.jpg)
សកម្មភាពប្រមូលសំរាមនៅខេត្តព្រះសីហនុពីថ្ងៃសៅរ៍។ សហការី
ព្រះសីហនុៈ លោក គួច ចំរើន អភិបាលខេត្ដព្រះសីហនុបានបើក «យុទ្ធនាការសម្អាតអនាម័យ និងបរិស្ថានទីក្រុង» ជាមួយនឹងការបញ្ចេញសាររិះគន់ចំពោះអ្នកបោះចោលសំរាមពាសវាលពាសកាលខណៈដែលចំនួនសំរាម នៅខេត្តមួយនេះបានកើនឡើងពី ៣០០ ទៅ ៤០០ តោនក្នុង ១ ថ្ងៃ បើធៀបនឹងឆ្នាំមុន នៅពេលដែលអង្គការសង្គមស៊ីវិលមើលឃើញថា ក្រុមហ៊ុនប្រមូលសំរាមតែមួយគត់គ្មានសមត្ថភាពប្រមូលសំរាម។
លោក គួច ចំរើន បានថ្លែងនៅក្នុងពេលបើកយុទ្ធនាការចុះប្រមូលសំរាមកាលពីថ្ងៃសៅរ៍ ដែលមានអ្នកចូលរួមប្រមូលសំរាមប្រមាណ ៥ ០០០ នាក់ ថា បញ្ហាសំរាមក្នុងក្រុងព្រះសីហនុ កំពុងរីកធំលើសពីសមត្ថភាពក្រុមហ៊ុនដឹកជញ្ជូនចេញ។ ប៉ុន្ដែលោកបានប្ដេជ្ញាត្រូវខិតខំគ្រប់គ្រងសំរាមឲ្យបានដោយរៀបចំផែនការឲ្យបានគត់មត់ក្នុងការដឹកជញ្ជូនសំរាមចេញឲ្យបានទាន់ពេលវេលា។
លោកបន្តថា៖ «សំរាមដែលនៅសេសសល់ក្នុងខេត្តព្រះសីហនុ ពិតជាមានចំនួនយ៉ាងច្រើន។ សំរាមកើនឡើងដោយសារតែមនុស្សជាអ្នកប្រើប្រាស់រយៈពេលកន្លងមក។ សំរាមពិតជាលើសពីតម្រូវការនៃការដឹកជញ្ជូនចេញធ្វើឲ្យសំរាមនៅសេសសល់ជាបន្តបន្ទាប់»។
លោកបានអំពាវនាវឲ្យពលរដ្ឋ អ្នកស្ម័គ្រចិត្ត បន្តការអប់រំផ្សព្វផ្សាយឲ្យបានទូលំទូលាយដល់ប្រជាពលរដ្ឋដែលជាអ្នកបង្កើតសំរាមនៅទូទាំងក្រុងព្រះសីហនុ ឲ្យពួកគាត់ចូលរួមវេចខ្ចប់គ្រប់គ្រងសំរាមឲ្យមានអនាម័យ បរិស្ថានល្អចាប់ពីពេលនេះតទៅ។
លោកសង្កត់ធ្ងន់ថា៖ «សំរាមមិនមែនជាករណីដែលគួរស្អប់ខ្ពើមនោះទេតែអ្នកដែលប្រើប្រាស់ចោលសំរាមតាមដងផ្លូវសាធារណៈ ទើបជារឿងដែលយើងស្អប់ខ្ពើម»។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុ ថ្លែងប្រាប់ភ្នំពេញប៉ុស្ដិ៍កាលពីថ្ងៃអាទិត្យជុំវិញយុទ្ធនាការសម្អាតបរិស្ថានទីក្រុងព្រះសីហនុថា រហូតមកដល់ថ្ងៃអាទិត្យ ខេត្ដព្រះសីហនុ នៅបន្តប្រមូលសំរាមនៅឡើយ ដោយឲ្យមន្រ្ដីមូលដ្ឋាន សង្កាត់ ភូមិ សហការជាមួយក្រុមហ៊ុនសំរាម បន្ដប្រមូលដឹកសំរាមចេញបន្តទៀត ខណៈយុទ្ធនាការសម្អាតបរិស្ថាន កាលពីថ្ងៃសៅរ៍ ប្រមូលសំរាមបានជាង ២៤៥ ឡាន យកទៅចោលទៅទីលានសំរាម។
លោកបានបន្តថា៖ «កិច្ចការងារប្រមូលសំរាមនេះយើងនឹងបន្តធ្វើជាប្រចាំ ដើម្បីឲ្យអស់សំរាម លែងមានសំរាមនៅរាយប៉ាយ»។
ទាក់ទងនឹងការលើកឡើងរបស់លោកអភិបាលខេត្ដព្រះសីហនុពីបញ្ហាសំរាម លោក ភារម្យ បញ្ជាក់ថា ប្រសាសន៍របស់លោកអភិបាលគឺចង់អប់រំដាស់តឿនទៅដល់អ្នកដែលចោលសំរាមគ្មានសណ្ដាប់ធ្នាប់តាមទីសាធារណៈឲ្យភ្ញាក់រឭក និងចូលរួមទុកដាក់សំរាមឲ្យបានត្រឹមត្រូវ។
លោកបន្ថែមថា៖ «ប្រសាសន៍លោកឯកឧត្ដមអភិបាលខេត្ត ក៏បានសង្កត់ធ្ងន់ផងដែរថា ចំពោះយុទ្ធនាការត្រឹម ១២ ថ្ងៃ យើងមិនអាចធ្វើឲ្យទីក្រុងយើងស្អាតបានទេ។ ប៉ុន្ដែយុទ្ធនាការនេះ គឺអាចធ្វើឲ្យយើងដឹង និងកំណត់នូវបញ្ហាសំរាមនេះបានច្បាស់ ហើយក៏ជាសារមួយ ដើម្បីចែកជូនទៅដល់ប្រជាពលរដ្ឋទាំងអស់ឲ្យចូលរួមដោះស្រាយបញ្ហាសំរាមនេះ»។
បើតាមលោក ភារម្យ នៅថ្ងៃយុទ្ធនាការសម្អាតបរិស្ថានមានមនុស្សជិត ៥ ពាន់នាក់ បានចូលរួមនឹងគ្រឿងចក្រជិត ២០០ គ្រឿង ដឹកជញ្ជូននិងប្រមូលសំរាមទៅចោល។
លោក ហេង ប៉េងហាក់ តំណាងក្រុមហ៊ុនប្រមូលសំរាមក្រុងព្រះសីហនុ (KSWM) ឲ្យដឹងថា ដោយសារតែខេត្តនេះជាតំបន់ដែលកំពុងអភិវឌ្ឍន៍ទើបធ្វើឲ្យមានកាកសំណល់សំរាមលាយឡំគ្នាច្រើនប្រភេទនាំឲ្យមានការលំបាកក្នុងការប្រមូលខណៈខ្វះកម្មករប្រមូលសំរាម។ លោកឲ្យដឹងថា សំរាមក្នុងក្រុងព្រះសីហនុ បានកើនចាប់ពី ៣០០ ទៅ ៤០០ តោនក្នុង ១ ថ្ងៃ បើធៀបនឹងឆ្នាំមុនខណៈបច្ចុប្បន្នក្នុង ១ ថ្ងៃ ក្រុមហ៊ុនត្រូវប្រមូលសំរាមយ៉ាងតិចពី ៦០០-៨០០ តោន។
លោកស្រី ជៀប សុធារី មន្ត្រីសម្របសម្រួលសមាគមការពារសិទ្ធិមនុស្សអាដហុក ខេត្តព្រះសីហនុទទួលស្គាល់ថា បញ្ហាសំរាម គឺត្រូវការរយៈពេលវែង ក្នុងការដោះស្រាយ ប៉ុន្ដែលោកស្រីទទូចឲ្យអភិបាលខេត្ដព្រះសីហនុ ស្វែងរកវិនិយោគិនបន្ថែមលើវិស័យប្រមូលសំរាម។
លោកស្រីបន្ដថា៖ «រយៈពេលជាង ២ ឆ្នាំមកហើយ មានក្រុមហ៊ុនប្រមូលសំរាមតែ ១ ប៉ុណ្ណោះ នៅខេត្ដព្រះសីហនុ។ ការប្រមូលសំរាមក៏មិនទទួលបានជោគជ័យដែរ។ ខ្ញុំសំណូមពរឲ្យអភិបាលខេត្ដស្វែងរកក្រុមហ៊ុនសំរាមដទៃទៀត មកវិនិយោគលើការប្រមូលសំរាមនៅខេត្ដព្រះសីហនុ»។
លោក សុខ សុខុម ប្រធានអង្គការស្រាវជ្រាវជាតិកម្ពុជា (CNRO) បានកត់សម្គាល់ឃើញថា កន្លងមក សំរាមនៅក្នុងខេត្ដព្រះសីហនុបាននៅកកស្ទះគ្រប់គោលដៅក្នុងក្រុងទេសចរណ៍នេះ ទើបជំរុញឲ្យលោកអភិបាលខេត្តថ្មី បង្កើតយុទ្ធនាការសម្អាតអនាម័យនេះឡើង ដើម្បីបំផុសគំនិតប្រជាពលរដ្ឋឲ្យចូលរួមសម្អាតអនាម័យទុកដាក់វេចខ្ចប់សំរាមឲ្យបានល្អ។
លោកថ្លែងថា៖ «ប៉ុន្ដែខ្ញុំសូមឲ្យឯកឧត្ដមអភិបាលខេត្ដ និងអភិបាលក្រុង ត្រូវពិនិត្យមើលក្រុមហ៊ុនប្រមូលសំរាមឡើងវិញតើមានធនធាន បច្ចេកទេសសម្ភារ ក្នុងការប្រមូលសំរាមដែរឬទេ? បើគ្មានត្រូវមានវិធានការបែបណា? ប្ដូរផ្លាស់យ៉ាងណា? ព្រោះក្រុមហ៊ុនប្រមូលសំរាមនៅព្រះសីហនុនេះ តាំងពីមានមក មិនទាន់បង្កើតស្នាដៃចំពោះការប្រមូលសំរាមឲ្យបានល្អ និងមានប្រសិទ្ធភាពនៅឡើយទេ»៕
