.jpg)
លោក ឆន ផល្លា (ស្តាំ) និងលោក នី សុខា ក្នុងសន្និសីទកាសែត នៅសមាគមអាដហុក នៅថ្ងៃទី១៦ខែកក្កដា ឆ្នាំ២០២០។ រូបថត សហការី
ភ្នំពេញ៖ លោក ឆន ផល្លា សកម្មជនការពារព្រៃឈើជនជាតិដើមភាគតិចបានអះអាងជាថ្មីទៀត នៅក្នុងសន្និសីទសារព័ត៌មានមួយនៅថ្ងៃទី ១៦ ខែកក្កដា ថា លោកត្រូវបានគេព្រួតវាយនៅក្នុងវេទិកាសាធាររណៈ ដែលរៀបចំឡើងដោយអាជ្ញាធរស្រុកលំផាត់ ហើយបានស្នើឱ្យមានការជួយអន្តរាគមន៍ពីលោកនាយករដ្ឋមន្ត្រី ហ៊ុន សែន ឱ្យជួយរកយុត្តិធម៌ ក្រោយពីអាជ្ញាធរនិងប៉ូលិសខេត្ត បានបដិសេធចំពោះការលើកឡើងនេះ។
លោក ឆន ផល្លា ដែលជាជនជាតិដើមភាគតិចទំពួន នៅភូមិសមុទ្រក្រោម ឃុំសេដា ស្រុកលំផាត់ នៅតែអះអាងថា លោកត្រូវបានគេវាយដំឱ្យមានស្នាមរបួសនិងគ្រាំពេញខ្លួន កាលពីថ្ងៃទី ៨ ខែកក្កដា នៅក្នុងវេទិកាជួបជុំ រវាងមន្ត្រី និងពលរដ្ឋដែលរៀបចំដោយរដ្ឋបាលស្រុកលំបាត់។
លោកបន្តថា ការវាយដំនេះ គឺកើតឡើងដោយសារមានការខឹងសម្បាររូបលោក ដែលបានដាក់ពាក្យប្ដឹងបរិហារមន្ត្រី និងពលរដ្ឋមួយចំនួនជាបន្តបន្ទាប់ អំពីការបណ្ដែតបណ្ដោយ និងឃុបឃិតគ្នា ដើម្បីកាប់បំផ្លាញព្រៃឈើ និងការទន្ទ្រានដីព្រៃខុសច្បាប់នៅក្នុងដែនជម្រកសត្វព្រៃលំផាត់ និងដីព្រៃសហគមន៍ជនជាតិដើមភាគតិច ដែលជាដីចម្ការវិលជុំ ដីលំនៅឋាន ដីបម្រុងទុក ដីព្រៃកប់សព និងដីអារក្សសម្រាប់សែនព្រេន។
លោក ផល្លា បញ្ជាក់ថា ការវាយដំលើរូបលោក គឺកើតឡើងនៅក្នុងវេទិកាដែលមានទាំងមន្ត្រី និងពលរដ្ឋបានឡើងនិយាយពីឈ្មោះរបស់លោកធ្វើជាប្រធានបទសំខាន់ និងនៅពេលដែលលោកឆ្លើយតបថា លោកប្ដឹងតែជនល្មើស ដែលទៅកាប់ទន្ទ្រានដីព្រៃ ដែលរដ្ឋហាមឃាត់ប៉ុណ្ណោះ។
លោក ផល្លា ចង់ឱ្យក្រសួងពាក់ព័ន្ធ ជាពិសេសលោកនាយករដ្ឋមន្ត្រីជួយរកយុត្តិធម៌ ដោយលោកថា លោកគឺជាពលរដ្ឋម្នាក់ ដែលអនុវត្តតាមប្រសាសន៍របស់លោក ហ៊ុន សែន ដែលស្នើឱ្យពលរដ្ឋចូលរួមការពារធនធានធម្មជាតិកុំឱ្យបាត់បង់។
លោកបញ្ជាក់ថា៖ «នៅពេលខ្ញុំឡើងឆ្លើយតបពេលហ្នឹង គឺស្រាប់តែមានគេមកវ៉ៃខ្ញុំតែម្ដង ហើយខ្ញុំក៏រត់ហើយគិតថា បើរត់ទៅផ្ទះក៏អត់រួចដែរ អ៊ីចឹងមានតែរត់មកកន្លែងអាជ្ញាធរទេ គឺខ្ញុំរត់ទៅកន្លែង នូ ថេរ (អភិបាលស្រុកលំផាត់) តែម្ដង»។
ការធ្វើសន្និសីទកាសែតរបស់លោក ឆន ផល្លា នេះ គឺធ្វើឡើងបន្ទាប់ពី លោក នូ ថេរ អភិបាលស្រុកលំផាត់ ចេញលិខិតបដិសេធថា លោក ឆន ផល្លា បាននិយាយខុសពីប្រធានបទ និងបានអុកឡុកបង្កការរំខានក្នុងវេទិកា ព្រមទាំងបានថតរូបបង្ហោះគ្មានការអនុញ្ញាត ទើបប្រជាពលរដ្ឋបាននាំគ្នាដកហូតទូរស័ព្ទមករក្សាទុក។
ស្នងការនគរបាលខេត្តរតនគិរី ក៏បានរាយការណ៍មកអគ្គស្នងការនគរបាលជាតិផងដែរថា លោក ផល្លា បានឡើងនិយាយក្នុងវេទិកាបរិហារកេរ្តិ៍ ចោទប្រកាន់ពលរដ្ឋ និងអាជ្ញាធរ ធ្វើឱ្យពលរដ្ឋខឹងសម្បាងើបតវ៉ា បង្កឱ្យមានភាពច្របូកច្របល់ក្នុងពិធី ហើយត្រូវអាជ្ញាធរឃាត់រារាំងដើម្បីរៀបចំសណ្ដាប់ធ្នាប់ឡើងវិញ។
លោក នី សុខា ប្រធានផ្នែកសិទ្ធិមនុស្ស ដីធ្លី នៃសមាគមអាដហុកបានថ្លែងថា ប្រសិនបើការប្រើប្រាស់អំពើហិង្សាទៅលើពលរដ្ឋជាសកម្មជនការពារព្រៃឈើ មិនត្រូវបានស៊ើបអង្កេត ដើម្បីស្វែងរកយុត្តិធម៌ទេនោះ នឹងធ្វើឱ្យពលរដ្ឋផ្សេងទៀត លែងហ៊ានចូលរួមការពារព្រៃឈើ។
លោកបញ្ជាក់ថា៖ «ខ្ញុំយល់ថា ពីនេះតទៅអ្នកការពារព្រៃឈើ និងការពារធនធានធម្មជាតិលែងហ៊ានចេញមុខការពារហើយ ព្រោះបើចេញការពារទៅគេធ្វើបាប ហើយគ្មានការរកឃើញខុសត្រូវឱ្យគាត់ អ៊ីចឹងវាគឺជារឿងជះឥទ្ធិពលមិនល្អទេ ហើយខ្ញុំគិតថា រដ្ឋាភិបាលនឹងមិនព្រងើយកន្ដើយទេ នៅក្នុងរឿងហ្នឹង»។
ប៉ុន្តែលោក ជិន ម៉ាលីន អ្នកនាំពាក្យក្រសួងយុត្តិធម៌ និងជាអ្នកនាំពាក្យគណៈកម្មាធិការជាតិសិទ្ធិមនុស្សកម្ពុជាបានថ្លែងថា តាមការបញ្ជាក់មកពីមន្ត្រីមូលដ្ឋាន គឺមិនមែនជាករណីប្រើអំពើហិង្សាអីទេ ប៉ុន្តែដោយសារប្រជាជនទប់កំហឹងមិនបាន ក៏បានកើតមានការវាយតប់ រវាងប្រជាជន និងប្រជាជនប៉ុណ្ណោះ។
លោកបញ្ជាក់ថា៖ «ប៉ុន្តែជាទិដ្ឋភាពច្បាប់ គឺគាត់ដែលអះអាងថា មានមូលដ្ឋានច្បាស់ថា គាត់ពិតជាទទួលរងការបំពានឬក៏រងនូវអំពើហិង្សា អាហ្នឹងគាត់អាចមានសិទ្ធិធ្វើការប្ដឹងផ្ដល់តាមផ្លូវច្បាប់បាន ដើម្បីដាក់ភ័ស្ដុតាង និងមូលដ្ឋានច្បាស់លាស់ថា មានបទល្មើសកើតឡើង ហើយការធ្វើសន្និសីទ អាហ្នឹងវាជារឿងទូទៅ និងជារឿងនយោបាយ ដែលក្រុមសកម្មជនទូទៅ តែងតែធ្វើ ដើម្បីកេងចំណេញផ្នែកនយោបាយ»៕
