.jpg)
លោកញឹក ប៊ុនឆៃ អង្គុយជាមួយសហការីនៅមុខផ្ទះនៅព្រឹកមិញ។ រូបថត Fresh News
ភ្នំពេញៈ ក្រោយពីទទួលបានការដោះលែងឲ្យនៅក្រៅឃុំ លោក ញឹក ប៊ុនឆៃ ត្រូវការពេលវេលាមួយរយៈដើម្បីសម្រាកព្យាបាលជំងឺ មុនពេលសម្រេចចិត្តដឹកនាំគណបក្សនយោបាយឡើងវិញ ដើម្បីចូលរួមការបោះឆ្នោតជ្រើសតាំងតំណាងរាស្ត្រ នៅថ្ងៃទី ២៩ ខែកក្កដានេះ។
លោក សិង្ហ គីរី ដែលឡើងជាប្រធានគណបក្សខ្មែររួមរួបជាតិក្រោយពេលដែលលោក ញឹក ប៊ុនឆៃ ត្រូវបានជាប់ឃុំ បានប្រាប់ភ្នំពេញ ប៉ុស្តិ៍នៅព្រឹកនេះថា៖ «លោក ញឹក ប៊ុនឆៃនឹងវិលត្រឡប់ទៅធ្វើជាប្រធានគណបក្សខ្មែររួមរួបជាតិវិញ។ នេះគ្រាន់តែជាការគ្រោងទុកទេ។ តែដោយសារសុខភាពគាត់។ យើងមិនទាន់កំណត់ថ្ងៃណាគាត់ចូលធ្វើប្រធានទេ។ គាត់ត្រូវការការព្យាបាលសុខភាពសិន និងសម្រាកអារម្មណ៍របស់គាត់ឲ្យវាល្អសិន ហើយការរៀបចំសមាជនិងសេចក្តីសម្រេចដើម្បីឲ្យគាត់ធ្វើជាប្រធានវិញនោះមិនទាន់បានកំណត់ថ្ងៃទេ»។
លោក គីរី បានថ្លែងបន្តថា៖«វាអាស្រ័យទៅលើសុខភាពគាត់សិន។ ប្រសិនបើគាត់អាចទទួលយកបាន គាត់នឹងទទួល តែប្រសិនបើសុខភាពគាត់មិនអាចទទួលយកបានទេ។ គាត់នៅជាថ្នាក់ដឹកនាំមួយនៅក្នុងបក្សដែរ»។
លោក ញឹក ប៊ុនឆៃ អតីតប្រធានគណបក្សខ្មែររួបរួមជាតិ ត្រូវបានសមត្ថកិច្ចឃាត់ខ្លួន កាលពីខែសីហា ឆ្នាំ ២០១៧ ពាក់ព័ន្ធករណីផលិតគ្រឿងញៀន កាលពីឆ្នាំ២០០៧។
លោកត្រូវបានចោទប្រកាន់ពីបទ សមគំនិត ផលិតគ្រឿងញៀន និងនាំចូលសារធាតុសម្រាប់ផ្សំគ្រឿងញៀន ប្រព្រឹត្តនៅក្នុងឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ កាលពីខែមេសា ឆ្នាំ ២០០៧៕
