The Phnom Penh Post Search

Search form




Logo of Phnom Penh Post newspaper Phnom Penh Post - លោក​ ជា មុន្នី ​ត្រូវការ​លុយ​ដើម្បី​ធ្វើ​សមាជ​រើស​ប្រធាន​ថ្មី

លោក​ ជា មុន្នី ​ត្រូវការ​លុយ​ដើម្បី​ធ្វើ​សមាជ​រើស​ប្រធាន​ថ្មី

លោក ជា មុន្នី ក្នុង​ពិធី​រំឭក​ខួប​កន្លង​មក​។
លោក ជា មុន្នី ក្នុង​ពិធី​រំឭក​ខួប​កន្លង​មក​។ ម៉ៃ វីរៈ

លោក​ ជា មុន្នី ​ត្រូវការ​លុយ​ដើម្បី​ធ្វើ​សមាជ​រើស​ប្រធាន​ថ្មី

ភ្នំពេញៈ លោក​ ជា មុន្នី ប្រធាន​សហជីព​សេរី​កម្មករ​ដែល​កម្មករ​ស្ទើរ​ទូទាំង​ប្រទេស​បាន​ស្គាល់​បាន​និយាយ​កាលពី​ថ្ងៃ​ចន្ទ​ម្សិលមិញ​ថា​លោក​កំពុង​ស្វះស្វែង​រក​ថវិកា​ដើម្បី​ប្រារព្ធ​ពិធី​សមាជ​ជ្រើសរើស​ថ្នាក់​ដឹកនាំ​ថ្មី​របស់​សហជីព​មួយ​នេះ​ដែល​យ៉ាង​ហោច​ណាស់​ក៏​ចំនួន​ ៦ ​ពាន់​ដុល្លារ​អាមេរិក​ខណៈ​ពេល​ដែល​សមាជិក​របស់​លោក​មិន​ចង់​ឲ្យ​មាន​ផ្លាស់ប្តូរ​ប្រធាន​ថ្មី​។

លោក​ ជា មុន្នី ថ្លែង​ថា៖ «កាលពី​ដើម​ខែ​សីហា​យើង​បាន​​ធ្វើការ​ប្រជុំ​ផ្ទៃក្នុង​ដើម្បី​ធ្វើការ​ពិភាក្សា​ស្វែងរក​ថវិកា​ដើម្បី​ធ្វើ​សមាជ និង​បាន​ធ្វើការ​កែប្រែ​លក្ខន្តិកៈ​មួយ​ចំនួន​ផង​ដែរ​ប៉ុន្តែ​យើង​ត្រូវ​ធ្វើការ​ប្រជុំ​ម្តង​ទៀត​ដើម្បី​​ជជែក​លើ​បញ្ហា​នេះ​ប៉ុន្តែ​ចំពោះ​ថា​តើ​ថ្ងៃ​ណា​សមាជ​របស់​យើង​នឹង​ប្រព្រឹត្ត​ទៅ​នោះ​គឺ​ខ្ញុំ​មិន​ទាន់​ដឹង​ទេ​អាស្រ័យ​លើ​ថវិកា​ដែល​យើង​មាន​គ្រប់គ្រាន់។ បើ​មាន​លុយ​យើង​អាច​ធ្វើ​ស្អែក​ក៏​បាន​ដែរ»។

ទាក់ទង​នឹង​ថវិកា​នេះ​លោក​ ជា មុន្នី បាន​ឲ្យ​ដឹង​ថា​វា​ទាក់ទង​នឹង​​វិភាគទាន​ពី​កម្មករ និង​សមាជិក​របស់​សហជីព​ហើយ​វិភាគទាន​សម្រាប់​ឆ្នាំ​នេះ​មាន​ការ​ថយចុះ​រហូត​ដល់​ ៣០ ​ភាគរយ​បើ​ធៀប​នឹង​ឆ្នាំ​មុនៗ​ដោយសារ​តែ​មាន​រោងចក្រ​មួយ​ចំនួន​បាន​បិទ​ទ្វារ និង​កម្មករ​មួយ​ចំនួន​ដែល​មាន​វ័យ​ចំណាស់​ និង​ធ្លាប់​បាន​ចូល​ជា​វិភាគទាន​​បាន​ឈប់​ជា​បន្តបន្ទាប់។

លោក​ថា៖ «ពេលវេលា​ក្នុង​ការ​ធ្វើ​សមាជ​ក្នុង​ការ​ជ្រើសរើស​ប្រធាន​ថ្មី​វា​មិន​សំខាន់​ទេ​សំខាន់​គឺ​យើង​មិន​ទាន់​​មាន​ថវិកា​ក្នុង​ការ​ធ្វើ​ដែល​ថវិកា​ក្នុង​ការ​ធ្វើ​សមាជ​យ៉ាង​ហោច​ណាស់​ចំនួន​ ៦០០០ ​ដុល្លារ​​។ មាន​លុយ​ថ្ងៃ​ណា​យើង​ធ្វើ​​ថ្ងៃ​នោះ​ក៏​បាន​ដែរ។ ចំពោះ​ជំនួយ​ពី​ក្រៅ​ប្រទេស និង​ពី​សប្បុរសជន​ផ្សេងៗ​នោះ​យើង​មិន​ទទួល​យក​តាំងពី​ឆ្នាំ​ ២០០៧ ​​មក​ម្ល៉េះ​ដោយសារ​យើង​គិត​ថា​យើង​មាន​លទ្ធភាព​ក្នុង​ការ​ជួយ​ខ្លួនឯង»។

ប្រធាន​សហជីព​ដែល​មិន​ចេះ​រណប​បុគ្គល​ណា​ម្នាក់​នោះ​បាន​បញ្ជាក់​យ៉ាង​ច្បាស់​ថា​ទោះបី​ជា​កម្មករ ឬ​សមាជិក​របស់​លោក​មិន​ព្រម​ឲ្យ​លោក​លា​ចេញ​ក៏​ដោយ ក៏​លោក​ដាច់ខាត​លោក​ត្រូវ​តែ​ចេញ​ព្រោះ​លោក​បាន​ធ្វើ​ខុស​ពី​លក្ខន្តិក​របស់​សហជីព​ដែល​​ចែង​ថា​ថ្នាក់​ដឹកនាំ​មាន​តែ​ពីរ​អាណត្តិ​ដែល​មាន​តែ​ ៦ ​ឆ្នាំ​ទេ​តែ​សម្រាប់​លោក​បាន​ធ្វើ​រហូត​ដល់​​ ១១ ​ឆ្នាំ​មក​ដល់​ពេល​នេះ​ដោយសារ​តែ​មាន​ការ​ស្នើសុំ​ពី​កម្មករ​ប៉ុន្តែ​លើក​នេះ​លោក​មិន​អាច​បន្ត​ទៅ​ទៀត​បាន​ទេ។

លោក​ ជា មុន្នី ធ្លាប់​បាន​ប្រកាស​ពី​ការ​លា​ចេញ​ពី​ប្រធាន​សហជីព​សេរីកម្មករ​នេះ​នៅ​ចំពោះ​មុខ​ថ្នាក់ដឹកនាំ​កម្មករ​ជាង​ ១០០ ​នាក់​​មកពី​ប្រមាណ​ជា​ ៦០ ​រោងចក្រ​កាលពី​ខែ​កក្កដា​ថា​ដល់​ពេល​ដែល​លោក​ត្រូវ​ចូល​និវត្តន៍​ហើយ​ ហើយ​នៅពេល​ដែល​លោក​ឈប់​ធ្វើ​ជា​មេដឹកនាំ​សហជីព​សេរីកម្មករ​លោក​នឹង​ធ្វើ​ជា​ទីប្រឹក្សា​សម្រាប់​កម្មករ និង​សហជីព​ដែល​នៅ​ត្រូវការ​លោក​ជួយ​ហើយ​​លោក​ក៏​នឹង​ចូលរួម​ក្នុង​ចលនា​សង្គម​ផ្សេងៗ​តាមរយៈ​គណបក្ស​សង្គ្រោះជាតិ និង​សង្គមស៊ីវិល​ដើម្បី​ជួយ​ដល់​ការ​អភិឌ្ឍ​សង្គម។

លោក​ ទិត្យ ផាត ប្រធាន​សហជីព​សេរី​កម្មករ​ប្រចាំ​រោងចក្រ Chung Fai Knitwear factory ហាក់​មិន​ចង់​ឲ្យ​លោក​ ជា មុន្នី ​ចាកចេញ​ពី​តំណែង​ជា​ប្រធាន​សហជីព​នេះ​ឡើយ។

លោក​បាន​ថ្លែង​ថា៖ «តាម​ចិត្ត​ខ្ញុំ ខ្ញុំ​ពិតជា​មិន​ចង់​ឲ្យ​គាត់​ដូរ​ចេញ​ទេ​ព្រោះ​យើង​មិន​ដឹង​ថា​តើ​អ្នក​ដឹកនាំ​ថ្មី​អាច​មាន​សមត្ថភាព​​ដូច​គាត់​ឬ​អត់? គាត់​ជា​មនុស្ស​ដែល​តែងតែ​ជួយ​ដល់​កម្មករ​គិត​ប្រយោជន៍​កម្មករ​ជាង​ប្រយោជន៍​ខ្លួន»។

លោក​ ផាត ថា លោក​នៅ​តែ​ស្រឡាញ់ និង​គាំទ្រ​សហជីព​សេរីកម្មករ​រហូត​បើ​ទោះ​ជា​មាន​ការ​ផ្លាស់ប្តូរ​មេដឹកនាំ​ក៏ដោយ​៕

អត្ថបទគួរចាប់អារម្មណ៍