.jpg)
លោក គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុត្តិធម៌ ក្នុងសន្និសីទសារព័ត៌មាន កាលពីថ្ងៃទី ២៥ មេសា។ រូបថត យូសុះ អាប់ឌុលរ៉ាស់ហ៊ីម
ភ្នំពេញ៖ លោក គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុត្តិធម៌បានឲ្យដឹងថា វិធានការនៃការបិទខ្ទប់សម្រាប់រាជធានីភ្នំពេញ និងក្រុងតាខ្មៅ អាចនឹងបន្តក្នុងរយៈពេល ១ សប្តាហ៍បន្ថែមទៀត ក្នុងករណីដែលគ្មានការចូលរួមរបស់ប្រជាពលរដ្ឋ ដែលបណ្តាលឲ្យការឆ្លងរីករាលដាលជំងឺកូវីដ ១៩ មិនថមថយ។
ការព្រមានបន្ថែមរយៈពេលនៃការបិទខ្ទប់បន្តទៀតនេះ បន្ទាប់ពីរាជរដ្ឋាភិបាលបានសម្រេចបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាលជាបន្តបន្ទាប់ រយៈពេល ៣ សប្តាហ៍ ចាប់ពីថ្ងៃទី ១៥ មេសា ដល់ថ្ងៃទី ៥ ឧសភា ដើម្បីទប់ស្កាត់ការរីករាលដាលជំងឺកូវីដ ១៩។
ថ្លែងក្នុងសន្និសីទសារព័ត៌មានស្តីពីការបន្តពន្យារពេលបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ នៅព្រឹកនេះ លោក គឹម សន្តិភាព បានអះអាងថា ការបិទខ្ទប់នឹងមិនបានសម្រេចនោះទេ ដើម្បីបញ្ចប់ព្រឹត្តិការណ៍ ២០ កុម្ភៈ ដែលកំពុងរីករាលដាល ជំងឺកូវីដ ១៩ បើប្រជាពលរដ្ឋនៅតែល្មើសបំពាន និងមិនចូលរួមជាមួយរដ្ឋាភិបាល។
លោកបន្ថែមថា ការឆ្លងនឹងមិនស្រាកស្រានទេ ព្រោះបើពលរដ្ឋនៅតែបន្តការជួបជុំ និងល្មើសបម្រាម ដោយមានការធ្វើដំណើរពាសវាលពាសកាល ដោយគ្មានការគោរពទៅតាមវិធានការសុវត្ថិភាពរបស់ក្រសួងសុខាភិបាល។
លោកបញ្ជាក់់ថា៖ «រយៈពេលបន្តនេះ ក៏បានកំណត់ដែរក្នុងសេចក្តីសម្រេច ហើយអាចនឹងមានការបន្តបិទខ្ទប់ទៀត ក្នុងករណីដែលការចូលរួមរបស់ប្រជាពលរដ្ឋ និងករណីដែលការថមថយស្ថានភាពជំងឺកូវីដ ១៩ គឺនៅមានស្ថានភាពរាលដាល»។
ទោះយ៉ាងណា លោករំពឹងថា ក្នុងរយៈពេលនេះ ការបិទខ្ទប់ ១ សប្តាហ៍បន្ថែមទៀតនេះ នឹងត្រូវបានបិទបញ្ចប់ បើប្រជាពលរដ្ឋមានការចូលរួមអនុវត្តឲ្យបានត្រឹមត្រូវ ទ្រាំលំបាកក្នុងរយៈពេលខ្លី ដែលធ្វើឲ្យការឆ្លងរីករាលដាលជំងឺកូវីដ ១៩ ថមថយដល់កម្រិតមួយដែលបានបញ្ចប់៕
