ភ្នំពេញៈ អគ្គស្នងការរងនគរបាលជាតិលោកនាយឧត្តមសេនីយ៍ ឆៃ ស៊ីណារិទ្ធ បានលើកឡើងថា «ការស្រាវជ្រាវស៊ើបអង្កេតទៅលើបទល្មើសដែលពាក់ព័ន្ធទៅនឹងប្រព័ន្ធបច្ចេកវិទ្យាក្នុងយុគសម័យថ្មីនេះ មិនមែនជាការតស៊ូប្រយុទ្ធប្រឆាំងបែបសាមញ្ញពេកនោះទេ» ខណៈបច្ចេកវិទ្យាកំពុងរីកចម្រើនដែលទាមទារឲ្យមន្ត្រីអនុវត្តច្បាប់បង្កើនសមត្ថភាពឲ្យរឹតតែប្រសើរឡើង។
ការថ្លែងរបស់លោក ឆៃ ស៊ីណារិទ្ធ បែបនេះបានធ្វើឡើងនៅក្នុងពិធីបើកវគ្គបណ្ដុះបណ្ដាលស្ដីពី «នីតិវិធីនៃការស្រាវជ្រាវ និងបង្ក្រាបបទល្មើសបច្ចេកវិទ្យា» នៅក្រសួងមហាផ្ទៃកាលពីថ្ងៃចន្ទក្រោមកិច្ចសហប្រតិបត្តិការរួមគ្នារវាងនគរបាលនៃនាយកដ្ឋានប្រឆាំងបទល្មើសបច្ចេកវិទ្យាកម្ពុជា និងនគរបាលសិង្ហបុរី ។
នៅចំពោះមុខសិក្ខាកាមចំនួន ៨០ នាក់ ដែលសុទ្ធសឹងជាមន្ត្រីនគរបាលជំនាញមកពីនាយកដ្ឋានប្រឆាំងបទល្មើសបច្ចេកវិទ្យា និងនាយកដ្ឋានប្រឆាំងបទល្មើសល្បែងពាណិជ្ជកម្មនៃអគ្គស្នងការដ្ឋាននគរបាលជាតិ លោក ស៊ីណារិទ្ធ បានថ្លែងថា បច្ចេកវិទ្យាជាអ្នកផ្លាស់ប្តូរជីវិតមនុស្ស និងសង្គមនៅគ្រប់ទីកន្លែងលើពិភពលោក។ អ៊ីនធឺណិតទៀតសោតក៏ជាផ្នែកដ៏សំខាន់ចាំបាច់នៅក្នុងជីវភាពរស់នៅប្រចាំថ្ងៃដែលអាចចាត់ទុកជាបេះដូងនៃអារ្យធម៌សម័យថ្មីផងដែរ។ ចំណែកការសិក្សា ស្រាវជ្រាវ ស៊ើបអង្កេតទៅលើបទល្មើសដែលពាក់ព័ន្ធទៅនឹងប្រព័ន្ធបច្ចេកវិទ្យាក្នុងយុគសម័យថ្មីនេះមិនមែនជាការតស៊ូប្រយុទ្ធប្រឆាំងបែប «សាមញ្ញពេក» នោះទេ។
លោកបានបញ្ជាក់ថា៖ «បច្ចេកវិទ្យាកាន់តែរីកចម្រើន ការប្រយុទ្ធប្រឆាំងទៅនឹងបទលើ្មសបច្ចេកវិទ្យាកាន់តែមានភាពស្មុគស្មាញស៊ីជម្រៅដែលទាមទារឲ្យមន្ត្រីអនុវត្តច្បាប់ត្រូវតែខិតខំប្រឹងប្រែងបង្កើនសមត្ថភាពយល់ដឹងឲ្យកាន់តែប្រសើរឡើងជាលំដាប់»។
ទាក់ទងនឹងបញ្ហានេះដែរលោក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យាបានប្រាប់ភ្នំពេញប៉ុស្តិ៍ពីម្សិលមិញថា វគ្គបណ្ដុះបណ្ដាលនេះមានរយៈពេល ៥ ថ្ងៃ (ពីថ្ងៃ ២៤-២៨ កុម្ភៈ) ដោយផ្ដោតសំខាន់លើនីតិវិធីនៃការស្រាវជ្រាវ ស៊ើបអង្កេតស្វែងរកវត្ថុតាងនានាពាក់ព័ន្ធនឹងបទល្មើសបច្ចេកវិទ្យាដើម្បីឲ្យមន្ត្រីនគរបាលជំនាញយកទៅពង្រឹងសមត្ថភាពក្នុងក្របខ័ណ្ឌការងាររបស់ខ្លួន ប្រកបដោយប្រសិទ្ធភាពខ្ពស់ ហើយនេះគឺជាវគ្គបណ្ដុះបណ្ដាលដំបូងសម្រាប់ឆ្នាំនេះ។
លោក ពៅ បានបញ្ជាក់ថា៖ «តាមរយៈគ្រូឧទ្ទេសនាមដ៏មានបទពិសោធក្នុងការស្រាវជ្រាវ និងបង្ក្រាបបទល្មើសបច្ចេកវិទ្យាមកពីប្រទេស សិង្ហបុរី យើងសង្ឃឹមថា មន្ត្រីនគរបាលជំនាញរបស់យើងនឹងខិតខំក្រេបយកបទពិសោធ និង ចំណេះដឹងថ្មីៗបន្ថែមទៀតស្ដីពីការវិវឌ្ឍនៃប្រព័ន្ធបច្ចេកវិទ្យាដើម្បីយកទៅពង្រឹងសមត្ថភាពផ្ទាល់ខ្លួនក្នុងការងារស្រាវជ្រាវស៊ើបអង្កេតបទល្មើសដែលពាក់ព័ន្ធបច្ចេកវិទ្យាប្រកបដោយប្រសិទ្ធភាពខ្ពស់»។
លោក ពៅ បានឲ្យដឹងដែរថា សម្រាប់ថ្ងៃដំបូងនៃវគ្គនេះ គ្រូឧទ្ទេសនាមមកពីប្រទេសសិង្ហបុរីបានលើកយកបទពិសោធរបស់គាត់ទាក់ទងនឹងការស្រាវជ្រាវ និងបង្ក្រាបបទល្មើសបច្ចេកវិទ្យាក្នុងប្រទេសសិង្ហបុរីមកចែករំលែកដល់សិក្ខាកាមហើយនៅថ្ងៃបន្ទាប់ សិក្ខាកាមទាំងអស់នឹងរៀនអំពីនីតិវិធីស្រាវជ្រាវស្ដីពីដំណើរការគ្រប់គ្រង និងចរន្តប្រើប្រាស់រូបិយប័ណ្ណតាមប្រព័ន្ធអេឡិចត្រូនិក (Crypto currency), បច្ចេកទេសនៃការឆបោកតាមបណ្តាញសង្គម ការស៊ើបអង្កេតបទល្មើសតាមប្រព័ន្ធអ៊ីនធឺណិត,ការស្រាវជ្រាវ និងស៊ើបអង្កេតរកភ័ស្តុតាងនៅក្នុងឧបករណ៍អេឡិចត្រូនិក និងការអនុវត្តជាក់ស្តែង៕