The Phnom Penh Post Search

Search form




Logo of Phnom Penh Post newspaper Phnom Penh Post - លោក គាត ឈន់ ឲ្យ​ក្រសួង​ពិនិត្យ​​ចំណាយ​បំពេញ​បេសកកម្ម​ក្រៅ​ប្រទេស

លោក គាត ឈន់ ឲ្យ​ក្រសួង​ពិនិត្យ​​ចំណាយ​បំពេញ​បេសកកម្ម​ក្រៅ​ប្រទេស

លោក គាត ឈន់ នៅក្នុង​ពិធី​មួយ​នា​ពេល​កន្លង​មក​។
លោក គាត ឈន់ នៅក្នុង​ពិធី​មួយ​នា​ពេល​កន្លង​មក​។ ហេង ជីវ័ន

លោក គាត ឈន់ ឲ្យ​ក្រសួង​ពិនិត្យ​​ចំណាយ​បំពេញ​បេសកកម្ម​ក្រៅ​ប្រទេស

ភ្នំពេញៈ លោក គាត ឈន់ ឧបនាយក​រដ្ឋមន្ត្រី​ប្រចាំការ​បាន​ណែនាំ​ឲ្យ​ថ្នាក់​ដឹកនាំ​ក្រសួង​ ស្ថាប័ន​រដ្ឋ​ ទាំង​អស់​ពិនិត្យ​ឡើង​វិញ​ ចំពោះ​ការ​បញ្ជូន​មន្ត្រី​ទៅ​បំពេញ​បេសកកម្ម​នៅ​ក្រៅ​ប្រទេស​ ដោយ​ត្រូវ​បញ្ជាក់​ពី​ចំណាយ​ឲ្យ​បាន​ច្បាស់លាស់​បង្ហាញ​របាយការណ៍​លទ្ធផល​បេសកកម្ម និង​ការ​ចាត់​បញ្ជូន​មន្ត្រី​ជំនាញ​ពាក់ព័ន្ធ​ជា​ជាង​ការ​បញ្ជូន​តែ​មន្ត្រី​ថ្នាក់​នយោបាយ។

សេចក្តី​ណែនាំ​ដែល​លោក​ឧបនាយក​រដ្ឋមន្ត្រី គាត ឈន់ ដាក់​ផ្ញើ​ទៅកាន់​ក្រសួង​ស្ថាប័ន​រដ្ឋ​នានា​តាមរយៈ​ការ​ប្រទាន​សិទ្ធិ​ពី​លោក​នាយករដ្ឋមន្ត្រី ហ៊ុន សែន ចុះ​ថ្ងៃ​ទី​ ១០ ខែ​កក្កដា ឆ្នាំ​ ២០១៥ បាន​ឲ្យ​ដឹង​ថា​សម្រាប់​រាល់​ការ​ស្នើសុំ​ទៅ​បំពេញ​បេសកកម្ម​ថ្នាក់ដឹកនាំ​ក្រសួង​ស្ថាប័ន​ត្រូវ​បញ្ជាក់​ពី​ចំនួន​អ្នក​ចូលរួម និង​ប្រភព​ហិរញ្ញប្បទាន​ឲ្យ​បាន​ច្បាស់លាស់​ហើយ​ក្នុង​ករណី​ប្រើប្រាស់​ឥណទាន​ថវិកា​របស់​រដ្ឋ​ត្រូវ​បញ្ជាក់​ឥណទាន​ថវិកា​ដែល​គ្រោង​ទុក ឬ​មិន​បាន​គ្រោង​ទុក​នៅក្នុង​កញ្ចប់​ឥណទាន​ថវិកា​ប្រចាំ​ឆ្នាំ​របស់​ក្រសួង ឬ​ស្ថាប័ន​សាមី។

សេចក្តី​ណែនាំ​នេះ​ក៏​បាន​តម្រូវ​ឲ្យ​ថ្នាក់ដឹកនាំ​ក្រសួង​ស្ថាប័ន​រដ្ឋ​ធ្វើ​របាយការណ៍​សង្ខេប​ខ្លី​ចំនួន​ ១ ទៅ​ ២ ​ទំព័រ​អំពី​លទ្ធផល​នៃ​បេសកកម្ម​របស់​ខ្លួន​ដែល​កន្លង​មក​ថ្នាក់ដឹកនាំ​ក្រសួង​ស្ថាប័ន​រដ្ឋ​ភាគច្រើន​ពុំ​បាន​ធ្វើ​របាយការណ៍​អំពី​លទ្ធផល​ទាំងនោះ​ឡើយ។ ជាមួយ​គ្នា​នេះ​ដើម្បី​ចៀសវាង​នូវ​ផល​ប៉ះពាល់​ដែល​អាច​កើត​មាន​ចំពោះ​ការងារ​បច្ចេកទេស​របស់​ក្រសួង​ស្ថាប័ន​នៅពេល​មាន​ការ​ផ្លាស់ប្តូរ​ណា​មួយ​លោក​ឧបនាយក​រដ្ឋមន្ត្រី​ប្រចាំការ​ក៏​ស្នើ​ឲ្យ​ថ្នាក់​ដឹកនាំ​ក្រសួង​ស្ថាប័ន​រដ្ឋ​យក​ចិត្ត​ទុក​ដាក់​ក្នុង​ការ​ចាត់​បញ្ចូន​មន្ត្រី​ជំនាញ​ពាក់ព័ន្ធ​ទៅ​បំពេញ​បេសកកម្ម​នៅ​ក្រៅ​ប្រទេស​អម​មន្ត្រី​ថ្នាក់​នយោបាយ។

អ្នក​នាំពាក្យ​ទីស្តីការ​គណៈរដ្ឋមន្ត្រី​លោក ផៃ ស៊ីផាន បាន​ឲ្យ​ដឹង​ថា​សេចក្តី​ណែនាំ​នេះ​គឺជា​ផ្នែក​មួយ​នៃ​កំណែ​ទម្រង់​រដ្ឋបាល​របស់​រដ្ឋាភិបាល​ដើម្បី​ធានា​តម្លាភាព និង​គណនេយ្យភាព​ចំពោះ​កិច្ចការ​បញ្ជូន ឬ​ចាត់​តាំង​មន្ត្រី​រដ្ឋ​ទៅ​បំពេញ​បេសកកម្ម​ក្រៅ​ប្រទេស។

លោក​ថា៖ «តើ​ហេតុ​ដូចម្តេច​បាន​ជា​សំបុត្រ​នេះ​ទើប​ចេញ​មាន​ផលប៉ះពាល់​យ៉ាង​ម៉េច​ពី​ដើម​ទី​មក​ខ្ញុំ​ជឿ​ថា​ប្រហែល​ជា​ឯកឧត្តម​ គាត ឈន់ បាន​ជួប​បញ្ហា​ណា​មួយ​ក្នុង​ការងារ​នេះ​ដែល​លោក​ចង់​ឲ្យ​ឃើញ​មាន​តម្លាភាព និង​គណនេយ្យភាព»។

លោក សុន ឆ័យ តំណាងរាស្ត្រ និង​ជា​អនុប្រធាន​គណៈកម្មការ​សេដ្ឋកិច្ច ហិរញ្ញវត្ថុ ធនាគារ និង​សវនកម្ម​មាន​សុទិដ្ឋិនិយម​ចំពោះ​កំណែ​ទម្រង់​ថ្មី​ដែល​ដក​ស្រង់​ចេញ​ពី​កំហុស​ឆ្គង​កន្លង​មក​នេះ​បើ​ទោះបី​ជា​លោក​គិត​ថា​ហាក់​យឺតយ៉ាវ​បន្តិច​ក្តី។

លោក​ថា៖ «តាម​ដែល​ខ្ញុំ​សង្កេត​អ្នក​ទៅ​បេសកកម្ម​មួយ​ចំនួន​ចាយ​លុយ​រដ្ឋ​ខ្ជីខ្ជា​ណាស់​ហួស​ពី​តម្រូវការ​អ្នក​ខ្លះ​ត្រូវ​បាន​បញ្ជូន​ទៅ​ច្រើន​ហួស​ហេតុ។ ម្យ៉ាង​ទៀត​មន្ត្រី​ដែល​ទៅ​បំពេញ​បេសកកម្ម​ក្រៅ​ប្រទេស​ក៏​មិន​មាន​ការ​ចែក​រំលែក​ពី​អ្វី​ដែល​ខ្លួន​បាន​រៀន​មក​កាន់​អ្នក​មិន​បាន​រៀន​នោះ​ទេ»។

ដើម្បី​បង្ហាញ​ពី​តម្លាភាព​នៃ​ការងារ​នេះ​ក៏​ដូចជា​បង្ហាញ​ពី​លទ្ធផល​ការងារ​លោក សុន ឆ័យ​ បាន​ជំរុញ​ឲ្យ​ក្រសួង​ស្ថាប័ន​ពាក់ព័ន្ធ​បើក​ចំហ​​ព័ត៌មាន​ចំពោះ​រឿង​នេះ​ហើយ​ទៅ​ថ្ងៃ​ខាង​មុខ​លោក​ក៏​សង្ឃឹម​ថា​វិធានការ​បង្ហាញ​ពី​តម្លាភាព​ដូច​គ្នា​នេះ​នឹង​ត្រូវ​បាន​អនុវត្ត​នៅ​មន្ទីរ​រដ្ឋសភា និង​ព្រឹទ្ធសភា​ផង​ដែរ។

ទាក់ទិន​នឹង​ចំណាយ​ប្រចាំ​ឆ្នាំ​ទៅលើ​បេសកកម្ម​ក្រៅ​ប្រទេស​របស់​ក្រសួង​ស្ថាប័ន​រដ្ឋ​អ្នក​នាំ​ពាក្យ​ក្រសួង​ទំនាក់ទំនង​ជាមួយ​រដ្ឋសភា ព្រឹទ្ធសភា និង​អធិការកិច្ច​លោក ហួត ហាក់ ​បាន​ពន្យល់​ថា​ការ​ចំណាយ​នេះ​ត្រូវ​បាន​សម្រេច​ជា​ប្រចាំ​ឆ្នាំ​ដោយ​ក្រសួង​សេដ្ឋកិច្ច និង​ហិរញ្ញវត្ថុ​អាស្រ័យ​លើ​ផែនការ​គម្រោង​របស់​ក្រសួង​ស្ថាប័ន​នីមួយៗ​ចំណែក​កម្រិត​ថ្នាក់​មន្ត្រី​ជាន់ខ្ពស់​គឺ​ទាមទារ​ការ​សម្រេច​ពី​រាជរដ្ឋាភិបាល។

លោក​ថា៖ «ជា​រៀងរាល់​ឆ្នាំ​តាម​ផែនការ​គឺ​ក្រសួង​យើង​នឹង​ចាត់​ប្រតិភូ​ចុះ​ទៅ​ពិនិត្យ​មើល​បញ្ជី​សារពើភណ្ឌ​ បញ្ជី​ចំណូល​ចំណាយ​ថវិកា​ជាតិ​នៅ​ក្រសួង​ស្ថាប័ន​នីមួយៗ»។

លោក ហួត ហាក់ ក៏​បាន​ទទួល​​ស្គាល់​ថា​ក្នុង​ដំណើរការ​អធិការកិច្ច​លើ​ចំណាយ​របស់​ក្រសួង​ស្ថាប័នរដ្ឋ​ក្រុម​ការងារ​ក៏​បាន​រកឃើញ​នូវ​ភាព​មិន​ប្រក្រតី​មួយ​ចំនួន​ផង​ដែរ។

លោក​ថា៖ «រាល់​ពេល​ដែល​រក​ឃើញ​នូវ​បាតុភាព​អសកម្ម​នោះ​គឺ​យើង​តែងតែ​ណែនាំ​ឲ្យ​មាន​ការ​កែតម្រូវ​សម្រាប់​ឆ្នាំ​ក្រោយៗ​ទៀត​បញ្ហា​នេះ​មាន​ខ្លះៗ​ដែរ​តែ​មិន​ច្រើន​ទេ​ប្រសិន​បើ​មាន​ការ​ខុស​ឆ្គង​តិចតួច​ខ្វះ​ឯកសារ​គឺ​យើង​ណែនាំ​ឲ្យ​បំពេញ​បន្ថែម​ការ​ចំណាយ​ថវិកា​បេសកកម្ម​ក្រៅ​ប្រទេស​កំហុស​ឆ្គង​គឺ​មិន​ធំ​ដុំ​នោះ​ទេ»។

តាមរយៈ​បទពិសោធ​ដែល​ធ្លាប់​បាន​ចេញ​ទៅ​បំពេញ​បេសកកម្ម​ការងារ​នៅ​ក្រៅ​ប្រទេស​ជាមួយ​នឹង​មន្ត្រី​រដ្ឋាភិបាល​លោក ព្រាប កុល ប្រធាន​អង្គការ​តម្លាភាព​កម្ពុជា​បាន​លើក​ឡើង​ថា​មាន​មន្ត្រី​ចាត់​តាំង​មួយ​ចំនួន​ហាក់​មិន​សូវ​យក​ចិត្ត​ទុក​ដាក់​ក្នុង​បេសកកម្ម​នោះ​ទេ​ហើយ​បែរ​ជា​ឆ្លៀត​ឱកាស​នោះ​ចំណាយ​ពេល​ដើរ​កម្សាន្ត​ទេសចរណ៍​ដែល​ខុស​ពី​គោលដៅ​នៃ​បេសកកម្ម​នាំឲ្យ​ខាត​នូវ​ប្រយោជន៍​ទៅ​វិញ។

លោក​ថា៖ «ពេល​ខ្លះ​ខ្ញុំ​ឃើញ​មន្ត្រី​ខ្លះ​គាត់​បែរ​ជា​ដើរ​លេង​ទិញ​អីវ៉ាន់​នៅ​ផ្សារ​មិន​យក​ចិត្ត​ទុក​ដាក់​ក្នុង​ការងារ​នោះ​ទេ​តើ​គាត់​បាន​ទទួល​ចំណេះដឹង ឬ​ព័ត៌មាន​នៃ​កម្មវិធី​បេសកកម្ម​គាត់​កម្រិត​ណា​? គ្រប់​ជ្រុងជ្រោយ​ ឬ​ពេញលេញ​ឬ​អត់?​ ម្យ៉ាង​ទៀត​មន្ត្រី​ភាគច្រើន​ខ្វះខាត​នូវ​ចំណេះ​ភាសា​ធ្វើឲ្យ​ពួកគាត់​មិន​បាន​ក្រេប​យក​នូវ​ផលប្រយោជន៍​នៃ​បេសកកម្ម​ទាំង​ស្រុង​ខ្ញុំ​គិត​ថា​គប្បី​មាន​ការ​ពិចារណា​ចំណុច​នេះ​ផង​ដែរ»៕

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។