ស​សង្គ្រោះ​ជាតិ​គួរ​តែ​​ពិចារណា​បេក្ខភាព​អនុប្រធាន​គណបក្ស​ដោយ​មិន​ពាក់ព័ន្ធ​នឹង​​បក្ខពួក​និយម​ការ​ជ្រើសរើស​ណា​ក៏ដោយ​ត្រូវ​តែ​ផ្អែក​ទៅ​លើ​ប្រជាប្រិយភាព​ និង​សមត្ថភាព​បើ​មិន​ដូច្នោះ​ទេ​វា​នឹង​ធ្វើ​ឲ្យ​ប្រជាប្រិយ​​របស់​បក្ស​ធ្លាក់​ចុះ​​។

លោក គន្ធាមី ​ថ្លែង​ថា​៖ «​​យើង​​​​ពិនិត្យ​មើល​ទៅ​លើ​​គុណភាព​នៃ​បុគ្គល​នោះ​ថា​តើ​​គាត់​សកម្ម​នៅ​ក្នុង​ការងារ​តំណាងរាស្រ្ត​​​នា​ពេល​កន្លង​មក ​និង​​​ការងារ​បក្ស​សកម្ម​​ឬ​អត់​ដើម្បី​ទាក់ទាញ​ការ​គាំទ្រ​ពី​អ្នក​បោះឆ្នោត​»៕ PS

អត្ថបទគួរចាប់អារម្មណ៍