ភ្នំពេញៈ លោក ឃួង ស្រេង អភិបាលរាជធានីភ្នំពេញបានបញ្ជាឱ្យអាជ្ញាធរខណ្ឌទាំង ១៤ ធ្វើការចាប់ឃាត់មធ្យោបាយធ្វើដំណើររបស់បុគ្គលណាដែលមិនគោរពតាមបម្រាមគោចរ ដែលជាវិធានការរដ្ឋបាលហាមការធ្វើដំណើរ និងការជួបជុំគ្នាមិនចាំបាច់ពីម៉ោង ៨ យប់ដល់ម៉ោង ៥ ព្រឹកដែលមានថិរវេលាអនុវត្តរយៈពេល ២ សប្ដាហ៍ គិតចាប់ពីថ្ងៃទី ១ ខែមេសា រហូតដល់ថ្ងៃទី ១៤ ខែមេសា ឆ្នាំ ២០២១។
តាមរយៈសារសំឡេង លោក ឃួង ស្រេង បានប្រាប់ទៅអាជ្ញាធរខណ្ឌទាំងអស់នៅក្នុងរាជធានី-ភ្នំពេញថា ប្រសិនបើមានអ្នកដែលមិនអនុវត្តតាមនូវសេចក្តីសម្រេចនេះគឺត្រូវចាប់យកសម្ភារ មធ្យោបាយធ្វើដំណើររបស់គាត់រក្សាទុកនៅក្នុងខណ្ឌនីមួយៗសិន ប៉ុន្តែពុំចាំបាច់ឃាត់មនុស្សទេ។
លោកបញ្ជាក់ថា៖ «យកឡាន ឬម៉ូតូរបស់គាត់រក្សាទុកសិនហើយឱ្យគាត់ធ្វើចត្តាឡីស័កនៅផ្ទះរបស់គាត់គ្រប់ ១៤ ថ្ងៃ ទើបឱ្យគាត់មកទទួលសម្ភារនេះវិញ ប៉ុន្តែក្នុងករណីអាជ្ញាធររកឃើញថា គាត់មិនអនុវត្តតាមការណែនាំរបស់សមត្ថកិច្ច នោះយើងនឹងអនុវត្តនូវវិធានការផាកពិន័យបន្តទៀត»។
លោក ឃួង ស្រេង លើកឡើងបែបនេះ បន្ទាប់ពីលោកបានចេញនូវសេចក្តីសម្រេចដាក់ចេញនូវ វិធានការរដ្ឋបាលជាបណ្តោះអាសន្នដើម្បីទប់ស្កាត់ការឆ្លងរាលដាលជំងឺកូវីដ ១៩ នៅក្នុងភូមិសាស្ត្ររាជធានីភ្នំពេញ ដែលមានថិរវេលាអនុវត្តរយៈពេល ២ សប្ដាហ៍ គិតចាប់ពីម្សិលមិញតទៅ។
សេចក្តីសម្រេចដែលចុះហត្ថលេខាដោយលោក ឃួង ស្រេង នៅថ្ងៃម្សិលមិញ រដ្ឋបាលសាលារាជធានីភ្នំពេញត្រូវសម្រេចផ្អាកជាបណ្តោះអាសន្ននូវសកម្មភាពអាជីវកម្មចំពោះតូបអាហារ អាហារដ្ឋានភោជនីយដ្ឋាន ហាងកាហ្វេ ហាងភេសជ្ជៈ និងភោជនីយដ្ឋាននៅតាមសណ្ឋាគារ ។ល។ ដែលទទួលអតិថិជនចូលមកទទួលទានអាហារភេសជ្ជៈ ឬទទួលទានគ្រឿងស្រវឹងនៅចន្លោះម៉ោង ៨ យប់ដល់ម៉ោង ៥ ព្រឹកជាកំហិត។ ប៉ុន្តែទីតាំងអាជីវកម្មទាំងនោះអាចលក់ជាលក្ខណៈវេចខ្ចប់បាន។
លោក ឃួង ស្រេង ក៏បានផ្អាកជាបណ្តោះអាសន្ននូវការប្រមូលផ្តុំ ឬការជួបជុំគ្នាទទួលទានអាហារភេសជ្ជៈ ឬទទួលទានគ្រឿងស្រវឹង នៅពេលវេលាដូចគ្នាដែរ លើកលែងតែចំពោះករណីចាំបាច់ដូចជា ការជួបជុំក្នុងចំណោមសមាជិកគ្រួសារដែលរស់នៅក្នុងលំនៅឋាន ឬទីសំណាក់ជាមួយគ្នា, ការរៀបចំពិធីបុណ្យសព ដោយគោរពតាមការកំណត់របស់អាជ្ញាធរមានសមត្ថកិច្ច, ការជួបជុំរបស់បុគ្គលិកសុខាភិបាល ដើម្បីយកវត្ថុសំណាកបុគ្គលដែលពាក់ព័ន្ធដោយផ្ទាល់ ឬប្រយោលជាមួយអ្នកផ្ទុកជំងឺកូវីដ១៩ ឬដើម្បីយកអ្នកដែលផ្ទុកជំងឺកូវីដ ១៩ ក៏ដូចជាបុគ្គលិកសុខាភិបាលដែលបំពេញការងារសង្គ្រោះបន្ទាន់ផ្សេងទៀត។
លោកបន្តថា ចំណុចដែលត្រូវលើកលែងបន្ថែមទៀតមានដូចជាការជួបជុំរបស់អាជ្ញាធរមានសមត្ថកិច្ច កម្លាំងបញ្ជាការឯកភាពរដ្ឋបាលគ្រប់លំដាប់ថ្នាក់ ក្នុងការបំពេញការងារថែរក្សាសន្តិសុខសណ្តាប់ធ្នាប់ និងរបៀរៀបរយសាធារណៈ, ការជួបជុំមនុស្សដែលមានភាពចាំបាច់សម្រាប់បម្រើផលប្រយោជន៍សាធារណៈ ឬក្នុងគោលបំណងផ្សេងទៀតតាមការកំណត់របស់អាជ្ញាធរមានសមត្ថកិច្ច។
ពលរដ្ឋម្នាក់រស់នៅសង្កាត់ច្បារអំពៅ ១ ខណ្ឌច្បារអំពៅ លោក ជា សំនៀង បានបង្ហាញការគាំទ្រទៅនឹងសេចក្តីណែនាំរបស់រដ្ឋាភិបាលដោយលោកលើកឡើងថា បម្រាមគោចរហាមប្រាមការធ្វើដំណើរ និងការប្រកបអាជីវកម្មនៅពេលយប់ អាចរួមចំណែកច្រើនក្នុងការកាត់បន្ថយការប្រមូលផ្តុំ និងចរាចរណ៍ពលរដ្ឋចៀសផុតពីការរីករាលដាលនៃជំងឺកូវីដ ១៩។
លោកប្រាប់ ភ្នំពេញ ប៉ុស្តិ៍ ម្សិលមិញថា៖ «នេះមិនមែនជាការរឹតត្បិតសិទ្ធិអីនោះទេ តែជាការចូលរួមទាំងអស់គ្នា។ ខ្ញុំយល់ថាបម្រាមនេះចាំបាច់ក្នុងកាលៈទេសៈនេះព្រោះស្ថានភាពឆ្លងកាន់តែធ្ងន់ធ្ងរហើយ»។
លោក ជា សំនៀង បានអំពាវនាវទៅដល់ពលរដ្ឋដទៃទៀតឱ្យបង្កើនការប្រុងប្រយ័ត្នផ្ទាល់ខ្លួន និងគោរពឱ្យបានខ្ជាប់ខ្ជួននូវការណែនាំរបស់ក្រសួងសុខាភិបាល ព្រមទាំងស្នើអាជ្ញាធរអនុវត្តនូវសេចក្តីណែនាំរបស់រដ្ឋាភិបាលឱ្យបានត្រឹមត្រូវចៀសវាងការលើកលែង ឬបណ្តែតបណ្តោយណាមួយ ដែលនាំឱ្យបង្កបញ្ហា ឬធ្វើឱ្យមេរោគឆ្លងរាលដាលកាន់តែខ្លាំង។
អភិបាលខេត្តកំពង់ស្ពឺលោក វ៉ី សំណាង ប្រាប់ ភ្នំពេញ ប៉ុស្តិ៍ ម្សិលមិញថា លោកកំពុងធ្វើការពិនិត្យមើលមុននឹងសម្រេចដាក់ការអនុវត្តបម្រាមគោចរតាមអនុក្រឹត្យរបស់លោកនាយករដ្ឋមន្ត្រី ហ៊ុន សែន ដោយសារខេត្តរបស់លោកមានកម្មករនិយោជិតដែលធ្វើការវេនយប់។
លោកថ្លែងថា៖ «ខ្ញុំអាចនឹងចាប់ផ្តើមអនុវត្តនៅក្នុងខេត្តពីស្អែក ឬខានស្អែកដោយសារតែនៅកំពង់ស្ពឺនេះ មិនទាន់មានការប្រឈមធ្ងន់ធ្ងរ ដូចនៅរាជធានីភ្នំពេញ ឬបណ្តាខេត្តផ្សេងៗមួយចំនួននោះទេ»។
លោក វ៉ី សំណាង ថា លោកអាចនឹងកំណត់ពេលវេលាក្នុងការអនុវត្តដូចនឹងសាលារាជធានីភ្នំពេញដែរ ប៉ុន្តែលោកត្រូវធ្វើការសិក្សាជាមុនសិនទៅលើកម្មករនិយោជិត ដែលពួកគាត់មួយចំនួនត្រូវធ្វើការចេញពេលយប់ និងត្រូវធ្វើដំណើររយៈពេលយូរ ដែលខុសពីអ្នកធ្វើការងារផ្សេងៗ ដែលអាចចេញពីភ្លឺ ឬមុនពេលម៉ោងកំណត់បម្រាមគោចរនេះ។
គួរបញ្ជាក់ផងដែរថា រដ្ឋាភិបាលបានចេញនូវអនុក្រឹត្យមួយកាលពីថ្ងៃទី ៣១ ខែមីនា ដោយក្នុងនោះផ្តោតសំខាន់ទៅលើវិធានការរដ្ឋបាលក្នុងការរឹតត្បិតលើការធ្វើចរាចរណ៍ និងបម្រាមគោចររាល់ការធ្វើដំណើរដោយហាមពីចន្លោះម៉ោង ៨ យប់ដល់ម៉ោង ៥ ព្រឹក។
អនុក្រឹត្យដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន ដែលមាន ៧ ជំពូក និង ២៣ មាត្រាស្តីពីវិធានការរដ្ឋបាល គឺបានចែងអំពីការទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ដែលកំណត់អំពីវិធានការរដ្ឋបាល សំដៅការពារអាយុជីវិតរបស់ប្រជាពលរដ្ឋ សុខភាពសាធារណៈ និងសណ្តាប់ធ្នាប់សាធារណៈព្រមទាំងកាត់បន្ថយឱ្យបានជាអតិបរមានូវផលប៉ះពាល់នៃការឆ្លងជំងឺនេះ ចំពោះវិស័យសង្គម និងសេដ្ឋកិច្ចនៅក្នុងព្រះរាជាណាចក្រកម្ពុជា៕
វីដេអូ៖