កំពង់ស្ពឺ: ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) លោក ជា ហ៊ាន បានចូលបំភ្លឺនៅសាលាដំបូងខេត្តកំពង់ស្ពឺកាលពីម្សិលមិញក្នុងនាមដើមបណ្ដឹង បន្ទាប់ពីលោកប្ដឹងមនុស្ស ៥ នាក់ ករណីឈូសឆាយដីដែនជម្រកសត្វព្រៃភ្នំឱរ៉ាល់ជាង ៤០០ ហិកតានៅភូមិស្រែកិន ឃុំត្រពាំងជោរ ស្រុកឱរ៉ាល់ ។
លោក ជា ហ៊ាន ប្រធានអង្គការ ACNCIPO បានប្រាប់ភ្នំពេញប៉ុស្ដិ៍ពីម្សិលមិញថា លោកបានចូលទៅបំភ្លឺនៅសាលាដំបូងខេត្តកំពង់ស្ពឺរួចរាល់ហើយនៅថ្ងៃទី ២៨ ខែកក្កដា តាមដីកាកោះរបស់លោក ខៃ សម្ផស្ស ព្រះរាជអាជ្ញារងអមសាលាដំបូងខេត្តកំពង់ស្ពឺ។ លោកបានចោទប្រកាន់ជនសង្ស័យចំនួន ៥ នាក់ ក្នុងនោះមានមេភូមិស្រែកិនម្នាក់ពាក់ព័ន្ធនឹងការកាប់រុករានដីព្រៃចំនួនជាង ៤០០ ហិកតា ស្ថិតនៅទីតាំងខាងលើចាប់ពីដើមឆ្នាំនេះ។
លោកបន្តថា ក្រុមជនសង្ស័យបាននាំគ្នាញុះញង់ពលរដ្ឋចំនួន ៣៨ គ្រួសារផ្សេងទៀតឲ្យសហការជាមួយខ្លួន ដើម្បីប្រើប្រាស់គ្រឿងចក្រចូលទៅកាប់ទន្ទ្រានរុករានយកដីព្រៃទាំងនេះ ដោយធ្វើរបងព័ទ្ធដី ហើយលក់ទៅឲ្យក្រុមឈ្មួញ ១ ក្រុមទៀត។ ករណីនេះលោកមេឃុំមិនហ៊ានចេញលិខិតបញ្ជាក់កម្មសិទ្ធិដីនោះឲ្យទៅក្រុមឈ្មួញទេ ប៉ុន្ដែពួកគេបានបញ្ចុះបញ្ចូល និងបង្ខំឲ្យមេឃុំទទួលស្គាល់លិខិតទិញ-លក់ដីនេះ។
លោក ជា ហ៊ាន បញ្ជាក់ថា៖ «ខ្ញុំដាក់ប្ដឹងពួកគាត់ទាំង ៥ នាក់ហ្នឹងហើយ គឺចោទពីបទប៉ុនប៉ងនៃបទឧក្រិដ្ឋរារាំងមន្ត្រីជំនាញក្នុងពេលបំពេញបេសកកម្ម និងឈូសឆាយទន្ទ្រានដីព្រៃដោយខុសច្បាប់ និងទាមទារសំណងនៃជំងឺចិត្ត ១០០ លានរៀល និងសុំឲ្យផ្តន្ទាទោសតាមច្បាប់លើបុគ្គលទាំង ៥ នាក់នេះ»។
លោក ខៃ សម្ផស្ស ព្រះរាជអាជ្ញារងសាលាដំបូងខេត្តកំពង់ស្ពឺពីម្សិលមិញបានបដិសេធធ្វើអត្ថាធិប្បាយជុំវិញករណីនេះ ដោយអះអាងថា លោកមិនមែនជាអ្នកឆ្លើយឆ្លងព័ត៌មានជាមួយអ្នកកាសែតទេ។
លោក អ៊ឹម សន មេភូមិស្រែកិនដែលជាចុងចោទក្នុងសំណុំរឿងនេះបានអះអាងពីម្សិលមិញថា លោកក៏ត្រូវបានសាលាដំបូងកោះហៅឲ្យចូលបំភ្លឺនៅថ្ងៃទី ២៩ ខែកក្កដានេះដែរ។ លោកគ្រោងចូលបំភ្លឺតាមដីកាកោះនេះ ប៉ុន្ដែលោកថា ការចោទរូបលោកមិនមានមូលដ្ឋានច្បាស់លាស់ និងគ្មានភ័ស្តុតាងត្រឹមត្រូវទេ។
លោកថា៖ «ខ្ញុំមិនបានទៅពាក់ព័ន្ធអ្វីនឹងដីនៅតំបន់ហ្នឹងទេ ហើយការចោទប្រកាន់ខ្ញុំនេះ គឺមិនមែនជាការពិតទេ។ ខ្ញុំសុខចិត្តទទួលទោសតាមច្បាប់ បើខ្ញុំពាក់ព័ន្ធនឹងដីហ្នឹងមែន ហើយឲ្យ ជា ហ៊ាន ប្ដឹងខ្ញុំទៅ ខ្ញុំមិនខ្លាចនឹងចូលបំភ្លឺនៅតុលាការទេ ព្រោះខ្ញុំមិនដឹងរឿងហ្នឹង។ ខ្ញុំមិនបានពឹងពាក់មេធាវីឲ្យជួយការពារក្ដីទេ»។
លោក ទេព ណែម មេឃុំត្រពាំងជោរប្រាប់ពីម្សិលមិញថា ដីដែនជម្រកសត្វព្រៃភ្នំឱរ៉ាល់ពិតជាមានការរំលោភពីសំណាក់ពលរដ្ឋមួយក្រុមតូចមែន ប៉ុន្ដែលោកមិនបានយល់ព្រមចុះបញ្ជីទទួលស្គាល់ធ្វើជាកម្មសិទ្ធិស្របច្បាប់ទេ។
លោកថា៖ «ខ្ញុំបានទទួលដំណឹងពីពលរដ្ឋមកថា មេភូមិ អ៊ឹម សន អ្នកជំរុញឲ្យពលរដ្ឋទៅរំលោភយកដីហ្នឹង ហើយខ្ញុំបានប្រាប់គាត់ច្រើនលើកហើយ កុំទៅប៉ះពាល់ដីហ្នឹង ដីរបស់រដ្ឋទេ។
បើគាត់នៅតែមិនស្ដាប់តាមខ្ញុំ ខ្ញុំក៏អត់មានយោបល់អ្វីដែរ។ ខ្ញុំទុកឲ្យតុលាការគាត់ចាត់ចែងតាមនីតិវិធីរបស់គាត់ទៅ»។
តាមពាក្យបណ្ដឹងរបស់លោក ជា ហ៊ាន ចុះថ្ងៃទី ១៥ មិថុនា ដែលប្ដឹងទៅសាលាដំបូងខេត្តកំពង់ស្ពឺនោះគឺលោកប្តឹងឈ្មោះ សឿន ណាក់ ភេទប្រុស អាយុ ៣៧ ឆ្នាំឈ្មោះ មក ម៉ាន ឈ្មោះ មក ម៉េត ឈ្មោះ ខៀវ សារឿន និងឈ្មោះ អ៊ឹម សន មេភូមិស្រែកិន។ ពួកគេរស់នៅភូមិស្រែកិន ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ។ ពួកគេរងការប្តឹងពីបទប៉ុនប៉ងនៃបទឧក្រិដ្ឋ [ឈូសឆាយដីព្រៃខុសច្បាប់ និងរារាំងមន្ត្រីជំនាញក្នុងការអនុវត្តច្បាប់]៕