.jpg)
លោក គួច ចំរើន ពេលចុះទៅពិនិត្យឆ្នេរក្នុងខេត្តព្រះសីហនុ។ សហការី
ព្រះសីហនុៈ លោក គួច ចំរើន អភិបាលខេត្តព្រះសីហនុ ដែលទើបឡើងកាន់តំណែងថ្មីប្រកាសចាប់ផ្តើមធ្វើការកែលម្អតំបន់ឆ្នេរទាំងអស់ក្នុងខេត្តមួយនេះឲ្យមានសោភណភាពស្រស់ស្អាត និងមានសណ្តាប់ធ្នាប់ឡើងវិញ សម្រាប់ពលរដ្ឋធ្វើដំណើរលម្ហែ ដោយចាត់ទុកវិធានការនេះ ជាកត្តាដ៏ចម្បងបំផុតរបស់ខ្លួន។
ការប្រកាសនេះធ្វើឡើងបន្ទាប់ពីលោក គួច ចំរើន ទើបតែត្រូវបានតែងតាំងជាអភិបាលខេត្តព្រះសីហនុ កាលពីថ្ងៃទី ២៩ ខែ មិថុនា ក្រោមអធិបតីភាពលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្រោយពីអតីតអភិបាលខេត្តនេះ លោក យន្ត មីន បានលាលែងពីតំណែង បន្ទាប់ពីកើតមានឧបទ្ទវហេតុបាក់រលំអគារកម្ពស់ ៧ ជាន់ ដែលបានបណ្តាលឲ្យមនុស្ស ២៨ នាក់ស្លាប់ និងរងរបួស ២៦ នាក់។
លោក គួច ចំរើន បានប្រកាសក្នុងគេហទំព័រហ្វេសប៊ុករបស់លោក កាលពីថ្ងៃអាទិត្យ ស្របពេលលោកបានចុះពិនិត្យឆ្នេរឯករាជ្យ និងជួបសំណេះសំណាលជាមួយភ្ញៀវទេសចរ ដែលមកកម្សាន្ដនៅតាមតំបន់ឆ្នេរថា នឹងរៀបចំកែលម្អសួនកន្លែងដើរថ្មើរជើង និងមានអ្នកសម្អាតសួនឆ្នេរជាប្រចាំ ធានាឲ្យមានភាពស្រស់ស្អាតរបស់ឆ្នេរ ពិសេសការចូលរួមលើកកម្ពស់ និងថែរក្សាបរិស្ថានឆ្នេរឲ្យកាន់តែមានសោភណភាព ដើម្បីទាក់ទាញភ្ញៀវទេសចរជាតិ និងអន្តរជាតិ មកលេងកម្សាន្ដ។
លោកបញ្ជាក់ថា ក្រោមការគ្រប់គ្រងរបស់លោកនឹងបំពេញនូវអ្វីដែលជាតម្រូវការចាំបាច់របស់ប្រជាពលរដ្ឋមូលដ្ឋាន ដូច្នេះការចុះស្តាប់ពីតម្រូវការរបស់ពលរដ្ឋ គឺជាកត្តាសំខាន់ដំបូងបំផុតក្នុងការដឹកនាំរបស់លោក ឲ្យចំគោលដៅ។
លោក ចំរើន បញ្ជាក់ថា៖ «ការចូលរួមសហការ គាំទ្រ និងលើកទឹកចិត្ត ពីបងប្អូនប្រជាពលរដ្ឋក្រុងព្រះសីហនុ ដើម្បីកែលម្អតំបន់ឆ្នេរទាំងអស់នៅខេត្តព្រះសីហនុ ឲ្យមានសោភណភាពស្រស់ស្អាត ដូចជាក្រាលឥដ្ឋការ៉ូឡា សម្រាប់ពលរដ្ឋធ្វើដំណើរលម្ហែ រៀបចំសណ្តាប់ធ្នាប់អនាម័យ និងបរិស្ថានឲ្យស្រស់បំព្រង គឺជាកត្តាសំខាន់ដ៏ចម្បងបំផុត»។
លោក ចំរើន កាលពីម្សិលមិញបានបដិសេធធ្វើអធិប្បាយបន្ថែមជុំវិញការប្តេជ្ញាចិត្តរបស់លោកដោយបានបង្វែរសំណួរទៅកាន់អ្នកនាំពាក្យ។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុ បានបញ្ជាក់ប្រាប់ភ្នំពេញប៉ុស្តិ៍ថា បន្ទាប់ពីការប្រកាសយ៉ាងដូច្នេះ អាជ្ញាធរនឹងរៀបចំកិច្ចប្រជុំបន្ទាន់មួយ ដើម្បីពិភាក្សាពីវិធានការនានា ដែលអាចនឹងត្រូវអនុវត្តក្នុងពេលឆាប់ៗខាងមុខ។ ប៉ុន្តែលោកបញ្ជាក់ថា វិធានការដែលដាក់ចេញទាំងអម្បាលមាណ នឹងចាប់ផ្តើមនៅពេលណា ដោយគ្រាន់តែអះអាងថា ជាជំហានដំបូងដែលអាចដោះស្រាយបញ្ហាចំពោះមុខបានក្នុងការកែប្រែតំបន់ឆ្នេរ គឺការចូលរួមរបស់ប្រជាពលរដ្ឋ។
លោកបញ្ជាក់ថា៖ «យើងចាប់ផ្តើមក្រុមការងារ ដើម្បីរៀបចំផែនការដែលនឹងមានកិច្ចប្រជុំបន្ទាន់ ក្នុងការបែងចែកតួនាទី ភារកិច្ចមន្ត្រីពាក់ព័ន្ធទាំងអស់ ហើយបើយើងនិយាយពីឧបសគ្គក្នុងការងារនេះ គឺសំខាន់ការចូលរួម ព្រោះបើខ្វះការចូលរួមពីប្រជាពលរដ្ឋ នឹងអ្នកពាក់ព័ន្ធ នោះនឹងមិនអាចសម្រេចបានទេ ដូច្នេះទាមទារឲ្យមានការចូលរួម ទើបបរិស្ថាន និងឆ្នេរយើងស្អាត»។
ជាមួយគ្នានេះ លោក ភារម្យ ក៏បានឲ្យដឹងផងដែរចំពោះបញ្ហាប្រឈមនានាទៅនឹងបញ្ហាទឹកកខ្វក់ ដែលកំពុងតែកើតឡើងនៅក្នុងខេត្តព្រះសីហនុខណៈដែលរដ្ឋបាលខេត្តក៏កំពុងតែពិភាក្សាគ្នា ដោយរង់ចាំគោលការណ៍បន្ថែមពីថ្នាក់ជាតិ ក្នុងការដោះស្រាយបញ្ហានេះ ដែលអាចនឹងឈានដល់ការបង្កើតអាងចម្រោះទឹកកខ្វក់បន្ថែមពីលើអាងដែលមានស្រាប់ចំនួន ៤ បន្ថែមទៀត ដើម្បីបំពេញតម្រូវការ ស្របពេលការអភិវឌ្ឍកើតមានយ៉ាងគំហុក។
លោកស្រី ជៀប សុធារី មន្រ្ដីសម្របសម្រួលសមាគមអាដហុកប្រចាំខេត្តព្រះសីហនុ បានសាទរចំពោះការប្តេជ្ញាចិត្តរបស់អភិបាលខេត្តថ្មីនេះ ប៉ុន្តែលោកស្រី យល់ថា បញ្ហានេះអាចអនុវត្តជោគជ័យទៅបាន លុះត្រាតែមានការសហការពីអាជ្ញាធរថ្នាក់ជាតិ។
លោកស្រីបញ្ជាក់ថា៖ «ខ្ញុំមិនហ៊ានថា គាត់បរាជ័យទេ ប៉ុន្តែស្ថិតនៅលើការពុះពារឧបសគ្គរបស់គាត់ ព្រោះការងារទាំងអស់ហ្នឹងមិនមែនថ្នាក់ខេត្តមានសិទ្ធិធ្វើសេចក្តីសម្រេចចិត្តទេ ដោយសារតែគម្រោងខ្លះ មានការសម្រេចតាំងពីថ្នាក់លើមកម្ល៉េះ ។ អ៊ីចឹងផែនការខ្លះ ខាងខេត្តមិនយល់ព្រម ប៉ុន្តែថ្នាក់ជាតិអនុញ្ញាត ដូច្នេះវាពិបាក»។
បន្ថែមពីនេះ លោកស្រី ជៀប សុធារី រំពឹងថា អាជ្ញាធរថ្នាក់ខេត្ត ត្រូវរក្សាឲ្យបាននូវតំបន់ឆ្នេរដែលនៅសេសសល់ ចៀសវាងការបាត់បង់បន្តទៀត។ «ខ្ញុំគ្រាន់តែសង្ឃឹមថា ឆ្នេរដែលនៅសេសសល់នេះអាចអភិរក្សថែរក្សាបានតទៅទៀតទៅចុះ។ តាមពិតប្រជាពលរដ្ឋយើងនៅខេត្តព្រះសីហនុ អត់ចង់ឲ្យមានការអភិវឌ្ឍនៅជាប់ឆ្នេរសមុទ្រទេ។ យើងចង់ឲ្យការអភិវឌ្ឍទាំងអស់ហ្នឹង នៅឆ្ងាយពីឆ្នេរសមុទ្រ គឺស្ថិតនៅខាងលើនៃម្ខាងផ្លូវ ព្រោះនៅតាមឆ្នេរជាប់មាត់សមុទ្រ សុទ្ធតែមានផ្លូវ។ អ៊ីចឹងយើងមិនចង់ឲ្យមានការអភិវឌ្ឍហ្នឹងនៅជាប់ឆ្នេរស្រស់ស្អាតរបស់យើងទេ ព្រោះឥឡូវឆ្នេរស្រស់ស្អាតគឺនៅសល់សូមឲ្យអភិបាលខេត្តថ្មីនេះ អភិរក្សកុំឲ្យមានការបាត់បង់»។
ពាក់ព័ន្ធនឹងសំណុំរឿងរលំបាក់អគារ ៧ ជាន់ លោក ឃាង ភារម្យ ឲ្យដឹងដែរថា ការស៊ើបអង្កេតនានា ជុំវិញការរលំបាក់អគារនេះ គណៈកម្មការចម្រុះ ដែលមានក្រសួងរៀបចំដែនដី កំពុងតែដំណើរការដូច្នេះលោកមិនអាចបញ្ជាក់អ្វីបានច្រើនទេ ក្រៅតែពីការរង់ចាំរបាយការណ៍ពីអន្តរក្រសួងស្របពេលសំណង់អគារ ក៏កំពុងត្រូវបានមន្ត្រីជំនាញ ធ្វើការស៊ើបអង្កេតរកមូលហេតុនៃការរលំបាក់ផងដែរ។
ពាក់ព័ន្ធនឹងជនរងគ្រោះ ដោយការរលំបាក់អគារនៅខេត្តព្រះសីហនុ កាលពីម្សិលមិញលោកនាយករដ្ឋមន្ត្រី ហ៊ុន សែន បានប្រកាសក្នុងឱកាសពិធីផ្ទេរការគ្រប់គ្រងសាលាកុមារពិការភ្នែក និងគថ្លង់នៃអង្គការគ្រួសារថ្មីឲ្យមកស្ថិតនៅក្រោមក្រសួងអប់រំថា ឧបទ្ទវហេតុនៅខេត្តព្រះសីហនុនេះ គឺជារឿងមួយដែលគ្មានប្រទេសណា ដែលចង់ឲ្យកើតមាននោះទេ តែឧបទ្ទវហេតុនេះ វាបានកើតឡើងមិនមែនតែកម្ពុជានោះទេ។
ដូច្នេះឆ្លើយតបនឹងសោកនាដកម្មនេះ ក្រុមគ្រួសារជនរងគ្រោះនៃឧបទ្ទវហេតុបាក់រលំអគារ គឺបានទទួលនូវប្រាក់ឧបត្ថម្ភជាច្រើន រួមទាំងការតាមថែរក្សា ដល់សាច់ញាតិជនរងគ្រោះផងដែរ។
លោកបញ្ជាក់ថា៖ «សូម្បីតែប៉ុន្មានថ្ងៃនេះ មានរឿងអកុសលកើតឡើងនៅខេត្តព្រះសីហនុ យើងយកការទទួលខុសត្រូវទៅលើបញ្ហានេះ សំណងរដ្ឋប្បវេណីដែលត្រូវផ្តល់ និងរឿងមួយទុកឲ្យតុលាការគេដោះស្រាយ ក៏ប៉ុន្តែរាជរដ្ឋាភិបាល និងសប្បុរសជន បានចេញមុខដោះស្រាយនូវបញ្ហានេះ គ្រួសារដែលស្លាប់ម្នាក់ទីកន្លែងខ្លះបានលើសជាង ១០ ម៉ឺនដុល្លារ។ ក៏ប៉ុន្តែបើទោះបីជាបានលើសជាង ១០ ម៉ឺនដុល្លារនោះ វាមិនអាចប្តូរយកជីវិតមនុស្សបានមួយទេ ប្រសិនជាក្រុមគ្រួសារនោះ ចេះប្រើប្រាស់នូវថវិកានោះ គេមិនធ្លាក់ទៅក្នុងភាពក្រីក្រទេ»៕
