.jpg)
លោក ឃួង ស្រេង អភិបាលរាជធានីភ្នំពេញ ថ្លែងនាពេលកន្លងមក។ រូបថត រដ្ឋបាលរាជធានីភ្នំពេញ
ភ្នំពេញ៖ អភិបាលរាជធានីភ្នំពេញ លោក ឃួង ស្រេង សម្រេចធ្វើការពិន័យអន្តរការណ៍ចំពោះបុគ្គលដែលមិនគោរពដោយចេតនានូវវិធានការរដ្ឋបាល ក្នុងការទប់ស្កាត់ការឆ្លងរាលដាលជំងឺកូវីដ ១៩ និងជំងឺឆ្លងកាចសាហាវ ដែលមានចន្លោះពី ២ លានរៀល ទៅ ៥ លានរៀល។
យោងតាមសេចក្តីសម្រេចស្តីពីការពិន័យអន្តរការណ៍ចំពោះបុគ្គលដែលមិនគោរពដោយចេតនានូវវិធានការរដ្ឋបាលក្នុងការទប់ស្កាត់ការឆ្លងរាលដាលជំងឺកូវីដ ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ក្នុងភូមិសាស្ត្ររាជធានីភ្នំពេញ កាលពីថ្ងៃទី ១៨ មេសា លោក ឃួង ស្រេង បានកំណត់ទឹកប្រាក់ពិន័យអន្តរការណ៍ទៅតាមវិធានការរដ្ឋបាលនីមួយៗ។
ចំពោះបុគ្គលដែលមិនគោរពដោយចេតនានូវវិធានការរដ្ឋបាលដែលរាជរដ្ឋាភិបាល និងរដ្ឋបាលរាជធានីភ្នំពេញបានកំណត់ បុគ្គលដែលមិនគោរពដោយចេតនានូវវិធានការរឹតត្បិត ឬការហាមឃាត់ការធ្វើដំណើរ ត្រូវពិន័យ ២ លាន ៥ សែនរៀល និងបានកំណត់ពេលត្រូវបង់ក្នុងរយៈពេល ៣០ ថ្ងៃ។
បុគ្គលដែលមិនគោរពដោយចេតនានូវវិធានការរឹតត្បិត ឬការហាមឃាត់ការជួបជុំ ឬការប្រមូលផ្តុំមនុស្ស ត្រូវពិន័យ ២ លានរៀល។ បុគ្គលដែលមិនគោរពដោយចេតនានូវវិធានការហាមឃាត់សកម្មភាពការងារ មុខរបរ ឬអាជីវកម្ម ត្រូវផាក ៣ លានរៀល។ បុគ្គលមិនគោរពដោយចេតនានូវវិធានការរឹតត្បិត ឬការហាមឃាត់ការធ្វើចរាចរណ៍ចេញ-ចូលតំបន់ ឬទីកន្លែងដែលមានការឆ្លងរាលដាលជំងឺកូវីដ ១៩ ត្រូវពិន័យ ៣ លានរៀល។ បុគ្គលមិនគោរពដោយចេតនានូវវិធានការបម្រាមគោចរត្រូវពិន័យ ៣ លាន ៥ សែនរៀល។
បុគ្គលមិនគោរពដោយចេតនានូវវិធានការបិទខ្ទប់តំបន់ ឬទីកន្លែងដែលមានការឆ្លងរាលដាលជំងឺកូវីដ ១៩ ត្រូវបង់ពិន័យ ៤ លានរៀល។ បុគ្គលមិនគោរពដោយចេតនាវិធានការរិតត្បិត ឬការហាមឃាត់ការធ្វើពាណិជ្ជកម្មលើទំនិញដែលជាហានិភ័យត្រូវបង់ពិន័យ ៥ លានរៀល និងបុគ្គលមិនគោរពដោយចេតនានូវវិធានការរដ្ឋបាលផ្សេងទៀត ដែលមានភាពចាំបាច់ ដើម្បីឆ្លើយតបនិងការទប់ស្កាត់ការឆ្លងរាលដាលនៃជំងឺកូវី ១៩ ត្រូវបង់ពិន័យ ២ លាន ៥ សែនរៀល។
លោក ឃួង ស្រេង បញ្ជាក់ថា៖ «មន្ត្រីដែលមាននីតិសម្បទាជានគរបាលយុត្តិធម៌នៃរដ្ឋបាលរាជធានីភ្នំពេញ ត្រូវចេញបង្កាន់ដៃពិន័យអន្តរការណ៍ជូនបុគ្គលដែលមិនគោរពដោយចេតនាវិធានការរដ្ឋបាលខាងលើ ដើម្បីបង្គាប់ឲ្យបុគ្គលនោះ បង់ប្រាក់ពិន័យអន្តរការណ៍ទៅតាមកំហុសដែលខ្លួនបានប្រព្រឹត្តក្នុងរយៈពេល ៣០ ថ្ងៃ គិតចាប់ពីថ្ងៃបានទទួលបង្កាន់ដៃពិន័យអន្តរការណ៍»។
ចំណូលដែលប្រមូលបានពីការពិន័យចំពោះអំពើមិនគោរពដោយចេតនាវិធានការរដ្ឋបាល ត្រូវកត់ត្រាជាចំណូលរបស់រដ្ឋបាលរាជធានីភ្នំពេញ។
លោកអភិបាលក្រុងបញ្ជាក់ថា ក្នុងករណីបុគ្គលដែលមិនគោរពដោយចេតនានូវវិធានការរដ្ឋបាល ដោយពុំបានបង់ប្រាក់ពិន័យអន្តរការណ៍ក្នុងរយៈពេល ៣០ ថ្ងៃ មន្រ្តីដែលមាននីតិសម្បទាជានគរបាលយុត្តិធម៌នៃរដ្ឋបាលរាជធានីភ្នំពេញ ត្រូវកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់ជាធរមាន។
លោក ឃួង ស្រេង បន្តថា ក្រៅពីការរងនូវពិន័យអន្តរការណ៍នេះហើយ បុគ្គលល្មើសនឹងទទួលរងនូវការផ្តន្ទាទោសដាក់ពន្ធនាគារ និងទោសពិន័យជាប្រាក់បន្ថែមទៀត៕
