.jpg)
លោក ឃួង ស្រេង អភិបាលរាជធានីភ្នំពេញ បានដឹកនាំកិច្ចប្រជុំមួយស្ដីពីការត្រួតពិនិត្យសំណង់ក្នុងរាជធានីភ្នំពេញ ដោយមានការចូលរួមពីមន្ទីរអង្គភាពជំនាញពាក់ព័ន្ធរួមទាំង អភិបាល អភិបាលរងខណ្ឌទាំង ១៤ នៅសាលប្រជុំសាលារាជធានីភ្នំពេញ កាលពីរសៀលថ្ងៃពុធ។ សាលារាជធានីភ្នំពេញ
ភ្នំពេញៈ លោក ឃួង ស្រេង អភិបាលរាជធានីភ្នំពេញណែនាំឲ្យមន្ត្រីថ្នាក់ក្រោមទាំង ១៤ ខណ្ឌនៅក្នុងរាជធានីភ្នំពេញត្រូវត្រួតពិនិត្យលក្ខណៈបច្ចេកទេសលើសំណង់ និងអគារទាំងអស់ឲ្យបានត្រឹមត្រូវតាមបច្ចេកទេសនិងច្បាប់សាងសង់ ដើម្បីធានាឱ្យបាននូវគុណភាពសំណង់។
កាលពីរសៀលថ្ងៃពុធលោក ឃួង ស្រេង បានដឹកនាំកិច្ចប្រជុំមួយស្ដីពីការត្រួតពិនិត្យសំណង់ក្នុងរាជធានីភ្នំពេញ ដោយមានការចូលរួមពីមន្ទីរអង្គភាពជំនាញពាក់ព័ន្ធរួមទាំង អភិបាល អភិបាលរងខណ្ឌទាំង ១៤ នៅសាលប្រជុំសាលារាជធានីភ្នំពេញ។
លោក ឃួង ស្រេង បានប្រាប់ភ្នំពេញប៉ុស្តិ៍កាលពីម្សិលមិញថា សំណង់ដែលគ្មានច្បាប់អនុញ្ញាត និងសាងសង់ខុសបច្ចេកទេសត្រូវតែចូលរួមគោរពតាមច្បាប់សំណង់ និងត្រូវមានច្បាប់អនុញ្ញាតសាងសង់ ហើយត្រូវតែគោរពតាមបទដ្ឋានបច្ចេកទេសសំណង់។
លោកបានឲ្យដឹងទៀតថា ចំពោះសំណង់ដែលមានសភាពចាស់ទ្រុឌទ្រោម គឺរដ្ឋបាលខណ្ឌទាំង ១៤ ត្រូវចេញសេចក្ដីជូនដំណឹង និងចុះណែនាំជូនបងប្អូនប្រជាពលរដ្ឋដែលរស់នៅក្នុងនោះមានការប្រុងប្រយ័ត្នខ្ពស់។
លោកថ្លែងថា៖ «យើងជំរុញឲ្យអនុវត្តច្បាប់ស្តីពីសំណង់ឲ្យមន្ត្រីថ្នាក់ក្រោមជាតិទាំងអស់អនុវត្តនូវច្បាប់សំណង់នេះ ដើម្បីធានាសុវត្ថិភាពដល់ប្រជាពលរដ្ឋ និងអ្នកប្រើប្រាស់សំណង់»។
លោក សុខ គីន ប្រធានសហព័ន្ធសហជីពកម្មករសំណង់ និងព្រៃឈើបានឲ្យដឹងថា វិស័យសំណង់នៅកម្ពុជាគឺមានតិចតួចប៉ុណ្ណោះ ដែលគោរពបានទៅតាមលក្ខណៈបច្ចេកទេស និងច្បាប់សំណង់។
លោកថ្លែងថា សំណង់អគារមួយចំនួនគឺបានសាងសង់រួចទៅហើយ ទើបបានដំណើរការសុំច្បាប់ជាក្រោយ ហើយបើទោះជាមន្ត្រីថ្នាក់ក្រោមបានរកឃើញពីកំហុស ក៏មិនមានលទ្ធភាពចាត់វិធានការលើការដ្ឋានសំណង់ទាំងនោះបានដែរ ព្រោះតែម្ចាស់អគារភាគច្រើន សុទ្ធតែមានអ្នកមានអំណាចនៅកាងពីក្រោយខ្នង។ ក្នុងករណីដែលរដ្ឋាភិបាលអនុវត្តតាមអ្វីដែលបានកំណត់ និងចាត់វិធានការដោយតឹងរ៉ឹង ហើយមន្ត្រីគ្រប់ជាន់ថ្នាក់ អនុវត្តទៅតាមតួនាទីរបស់ខ្លួន នោះវិស័យសំណង់នៅក្នុងប្រទេសកម្ពុជានឹងលែងមានបញ្ហាកើតឡើងទៀតហើយ។
លោកថ្លែងឲ្យដឹងថា៖ «មកដល់ពេលនេះ ខ្ញុំនឹងសប្បាយចិត្ត បើសិនជាអភិបាលរាជធានីភ្នំពេញ គាត់ចាត់វិធានការពេលហ្នឹង ហើយគាត់បន្តយន្តការទាំងនេះតឹងរ៉ឹងចំពោះមន្ត្រីទាំងវិស័យឯកជន»។
ច្បាប់ស្តីពីសំណង់ដែលមាន ២២ ជំពូក និង ១១១ មាត្រាត្រូវបានព្រះមហាក្សត្រប្រកាសឲ្យប្រើជាផ្លូវការកាលពីខែវិច្ឆិកា ឆ្នាំ ២០១៩ ដោយច្បាប់នេះនឹងដាក់ទោសទណ្ឌដល់ជនទាំងឡាយណា ដែលប្រកបអាជីវកម្មក្នុងវិស័យសំណង់រាប់ចាប់ពីអ្នករៀបចំប្លង់រហូតដល់ម្ចាស់សំណង់រួមទាំងមន្ត្រី ដោយអាចប្រឈមនឹងទោសជាប់ពន្ធនាគារដល់ទៅ ១៥ ឆ្នាំ បើរកឃើញថា ការធ្វេសប្រហែសរបស់ពួកគេបណ្តាលឲ្យមានមនុស្សស្លាប់។ ច្បាប់នេះបានបញ្ញត្តិទុករយៈពេល ២ ឆ្នាំក្រោយពីចូលជាធរមានសម្រាប់ឲ្យម្ចាស់សំណង់ដែលបានសាងសង់រួចដោយគ្មានលិខិតអនុញ្ញាត ឬសាងសង់ខុសពីលិខិតអនុញ្ញាតត្រូវធ្វើការកែតម្រូវឲ្យត្រឹមត្រូវតាមច្បាប់កំណត់ ខណៈផុតរយៈពេលនេះរាល់ទោសទណ្ឌដែលបានបញ្ញត្តិនឹងត្រូវអនុវត្ត៕
