.jpg)
សកម្មភាពរំលោភយកដីដែនជម្រកសត្វព្រៃ។ រូបថត ជា ហ៊ាន
កំពង់ស្ពឺ: លោក ជា ហ៊ាន ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) បានធ្វើលិខិតស្នើទៅមន្ទីរបរិស្ថានខេត្តកំពង់ស្ពឺសុំចុះកំណត់លេខយាមការដីដែនជម្រកសត្វព្រៃភ្នំឱរ៉ាល់នៅឃុំត្រពាំងជោរ និងឃុំតាសាល ស្រុកឱរ៉ាល់ ខេត្ដកំពង់ស្ពឺ ក្រោយពីសង្កេតឃើញដីរាប់រយហិកតាត្រូវបានគេរំលោភយក។
លោក ជា ហ៊ាន ដាក់លិខិតជូនទៅលោក ឯម សុគន្ធ ប្រធានមន្ទីរបរិស្ថានខេត្តកំពង់ស្ពឺចុះថ្ងៃទី ៨ ខែមិថុនា បានស្នើសុំដល់លោកប្រធានមន្ទីរឲ្យចាត់មន្ត្រីរបស់មន្ទីរបរិស្ថានសហការជាមួយនាយកដែនជម្រកសត្វព្រៃភ្នំឱរ៉ាល់ និងអង្គការរបស់លោក ដើម្បីចុះកំណត់យាមការដី ទប់ស្កាត់ការចាប់រានទន្ទ្រានដីព្រៃនៅភូមិស្រែកិន ភូមិពោធិ៍មាស ឃុំត្រពាំងជោរ និងភូមិដូង ឃុំតាសាល ស្រុកឱរ៉ាល់ ខេត្តកំពង់ស្ពឺ ដើម្បីដកហូតទុកជាសម្បត្តិរដ្ឋវិញ។
លិខិតដដែលថា កន្លងមកអង្គការបានចុះសង្កេតនៅទីតាំងដីដែលស្ថិតនៅទីតាំងខាងលើនេះមានក្រុមមេខ្យល់បានរៀបចំពលរដ្ឋជាក្រុមចាប់ទន្ទ្រានដីព្រៃនៅតំបន់នោះ ដែលជាតំបន់ដែនជម្រកសត្វព្រៃភ្នំឱរ៉ាល់ ដើម្បីកាប់ព្រៃឈើរុករានទន្ទ្រានចូលកាន់កាប់ដីរដ្ឋដោយខុសច្បាប់។ អង្គការ ACNCIPO បានពិនិត្យឃើញថា ដីតំបន់ដែនជម្រកសត្វព្រៃភ្នំឱរ៉ាល់ ការពារដោយព្រះរាជក្រឹត្យ ត្រូវបានក្រុមអនាធិបតេយ្យតែងតែឆ្លៀតឱកាសប្រើប្រាស់ពលរដ្ឋជាអ្នកចាប់ដីព្រៃតំបន់ការពារលក់យ៉ាងអនាធិបតេយ្យ។
លោក ជា ហ៊ាន បានប្រាប់ភ្នំពេញប៉ុស្ដិ៍ថា ដីព្រៃនៅឃុំត្រពាំងជោរ និងឃុំតាសាល ស្រុកឱរ៉ាល់ ខេត្ដកំពង់ស្ពឺចំនួន ៦៣ ហិកតា ត្រូវបានគេប្រកាសដាក់លក់ ហើយរាប់រយហិកតាទៀតកំពុងរងការឈូសឆាយ និងរំលោភបំពាន។ ដីទាំងនេះគឺជាដីដែនជម្រកសត្វព្រៃភ្នំឱរ៉ាល់ដែលការពារដោយព្រះរាជក្រឹត្យ ប៉ុន្ដែមួយរយៈចុងក្រោយនេះត្រូវបានឈ្មួញ និងពលរដ្ឋខិលខូចនាំគ្នាមកចាប់កាប់ទន្ទ្រានធ្វើជាកម្មសិទ្ធិផ្ទាល់ខ្លួនដោយខុសច្បាប់។
លោកបញ្ជាក់ថា៖ «ខ្ញុំនឹងសហការជាមួយមន្ត្រីជំនាញនៃមន្ទីរបរិស្ថានខេត្តកំពង់ស្ពឺ និងនាយកដែនជម្រកសត្វព្រៃភ្នំឱរ៉ាល់ ដើម្បីចុះកំណត់យាមការ បើរកឃើញមានភាពមិនប្រក្រតីមែន ខ្ញុំនឹងជំរុញឲ្យមានការដកហូតទុកជាសម្បត្តិរដ្ឋវិញ។ ចំណែកទីតាំងដែលពួកគាត់បានឈូសឆាយរួចរាល់ ខ្ញុំនឹងកសាងសំណុំរឿងបញ្ជូនទៅតុលាការចាត់ការតាមច្បាប់»។ «ដូច្នេះលោកប្រធានមន្ទីរបរិស្ថានខេត្តកំពង់ស្ពឺ គួរពិនិត្យ និងសម្រេចចាត់តាំងមន្ត្រីជំនាញរបស់មន្ទីរ សហការជាមួយនាយកដែនជម្រកសត្វព្រៃភ្នំឱរ៉ាល់ និងអង្គការចុះទប់ស្កាត់ការកាប់រុករានទន្ទ្រានដីព្រៃ ដើម្បីមានមូលដ្ឋានដកហូតដីព្រៃមកទុកជាសម្បត្តិរដ្ឋវិញ»។
លោក ឯម សុគន្ធ មិនអាចទាក់ទងសុំការបញ្ជាក់បានទេកាលពីម្សិលមិញ។ ប៉ុន្ដែលោក ហ៊ុល ម៉ារ៉ា នាយកដែនជម្រកសត្វព្រៃភ្នំឱរ៉ាល់បានថ្លែងថា លោកបានទទួលសំណើរបស់លោក ជា ហ៊ាន នេះហើយដោយលោក ឯម សុគន្ធ ប្រធានមន្ទីរបរិស្ថានខេត្តកំពង់ស្ពឺបានយល់ព្រមឲ្យលោកចុះទៅសហការជាមួយអង្គការ និងមន្ត្រីមូលដ្ឋានស្រុកឱរ៉ាល់ ដើម្បីចុះទប់ស្កាត់ និងវាស់វែងដីនៅតំបន់នោះ។
លោកបានថ្លែងថា៖ «លោកប្រធានមន្ទីរបានយល់ព្រមហើយ គាត់បានអនុញ្ញាតឲ្យខ្ញុំ និងមន្ត្រីជំនាញយើងមួយចំនួនទៀតចុះទៅធ្វើការងារនៅចុងសប្ដាហ៍នេះតែម្ដង ដើម្បីទប់ស្កាត់ការកាប់ទន្ទ្រានដីព្រៃនេះ។ ខ្ញុំមិនទាន់ដឹងទំហំដីពិតប្រាកដទេ ប្រហែលជាត្រូវវាស់វែងហើយ ទើបអាចដឹងច្បាស់»។
លោក ទេព ណែម មេឃុំត្រពាំងជោ មិនទាន់អាចទាក់ទងសុំការបញ្ជាក់បានទេកាលពីម្សិលមិញ៕
