.jpg)
ទិដ្ឋភាពក្រុងព្រះសីហនុបច្ចុប្បន្នមើលពីលើអគារ។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ អភិបាលខេត្ដព្រះសីហនុលោក គួច ចំរើន បានថ្លែងថា បញ្ហាវិវាទដីធ្លី ដែលនៅតែបន្តកើតមាននៅក្នុងខេត្ដនេះគឺជាកង្វល់មួយ ហើយអាជ្ញាធរខេត្ត កំពុងខិតខំដោះស្រាយ និងក៏កំពុងខិតខំពន្លឿនការចុះបញ្ជីក្បាលដីជូនដល់ប្រជាពលរដ្ឋឲ្យបានឆាប់ចប់រួចរាល់ ខណៈបច្ចុប្បន្នខេត្ដចុះបញ្ជីក្បាលដីជូនពលរដ្ឋបានចំនួន ៤២ ០០០ ក្បាលដី។
លោក គួច ចំរើន បានថ្លែងក្នុងសន្និសីទសារព័ត៌មានស្តីពីវឌ្ឍនភាព និងទិសដៅការងារបន្តរបស់រដ្ឋបាលខេត្តព្រះសីហនុនៅទីស្តីការគណៈរដ្ឋមន្ត្រី កាលពីថ្ងៃទី ៩ ខែមិថុនាថា ការដោះស្រាយទំនាស់ដីធ្លីសំណុំរឿងដែលកំពុងស្រាវជ្រាវ និងសំណុំរឿងដែលកំពុងដោះស្រាយសម្របសម្រួលបន្តមានចំនួន ៥១៣ ករណី ហើយបើគិតត្រឹមខែឧសភា ឆ្នាំ ២០២០ ដោះស្រាយសរុបបាន ៥៨ ករណី។
លោកអភិបាលខេត្ដថ្លែងថា៖ «ដីធ្លីដែលជាកម្មសិទ្ធិរបស់ប្រជាពលរដ្ឋ គោលនយោបាយរបស់យើងគឺខិតខំចុះបញ្ជីដែលរហូតមកទល់ពេលនេះគឺមន្ទីររៀបចំដែនដីបានជំរុញការចុះបញ្ជីដីធ្លីបាន ៤២ ០០០ ក្បាលដីជូនដល់ប្រជាពលរដ្ឋនៅទូទាំងខេត្ដព្រះសីហនុ។ ទាក់ទងជាមួយនឹងបញ្ហាដីធ្លីក៏អាចថាជាកង្វល់មួយដែរដោយសារតែទំនាស់ដីធ្លីកើតមានច្រើន។ ដើម្បីរួមចំណែកក្នុងការដោះស្រាយបញ្ហាទំនាស់ដីធ្លីនេះគឺយើងត្រូវផ្ដើមចេញពីការខិតខំក្នុងការចុះបញ្ជីដីធ្លីឲ្យប្រជាពលរដ្ឋរបស់យើង»។
លោកបានបន្តថា៖ «យើងក៏ខិតខំប្រឹងប្រែងធ្វើកិច្ចការងារនេះ (ចុះបញ្ជីក្បាលដី) ឲ្យបានកាន់តែលឿនថែមទៀត ព្រោះថានៅពេលដែលយើងបានចុះបញ្ជីក្បាលដីឲ្យបានរួចរាល់យើងនឹងកាត់បន្ថយនូវបញ្ហាទំនាស់ដីធ្លីបាន។ បើទោះបីជាមានទំនាស់យើងក៏មានភាពងាយស្រួលក្នុងការដោះស្រាយបញ្ហាដែលកើតឡើងនោះជូនទៅភាគីដែលមានទំនាស់»។
បើតាមលោក គួច ចំរើន ខេត្ដព្រះសីហនុមានតំបន់ដីធ្លីដែលគ្រប់គ្រងដោយសមត្ថកិច្ចចំនួន ៣ ដាច់ដោយឡែកពីគ្នា។ ក្នុងនោះមួយផ្នែកគឺជាដីធ្លីដែលជាកម្មសិទ្ធិរបស់ប្រជាពលរដ្ឋ ដែលស្ថិតក្នុងការគ្រប់គ្រងដោយមន្ទីររៀបចំដែនដី ជាដីដែលពលរដ្ឋមានសិទ្ធិប្រើប្រាស់ស្របច្បាប់។ មួយផ្នែកទៀតគឺជាដីគម្របព្រៃឈើដែលត្រូវគ្រប់គ្រងដោយសមត្ថកិច្ចមន្ទីរកសិកម្មនៃក្រសួងកសិកម្ម និងមួយផ្នែកទៀតគឺជាតំបន់ដែនអភិរក្ស ដែលមានរហូតដល់ចំនួន ១១ កន្លែង។
លោកថ្លែងថា៖ «ពិតណាស់គោលដៅរបស់រាជរដ្ឋាភិបាល គឺថាដើម្បីធ្វើការអភិរក្ស ដើម្បីរក្សានូវគម្របព្រៃឈើដើម្បីថែទាំព្រៃឈើរបស់កម្ពុជាឲ្យបានល្អ និងទប់ទល់នឹងការប្រែប្រួលអាកាសធាតុ។ ប៉ុន្ដែនៅក្នុងតំបន់ទាំងនេះក៏តែងតែកើតមានឡើងនូវបញ្ហាជម្លោះដីធ្លីដែរ ដោយសារតែការកាប់រុករានទន្ទ្រានយកដីរហូតបង្កឡើងជាទំនាស់វិវាទដីធ្លីឡើង»។
លោក គួច ចំរើន បញ្ជាក់ថា៖ «ចំពោះការដោះស្រាយ និងបញ្ហាប្រឈមយើងបានបន្តការដោះស្រាយទៅតាមគោលការណ៍ច្បាប់។ រាជរដ្ឋាភិបាលក៏បានខិតខំប្រឹងប្រែងក្នុងការដោះស្រាយបញ្ហាដីធ្លីក្នុងខេត្ដព្រះសីហនុនេះម្ដងហើយម្ដងទៀត។ កាលពីឆ្នាំ ២០១២ កន្លងទៅបានដាក់ចេញនូវបទបញ្ជាលេខ ០១ ដើម្បីកាត់ឆ្វៀលដីក្នុងតំបន់ដែនអភិរក្សក្នុងខេត្ដព្រះសីហនុទៅឲ្យប្រជាជនទាំងឡាយដែលបានរស់នៅក្នុងតំបន់ដែលមានការថែរក្សា គ្រប់គ្រង និងអភិរក្ស ដោយបានចុះបញ្ជីជូនពួកគាត់រួចរាល់ហើយអស់ដែរ»។
លោកបន្តថា ប៉ុន្ដែរហូតដល់បច្ចុប្បន្ន នៅតែបន្តកើតមានបញ្ហាវិវាទដីធ្លីជាហូរហែ ខណៈមានពលរដ្ឋខ្លះមកសុំដី និងមានអ្នកខ្លះអះអាងផ្សេងៗពីគ្នាពេលចូលទៅកាន់កាប់ទន្ទ្រានយកដីរបស់រដ្ឋនោះ ដែលបង្កឲ្យក្លាយទៅជាទំនាស់ដីធ្លី។
តាមរបាយការណ៍របស់រដ្ឋបាលខេត្ដព្រះសីហនុដែលបានបង្ហាញក្នុងសន្និសីទសារព័ត៌មាននៅថ្ងៃទី ៩ ខែមិថុនា ខេត្ដព្រះសីហនុមានដីសម្បទាន និងដីសម្រាប់វិនិយោគក្នុងនោះមានសម្បទានដីសង្គមកិច្ចស្ថិតនៅក្នុងស្រុកព្រៃនប់ និងស្រុកស្ទឹងហាវ ដែលមានផ្ទៃដីសរុប ១ ០៤០ ហិកតា និងសម្បទានដីសេដ្ឋកិច្ចដីជួលរយៈពេលវែង ដីកោះ និងតំបន់សេដ្ឋកិច្ចពិសេសមាន ៥ ក្រុមហ៊ុនទំហំសរុប ១១ ៧២៨ ហិកតា៕
