.jpg)
លោក គួច ចំរើន និងមន្ត្រីពេលចុះពិនិត្យសំណង់រំលោភចូលប្រឡាយ។ រូបថត ហ្វេសប៊ុក
ព្រះសីហនុៈ អភិបាលខេត្ដព្រះសីហនុ លោក គួច ចំរើន បានអំពាវនាវដល់អ្នកចាក់ដី និងអ្នកសាងសង់រំលោភលើអូរប្រឡាយត្រូវប្រញាប់កាយចេញវិញ ខណៈដែលលោកឲ្យកម្លាំងចម្រុះយកគ្រឿងចក្រទៅស្ដារអូរប្រឡាយចំនួន ៦ ទីតាំងដើម្បីរំដោះជំនន់ទឹកភ្លៀងដែលកំពុងជន់លិចក្រុង និងស្រុកមួយចំនួនក្នុងខេត្ដនេះ។
ថ្លែងក្រោយពេលចុះពិនិត្យមើលផ្លូវស្ពាននៅចំណុច ភូមិ ១ សង្កាត់លេខ ១ ក្រុងព្រះសីហនុកាលពីថ្ងៃសៅរ៍លោក គួច ចំរើន បានលើកឡើងថាក្រុងព្រះសីហនុកំពុងរងការខូចខាតដោយសារទឹកជំនន់ទឹកភ្លៀង ហើយរដ្ឋបាលខេត្ដកំពុងដោះស្រាយបញ្ហានេះ។ លោកថ្លែងថា៖ «មេឃកាន់តែភ្លៀង ប្រជាជនចូលរួមកាន់តែច្រើន។ អ្នករំលោភអូរ ប្រញាប់កាយចេញវិញផង»។
លោក ឃាង ភារម្យ អ្នកនាំពាក្យរដ្ឋបាលសាលាខេត្តព្រះសីហនុបានប្រាប់ភ្នំពេញប៉ុស្ដិ៍កាលពីម្សិលមិញថា លទ្ធផលនៃការស្តារប្រឡាយអូរក្នុងអំឡុងមានជំនន់ទឹកភ្លៀង ដែលរួមទាំងសំណង់រំលោភចូលអូរផងនោះ រួមមានអូរ ៦ ទីតាំងសរុបប្រវែង ៧១០ ម៉ែត្រនៅចំណុចអូរអណ្តូងអ៊ុនតាក់, អូរសំអាត, អូរអូរឈើទាល,អូរនៅម្លប់តាប៉ាង, អូរLV, និងចំណុចអូរ ១ (មាន ៥ គោលដៅផ្សេងទៀត)។ រីឯវិធានការលើការស្ដារនេះនឹងអនុវត្ដបន្តទៀតដោយយកច្បាប់ជាគោល។
លោកថា៖ «យើងក៏សូមអំពាវនាវដល់បងប្អូនប្រជាពលរដ្ឋដែលមានការពាក់ព័ន្ធនឹងការចាក់ដីសាងសង់សំណង់ផ្សេងរំលោភយកដីចំណីអូរប្រឡាយ សូមចូលរួមសហការជាមួយរដ្ឋបាលខេត្ដ ដើម្បីស្ដារ និងពង្រីកទំហំអូរប្រឡាយទៅតាមប្លង់ប្រព័ន្ធរបស់ខេត្ដរហូតឈានដល់ការរំដោះការជន់លិចពីទឹកភ្លៀងផ្សេងៗ និងបញ្ចៀសឲ្យបាននូវគ្រោះមហន្តរាយដូចដែលធ្លាប់កើតមានឡើងកន្លងមក»។
បើតាមលោក ភារម្យ ជំនន់ទឹកភ្លៀងចាប់ពីដើមខែសីហានេះបានធ្វើឲ្យប៉ះពាល់ដល់សង្កាត់ទាំង ៤ នៃក្រុងព្រះសីហនុ និងស្រុកព្រៃនប់ និងបង្កខូចខាតហេដ្ឋារចនាសម្ព័ន្ធផ្លូវ ស្ពាន ធ្ងន់ធ្ងរនៅក្នុងក្រុង។ ក្នុងនោះពលរដ្ឋរងផលប៉ះពាល់មាន ១ ៧៣៦ គ្រួសារ ផ្ទះចំនួន ៩៣៧ ខ្នង និង រថយន្ត ម៉ូតូ ម៉ាស៊ីនភ្លើង និងគ្រឿងអេឡិចត្រូនិករាប់រយគ្រឿងផ្សេងទៀត។
អ្នកស្រី ជៀប សុធារី មន្ដ្រីសម្របសម្រួលសមាគមសិទ្ធិមនុស្សអាដហុកប្រចាំខេត្ដព្រះសីហនុបានឲ្យដឹងកាលពីម្សិលមិញថាកាលពីថ្ងៃទី ១៣ ខែសីហាលោក គួច ចំរើន បានប្រជុំជាមួយបណ្ដាអង្គការសង្គមស៊ីវិលមួយចំនួន ដើម្បីរកមូលហេតុដែលបង្កឲ្យមានទឹកជន់លិចក្រុង និងផ្ទះសំបែងរបស់ពលរដ្ឋ និងការដោះស្រាយ។
អ្នកស្រី ថ្លែងថាបណ្ដាអង្គការសង្គមស៊ីវិលដែលពាក់ព័ន្ធប្រមាណ ៦ បានស្នើឲ្យអភិបាលខេត្ដព្រះសីហនុដោះស្រាយបញ្ហាទឹកជំនន់ជន់ នៅពេលមើលឃើញបញ្ហានេះកើតឡើងពីករណីចាក់ដី និងសាងសង់សំណង់រំលោភចំណីអូរប្រឡាយជាយូរមកហើយ។
អ្នកស្រីបញ្ជាក់ថា៖ «បញ្ហានេះមិនមែនទើបកើតឡើងទេ វាកើតឡើងយូរហើយ ប៉ុន្ដែការដោះស្រាយទើបចាប់ផ្ដើម។ តាមការអំពាវនាវរបស់អាជ្ញាធរខេត្ដបានប្រាប់ឲ្យភាគីដែលរំលោភយកអូរប្រឡាយត្រូវដឹងខ្លួនទទួលខុស និងកែប្រែឥរិយាបថ ហើយកាយ ឬរុះរើសំណង់របស់ខ្លួនដែលសង់រំលោភនោះចេញវិញ»។
អ្នកស្រី សុធារី បានបន្តថាមូលហេតុដែលនាំឲ្យមានអ្នកបន្តចាក់ដី និងសាងសង់សំណង់រំលោភចូល អូរប្រឡាយ ដោយសារកន្លងមកអាជ្ញាធរមិនបានចាត់វិធានការផ្លូវច្បាប់។ ប៉ុន្តែអ្នកស្រីបញ្ជាក់ថាក្នុងជំនួបជាមួយអង្គការសង្គមស៊ីវិល លោកអភិបាលខេត្ដបានអះអាងថានឹងចាត់វិធានការផ្លូវច្បាប់ចំពោះអ្នកដែលរំលោភយកអូរប្រឡាយដើម្បីស្ដារអូរប្រឡាយឡើវិញ។
អ្នកស្រីបន្ថែមថា៖ «ខ្ញុំគាំទ្រនូវសកម្មភាពរបស់ខេត្ដនាពេលនេះ។ ប៉ុន្ដែសូមឲ្យអ្វីដែលនិយាយទៅហើយ សូមឲ្យចាត់វិធានការដូចអ្វីដែលបានសន្យា។ ព្រោះថា អ្នកដែលរំលោភយកដី អូរប្រឡាយ មិនមែនសុទ្ធតែជាពលរដ្ឋធម្មតាទេ ក្នុងនោះក៏មានអ្នកមានអំណាច មានបុណ្យស័ក្ដិមួយចំនួនផងដែរ»៕
